“Prezidentin milli mətbuat günündə imzaladığı sərəncamlar bu sahənin inkişafına davamlı dəstəyin bariz nümunəsidir”

Mətbuat Şurası İdarə Heyətinin üzvü, “İki sahil” qəzetinin baş redaktoru, əməkdar jurnalist Vüqar Rəhimzadənin SİA-ya müsahibəsi

-Sizi Mətbuat Şurasının təsis etdiyi Ali Media Mükafatına layiq görülməniz münasibətilə təbrik edirik. Ölkə Prezidenti İlham Əliyevin jurnalistlərin sosial vəziyyətinin yaxşılaşdırılması məqsədilə imzaladığı fərmanı necə qiymətləndirirsiniz və bu, Azərbaycan mətbuatının inkişafına necə təsir göstərəcək?

- Çox sağ olun, təşəkkür edirəm. Demokratiyanın vacib amillərindən biri olan azad mətbuatın inkişafı daim dövlətin diqqətindədir. Müasir Azərbaycan dövlətinin qurucusu ulu öndər Heydər Əliyevin xalqın təkidli tələbi ilə hakimiyyətə qayıdışından sonra bu istiqamətdə ardıcıl tədbirlər həyata keçirilməyə başlandı. “Mətbuat cəmiyyətin güzgüsü, həqiqətin çarçısıdır” söyləyən ümummili lider Heydər Əliyev eyni zamanda bildirirdi ki, jurnalist əməyi qeyri-adi əməkdir. Böyük səy, zəhmət, cəsurluq, hünər, fədakarlıq, öz peşəsinə vurğunluq tələb edən əməkdir. Ulu öndərin uğurlu siyasəti nəticəsində söz və məlumat azadlığını məhdudlaşdıran süni maneələr aradan qaldırıldı, KİV-lərin fəaliyyətini tənzimləyən qanunvericilik bazası təkmilləşdirildi. Mətbuatın maddi-texniki bazasının möhkəmləndirilməsi daim diqqət göstərilən məsələlərdən olub. Ulu öndərin, eyni zamanda bu siyasi kursun uğurlu davamçısı cənab İlham Əliyevin müxtəlif istiqamətləri əhatə edən fərman və sərəncamlarına diqqət yetirməklə azad mətbuatın inkişafına göstərilən diqqətin bir daha şahidi olarıq.

“Əkinçi” qəzetinin 135 illiyinin respublikanın bütün bölgələrində yüksək səviyyədə qeyd olunması, jurnalistlərin fəxri adlarla mükafatlandırılması, 32 qəzet redaksiyasının hər birinə 20 min manat birdəfəlik maliyyə yardımı ayrılması, mətbuat işçilərinin sosial müdafiəsinin gücləndirilməsi ilə bağlı sərəncamın imzalanması dövlətin mətbuata qayğısının bariz təcəssümüdür. Yubiley günündə Mətbuat Şurasının yeni binasının açılış mərasimində Prezident İlham Əliyevin iştirakı da bu diqqətin göstəricisidir. Bu diqqət və qayğı mətbuat nümayəndələrini daha da ruhlandırır, obyektivlik, gerçəklik prinsiplərini əldə əsas tutaraq daha sanballı yazılar ortaya çıxarmalarına stimul verir. Mətbuat tarixində ilk dəfə olaraq cənab İlham Əliyevin jurnalistlərin sosial müdafiəsinin gücləndirilməsi tədbirləri haqqında sərəncamı bu sahənin əməkdaşları tərəfindən daha böyük sevinclə qarşılandı. Sərəncamda da Azərbaycan mətbuatının keçdiyi inkişaf yolu, daim dövlətin diqqət və qayğısı ilə əhatə olunması, KİV-lərin maddi-texniki bazasının möhkəmləndirilməsi ilə bağlı ardıcıl tədbirlərin həyata keçiriməsi xüsusi qeyd edilir. Sənədə əsasən mətbuat işçilərinin mənzil şəraitinin yaxşılaşdırılması və onlar üçün yaşayış evlərinin tikilməsi məqsədilə 2010-cu il dövlət büdcəsində nəzərdə tutulmuş Azərbaycan Respublikası Prezidentinin Ehtiyat Fondundan Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fonduna 5 milyon manat vəsait ayrılıb. Sözsüz ki, bu, böyük diqqət və qayğıdır. Hər bir sahədə yüksək nəticələrin əldə olunması, ilk növbədə, işçilərin sosial vəziyyətindən, onlara göstərilən diqqət və qayğıdan asılıdır.

Düşünürəm ki, Prezident İlham Əliyevin jurnalistlərin sosial müdafiəsinin gücləndirilməsinə xidmət edəcək bu sərəncamı mətbuat işçilərini daha səylə çalışmağa, üzərilərinə düşən məsuliyyəti lazımi səviyyədə yerinə yetirmələrinə geniş imkanlar yaradacaq. Bu addım eyni zamanda belə bir həqiqəti də ortaya qoyur ki, dövlətin iqtisadi siyasətinin əsasında bütün kateqoriyadan olan vətəndaşların sosial problemlərinin həlli dayanır. Maliyyə imkanları artdıqca hər bir sahənin əməkdaşları bu inkişafı, tərəqqini özünün gündəlik həyatında, sosial vəziyyətinin yaxşılaşmasında hiss edirlər. Bütün dövrlərdə cəmiyyəti düşündürən problemləri, dövrün qabaqcıl ideyalarını əks etdirən, milli və bəşəri dəyələrin təbliğində mühüm rol oynayan mətbuatın inkişafı öndədir.

- Redaksiyaya ayrılan 20 min manat vəsait əsasən nəyə xərclənəcək? Bu vəsaitin xərclənməsində daha çox hansı məsələ, perspektivlər əsas götürülməlidir?

- Möhtərəm Prezidentimiz İlham Əliyevin “Azərbaycan milli mətbuatının 135 illiyi ilə əlaqədar tədbirlərin maliyyələşdirilməsi və Azərbaycan Respublikasının kütləvi informasiya vasitələrinə birdəfəlik maliyyə yardımının göstərilməsi haqqında” sərəncamına əsasən 32 qəzet redaksiyasının hər birinə 20 min manat birdəfəlik maliyyə yardımı ayrılıb. Təbii ki, bu yardımların göstərilməsində əsas məqsəd qəzetlərin maddi-texniki bazasını, iqtisadi müstəqilliyini gücləndirmək, jurnalistlərin peşəkarlığını daha da artırmaqdır. Bu məqsədə uyğun olaraq qəzetimizə ayrılan vəsait də məhz bu istiqamətlərə yönəldiləcək. Dövlət başçısı İlham Əliyev Mətbuat Şurasının yeni binasının açılışındakı çıxışında xüsusi vurğuladı ki, hər sahədə peşəkarlığın artırılması prioritet məsələdir. O cümlədən jurnalistikada peşəkar kadrların yetişdirilməsi daha vacibdir. Bu peşəkarlığın artırılmasında vacib amillərdən biri də əməkdaşların redaksiya daxilində mükafatlandırılmasıdır. Bu kimi tədbirlərin keçirilməsi jurnalistlərdə məsuliyyəti artırır, redaksiyada yaradıcılıq mühitinin daha da inkişafına stimul verir. Sözsüz ki, ayrılan vəsait istiqamətə də yönəldiləcək.

-Jurnalistlərin evlə təminatı məsələsi ilə bağlı cənab Prezidentin sərəncamının icrası zamanı hansı meyarlar nəzərə alınmalıdır?

- Sərəncamda da qeyd edildiyi kimi məqsəd mətbuat işçilərinin mənzil şəraitinin yaxşılaşdırılması və onlar üçün yaşayış evlərinin tikilməsidir. Sərəncamın icrası zamanı mənzil şəraiti yaxşı olmayan, daha dəqiq desək, evsiz jurnalistlər ilk növbədə nəzərə alınacaq.

- Artıq mətbuatımıza dövlət tərəfindən kifayət qədər iri həcmli yardımlar ayrılır. Bu vəsaitlər problemlərin həll edilməsinə kifayət edəcəkmi? Ümumiyyətlə, mətbuat nə vaxt yardıma ehtiyac duymadan özünü tam təmin edə biləcək?

- Azərbaycan bütün sahələrdə uğurla inkişaf edir. Hər bir uğur növbəti nailiyyət üçün başlanğıcdır. Bircə faktı qeyd etmək kifayətdir ki, milli mətbuatımızın 135 illiyinin belə yüksək səviyyədə keçirilməsi, dövlət başçısı İlham Əliyevin redaksiyalara birdəfəlik yardım ayırması, mətbuat işçilərinin sosial müdafiəsinin gücləndirilməsi, eyni zamanda, jurnalistlərin fəxri adlarla təltif olunması haqqında sərəncamları bir daha təsdiqləyir ki, ölkənin ictimai-siyasi həyatında, demokratikləşmə və müasir vətəndaş cəmiyyəti quruculuğunda böyük rola malik olan mətbuatın inkişafı daim dövlətin diqqətindədir. İqtisadi inkişaf demokratiya ilə sıx bağlıdır. Demokratik və iqtisadi islahatların paralel aparılması Azərbaycanı daha da möhkəmləndirir, qüdrətləndirir. Bu baxımdan deyə bilərik ki, mütəmadi olaraq ayrılan vəsaitlər mətbuatın maddi-texniki bazasının güclənməsinə, jurnlistlərin azad fəaliyyətinə, peşəkarlıqlarının daha da artırılmasına geniş imkanlar yaratsa da, ötən hər il qarşıya yeni məqsədləri qoyur. Bu məqsədlərə nail olmaq üçün isə dövlət hər sahəyə, o cümlədən də mətbuata diqqət və qayğısını artırır. KİV-lərin inkişafına Dövlət Dəstəyi Konsepsiyasında da qeyd edildiyi kimi, hüquqi dövlət və vətəndaş cəmiyyəti quruculuğunun dərinləşməsi, Azərbaycanın dünya informasiya məkanına daxil olması və informasiya cəmiyyətinə keçid şəxsiyyətin, cəmiyyətin və dövlətin informasiyaya olan tələbatının daha dolğun ödənilməsinə, kütləvi informasiya vasitələrinin fəaliyyətinin təkmilləşməsinə və müasir dövrün tələblərinə uyğunlaşmasına ehtiyac yaradır. Bu baxımdan mətbuata dövlət qayğısı davamlıdır. Bu diqqət və qayğıya görə dövlət başçısı İlham Əliyevə minnətdarlığımı bildirir və bundan sonra da peşəkarlıq, obyektivlik, yüksək milli şüur və vətənpərvərlik prinsiplərini əsas tutaraq, milli-mənəvi dəyələrimizin inkişafına, tarixi həqiqətlərimizin təbliğinə, ən əsası dövlətimizin daha da qüdrətlənməsinə, möhkəmlənməsinə, beynəlxalq aləmdə nüfuzunun artmasına xidmət edəcəyik.

Paritet.- 2010.- 27-28 iyul.- S. 8.