Tuğ kənd orta məktəbinin 125 illiyi qeyd edildi

Aprelin 23-ündə Beyləqan rayonu ərazisində yerləşən Yeni Xocavənd köçkün qəsəbəsində Tuğ kənd orta məktəbinin 125 illiyi münasibətilə yubiley tədbiri keçirildi.

Mərasimdə Qaçqın və Məcburi Köçkünlərin İşləri Üzrə Dövlət Komitəsinin sədri Əli Həsənov, təhsil nazirinin müavini İsgəndər İsgəndərov, Dağlıq Qarabağın Azərbaycanlı İcmasının rəhbəri Bayram Səfərov, Beyləqan, Laçın, Füzuli, Kəlbəcər,Cəbrayıl, Xocavənd rayon və Şuşa, Xocalı şəhər icra hakimiyyətlərinin başçıları, Bakı Slavyan Universitetinin (BSU) nümayəndələri də iştirak edirdilər. Ə.Həsənov Tuğ məktəbinin iki müəlliminin fəxri adla təltif olunmasını, bu təhsil ocağının 125 illiyinin keçirilməsinə dair Prezident İlham Əliyevin sərəncam imzalamasının böyük önəm kəsb etdiyini bildirdi. O, Tuğ kənd orta məktəbinin yubileyinin təntənəli şəkildə keçirilməsinə göstərdiyi diqqətə görə, prezident İlham Əliyevə Xocavənd əhalisi, Tuğ kənd sakinləri adından təşəkkür etdi.

Tədbirdə Bakı Slavyan Universitetinin rektoru Kamal Abdullanın təbrik məktubu tədbir iştirakçılarının diqqətinə çatdırıldı. Xatırladaq ki, Prezident İlham Əliyevin 2004-cü il 1 iyul tarixli 298 nömrəli Sərəncamı ilə təsdiq edilmiş “Qaçqınların və məcburi köçkünlərin yaşayış şəraitinin yaxşılaşdırılması və məşğulluğunun artırılması üzrə dövlət proqramı”na əlavələr edilməsi haqqında 31 oktyabr 2007-ci il tarixli sərəncamında Tuğ kənd orta məktəbinin 125 illiyinin təşkil edilməsi öz əksini tapır. Tuğ məktəbinin müəllimləri, “Tərəqqi” medalı ilə təltif olunan Oqtay Göyüşov və “Əməkdar müəllim” fəxri adına layiq görülən aidə Novruzaya ali mükafatlar təqdim edildi.

Rəsmi hissədən sonra Xocavənd rayon mədəniyyət evinin kollektivi və Tuğ kənd orta məktəbinin şagirdləri ədəbi-bədii kompazisiya ilə çıxış etdilər.

Qeyd edək ki, Tuğ kənd orta məktəbinin yaradılması 19-cu əsrin 80-ci illərinə təsadüf edir. Məktəbin əsası görkəmli Azərbaycan ziyalısı, “Kitabi-tarixi Qarabağ” əsərinin müəllifi Mir Mehdi Mir Haşım oğlu Xəzani (1811-1893) tərəfindən qoyulub. Tuğ kənd məktəbinin məzunları arasında indiyədək 10 nəfər elmlər doktoru, professor, 15 nəfər isə elmlər namizədi dərəcələrinə yüksəlib. Çoxlu sayda yüksək rütbəli zabit bu məktəbin yetirməsidir.

Səbuhi

Paritet.- 2010.- 27-28 aprel.- S. 10.