“İrəli” öz arxasıyla vətənpərvər, savadlı, bacarıqlı gənclər ordusunu aparır”

Kənan Əliyev: “Pandemiya dövründə belə, Azərbaycan Könüllüləri Əlaqələndirmə Mərkəzi tərəfindən bir sıra QHT-lər və Dövlət təşkilatlarının könüllü gənclərinin bu çətin dövrdə əvəzolunmaz xidmətləri oldu”

Müsahibimiz aktiv gənclərdən olan Kənan Əliyevdir. Kənan 2 Saylı Bakı DOST Mərkəzinin əməkdaşıdır və “İrəli’’ İctimai Birliyinin İdarə Heyətinin üzvüdür. 2014-cü ildən başlayaraq həm də könüllü kimi fəaliyyət göstərir.

-Bildiyiniz kimi bu il “könüllülər ili”dir. Pandemiya bir çox fəaliyyətlərə mane olsa da, könüllülük fəaliyyəti davam etdi. Bir könüllü kimi fəaliyyətinizdən söz açardınız. Könüllülük sizin üçün nə deməkdir?

- Könüllülərə mənim üçün öz iradəsi və sərbəst seçimi əsasında, əvəzi ödənilməyən ictimai faydalı fəaliyyəti ürəkdən, təmənnasız, könüldən gələrək, şəxsən həyata keçirən şəxs deyərdim. Pandemiya dövründə belə, Azərbaycan Könüllüləri Əlaqələndirmə Mərkəzi tərəfindən bir sıra QHT-lər və Dövlət təşkilatlarının könüllü gənclərinin bu çətin dövrdə əvəzolunmaz xidmətləri oldu. Hətta belə bir ağır dönəmdə, ciddi sosial izolyasiyanın tələb olunduğu, cəmiyyətimizin hər mənada köməyə ehtiyac duyduğu günlərdə belə könüllülər passiv olmadılar, onlayn ictimai fəallıqlarını davam etdirdilər və onlayn olaraq görüşlərdə, təlimlərdə iştirak etdilər. Bu da hər bir gənc üçün gələcəkdə duracağı pillənin təməli olan zaman amilinin boşa sərf olunmamasına şərait yaratdı.

-İctimai xidmətlər sektorunda könüllülərin ilbəil artmasını necə dəyərləndirirsiniz? Məsələn, gələcəkdə bu fəaliyyətdə olan gənclərin dövlət təşkilatlarında işləmə imkanları, şansları daha çox görünürmü?

-Hər bir qurumun öz daxili potensial kadrlarının yaradılması üçün könüllülük təcrübəsi çox müsbət haldır. Artıq bir çox dövlət qurumunda çalışan gənclərin iş həyatının başlama səbəbi könüllülük yolu olub. Bu hal da hazırda könüllü fəaliyyət göstərən gənclərə motivasiyadır.

- DOST mərkəzində də çalışırsınız. Bu yeni yaranan qurumun fəaliyyətini bir aktiv gənc kimi necə dəyələndirirsiz?

-Sosial xidmətlər sahəsində keyfiyyətcə yeni mərhələ açan, hər kəsə dost məramı ilə yanaşan, şəffaflıq, operativlik, vətəndaş məmnunluğunu təmin etmək məqsədi ilə yaradılan DOST layihəsi Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban Əliyevanın təşəbbüsünün nəticəsidir. Könüllü fəaliyyətinə başladığım gündən bəri, olduğum layihələrdə həm iştirakçı, həm təşkilatçı qismində olarkən daima şəffaflıq və ədalət prinsipini rəhbər tutaraq fəaliyyət göstərmişəm.

Hərbi xidmətdən qayıdandan sonra, DOST Agentliyinin işinə nəzər yetirdim və öz fəaliyyətimlə agentliyin prinsiplərinin uyğun olduğunu gördüm. Əsas məqsədim olan ədalət prinsipi əsasında, şəffaflıqla vətəndaşlara xidmət, cəmiyyətə faydalı olmaq üçün burada olmağımı vacib bildim

-Könüllülükdən başqa digər ictimai işlərdə necə, aktivsinizmi?

- Öncə istərdim könüllülük fəaliyyətimlə bağlı bir qədər ətraflı məlumat verim. İlk könüllü fəaliyyətimə başlamışam, 2014-cü ildə universitet daxilində fəaliyyət göstərən birliklər, dərnəklərdə və Tələbə Gənclər Təşkilatı daxilində başlayaraq universitet daxilində fəaliyyət göstərən debat klubunda iştirak etmiş, 2018-ci ilədək universiteti müxtəlif yarışlarda, dövlət tədbirləri və layihələrdə təmsil etmişəm. Daha sonra 2015-ci ilin yanvar ayından 2015-ci ilin iyun ayınadək “Sos Uşaq Kəndləri -Azərbaycan Assosiasiyası’’ tərəfindən həyata keçirilən “Bakı Ailələrinə dəstək’’ layihəsində könüllü olaraq çalışmışam. 2015-ci ildə Yasamal rayon əlillər cəmiyyətində həssas qruplara yönəlmiş layihələrin təşkilində, elə həmin ilin aprel ayında “Birgə və Sağlam İctimai Birliyi’’-nin layihələrinin həyata keçirilməsində iştirak etmiş və hər il autizm ayı olan Aprel ayında təşkil olunan “Aprel Autizm ayı’’ tədbirlərin təşkilini həyata keçirmişəm.

Bundan başqa “İrəli” İctimai Birliyində də aktiv fəaliyyətim var ki, burada da ilk olaraq könüllü kimi fəaliyyətə başlamışam. Daha sonra 2014-cü ilin sentyabr ayından “İrəli” İctimai Birliyinin İnsan Resursları katibliyinin əməkdaşı qismində 2018-ci ilin may ayınadək rəsmi fəaliyyət göstərmişəm. Hazırda da Birliyin İdarə Heyətinin üzvüyəm.

-“İrəli” İctimai Birliyindən söz açdınız. Xeyli sayda perspektivli, istedadlı gənci bir araya gətirən belə bir təşkilatın fəaliyyəti sizi qane edirmi? “İrəli” sizin üçün hansı təcrübələri verdi?

-Əlbəttə sizin də qeyd etdiyiniz kimi “İrəli” İctimai Birliyi böyük perspektivə malik bir təşkilatdır, hətta deyərdim ki, öz arxasıyla vətənpərvər, savadlı, bacarıqlı gənclər ordusunu aparır. “İrəli” İctimai Birliyi 26 avqust 2005-ci il tarixindən gənclər hərəkatı kimi fəaliyyətə başlayıb. Əsas məqsədi Azərbaycanda gənclər siyasətini həyata keçirmək və gənclərin inkişafına nail olmaqdır. 3 illik fəaliyyətdən sonra “İrəli” İctimai Birliyi öz fəaliyyətini gənclər hərəkatı kimi dayandırıb. 24 dekabr 2008-ci il tarixindən təşkilat olaraq fəaliyyətə başlayıb. Bu gün də bu təşkilatın əsas məqsədi dövlət gənclər siyasətinin inkişafına dəstək ola biləcək hər bir gəncin təşəbbüslərinin bütün sahələrdə stimullaşdırmaq və gənclər siyasətində yaxından cəlb olunan və ölkənin maraqlarını qoruyan vətəndaş cəmiyyətinin formalaşmasında iştirak etməkdir. Yolu “İrəli” İB-dən keçən gənclərin bu gün fəaliyyətlərinə, vətəndaş cəmiyyətindəki mövqelərinə nəzər yetirsək, əminliklə deyə bilərəm ki, təşkilat öz ali məqsədinə nail olub.

-Bəs Azərbaycan gənclərinin hazırkı durumu, sizi qane edirmi?

-Bu gün Azərbaycan gəncinə bütün sahələrdə yaradılmış münbit şərait göz önündədir. Günümüzdə hər hansı universitetdə təhsil alan gənc istədiyi sahə, ixtisası üzrə nəzəri bilikdən əlavə təcrübə toplamaq üçün təşkilat, ictimai birlik tapa bilər. Hətta region gəncləri belə, Gənclər Evi vasitəsi ilə ictimai fəallıqlarını artıra bilərlər. Burada dövlət öz üzərinə düşəni etdiyi üçün növbə gəncdədir və gənc də bu imkanlardan sözün yaxşı mənasında istifadə etməlidir.

-Sizin xeyirxah missiyalı kampaniyanız olması haqqında məlumatlıyam. Bu barədə də söz açardınız.

- Bəli belə bir xeyriyyə xarakterli aksiyamız var. 2017-ci ildən start götürən xeyriyyə aksiyamız artıq neçə ildir ki, uğurlu şəkildə davam edir. Hər il mart ayında reallaşdırılan aksiyanın keçirilməsində məqsəd aztəminatlı ailələrin maddi vəziyyətinin yaxşı olmaması və əksər ailələrdə uşaqların bayram sevincindən məhrum olması səbəbindən həmin ailələrə dəstək olmaqdır. Bununla yanaşı, ailələrdə uşaqların yaxşı təhsil almalarına az da olsa şərait yaratmaq nəzərdə tutulan əsas amillərdən biridir. Hər bir şəxs müxtəlif məktəb ləvazimatları(qələm, kitab, dəftər, çanta, rəngli karandaşlar və s.) alaraq, həmçinin, artıq ehtiyac duymadığını yeni geyimləri verərək aksiyamıza dəstək ola bilir. Gedəcəyimiz ailələrdə hər yaşda üzv olduğu üçün hər yaşa və ölçüyə uyğun geyimlər də qəbul edilir. Həmçinin maddi yardım göstərərək də, nəzərdə tutulmuş ləvazimatların, müəyyən qida vasitələrinin-şirniyyatların alınmasına dəstək olaraq aksiyaya öz töhfəsi verilə bilər. Bu da qəlbində paylaşmaq hissi olan, paylaşmağı bacaran hamıya imkan yaradır ki, hər kəs bacardığı dəstəyi göstərə bilsin.

Kənan Əliyev

Müsahibəni apardı: Tural Tağıyev

Palitra.- 2020.- 19 iyun. S. 6.