Qəbələdə II Beynəlxalq Musiqi Festivalı açılıb

Mehriban Əliyevaya YUNESKO-nun “Qızıl Motsart” medalı təqdim olunub

Heydər Əliyev Fondunun təşəbbüsü ilə Qəbələdə keçirilən İkinci Beynəlxalq Musiqi Festivalının iyulun 30-da təntənəli rəsmi açılışı olub. Prezident İlham Əliyev, Azərbaycanın birinci xanımı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyeva və ölkəmizdə səfərdə olan YUNESKO-nun baş direktoru xanım İrina Bokova mərasimdə iştirak ebiblər. Heydər Əliyev Fondunun prezidenti Mehriban Əliyeva festivalın açılışında çıxış edib(AzərTAc).

Qəbələdə qonaqları salamlayan M. Əliyeva Azərbaycanın ən qədim şəhərlərindən biri olan Qəbələnin təkcə Azərbaycanın yox, dünyanın ən gözəl guşələrindən biri olduğunu bildirib: “Zəngin tarixi və əsrarəngiz təbiəti olan bu gözəl şəhər dünyanın ən qədim sivilizasiyalarından birinin - Qafqaz Albaniyasının paytaxtı olub və hər bir dövr, hər bir mədəniyyət burada öz izini qoyub. Buraya qədəm qoyan hər bir insan əsrlərin nəfəsini hiss edir. Qəbələ torpağına qədəm qoyan hər bir insan tarixin nəfəsini, əsrlərin ruhunu duyub hiss edir. Zaman keçdikcə dövlətlər, sivilizasiyalar, xalqlar və millətlər yaranır və yox olurdu. Dəyişməyən, əbədi olan bu dağların möhtəşəmliyi, çay və bulaqların aramsız axarı və əsrlərin şahidi olan ağacların səmaya doğru ucalmasıdır. Qəbələnin füsunkar təbiətinin özü elə bil ki, təkrarsız bir musiqi əsəri yaradır və bizləri bu əsəri dinləməyə dəvət edir”. Hazırda dünya xəritəsində Qafqaz Albaniyası olmasa da, Qəbələ mədəniyyətin paytaxtı kimi çıxış edir”- deyən Azərbaycanın birinci xanımı bildirib ki, bu günlərdə hamımızı bir amil - musiqi birləşdirir.

M. Əliyeva YUNESKO-nun baş direktoru İrina Bokovaya Azərbaycana gəldiyinə və bu festivalda iştirakına görə təşəkkür edib. O, Azərbaycan-YUNESKO əməkdaşlığının əhəmiyyətini vurğulayaraq bu əlaqələrin çoxşaxəli olduğunu deyib. Prezident İlham Əliyevə gərgin iş qrafikinə baxmayaraq festivalın rəsmi açılışına qatıldığına görə minnətdarlıq edən Azərbaycanın birinci xanımı musiqiçiləri də salamlayıb və bu musiqi bayramının ilk növbədə onların sayəsində baş tutduğunu diqqətə çatdırıb.

Mərasimdə çıxış edən YUNESKO-nun baş direktoru İrina Bokova festivala uğurlar arzulayıb. Azərbaycana səfərindən məmnun olduğunu deyən İrina Bokova bu beynəlxalq festival üçün Qəbələnin möhtəşəm səhnə olduğunu vurğulayıb: “Qəbələ beynəlxalq mədəni görüşlər üçün ən münasib yerdir. Biz Qafqaz Albaniyasının qədim paytaxtının yanındayıq. Vaxtilə bura Asiyanın, ərəb dünyasının, Avropanın kəsişdiyi məkanlarda dinamik ticarət, təhsil və mədəniyyət mərkəzi, çiçəklənən region olub. Xalqların və mədəniyyətlərin bu görüşünün əsas nəticəsi Azərbaycanın ustaddan şagirdə, nəsildən-nəslə keçən zəngin musiqi ənənələridir. YUNESKO belə hesab edir ki, bu ənənələrin bir qismi ümumdünya irsinin inciləridir. Onların qorunub saxlanması və populyarlaşdırılması üçün bütün tədbirlər görülməlidir”.

İ.Bokova xüsusən muğamın dünyada yayılmasının vacibliyini qeyd edib: “YUNESKO tərəfindən tərtib edilən bəşəriyyətin qeyri-maddi mədəni irsinin reprezentativ siyahısına daxil edilmiş muğam fars, türk və ərəb ənənələri əsasında klassik poeziyanı və improvizasiyanı özündə birləşdirərək insanı vəcdə gətirən melodiyalar yaradır və nəticə etibarilə Azərbaycan ənənələrini təşkil edir. Bu siyahıya sizin ölkənin mədəni bənzərsizlik rəmzlərindən biri olan poeziyanı, dastanları, rəqsləri, vokal və instrumental musiqini birləşdirən Azərbaycan aşıq sənəti də daxildir. Digər tərəfdən, Yeni il bayramı - hər il martın 21-də Azərbaycanda, habelə Türkiyədə, Hindistanda, İranda qeyd edilən Novruz bayramı əfsanələr, rəvayətlər, rituallar, dünyanın mədəni dəyərlərini, ailələr və icmalar arasında həmrəyliyi inkişaf etdirən festivallarla bağlıdır”.

“Bu festival Azərbaycanın zəngin musiqi irsi ilə tanışlığa şərait yaradır”- deyən Bokova YUNESKO prinsiplərini hər zaman yüksək tutduqlarına görə Azərbaycan prezidentinə və Mehriban Əliyevaya təşəkkür edib.

Qəbələ Beynəlxalq musiqi festivalının əhəmiyyətindən danışan YUNESKO-nun baş direktoru deyib ki, bu bayram Azərbaycan musiqisinin ruhunu əks etdirir və gələcəkdə qəlblərin və düşüncələrin bir araya gəlməsi üçün bu cür tədbirlər mühüm əhəmiyyət daşıyır: “Qəbələ festivalı çərçivəsində gənc musiqiçilər üçün ustad dərsləri təşkil edilir, ənənəvi, klassik, müasir musiqini və cazı əhatə edən proqram həyata keçirilir. Bu festival Azərbaycanın musiqi ruhunun və səxavətinin əksidir”.

“Azərbaycan müxtəlif mədəniyyətlərin qovuşduğu məkandır və bu festival da həmin mədəniyyətləri ən yüksək səviyyədə təqdim edəcək”, - deyən İ.Bokova M. Əliyevanın mədəniyyətlərarası dialoqun möhkəmləndirilməsindəki xidmətlərini yüksək qiymətləndirib.

Çıxışdan sonra İ.Bokova YUNESKO-nun “Qızıl Motsart” medalını M. Əliyevaya təqdim edib. Qeyd edək ki, bu medal 1991-ci ildən verilir. Medala indiyəcən bəstəkarlar, müğənnilər, ifaçılar və bir musiqi məktəbi layiq görülüb. İlk dəfədir ki, medal tanınmış musiqiçi olmayan şəxsə verilir. Bundan qabaq medal - 2007-ci ildə Bakıda anadan olmuş dünya şöhrətli ifaçı Mstislav Rostropoviçə verilmişdi.

Sonra Azərbaycan mədəniyyətinə həsr olunan videoçarx nümayiş etdirilib, ardınca isə konsert proqramı olub. London Kral Filarmonik Orkestrinin ifasında Azərbaycan və Avropa bəstəkarlarının əsərləri səslənib. Konsertdə Dmitri Yablonski, Yuri Başmet, Emilio Ponsı, Xloe Hanslip, Fərhad Bədəlbəyli çıxış ediblər. Gecənin sonunda atəşfəşanlıq olub.

B.CAHANDAROV

Paritet.- 2010.- 3-4 avqust.- S.3.