“Biz mübarizəmizi daha çox mədəniyyət istiqamətində aparırıq”

“Can Azərbaycan” televiziyasında sentyabr ayından Qarabağ probleminə həsr edilmiş proqram yayımlanacaq

Erməni terrorizmi və xalqımızın qanlı tarixi ilə bağlı faktların, həqiqətlərin, tarixi sənədlərin dünyaya çatdırılmasında diaspor təşkilatlarının və telekanalların da rolu əvəzolunmazdır. Əsasında azərbaycançılıq, türkçülük ideyası duran, artıq xeyli müddətdir ki, yayımlanan telekanallardan biri də “Canaz” TV-dir. Bizdə İzmir Azərbaycan Mədəniyyət Mərkəzinin və “Canaz” TV-nin(www.canaz. tv) rəhbəri Cəmal Məmmədxanoğlu ilə həmsöhbət olub, rəhbəri olduğu telekanalda erməni terrorizminin , Qarabağ probleminin hansı formada işıqlandırılması ilə maraqlandıq. O ilk olaraq bizimlə söhbətə İzmir Azərbaycan Mədəniyyət Mərkəzinin qeyd etdiyimiz məsələlər ətrafında gördüyü işlərdən danışmaqla başladı.

-Azərbaycan lobbisinin inkişaf və gəncləndiyi bir zamanda dünyada olan diaspor təşkilatları öz fəaliyyətlərini gücləndirib. Və bizdə İzmir Azərbaycan Mədəniyyət Mərkəzi olaraq bu fəaliyyətə qatılırıq. Onu da qeyd edim ki, bizim təşkilat siyasi deyil, mədəniyyət sahəsi üzrə fəaliyyət göstərməyə üstünlük verən bir qurumdu. Belə ki, hər il Azərbaycan adı altında tədbirlər, Novruz şənlikləri, festivallar keçiririk. Ən son bu il novruz bayramı ərəfəsində böyük festival təşkil etdik. Sözügedən festival bir neçə gün davam etdi. Festival Bakı gecələri, Təbriz gecəsi, Qarabağ gecəsi, Bəxtiyar Vahabzadə gecəsi, Rəşid Behbudov gecəsi və s. kimi gecələri təşkil etdik. Bu gecələrdə bütün çıxışlar, söhbətlər və ifa edilən mahnıların hamısı Qarabağ məsələsinə və Azərbaycanın bütövlüyünə həsr olunur. Bu gün öz fəaliyyətində siyasi məsələlərə üstünlük verən çoxsaylı diaspor təşkilatlarımız var. Bizim təşkilat isə insanlara -dünyada yaşayan azərbaycanlılara, əcnəbilərə Azərbaycanın bütövlüyü və Qarabağ məsələsi ilə bağlı məqamları mədəniyyət yolu ilə çatdırır.Və düşünürük ki, Qarabağa həsr olunmuş və bu ad altında ifa olunan mahnını bir xarici vətəndaş eşidirsə, o bizlərdən soruşacaq ki, Qarabağ haradır? . Bizdə onun sualını ətraflı cavablandıracağıq və Qarabağ haqda bilgisi olacaq. Biz təşkilat olaraq bu cür işləyirik. Yəni işimizdə insanlara daha tez təsir edən və qavraya biləcək üsullardan istifadə edirik. Qaldı siyasi tərəfdən Qarabağ məsələsinin qabardılmasını, bu haqda informasiyaların geniş auditoriyaya çatdırılmasını və bu mövzuda proqramların hazırlanmasını biz televiziyamız ( “Canaz” TV (www.canaz. tv) vasitəsilə edirik.

- Qarabağ problemi və ermənilərin xalqımıza qarşı törətdiyi dəhşətlər sizin televiziyada hansı formada işıqlandırılır?

-Ümumiyyətlə, qeyd edim ki, “Can Azərbaycan” Türkiyədə yaşayan azərilər adına yayıma başlayıb, ancaq dünyada yaşayan 50.000.000-dən çox Azərbaycan türkünün televiziyası olmaq istəyindədir. “Canaz” TV Türkiyədə yaşayan azərbaycanlıların Türkiyə dövlətinin əsl ünsürlərindən biri olduğunu düşünür. “Canaz” TV milli bir televiziyadır, yəni hər hansı bir dövlətə, sərmayə qrupuna, mənfəət qrupuna bağlı deyil. O vətəndaş cəmiyyəti xüsusiyyətlərini daşıyır. Eyni zamanda “Can Azərbaycan”, əsas olaraq mədəni bir televiziyadır. Kanalımız imkan daxilində Azərbaycan mədəniyyətinə xidmət edir. Mədəniyyətimizin, yaşaması, inkişafı, sevilməsi, unudulmamasına çalışır. “Canaz” dünyada yaşayan azərbaycanlıların ən ümdə iki milli məsələsində, əlindən gələn hər şeyi edər. Bu məsələlərdən birincisi; xalqımızın böyük bir əksəriyyəti, ana dildə təhsil haqqından məhrum yaşayır və bu səbəblə, ana dilində təhsil haqqı üçün böyük mübarizə aparır. Televiziyamız, bu mübarizənin hər vaxt yanında olacaq. İkinci məsələmiz isə, 1 milyondan çox vətəndaşımızın, doğma torpaqları, vətənləri işğal edilib. “Canaz” TV, işğal edilmiş torpaqlarımızda, Qarabağda işğalın sona çatdırılması üçün verilən bütün mübarizələrin yanında olacaq.

Bizim televiziyanın qarşısına qoyduğu əsas məqsəd dünya azərbaycanlılarının problemini dünya ictimaiyyətinə çatdırmaq, imkanımız daxilində bu istiqamətdə işlər aparmaqdır.Təbii ki, Azərbaycan və Ermənistan münasibətləri də bizim televiziyamızda daha ön hissədə olan, 1-ci dərəcəli vacib hesab etdiyimiz və həllini səbrsizliklə gözlədiyimiz problemdir. Nəzərinizə çatdırım ki, “Canaz” TV-nin gündə iki dəfə olmaqla canlı xəbərlər proqramı var. Demək olar ki, xəbərlərimiz dörd bölmədən ibarətdir. Xəbərlərin ilk bölümü Qarabağ, Cənubi Azərbaycan problemi ilə başlayır. Digər bölümlər isə şimal xəbərləri, sonra Türkiyə xəbərləri və türk dünyası, ən son bölmədə isə dünyadan xəbərlər çatdırırıq. Bizim xəbər qayəmiz belədir. Və hər gün Azərbaycan Ermənistan münasibətlərini gündəmdə saxlayıb, daha dəqiq məlumatları çatdırmaq istəyirik.

- ”Canaz” TV-də Qarabağla bağlı xüsusi bir proqram yayımlanırmı?

-Konkret olaraq desək, bizim televiziyada sırf Qarabağ probleminə həsr olunmuş proqram yoxdur. Bu hal da bizim Bakıda deyil, İzmirdə yayımlanmağımızdan irəli gəlir. Dəvət olunan qonaqlar da önəmlidir. Bakıda hər hansı telekanalda Qarabağla bağlı yayımlanan proqrama istədiyin politoluqu, tarixçini dəvət etmək daha rahatdır. Məkanın məsafəsini nəzərə alsaq, bunu bizim televiziyada etmək bir az çətindir. Çünki burda bu kontingenti tapmaq çətindir. Bunun üçün həftəlik proqram yayımlamaq olmur. Amma belə qonaqlar olduqda dəvət edib onlardan proqram hazırlayırıq. Məsələn, ən son qonağımız TÜRKSAM-nın rəhbrəri Sinan Oğan olub. İki həftə əvvəl Sinan bəyin iştirakı ilə Qarabağla bağlı canlı proqram hazırladıq. Qarşıdan gələn sentyabr ayında isə sırf belə bir proqramın yayımlanmasını nəzərdə tutmuşuq. Amma onu qeyd edim ki, “Canaz”-ın hazırladığı Qarabağ adlı sənədli filmlər var. Burada Xocalı faciəsini ictimaiyyətə çatdırmaq üçün 25 dəqiqəlik film hazırlamışıq. Hazırladığımız filmlərin əsas fərqi ondan ibarətdir ki, Xocalıda iştirak etmiş rus və erməni ordusunu və Xocalının az yaşlı qurbanlarını adlarıyla orda işıqlandırmışıq. Bundan əlavə bizim arxivimizdə dünyada erməni yalanlarını, Qarabağ həqiqətləri, Qarabağ probleminin tarixi haqqında digər ölkələrdə çəkilmiş sənədli filmlər var ki, onları da televiziyamızda tez-tez yayımlayırıq.

“Azərbaycanı tanıyaq” adlı daha maraqlı bir proqamımız var. Bu tanıtım proqramında Azərbaycanın bütün şəhərlərinin görüntülərini yayımlayırıq. Xüsusilə də Qarabağ və Cənubi Azərbaycan şəhərlərinin görüntüləri. Bu da ona dəlalət edir ki, Cənubda oturub bizi izləyən soydaşımız Laçının adını eşidirsə və onun mənzərələrini görərsə bu ad onun beyninə həkk olur və bilir ki, Qarabağda Laçın adında şəhər var. Həmçinin, Urmiya adında şəhəri duyan hansısa xaricdə doğulan soydaşımız onu Azərbaycan şəhəri kimi tanıyır. Biz mübarizəmizi daha çox mədəniyyət istiqamətində aparırıq.

Xatırladım ki, bu il bütün Dünya Azərbaycanlılarının yaddaşında həkk olunan 31 Mart Soyqırımı ilə bağlı qısametrajlı filmlərin və sosial reklamların yayımlanmasına qərar verdik. Bu baxımdan 31 Mart soyqırımı ilə əlaqədar olaraq insanlarımızın əməyinin hər kəsə çatdırılmasını istədik. Azərbaycanda və digər ölkələrdə fəaliyyət göstərən azəri qeyri-hökumət təşkilatları, biznes təşkilatları və s. qurumlar öz qısametrajlı filmlərini və ya sosial çarxlarını hazırlayıb bizə göndərdilər, biz də kanalımızda yayımladıq.

- Sizin kanalda Qarabağ mövzusu ilə bağlı yayımlanan verilişlərə dünya azərbaycanlıları necə reaksiya verir?

- “Canaz” bütün dünya azərbaycanlılarının kanalı olduğu üçün Azərbaycanı bütöv görür. Burda tək Qarabağ deyil, Azərbaycanın şimalında və cənubunda baş verən hadisələr günbəgün izlənir və cənubda yaşayan soydaşlarımızın maariflənməsi üçün milli mədəni proqramlar, CD-lər yayımlayırıq. Bütün televiziyalarda olduğu kimi bizim saytımızda şərhlər bölümü var. Hər gün qeyd etdiyim bu şərhlər bölümünə və bizə gələn məktubları sizə göstərsək görərsiniz ki, dünyanın hər yerindən bizi izləyənlər daxillərində olan hisslərini bizimlə paylaşırlar. Məsələn, Qarabağla bağlı hazırladığımız sənədli filmlər yayımlananda Türkiyədə və xaricdə yaşayan azərilər, türklər öz narahatlıqlarını və döyüşmək əzmində olduqlarını bizə yazmışdılar. Təbrizdən bir soydaşımız yazmışdı ki, müharibə başlasın , gələk, torpaqlarımızı erməni terroristlərindən azad edək. Bu onu göstərir ki, demək biz Türkiyə məkanından çıxıb dünya azərbaycanlılarının kanalı olmağı bacardıq. Bu gün qeyd etdiyimiz problemlərimizi dünyaya çatdırmaqda hardasa bizim də töhfəmiz var.

Günay ƏSƏDOVA

Paritet.- 2010.- 6-7 iyul.- S. 7.