Musiqi mənim mənəvi qidamdır

 

Ruslan Əkbərov: Muğamın incəliklərini hələ heç kim tam anlaya bilməyib

 

İnsan var ki, müğənniliyə populyarlıq xatirinə maddi ehtiyacdan gəlir. İnsan da var ki, mənəvi ehtiyacdan doğaraq müğənni olmaq istəyir. Yəni, belə adamlar necə deyərlər oxumasalar qala bilməzlər. Əsl musiqi istedadı da budur və İmmanuel Kant demişkən bu istedad necə olurasa-olsun öz başına bir çarə qılacaq. Müsahibimiz Ruslan Əkbərov da belə musiqi istedadı olan insanlardandır. Onu müğənniliyə çəkib gətirən də mənəvi olaraq içindən gələn istəkdir.

 

-Oxucularımız Sizi tanısın deyə ilk olaraq özünüz haqqında danışardınız..

- Mən 1985-ci ildə Sumqayıt şəhərində anadan olmuşam. Elə orada da 37 saylı orta məktəbi bitirmişəm. 1992-ci ildən Səid Rüstəmov adına musiqi məktəbində təhsil almışam. 2003-cü ildə isə Mədəniyyət İncəsənət Universitetinin muğam şöbbəsinə qəbul olundum. Orada kafedra müdirimiz Canəli Əkbərov, mərhum sənətkarımız İslam Rzayev, Gülyanaq Məmmədova, Simarə İmanova, Qorxmaz Əlili Vaqif Gərayzadədən dərs almışam. 2007-ci ildə mən universiteti bitirdikdən sonra Türkiyədə işlədim. Məni ora türk adamı Nizam Albayraq dəvət etmişdi. Bir il müddətində Türkiyədə axşamlar kübar insanların istirahət etdiyi yerdə mahnılar oxuyurdum.

- Belə başa düşdüm ki, sizin müsiqiyə həvəsiniz uşaqlıqdan olub.

- Mənim bu sənətə həvəsim 6 yaşından yaranıb. Çünki məmin atamın, atamın əmilərinin, bibilərimin gözəl səsi var. Yəni bu, nəsildən gələn, irsən olan bir şeydir. Düzdü, valideynlərim istəyirdilər ki, mən hüquqşünas olum. Amma mənim incəsənətə meyilim daha çox idi. Çünki oxumaq mənim içimdən gəlir. Məsələn, mən səhər yuxudan ayılanda ilk olaraq oxumaq istəyirəm. Bu mənim özümdən asılı deyil. Oxuyuram, elə bil rahatlaşıram. Musiqi mənim mənəvi qidamdır. Məhz buna görə mən qət etmişəm ki, Allahın izni ilə müğənni olacağam.

-Hazırda musiqi sahəsində təhsilinizi davam etdirirsiniz?

- Mən Sumqayıtda Kimyaçılar Mədəniyyət saraynda uşaqlara muğamdan dərs deyirdim. İndi fərdi olaraq həftədə iki gün müəlliməm Samirə İmanovanın yanına gedirəm. Onunla həm müğam, həm xalq mahnıları üzrə məşqlər edirik. Eyni zamanda Rəşid Behbudov adına Mahnı tetrında Gülyanaq Məmmədova ilə məşqlərimiz olur.

-Sumqayıtda keçirilən rəsmi konsert tədbirlərinə dəvət olunursunuz?

- Sumqayıtda keçirilən dövlət tədbirlərinə hər zaman məni dəvət edirlər. O cümlədən Bakıda regionlarda təşkil olunmuş bir sıra konsertlərdə çıxışlarım olub. Buna görə Sumqayıt şəhər icra hakimiyyətinin rəhbərliyinə öz minnətdarlığımı bildirirəm. Bir sağ olsun xalqımız, toylar da dəvət edəndə gedirəm. Yeri gəlmişkən Sumqayıt Kimyaçılar Mədəniyyət sarayının müdiri Ədalət Quliyevə xüsusi təşəkkür edirəm . O həm uşaqlıqda musiqi müəllimim olub, həm tədbirləri olanda məni dəvət edir.

-Hansı janra üstünlük veririsiniz?

- Mən həm mügam, həm estrada, həm xalq mahınları ifa edirəm. Eyni zamanda dini mahnılar da ifa edirəm. Bu da hər bir müğənniyə xas olmur. Elə müğənni var ki, muğamı oxuyur, amma onda estrada alınmır. ya estrada oxuyur, amma muğam oxuya bilmir. Mən isə səs tembrim buna imkan veririr. Bunu da mənə müəllimlərim deyib.

-İndiyə kimi neçə diskiniz işıq üzü görüb?

- Bu vaxta kmi iki diskim çıxıb. 2004-cü ildə bir neçə müğənninin mahnısı olan diskdə mənim mahnım yer almışdı. Fərdi olaraqsa 2006-cı ildə öz albomumu buraxdım. Səbuhi studiyasında yazılmış bu albomda xalq mahnılarımız, təsniflərimiz türk manılarından ibarət 10 musiqi var. Orada Oqtay Kazıminin Taleyim mənim, Yaşayır insan mahnıları var. Sonra İslam Rzayevin Gəl inad etmə şur təsnifi, Emin Sabitoğlunun Bu gecəm mahnısı s. mahnılar yerləşdirlib.

-Bəs, klipiniz necə?

-2004-cü ildə AzTv tərəfiindən bir klip çəkdirmişəm. Bu kilip sonradan müxtəlif mərkəzi regional televiziylarda da verildi. O, qəmli baxışlarla adlanan bu klipin rejissoru Oqtay Əliyevdir. Sözləri Zahir Abbasa məxsusdur. Müsiqisi oranjmanı isə Mahir Tahiroğluna adiddir.

-Mümkünsə bu sahədə planlarınız haqda danışardınız?

- İnşallah, yeni diskin üzərində işləyirəm. Bu diskdə 10 mahnı olacaq. Əvvəlki diskdən bunun fərqi odur ki, burada sırf öz manılarım olacaq. Bunların da hamısı oxunmamış mahnılardır. Diskdə Vaqif Gərayzadənin, Tunarın, Mahir Tahiroğlunun Nizam Albayraqın mahnıları yer alacaq. Hələlik məşqlər gedir. Sağlıq olsun çalışacam 2011-ci ilin əvvələrinə bu disk işıq üzü görsün. Eyni zamanda bu albomdan sonra yeni klip çəkdiməyi planlaşdırıram.

-Muğamı oxuyan daha yaxşı bilir, yoxsa dinləyən?

- Mən muğamı oxumaqdan daha çox zövq alıram. Amma əsasən özüm Hacıbaba Hüseynov, Səxavət Məmmədov, Ağaxan Abdullayev, Simarə İmanovanın muğamlarına qulaq asıram. Amma bildirim ki, muğamın incəliklərini hələ heç kim tam anlaya bilməyib. Muğam bir dəryadır. Məsələn, Seyid Şuşinski özü etiraf edib ki, muğamı tam anlaya bilməyib. Muğamı tam bilmək qeyri-mümkündür.

- Hazırda əlinizdən tutub qaldıran varmı?

- Bilirsiniz, müəllimlik ayrı bir işdir, tələbəni qaldırmaqsa ayrı. Əvvəldə dediklərim mənə müəllimlik ediblər. Sağ olsunlar, hamısına minnətdaram. Amma qaldı ki, əlimdən tutmağa, hələlki kimsə yoxdur. Hazırda mən bu sənətdə ilk addımlarımı atıram. Sağ olsunlar mənə bu işdə kömək edən insanlar. İnşallah, müğənni İzzət Bağırovla bir yerdə çalışmağı planlaşdırıram. Bu baxımdam o mənə öz dəstəyini göstərməyə başlayıb.

-Sizin pasport mahnınız hansıdır?

- Dilbərim mahnısı. İlk dəfə Mədəniyyət İncəsənət Universitetində keçirilən bir tədbirdə həmin mahnını ifa etmişdim. Çox bəyənildi. Belə desək mən həm bu mahnı ilə tanındım. Çox yayılıb, özüm konsertlərdə, dövlət tədbirlərində bu mahnını oxuyuram.

-Haradasa sizin mahnılarınızın oxunduğunu eşidəndə hansı hisslər keçirirsiniz?

- Belə çox olur mən həddindən artıq sevinirəm. Sənətçi üçün bu həm böyük qürurudur. Hiss edirəsən ki, xalq səni qəbul edir. Xalq kimisə qəbul etməsə qulaq asmaz.

- İndiyə kimi oxuduğunuz mahnıların arasında ən ürəyinzcə olanı hansıdır?

- Ürəyimcə olan mahnı var. Düzdü, həmin mahnının möhürünü mərhum müğənni Səxavət Məmmədov vurub. Bu onun ifa etdiyi Azad bir quşdum mahnısıdır. Bu vaxta kimi onu kimsənin oxuduğunu eşitməmişəm. Mən Mədəniyyət İncəsənət Universitetinə qəbul üçün qabiliyyət imtahanı verəndə bu mahnını oxumuşdum. Müəllimlər dedi ki, bu möhürlü mahnıdır, amma məndə alındı. İndi demirəm Səxavət Məmmədov kimi oxudum. Amma hər halda Rüslan Əkbərov kimi oxudum. Ümumiyyətlə, istərdim ki, hərə özü olsun. Məsələn, Səxavət Məmmədov olub. İkinci Səxavət heç zaman gəlməyəcək. Mən musiqi aləmində ancaq Ruslan Əkbərov ola bilərəm...

 

 

Əkbər

 

Paritet.- 2010.- 22-23 iyul.- S. 12.