Əhalinin 41 faizi internet istifadəçisidir

Ölkəmizdə internet xidmətlərinin orta qiymətləri region dövlətlərində tətbiq edilən orta qiymətlərlə eynidir

Azərbaycanda internet xidmətlərinin orta qiymətləri region dövlətlərində tətbiq edilən orta qiymətlərlə eynidir. Bu tendensiya Rabitə və İnformasiya Texnologiyaları Nazirliyinin (RİTN) əməkdaşları tərəfindən aparılmış region üzrə ADSL texnologiyasına qoşulmaqla internetə daxil olma tariflərinin araşdırılmasına dair monitorinqlərin nəticələrində əks olunur.

RITN-dən verilən məlumata görə, monitorinq Nazirliyin Kollegiyası tərəfindən qəbul olunmuş qərara əsasən həyata keçirilib. Xatırladaq ki, RİTN-in Kollegiya iclasında nazirlik tərəfindən internet xidmətlər sektorunun vaxtaşırı monitorinqinin keçirilməsi və bazarın həmin seqmenti üzrə vəziyyətin ictimaiyyətə çatdırılmasına dair qərar qəbul olunub.

Monitorinq zamanı müəyyən olunub ki, Azərbaycanda ADSL texnologiyası vasitəsilə təqdim olunan internet xidmətlərinin orta qiymətləri region dövlətlərində tətbiq edilən orta qiymətlərlə eynidir. Monitorinqin nəticələrinə əsasən Azərbaycanda ADSL texnologiyasına qoşulmaqla saniyədə 1 Mb-dək sürətlə limitsiz internet xidmətlərinə görə aylıq ödəniş 20 manatdan 50 manatadək təşkil edir. Aşağıda respublikanın bir neçə provayderinin ADSL texnologiyasına qoşulmaqla saniyədə 1 Mb-dək sürətlə aylıq limitsiz internet xidmətlərinə görə tarifləri göstərilib:

Bakinternet - 29 manat

Aztelekomnet - 29 manat

Connect - 20 manat

Intrans - 94 manat

AzEuroTel - 32 manat

SuperOnline - 51 manat

Uninet - 25 manat

Regionun digər ölkələrinə gəldikdə isə, Gürcüstanda bu cür paketin qiyməti 30 manatdan 100 manatadək; Ukraynada 50 manatdan 110 manatadək; Belarusiyada 130 manatdan 200 manatadək; Moldovada 20 manatadək; Rusiyada 30 manatadək; Qazaxıstanda 256/256 Kbit/s təqribən 85 manat təşkil edir. Ermənistanda 1024/256 kbit/s sürətli qoşulmaya görə aylıq limitsiz paketin qiyməti 70 manata yaxındır. Qırğızıstanda isə 128/128 kbit/s sürətli qoşulmaya görə aylıq limitsiz paketin qiyməti təxminən 60 manat təşkil edir.

Araşdırmaların nəticəsinə görə, qeyd etmək olar ki, Azərbaycanda digər sürətli internet xidmətlərinin orta qiymətləri də region dövlətlərində tətbiq edilən orta qiymətlərlə eyni səviyyədədir.

İnternet xidmətləri üzrə qiymətlərin monitorinqi ilə yanaşı, ölkədə internet seqmentinin inkişafı baxımından bir sıra statistik məlumatları da qeyd etmək olar. Belə ki, Azərbaycanda 30-dan çox internet servis provayderi fəaliyyət göstərir, ümumi internet istifadəçilərinin sayı isə (DİAL UP, WiFi, MOBILE, ADSL, WiMAX, CDMA) əhalinin 41 faizini təşkil edir. Son bir ildə genişzolaqlı internet tarifləri 5 dəfəyə qədər ucuzlaşdırılıb, nəticədə isə genişzolaqlı qoşulma istifadəçilərinin sayı 2 dəfə artaraq 80 minə çatıb. Onu da nəzərinizə çatdıraq ki, “.az” domen zonasında domenlərin illik qeydiyyat haqqı 20 manat təşkil edir, domenlərin sayı isə 10 minə yaxınlaşır. Ölkənin ümumi internet trafikinin həcmi (kanalın tutumu) - 10 Gbit/san. təşkil edir.

Bundan əlavə bütün ölkə ərazisi tam olaraq telefonlaşıb. 3 yaşayış məntəqəsi olan kəndlərdə belə ən azı 1 rabitə əlaqəsi mövcuddur. Bu da 171 (və ya 178) və 150 yığmaqla eyni şərtlərə uyğun olaraq regionlardan (hətta ucqar kəndlərdən belə) Aztelekom.net və Bakinter.net provayderinin DİAL UP internet xidmətinə qoşulmağa imkan verir. Bakıda və Gəncədə WiFi xidməti, Bakıda və Abşeronda isə WiMAX xidməti göstərilməkdədir. Bütün rayon mərkəzlərində CDMA texnologiyası ilə internetə çıxış imkanı mövcuddur.

Sonda nəzərinizə çatdıraq ki, RİTN bundan sonra da bu istiqamətdə monitorinqlər keçirəcək, nəticələr isə geniş ictimaiyyətə təqdim olunacaq.

B.CAHANDAROV

Paritet.- 2010.- 15-16 aprel.- S. 8.