Milli Məclisin yaz sessiyasının ilk plenar iclası keçirildi

Təqvimə “Analar günü” kimi yeni bayramın salınması və “Azərbaycanın işğal olunmuş əraziləri haqqında” qanun layihəsinin qəbul olunması təklif olunur

Dünən Milli Məclisin yaz sessiyasının ilk plenar iclası keçirildi. Dövlət himni səsləndirildikdən sonra plenar iclası giriş sözü ilə açan Milli Məclisin sədri Oqtay Əsədov ötən sessiyasının mühüm işlərindən, həmin dövr ərzində qəbul olunan qərar və qanunlardan söhbət açdı. Bildirildi ki, ötən sessiyada Milli Məclisin 13 iclası keçirilib, 80 qanun və qərar qəbul olunub.

Daha sonra Milli Məclisin 2010-cu il yaz sessiyasının gündəliyinə təklif olunan məsələlər səsləndirildi.

Millət vəkili Cəmil Həsənli Milli Məclisin yeni başlayan yaz sessiyasında ölkənin sosial, hüquqi, mədəni həyatında müsbət dəyişikliklər edə biləcək mühüm qanunların qəbul ediləcəyinə ümidli olduğunu bildirdi. Mühüm, qəbulu vacib olan qanunlardan birinin də “Neft haqqında” qanunun olduğunu deyən millət vəkili hesab etdi ki, belə bir qanunun qəbulu ölkənin bu günkü həyatı üçün mühüm addımlardan ola bilər: “ Hesab edirəm ki, neftdən istifadənin hüquqi əsasları hazırlanmalıdır. Neft haqqında qanun layihəsi yaxın vaxtlarda Milli Məclisin gündəliyinə salınmalıdır” .

C.Həsənlinin toxunduğu digər məsələ isə yeni tikili binaların qazla təchizatının olmaması oldu: “Artıq neçə illərdir ki,çox sayda yeni binalar inşa olunur. Əhali yeni binalarda məskunlaşırlar. Belə binalara 146 min sakin köçüb. Lakin həmin binaların qazla təchiz olunmaması artıq əhali arasında narazılıqların yaranmasına səbəb olur. Problemin əsası isə həmin binalarda müəyyən problemlərin olmasında göstərilir. Həmin problemlər araşdırılmalı və binalar qazla təmin olunmalıdır.”

Millət vəkili Mübariz Qurbanlı işğal olunmuş torpaqların bütövlükdə ümumiləşdirilərək onların statusunu müəyyən edən, ümumilikdə “İşğal olunmuş ərazilər haqqında” qanun layihəsinin işlənməsini təklif etdi. Bir çox ölkələrin belə bir qanun layihəsinin olduğunu deyən millət vəkili işğal olunan ərazilər haqqında qanun layihəsinin həm hüquqi, həm siyasi baxımdan vacib olduğunu bildirdi.

Cari məsələlər haqqında danışan millət vəkilləri daha çox yaxın günlərdə Daşkəsən rayonunda yerləşən hərbi hissədə baş verən qanlı faciəli hadisəyə münasibət bidirdilər.Millət vəkili İqbal Ağazadə baş verən hadisənin Azərbaycan ordusunun bugünkü vəziyyətinə dəlalət etdiyini bildirdi.

Deputat İsrafil İkram isə həmin ərazidəki hərbi hissəyə Milli Məclisin sədr müavini Ziyafət Əsgərovun başçılığı ilə deputat qrupunun göndərilməsini və bununla da bir daha araşdırmanın nəticələrini ictimaiyyətə çatdırmağı təklif etdi. Deputat Siyavuş Novruz isə baş verən hadisəni ordunun vəziyyəti ilə əqələndirməyin düzgün olmadığını bildirdi. O həmçinin qeyd etdi ki, bu gün Azərbaycan ordusundan yayınanların sayı azalır, günü gündən ordu güclənir. Bu da orduya olan inamın yüksək olmasından xəbər verir: “Hər dəfə baş verən hansısa hadisə ilə bağlı Müdafiə Nazirliyinin hansısa qurumunun hesabatını tələb etmək düzgün deyil. Onlar Ali baş komandan qarşısında məsuliyyət daşıyırlar”.

Ziyafət Əsgərov isə öz növbəsində bildirdi ki, Daşkəsəndəki hərbi hissədə baş verən hadisə hamını narahat edir, bunula bağlı ciddi iş görülür: “Mən bu hadisədən sonra nazirlə danışdım. Hadisə yerinə komissiya göndərilib. Bu hadisə ilə bağlı ciddi tədbirlər görüləcək”. Spiker Oqtay Əsədov da baş verən hadisə ilə bağlı istintaqqrupunun yaradıldığını və cəmiyyətə əlavə məlumat veriləcəyini dedi.

Millət vəkili Pənah Hüseyn cari məsələlər haqqında danışdığı zaman əhalinin qaz borclarının dövlət büdcəsi tərəfindən ödənilməsi haqqında ölkə başçısının sərəncamını gözlənilən bir addımın atılması kimi qiymətləndirdi və bildirdi ki, bu kimi sərəncamlar təkcə qaz sahəsində deyil, elektrik enerjisində də tətbiq edilməlidir: “Sayğaclar qoyulana qədər olan borclar istər dövlət hesabına və yaxud hansısa başqa formada ödənməlidir. Bu məsələdə irəliyə doğru addım atıldı, belə addımların gələcəkdə də atılması əhalinin sosial problemlərinin həlli ola bilər”. Deputat parlamentdə Dağlıq Qarabağla bağlı məsələnin müvafiq icra hakimiyyətlərinin iştirakı ilə müzakirəsinin təşkil olunması təklifini də irəli sürdü.

Millət vəkili Qüdrət Həsənquliyev öz çıxışında həmkarları ilə birgə yollandığı İtaliya səfəri haqqında məlumat verdi: “Onlar da bu münaqişənin öz həllini tapmamasından öz narahatlıqlarını bildirdilər. Minsk qrupun üzvü kimi bu proseslərdə daha fəal iştirak etmək arzusunda olduqlarını diqqətimizə çatdırırdılar. Biz orada vurğulayırdıq ki, Minsk qrupunun həmsdərləri hamısı ermənipərəst mövqedən çıxış edirlər. Fransada, Amerikada böyük erməni diasporu var bu ölkələrin hökümətləri də müəyyən mənada onların təsiri altındadırlar. Hər halda İtaliya ilə bizim münasibətləri genişləndirmək üçün çox böyük imkanlarımız var və onlar bunu xüsusi olaraq vurğulayırdırlar.”

Millət vəkili son zamanlar silahlı qüvvələrdə baş verən hadisələrlə bağlı parlamentin öz reaksiyasını verməli olduğunu bildirdi: “Milli Məclisin səlahiyyəti var ki, hər hansı bir nazirliyin və yaxud səlahiyyətli şəxsi dəvət edib dinləmələr aparsın. Bizə bu səlahiyyət ona görə verilib ki, bu cür hallarda biz bu statusdan istifadə edək”. Millət vəkilinin əfv fərmanlarının verilməsinin tərəfdarı olmadığını vurğuladı. Onun sözlərinə görə yüzlərlə insanların əfv olunması ölkədə cinayətkarlığa qarşı mübarizəyə çox pis təsir göstərir.

Deputat İkram İsrafil Seçki Məcəlləsinə əlavə və dəyişikliklərlə bağlı layihəni parlamentə təqdim etdiklərini, bu sənədin müzakirəyə çıxarılmasının zəruri olduğunu bildirib: “Biz həmçinin təklif edirik ki, proporsional seçki sistemi bərpa olunsun”.

Deputat Siyavuş Novruzov isə həmkarına cavab verərək qüvvədə olan Seçki Məcəlləsinin tam normal olduğunu, hər hansı dəyişikliyə ehtiyac görmədiklərini deyib.

MM sədrinin birinci müavini Ziyafət Əsgərov deyib ki, proporsional seçki sistemi ilə bağlı məsələni indi yox, referendum zamanı qaldırmaq lazım idi: “Buna ehtiyac yoxdur. Düzdür, çoxlu partiyalar var. Amma bu proses hələlik klassik sistem formasına gəlib çatmayıb. Niyə majoritar sistemdən qorxursunuz?”

Millət vəkili Elmira Axundova da həmişə olduğu kimi bir sıra sosial yönümlü məsələlərlə çıxış etdi. Gündəlikdəki məsələlərin mühüm qanunlar olduğunu deyən xanım millət vəkili yaz sessiyasının fəaliyyətində bir sıra qanun layihələrini də görmək istəyir: “Çox istərdim ki, bu sessiyada “Sosial işçilər haqqında” qanun layihəsini görək. Məlumdur ki, bu institut respublikada mövcuddur.Əmək və Əhalinin Sosial Müdafiəsi Nazirliyinin nəzdində iki minə yaxın sosial işçi işləyir.Onların işlərinin öz spesifikası vardır. Lakin yaxşı olardı ki, bütün bunlar bir qanunla tənzimlənsin. Sosial işçilərə tələbat böyükdür. Həmçinin bu sessiyada gənc ailələrin sosial müdafiəsi haqqında, mərasimlər haqqında layihələri görmək istərdim.”

E.Axundovanın daha bir təklifi isə təqvimimizə daha bir yeni bayram gününün əlavə edilməsi ilə bağlı oldu. 8 mart beynəlxalq qadınlar gününün bayram olaraq artıq sosialist məkanında yaranan müstəqil dövlətlərdə qeyd olunmadığını deyən millət vəkili həmin bayramın analar günü bayramı ilə əvəz edilməsi təklifi ilə çıxış etdi: “Avropa ölkələrində və ABŞ da bu bayram qeyd edilmir. Onun əvəzinə bu ölkələrdə analar günü qeyd edilir. Rusiyanın birinci xanımının təşəbbüsü ilə Rusiyada iki ildir ki, “Ailə, məhəbbət və sədaqət günü” kimi qeyd edilir. Nümunəvi ailələr xüsusi diplomlarla medallarla təltif olunurlar. Təklif edirəm ki, təqvimizə yeni bir bayram günü “analar günü” əlavə edilsin. Bu bayramı ana və ailə günü kimi qeyd etmək olar. Bu bayramı 28 apreldə qeyd etmək yerinə düşər. Bildiyimiz kimi 28 aprel görkəmli alim, ictimai xadim, gözəl insan, ana akademik Zərifə Əliyevanın ad günüdür.”

Millət vəkili Əli Əhmədov çıxışında bəzi həmkarlarının parlamentin səmərəsiz fəaliyyəti ilə bağlı səsləndirdikləri fikirlərinə münasibət bildirərək qeyd etdi ki, ötən sessiyada parlament səmərəli fəaliyyət göstərib, növbəti sessiyada da təklif olunan gündəlik əsasında səmərəli və faydalı fəaliyyət göstərəcək: ”Bəzi deputatlar tərəfindən Milli Məclisin fəaliyyətinin yaxşı olmaması ilə bağlı səslənən fikirlərə öz etirazımı bildirirəm. Bəzi adamlar bütövlükdə fəaliyyətin səmərəliliyinin nədən ibarət olduğunun aydın şəkildə görə bilmir. Əgər milli məclisin fəaliyyətinin səmərəliliyini 90-cı illərdə olduğu kimi zalda siqaret tüstüsündə, qalmaqallarda görürlərsə, bu da fikirlərin normal olmadığından xəbər verir. Parlament yetkinlik yaşındadır. Təbii ki, yetkinlik yaşında olan parlamentin fəaliyyəti bir sıra mühüm dəyərlərə, prioritetlərə söykənir. Bu prinsiplər əsasında parlement Azərbaycanın inkişafına özünün töhfəsini verib, respublikanın inkişafı üçün səmərəli hüquqi baza yaradıb.”

Oqtay Əsədov bir qrup deputatdan narazılığını bildirib. O deyib ki, yaz sessiyası üçüncü çağırış Milli Məclisin sonuncu tam sessiyasıdır: “Ona görə bu sessiyasını indiyədək necə olubsa, gərək bundan sonra da ləyaqətlə aparaq. Amma mən televiziyaya baxanda, mətbuatı oxuyanda bəzən təəssüf hissi keçirirəm. Bəzi deputatlar deyirlər ki, Milli Məclis işləmir, səlahiyyəti yoxdur, olan səlahiyyətini də yerinə yetirmir. Baxmayaraq ki, onlar öz aramızda oturublar, amma belə danışırlar. Belə deputatlar mövqesiz deputatlardır”.

Spiker bildirib ki, kimin necə işlədiyini, qanun layihələri hazırladığını hamı yaxşı bilir.

O.Əsədov qeyd edib ki, belə deputatların işi yalnız populist şəkildə Milli Məclisdən danışmaqdan ibarətdir: “Bir qrup yaranıb ki, işləri yalnız Milli Məclisdən danışmaqdır. Elə bil özləri Milli Məclisdə işləmirlər, Amerikada yaşayırlar. Bunun köklü səbəbləri var. Mən bunun səbəblərini demək istəmirəm. Milli Məclis necə işləmir ki, dörd ildə 938 qanun qəbul edib? Ona görə də işimizdə diqqətli olaq və işimizi şərəf və ləyaqətlə başa vuraq”. Müsavat deputat qrupunun üzvü Pənah Hüseyn isə deyib ki, son illər Milli Məclisin səlahiyyətləri xeyli azaldılıb, iclaslarda deputatların çıxış müddəti dəfələrlə kəsilib. Bu da parlamentin işindən narazılıq yaradır.

G.BÜNYADZADƏ

Paritet.- 2010.- 2-3 fevral.- S. 3.