Xalq kompyuteri” layihəsində yeni sistem tətbiq ediləcək

“Xalq kompyuteri” layihəsinin növbəti mərhələsinə start verilir. Bunu dünən “Aztelekom” İstehsalat Birliyində keçirilən mətbuat konfransında Rabitə və İnformasiya Texnologiyaları Nazirliyi informasiya cəmiyyətinin inkişafı şöbəsinin müdiri Rüfət Gülməmmədov bildirib.

Layihənin icrasında iştirak edən “Bestcomp” şirkətinin direktoru Rauf Həsənovun sözlərinə görə, pilot layihə çərçivəsində 1,850 mln. manat həcmində investisiya qoyulub və 500-700 manat qiymətində 3500 kompyuter satılıb, onların əksəriyyəti isə (834 ədəd) Bakıda realizə edilib.

“HP-Azerbaijan” şirkətinin biznes inkişafı üzrə meneceri Rasim Baxşının sözlərinə görə, yeni mərhələdə layihə çərçivəsində kompyuterlər ali məktəb müəllimlərinə və tibb işçilərinə təqdim ediləcək və onların qiyməti dəyişməyəcək, konfiqurasiyaları gücləndiriləcək. Belə ki, artıq 2 GB əməliyyat yaddaşının əvəzinə 3 GB əməliyyat yaddaşı olan kompyuterlər təqdim ediləcək. Bununla yanaşı, layihədə iştirak etmək üçün iki şirkət - “Symantec” və “KÜR” şirkəti təşəbbüs irəli sürüb. Belə ki, birincisi “Norton Antivirus” proqramlarını layihə çərçivəsində güzəştli şərtlərlə (ayda 35 qəpik), yerli zavod isə 1 və 4 portlu ADSL modemlərini müvafiq olaraq ayda 2,8 manat və 3,5 manat ödəməklə almağı təklif edir. Bundan başqa, layihə çərçivəsində kompyuter alanlara 1 aylıq pulsuz internet xidmətləri təqdim edilir. “Aztelekom” və “Bakinternet” provayderləri tərəfindən 3, 6 və 9 ay ərzində kompyuterin dəyərini ödəyənlərə müvafiq olaraq koper-printer, printer və flash-kart hədiyyə olunacaq.

Tədbirdə iştirak edən rabitə və informasiya texnologiyaları nazirinin müavini Elmir Vəlizadə bildirib ki, bu, cəmiyyətə tələb olunan layihədir: “Hazırda Azərbaycanda hər 100 nəfərin payına 8 kompyuter düşür və bizim məqsədimiz bu göstəricini artırmaqdır. Layihənin ümumi məqsədi isə sosial yönümdədir və insanların informasiya əldə edilməsini təmin etməkdir. Eyni zamanda, layihə əhali arasında yeni mədəniyyətin formalaşmasına yönəlib ki, bu da hüquqi zəmində proqram təminatından istifadə mədəniyyətidir”.

Layihənin nəticələrinin müzakirəsində iştirak edən “Microsoft-Azerbaijan” şirkətinin layihə meneceri Emin Axundov bu təşəbbüsün rəqəmsal fərqin aradan qaldırılmasında mühüm rol oynadığını, regionlarda yaşayan müəllimlərin “Azərpoçt” şəbəkəsi vasitəsi ilə kompyuterlərlə təmin edildiyini bildirib. HP şirkətinin MDB ölkələri üzrə nümayəndəsi Sergey Plaksin layihənin Şərqi Avropada analoqunun olmadığını və gələcəkdə şirkətin məhsul çeşidinin genişləndirilməsi ilə yanaşı funksional və məhsuldarlı çeşid təqdim etməyə hazır olduğunu vurğulayıb. Tədbirdə həmçinin Təhsil Nazirliyi, “KÜR” və “Symantec” şirkətlərinin nümayəndələri iştirak edib.

“Bestcomp” şirkətinin direktoru Rauf Həsənov bildirib ki, “Xalq kompyuteri” layihəsi çərçivəsində yaxın bir ay ərzində yeni sistem tətbiq ediləcək. Bu, layihə üzrə bağlanılan müqavilələrin avtomatik generasiyası sistemidir. Bu sistem vasitəsilə alınan mal və xidmətlərin ümumi məbləği hesablanır, müqavilə çap edilərək alıcı tərəfindən poçtla “Bestcomp” şirkətinə göndərilir. Gələcəkdə alıcılar elektron imzadan istifadə edərək, bu müqaviləni birbaşa elektron poçt vasitəsilə göndərə biləcəklər.

Rasim

Palitra.-2009.-18 noyabr.-.S.2.