Ordumuz iftixar yerimizdir

Bu gün hər bir Azərbaycan vətəndaşının ordumuzla fəxr etməyə haqqı var. Çünki ötən illər ərzində Silahlı Qüvvələrimizin inkişafında əsaslı uğurlar qazanılıb. Artıq heç bir şübhə yoxdur ki, Azərbaycanın müasir tələblərə cavab verə biləcək ordusu torpaqlarımızı düşməndən etibarlı müdafiə etməyə qadirdir.

Cəmi 23 il yaşamış Azərbaycan Xalq Cümhuriyyəti ilə yaşıd olan ordumuz yarandığı ilk dövrdən etibarən əzablı bir yol keçib gəlib. Tariximizdən məlum olduğu kimi, Cümhuriyyətin elan olunmasından bir müddət sonra, 1918-ci ilin 26 iyununda əlahiddə Azərbaycan Korpusu yaradılmaqla müasir ordumuzun təməli qoyulub. Cümhuriyyətin qısa mövcudluğu zamanında məşhur generallar Səməd bəy Mehmandarov, Əlağa Şıxlinski kimi peşəkar hərbçilərin rəhbərliyi altında yüksək nizam-intizama və döyüş qabiliyyətinə malik olan ordu hissələri formalaşmışdı. Təəssüf ki, bolşeviklərin hakimiyyəti ələ keçirməsi ilə Cümhuriyyətin mövcudluğuna son qoyuldu.

Nəhayət, 70 illik sovet rejimi süquta uğradı və xalqımız yenidən tarixi müstəqilliyinə qovuşdu. 1991-ci ildə Azərbaycanın dövlət müstəqilliyi haqqında Konstitusiya aktının qəbul edilməsi ilə ölkəmizin həyatında tamamilə yeni bir mərhələnin başlanğıcı qoyuldu. Amma müstəqiliyimizin ilk illərində hakimiyyətin qeyri-peşəkarlar tərəfindən idarə edilməsi və torpaqlarımızın erməni hərbi birləşmələrinin təcavüzünə məruz qalması xalqımızı çətin sınaqlarla üz-üzə qoydu. Və həmin dövrdə müstəqil dövlətçiliyimizin itirilməsi təhlükəsi ilə üzləşdik. Xüsusən də ordu quruculuğunda ciddi səhvlərə yol verilməsi torpaq itkisiylə nəticələndi və müharibədə dalbadal uğursuzluqlarımıza gətirib çıxardı.

Belə bir çətin zamanda xalqımız haqlı olaraq peşəkar dövlət xadiminə üz tutdu və 1993-cü ilin iyun ayında ümummilli lider Heydər Əliyev yenidən hakimiyyətə qayıtdı. Müdrik rəhbər ölkənin müstəqilliyini və sərhədlərini qorumaq məqsədilə öncə nizami ordunun yaradılmasını ön plana çəkdi. Ulu öndər əvvəlcə televiziya və radio vasitəsilə xalqa müraciət edərək ölkəmizin çox çətin bir vəziyyətə düşdüyünü, müstəqil dövlətçiliyimizin taleyi üçün təhlükə yarandığını hamının diqqətinə çatdırdı və əhalini səfərbər olmağa çağırdı. Məhz belə bir tarixi müraciətdən sonra gənclərimizin vətənpərvərlik hissləri gücləndi, cəbhə xəttində ordumuzun uğurlu əks-hücumları başlandı. Ağdam, Füzuli, Tərtər bölgəsində gedən hərbi əməliyyatlar zamanı döyüşçülərimiz real üstünlük əldə etdilər və onlarla kəndimiz işğalçılardan təmizləndi. Artıq xalqımız ölkədə nizami və vahid komandanlıq tərəfindən idarə edilən bir ordunun yaradıldığını hiss etdi. Azərbaycan ordusunun cəbhə xəttində real üstünlüyü Ermənistan rəhbərliyini atəşkəsi imzalamağa məcbur etdi. Doğrudur, bəzi siyasət dəllalları 1994-cü il mayın 12-də imzalanmış atəşkəs haqqında razılığı birmənalı qarşılamasa da, sonrakı proseslər göstərdi ki, ölkədə ictimai-siyasi sabitliyin təmin edilməsi və dövlətçilik atributlarının möhkəmləndirilməsi baxımından belə bir addımın atılması az əhəmiyyət kəsb etmədi.

Azərbaycan Silahlı Qüvvələrinin döyüş və mənəvi-psixoloji hazırlığının artırılması istiqamətində həyata keçirilən önəmli islahatlar qısa bir zamanda ölkəmizin müdafiə qabiliyyətinin güclənməsinə təkan verdi. Ordu quruculuğunda vahid komandanlıq prinsiplərinin möhkəmləndirilməsi, nizam-intizama və qanunçuluğa əməl edilməsi, hərbi təhsil sahəsində məqsədyönlü islahatların həyata keçirilməsi yalnız ümummilli lider Heydər Əliyevin rəhbərliyi altında mümkün oldu. Yeri gəlmişkən bir faktı vurğulamaq lazımdır ki, dahi rəhbərin ölkəmizə birinci rəhbərliyi dövründə, yəni postsovet məkanında da çox böyük uzaqgörənliklə Azərbaycanda hərbi təhsilin, gənc nəslin hərbi vərdişlərə yiyələnməsinin bünövrəsi qoyulmuşdu. Buna misal kimi, 1971-ci ildə Bakıda ibtidai hərbi məktəbin yaradılmasını göstərmək olar. Belə bir qətiyyətli işin həyata keçirilməsi müdrik rəhbərin uzaqgörənliyini sübut etdi. Bu gün ölkədə ordu quruculuğunun inkişaf etdirilməsində bu təhsil ocağının mühüm əhəmiyyəti var

Müdrik komandanın hərbi təhsilin təkmilləşdirilməsi istiqamətində həyata keçirdiyi tədbirlər az bir vaxtdan sonra Azərbaycanda müasir tələblərə cavab verə biləcək peşəkar hərbi kadr heyətinin formalaşmasına gətirib çıxardı. Və ordu quruculuğu təcrübəsi sübuta yetirir ki, cəmiyyətin bütün sahələrində olduğu kimi, hərbi sahədə də uğurların qazanılmasında yüksək peşəkarlığa malik olan kadr heyəti mühüm rol oynayır. Müasir dünya ordularının qabaqcıl təcrübəsinin ölkəmizdə tətbiq edilməsi bir tərəfdən beynəlxalq hərbi əlaqələrimizin yaranmasına təkan versə də, digər bir tərəfdən ordumuzun NATO standartlarına inteqrasiya etməsinə zəmin yaratdı. Bir sözlə, ordu quruculuğu, təcrübəli zabit kontingentinin hazırlanması ulu öndərin siyasi fəaliyyətinin əsas istiqamətlərindən biri olub.

Azərbaycan Silahlı Qüvvələrinin beynəlxalq əlaqələrinin qurulmasına önəm verən müdrik komandan dünyanın münaqişə bölgələrində sülhyaratma əməliyyatlarında da ordumuzun hərbi qulluqçularının təmsil olunmasına dəstək verirdi. Azərbaycan sülhməramlılarının Kosovo, Əfqanıstan, İraq bölgələrində beynəlxalq təhlükəsizlik koalisiyası tərkibində nümunəvi xidmətləri buna əyani sübutdur.

1997-ci ildən ölkəmizin hərbi təhsil sistemində NATO standartlarına uyğun proqramın tətbiq edilməsi ilə daha mükəmməl zabit kadrlarının hazırlanmasına başlanıb. “Sülh Naminə Tərəfdaşlıq Proqramı” çərçivəsində ordumuzun bir çox dövlətlərlə hərbi əməkdaşlığı yaranıb və bu əlaqələr indi də genişlənir.

Ümummilli lider Heydər Əliyevin ordu quruculuğunda önəm verdiyi məsələlərdən biri də hərbi vətənpərvərlik istiqamətində məqsədyönlü işlərin görülməsi idi. O daim tövsiyə edirdi ki, gənc nəsli vətənpərvərlik ruhunda tərbiyə etmək, gənclərə milli-əxlaqi dəyərlərimizi aşılamaq cəmiyyətin əsas vəzifələrindən biri olmalıdır. “Qoy hər bir azərbaycanlı gənc yaxşı bilsin ki, Vətəni qorumaq, dar gündə torpaqlarımızın keşiyində dayanmaq onun ən müqəddəs vəzifəsidir”.

İlk müstəqillik dövründə ölkənin bütün sahələrində hökm sürən hərc-mərclik, özbaşınalıq gənclərin həyatından da yan ötmədi, bu sahədə mövcud olan təşkilatları pərakəndəlik bürüdü. Amma dahi rəhbərin hakimiyyətə qayıdışından sonra gənclərin fəaliyyətində əsaslı dönüş yarandı, bu sahənin inkişaf etdirilməsi üçün ümumrespublika forumu keçirildi. Bu tədbirdə iştirak etmiş ulu öndərin dərin məzmunlu və proqram xarakterli məruzəsi indi də çoxlarının yaddaşındadır.

Ümummilli liderimizin ordu quruculuğu sahəsində həyata keçirdiyi islahatlar hazırkı mərhələdə onun siyasi kursunun layiqli davamçısı, Azərbaycan Respublikasının Prezidenti, Ali Baş Komandan İlham Əliyev tərəfindən uğurla davam etdirilir. Regionun təcrübəli siyasi lideri olan dövlət başçımız hakimiyyətə gəldiyi gündən ordu quruculuğuna diqqət və qayğısını artırıb, hazırda ordunun döyüş qüdrətinin artırılması, maddi-texniki bazasının möhkəmləndirilməsi və hərbi qulluqçuların sosial müdafiəsinin gücləndirilməsi istiqamətində mühüm tədbirlər həyata keçirilir. Ölkəmizin dövlət büdcəsindən hərbi sahəyə ayrılan maliyyə vəsaiti də ildən ilə artmaqdadır. Elə buna görə fəxrlə demək lazımdır ki, Azərbaycan ordusu hərbi qüdrətinə görə bölgədə liderdir və bu estafeti sonadək qoruyub saxlayacaqdır.

Arif PƏNAHOV

Paritet.- 2010.-24-25 iyun.-S. 12.