“Azərbaycanın işğal olunmuş ərazilərində Ermənistanın bütün hüquqazidd addımları onun təcavüzkar siyasətini göstərir”

“The Jerusalem Post” qəzetinin yazdığına görə, İsrailin “Israel Aerospace Industries” konserni bərk yanacaqla işləyən birpilləli LORA (“Long-Range Artillery Weapon System”) operativ-taktiki raket kompleksinin (ОTRK) sınaqlarının uğurla başa çatması barədə rəsmi məlumat verib.

Xarici KİV-lər böyük həsəd və kin hissi ilə bildirirlər ki, Azərbaycan İsrailin həmin raket komplekslərini göndərdiyi ilk və yeganə ölkədir. Qeyd etmək lazımdır ki, Azərbaycan Ordusu hələ iki il bundan əvvəl LORA OTRK ilə təchiz olunub.

AZƏRTAC xəbər verir ki, Bakı Beynəlxalq Multikulturalizm Mərkəzinin İsraildəki Nümayəndəliyinin rəhbəri, beynəlxalq münasibətlər sahəsində tanınmış israilli ekspert Arye Qutun İsraildə çıxan nüfuzlu ingilisdilli “The Jerusalem Post” qəzetində dərc olunmuş “İsrail – Azərbaycan: sarsılmaz strateji tərəfdaşlıq” sərlövhəli məqaləsi bu mövzuya həsr edilib (https:// www.jpost.com/opinion / israel-and - azerbaijan-an - unbreakable-strategic - partnership-631367).

Xarici KİV-lər yazırlar: “Yeni raketlər bir qədər fərqli xarakteristikalara malikdir, lakin şirkət öz raketlərini “səhra şəraitində” sınaqdan keçirmək istəməyibmi, bəlkə elə buna görə hələ yoxlanılmamış ölümsaçan silahları Ermənistanla döyüşən respublikaya göndərməyi qərara alıb?”

Arye Qut qeyd edir ki, əgər Azərbaycan İsrailin bu raketləri göndərdiyi ilk və yeganə ölkədirsə, bu fakt İsraildəki qüvvələrə həqiqi və real cavabdır ki, İsrail-Azərbaycan münasibətləri strateji tərəfdaşlıq xarakteri daşıyır, dövlətlərarası siyasi və hərbi-texniki tərəfdaşlıq etimadın və daimi dialoqun ən yüksək səviyyəsinə dəlalət edir.

Arye Qut öz məqaləsində yazır: “Bu tərəfdaşlıq əvvəllər energetika sahəsinə yönəlmişdi, indi isə tərəfdaşlıq iqtisadiyyatın digər sektorlarına da, o cümlədən kənd təsərrüfatı, yüksək texnologiyalar sənayesi, səhiyyə, hərbi-texniki tərəfdaşlıq sahələrinə də şaxələndirilib. İsrailin müdafiə şirkətləri Azərbaycan hərbi sənayesinin qurulmasında fəal iştirak ediblər və bu iştirak davam edir. Qeyd etmək lazımdır ki, İsrail dünya bazarında Azərbaycan neftinin əsas strateji alıcılarından biridir”.

İsrailli ekspert vurğulayır: “LORA (“Long-Range Artillery Weapon System”) operativ-taktiki raket kompleksi mövzusuna qayıdaraq qeyd etmək lazımdır ki, bu raket 2004-cü ilin mart ayında Aralıq dənizində uğurla sınaqdan keçirilib və İsrail müdafiə ordusunda müvəffəqiyyətlə istifadə edilir. LORA raketinin yeni sınaqları bir qədər yeni modifikasiyanın sınaqlarıdır, lakin İsrailin bu silahı sınaqdan keçirmədən Azərbaycana göndərdiyini bəyan etmək qeyri-adekvat, qeyri-relevant və qeyri-peşəkar sərsəmlikdir. Bundan əlavə, hər hansı ölkənin Azərbaycana göndərdiyi hər bir silah Azərbaycan Silahlı Qüvvələrində zəruri sınaq və test yoxlamalarından keçirilir. Bütün bunlara baxmayaraq, Ermənistan İsraillə hansısa etimada əsaslanan münasibətlər qurmaq ümidindədir. Xatırlatmaq istəyirəm ki, İsrail hərbi-sənaye kompleksi yetərincə ciddi qurumdur və İsrail Müdafiə Nazirliyinin tam nəzarəti altında fəaliyyət göstərən çox ciddi peşəkarlar komandasıdır”.

Məqalənin müəllifi qeyd edir ki, bugünkü Azərbaycan Ordusu Cənubi Qafqazda ən qüdrətli ordu, ən müasir texnika və silahlar, ən yüksək döyüş hazırlığı, şəxsi heyətin intizamı və döyüş ruhu deməkdir. İsrailli ekspert vurğulayır: “Müasir müharibədə kimin döyüş əməliyyatlarını təmin etmək üçün daha müasir yüksək texnoloji vasitələri varsa, həmin tərəf qalib gəlir. 2016-cı ilin Aprel əməliyyatı zamanı erməni işğalçılara qarşı İsrailin pilotsuz zərbə qurğularının səmərəli tətbiq edilməsini xatırlamaq kifayətdir. Bu barədə çox danışmaq olar”.

İsrailli ekspert vurğulayır: “Tolerantlıq və multikulturalizm Azərbaycan cəmiyyətinin fundamental əsasıdır. İsrail dövləti Azərbaycanda yəhudi icmasına münasibətdə respublika rəhbərliyinin rolunu yüksək qiymətləndirir. Bu hörmət və əməkdaşlıq ənənəsi olmadan Azərbaycan ilə İsrail arasında sıx və yaxın ikitərəfli münasibətlər praktik olaraq qeyri-mümkün olardı. İsrail dövləti Azərbaycanın ədalətli mövqeyinin tərəfdarıdır. O, Azərbaycanın ərazi bütövlüyünü fəal dəstəkləyir və Ermənistan-Azərbaycan münaqişəsini yalnız Azərbaycanın ərazi bütövlüyü çərçivəsində nizamlamağa çağırır”.

“Dağlıq Qarabağda da xunta rejimi hökm sürür”

Yeri gəlmişkən, Azərbaycan Respublikasının Prezidenti yanında Dövlət İdarəçilik Akademiyasının professoru, siyasi elmlər doktoru Elçin Əhmədov bildirib ki, işğalçılıq siyasəti yürüdən Ermənistan dünya birliyinin iradəsinə tabe etdirilməlidir (SİA).

Onun sözlərinə görə, bu baxımdan, Azərbaycanın işğal olunmuş ərazilərində Ermənistanın bütün hüquqazidd addımları onun təcavüzkar siyasətini göstərir. Bundan əlavə, münaqişənin nizama salınması üçün aparılan danışıqlarda, işğalçı Ermənistan tərəfindən yaradılan və hazırda onun nəzarətində olan Dağlıq Qarabağdakı cinayətkar və qondarma qurumun tərəf kimi iştirakının təmin olunmasını istəyir. Ancaq bu tələb də əsassızdır və beynəlxalq hüquq prinsiplərinin pozulmasıdır: "Çünki Dağlıq Qarabağ ermənilərinin müstəqil tərəf kimi danışıqlarda iştirakı məsələsi 1992-ci ildə yaradılan ATƏT-in Minsk qrupunun mandatına ziddir. Həmçinin, Dağlıq Qarabağ bölgəsi tarixən Azərbaycanın əzəli torpağı, o cümlədən ayrılmaz tərkib hissəsi olmaqla yanaşı, danışıqlar Ermənistanla Azərbaycan arasında aparılır və bu beynəlxalq formatdır. Əgər Dağlıq Qarabağ münaqişə tərəfi olsaydı, onda Ermənistan tərəfi bu günə kimi danışıqlar prosesində iştirak edib indiyə kimi bir sıra müvafiq sənədləri imzalamazdı. Sonuncu, qondarma "prezident və parlament seçkiləri"nin keçirilməsinə gəldikdə isə, münaqişənin nizama salınmasında 28 ildir vasitəçilik edən ATƏT-in Minsk qrupu, eləcə də bir sıra beynəlxalq təşkilatlar və dövlətlər tərəfindən bu qondarma "seçki"lər heç vaxt tanınmamışdır.

Azərbaycan Prezidenti İlham Əliyev iyunun 3-də Tərtər rayonuna səfəri zamanı bildirdi ki, Ermənistan təbliğatına və ümumiyyətlə, münaqişə ilə bağlı mövqeyinə növbəti böyük zərbə bu yaxınlarda vuruldu. Sonuncu, qondarma "prezident və parlament seçkiləri"nin keçirilməsi isə münaqişənin nizama salınmasında ATƏT-in Minsk qrupu daxil olmaqla, bir sıra beynəlxalq təşkilatlar (NATO, Qoşulmama Hərəkatı, Avropa İttifaqı, Avropa Parlamenti, İƏT, GUAM və s.) və dövlətlər tərəfindən qanunazidd hərəkət kimi qiymətləndirilib və tanınmayıb. Prezident İlham Əliyev diqqətə çatdırdı ki, bütün bu təşkilatlar bu “seçkiləri” tanımadı və bir daha göstərdilər ki, Dağlıq Qarabağ Azərbaycanın ayrılmaz hissəsidir. Ermənistanda isə əhalinin 99,9 faizi ermənidir. Bu cinayətkar kriminal rejim bütün digər millətlərdən olan insanları müxtəlif yollarla qovub. İndi Dağlıq Qarabağda da xunta rejimi hökm sürür.

Bu baxımdan, mayın 11-də Avropa Parlamentinin məruzəçilərinin birgə bəyanatında əksini tapmış mühüm məqamlar da işğal faktının Avropa qurumları tərəfindən də təsdiq olunduğunu göstərir. Avropa Parlamentinin Cənubi Qafqaz üzrə Parlament Əməkdaşlıq Komitəsinin həmsədri Mariya Kalyurand, Azərbaycan üzrə məruzəçisi Jelena Zavko, Ermənistan üzrə məruzəçisi Trayan Basesku Ermənistan ilə Azərbaycanın işğal altında olan Dağlıq Qarabağ bölgəsi arasında əlaqə yaradacaq magistral yolun tikintisi ilə bağlı birgə bəyanat yaydılar. Sənəddə Ermənistan tərəfindən verilən bu qərar beynəlxalq hüququn pozulması kimi göstərilir. Əslində bu bəyanatın təkcə Cənubi Qafqaz ölkələri üzrə Parlament Tərəfdaşlıq Komitələrində nümayəndə heyətinin həmsədri, eləcə də Azərbaycan üzrə məruzəçisi tərəfindən deyil, həm də Ermənistan üzrə məruzəçinin adından da verilməsi Ermənistan-Azərbaycan Dağlıq Qarabağ münaqişəsi ilə bağlı Avropa təsisatlarının vahid yanaşmasının təsdiqi kimi də qiymətləndirilə bilər. Digər dərəfdən, bəyanatda ölkəmizin işğala məruz qalan tərəf olduğu, eyni zamnda birbaşa Ermənistan tərəfindən Azərbaycanın torpaqlarını işğal etməsi faktı aydın şəkildə təsdiq edilir. Bununla yanaşı, bəyanatda tərəflərin danışıqlara dəvət olunması çağırışı onu göstərir ki, son illərdə təcavüzkar dövlətin bu prosesdən özünü kənara çəkməsi əbəsdir, çünki işğalçı tərəf məhz Ermənistandır. Eyni zamanda, adı çəkilən sənəddə münaqişənin məhz Azərbaycanın beynəlxalq səviyyədə tanınmış sərhədləri çərçivəsində həllinə çağırış da ifadə olunmuşdur. Bu baxımdan, sənəd mühüm əhəmiyyət kəsb edir və Ermənistan-Azərbaycan Dağlıq Qarabağ münaqişəsi ilə bağlı beynəlxalq birliyin məlum mövqeyini bir daha təsdiqləyir. Digər tərəfdən, bu bəyanat 1992-ci ildən münaqişənin nizama salınması üçün yaradılmış və tərəfsiz vasitəçilik missiyasını öz üzərinə götürmüş ATƏT-in Minsk qrupu üçün də bir nümunə ola bilər. Çünki, 2005-ci ildə ATƏT-in Azərbaycanın işğal olunmuş ərazilərində faktaraşdırıcı missiyasının hesabatında öz əksini tapmış faktlar, yəni Ermənistan tərəfindən atılan qeyri-qanuni addımlar, xüsusilə məskunlaşdırma siyasətinin aparılması ilə demoqrafik tərkibin qəsdən dəyişdirilməsininin yolverilməz olduğu, o cümlədən beynəlxalq hüququn prinsiplərinin kobud şəkildə pozulduğu təcavüzkar tərəfin diqqətinə çatdırılmalıdır".

Siyasi elmlər doktoru bildirib ki, bununla yanaşı, Ermənistan-Azərbaycan Dağlıq Qarabağ münaqişəsinin həlli ilə bağlı Ermənistan rəhbərliyi tərəfindən səsləndirilən əsassız fikirlər tarixi reallıqları, münaqişənin əsl mahiyyətini də əks etdirmir: "Bunu Azərbaycan Prezidenti İlham Əliyev 2019-cu il oktyabrın 3-də Rusiya Federasiyasının Soçi şəhərində "Valday" Beynəlxalq Diskussiya Klubunun XVI illik toplantısında və həmin il oktyabrın 11-də MDB Dövlət Başçıları Şurasının məhdud tərkibdə iclasında çıxışları zamanı tutarlı faktlarla sübut etdi. 2020-ci il fevralın 15-də Münxen Təhlükəsizlik Konfransı çərçivəsində isə Ermənistan-Azərbaycan Dağlıq Qarabağ münaqişəsi ilə bağlı panel müzakirələr zamanı Ermənistanın yürütdüyü faşist ideologiyası, Azərbaycana qarşı etnik təmizləmə, dövlət terrorizmi və işğalçılıq siyasətini ifşa edən dövlətimizin başçısı Ermənistanın baş nazirinə beynəlxalq hüquqdan və tarixdən əsl dərs keçdi. Ermənistanın baş naziri Dağlıq Qarabağın dırnaqarası özünümüdafiə qüvvələrindən danışanda, onun bir daha həqiqətə uyğun olmayan sözlər söylədiyini bildirən Prezident İlham Əliyev diqqətə çatdırıb.

Fuad Hüseynzadə

Palitra.- 2020.- 17 iyun. S. 11.