Qarabağ mövzusunda yazılmış “Vicdan Dustağı” kitabının təqdimatı olub

 

 Dünən   Respublika Uşaq Kitabxanasında  Azərbaycan Yazıçı Qadınlar Cəmiyyəti İctimai Birliyinin sədri Nüşabə Məmmədlinin “Vicdan dustağı” kitabının təqdimatı keçirildi. Tədbirdə Ailə Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova, Mədəniyyət və Turizm  Nazirliyinin  şöbə müdiri  Lətifə Məmmədova və bir çox digər yazıçı və şairlər iştirak edirdilər.

 Kitabının məhz kitabxanada təqdim olunmasının səbəbini müəllif belə  izah etdi: “Tədbiri burda  keçirməkdə əsas məqsəd kitab mədəniyyətinin təbliği, mütaliəyə marağın artırılmasından ibarətdir. İstərdim digər həmkarlarım da kitablarının təqdimatlarını kitabxanalarda etsinlər.  Bu hal kitaba marağı daha da artıracaq”.

Mütəmadi olaraq yazılarında  Qarabağ mövzusuna müraciət etdiyini deyən Nüşabə Məmmədli  bildirdi ki,  “Vicdan dustağı” kitabı onun  Qarabağ mövzusunda yazdığı dördüncü kitabıdır: “İistəmişəm göstərəm ki, ermənilərdə  hiylə,  riyakarlıq təkcə azərbaycanlılara, türklərə qarşı deyil, bütün millətlərə qarşı olub. Çalışmışam ki, obyektivliyi qoruyaraq,  çünki ermənilərdən söhbət gedəndə heç zaman təxəyyülə vara bilmirəm. O səbəbdən ki,  təxəyyülüm nə qədər inkişaf etsə belə, erməni simasını özləri kimi aça bilməz. Ermənilər o qədər qəddardılar, o qədər rəhimsizcəsinə insanları qətlə yetirirlər ki, onu heç bir sənət adamı, yazıçı, şair qələmə ala  bilməz. Buna görə də hər bir müəllif yazar ermənilərin özlərinin törətdiyi vəhşilikləri  real hadisələrdən götürməlidir. Ermənilər əvvəlcə bir milləti  dost tutur, sonra düşməncəsinə vururlar”.

Yazıçı bildirdi ki,  əsərində hadisələr Azərbaycandan başlayır: “ Yəni 1988-ci ildən, sonra gəlir işğal vaxtı və işğaldan sonra  qaçqın və məcburi köçünlərimizin Azərbaycanın rayonlarına və  Bakıya məskunlaşması verilir. O vaxt çox adam Rusiyaya meylləndi. Bu əsərdə  bir ailənin həyatının götürmüşəm. Bu ailə Rusiyaya gedir, orda yenə də ermənilərlə rastlaşır. Rusiyada Qarabağ hadisəsi yoxdur, orda adi insanlardı, amma yenə də orda  da ermənilər  azərbaycanlılardan əl çəkmirlər. Bunu əsərdə göstərmişəm. 15-16 yaşlı uşağı ermənilər hiylələrinin və  məkirlərinin qurbanı edib, boğub öldürürlər”.

 Kitabın yazılma müddətinə gəlincə isə,  müəllif bu kitabı 2008-ci ildə yazmağa başlayıb və 2009-cu ilin noyabrında bitirib:” Ümumiyyətlə, Qarabağ mövzusunda yazılan bütün əsərlər yazıçının ömründən kəsir. Ancaq bir şeyi  özümə şərəf və qürur hesab edirəm ki, Qarabağ mövzusunda hansı mövzuya toxunuramsa, onun öhdəsindən gəlməyincə onu əlimdən yerə qoymuram.Bundan əvvəl mənim “Zəngulə” əsərimi yazmışdım. Bu əsərdə  Qarabağın əsir qadınlarından söhbət gedir. “Zəngulə”   çox səs salmışdı və bu əsərə  çoxlu münasibətlər bildirildi. Böyük səs-sədaya səbəb oldu və xaricdə onun təqdimatı keçirildi. Çoxlu mükafatlar aldım. Düzdür, mən əsəri yazanda mükafat üçün yazmıram. Hər bir əsəri  yazanda  ilk növbədə gələcək nəsili düşünürəm.  Mən istəyirəm gənc nəsilə göstərəm və  nəsə qoyam, onlar  görsünlər və bilsinlər ki,  ermənilər bizim tarixi  düşmənimizdir”. Müəllif əsərdə hadisələrin və obrazların reallıqda olduğunu və faktiki hadisələr əsasında qurulduğunu dedi:” Mən nəyi  yazmışamsa reallığa uyğun olaraq yazmışam. Əsərdə təsvir etdiyin Səltənət obrazı bu gün də var. Ondan başqa Murad və Orxan  da real həyatda olan qəhrəmanlardı.  Amma əsərdə verilmiş Səməd və Məlik dünyasını dəyişib və erməni vəhşiliyinin qurbanı olublar. Süjet xətti əsərdə kim ki, mənə danışıb, əsas o xətdir, eyni zamanda öz təxəyyülüm də var”.

 Keçirilən tədbiri yüksək qiymətləndirən Mədəniyyət və Turizm Nazirliyinin şöbə müdiri Lətifə Məmmədova bildirdi ki, bu təqdimatda hər kəs N. Məmmədlinin poeziya aləminin işığına  və “Vicdan dustağı” əsərinin  təqdimatına yığışıb:” Bir kitabxana mütəxəssisi kimi deyə bilərəm ki, kitab yazmaq və insanların  az mütaliə etməsi bu gün dünyanın bir çox yerlərində problemdir. Amma müasir dövrdə  dəyərli kitablar yazılır. Elə bu gün təqdimatına toplaşdığımız “Vicdan dustağı”da belə əsərlərdəndir. İlk olaraq bu təqdimata dəvət alanda kitabın adı mənə çox təsir etdi və maraqlandırdı. Bu kitabı mütaliə edən  zamanı həqiqətən  onun bu gün Qarabağ haqqında yazılan dəyərli əsərlər sırasında olacağına inandım”.

L.Məmmədova bildirdi ki, “Vicdan dustağı”nın 50 nüsxəsi  kitabxanaya verilib və o andan başlayaraq  oxucular tərəfindən götürülüb və oxunub:” Bu da onun göstərir ki,  əsər çox dəyərlidir. Bilirsiniz, bu gün  çox böyük həcmli kitabları oxumağa insanların marağı  o qədər də çox deyil. İnformasiya texnologiyalarının bu gün həyatımıza sirayət etdiyi bir vaxtda  aktivlik və cəldlik bu günkü həyatımızın əsasını təşkil edir. Onun üçün də  müasir dövürdə böyük həcmli kitablar    “Vicdan dustağı”, “Azər və Aida” əsəri qədər maraqlı yazılmalıdır ki, oxucular tərəfində sürətlə və yaxşı oxunsun”.

“Bu gün gənclərin kitaba münasibəti bizi narahat edir. Hər zaman  biz bu məsələni keçirdiyimiz tədbirlərdə  müzakirə edirik”-deyən “Ailə Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova bildirdi ki,  komitə tərəfindən son zamanlar bir sıra qadın müəlliflərin əsərlərinin təqdimatı keçirilib:” Bütün qadın müəlliflərin kitabının təqdimatını  komitənin  etməsi mümkün deyil. Bu gün çox təqdirəlayiq haldır ki, kitabxanada kitab təqdimatı edilir. Bu məkan kitab təqdimatə üçün çox maraqlıdır. İlk öncə ona görə ki, insanlarda kitaba  və mütaliə olan marağı artıracaq.  “Vicdan qustağı” kitabının cəlbedici və məzmunlu olduğunu qeyd edən S.Qəhrəmanova bildirdi ki,  yazılan hər bir kitabda və yazı materialında  yazıçının vicdanından  süzülüb  gələn və cəmiyyətdə olan reallıqlar  təqdim edilir, o cümlədən bu gün təqdimatına toplaşdığımız  “Vicdan dustağı” kitabında.

Qadın yazıçılardan Firuzə Məmmədli, Sona Xəyal, Nafilə Abuzərli, Həqiqət Paşaqızı, Gülrux Əlibəyli, Gülzar İbrahimova, Sevinc Nuruqızı və b. yazıçının yeni kitabı ilə bağlı çıxış edərək bildirdilər ki, “Vicdan dustağı”əsəri öz çəkisinə, məzmununa görə  müasir dövürdə yazılan dəyərli əsərlər sırasında olacaq və oxucular tərəfindən seviləcək.

 

 

Günay ƏSƏDOVA

 

Paritet.- 2010.- 3-5 aprel.- S. 10.