Ordu quruculuğu sahəsində aparılan işlər mövqeyimizi gücləndirir

Ötən il istehsal olunmuş müdafiə təyinatlı məmulatların həcmi 3 dəfə, mülki məhsulların həcmi isə 20 faiz artıb

Azərbaycan Ordusunun tərəqqisi, dünya standartlarına cavab verməsi əsas prioritetlərdən biridir. Ruh yüksəkliyinin artırılması, peşəkarlıq, müasir standartlara uyğunlaşma prosesi çox sürətlə gedir.

Peşəkarlıqla yanaşı, ordunun maddi-texniki bazası da möhkəmlənir. Bu istiqamətdə son illər ərzində böyük işlər görülür. Azərbaycanın ümumi hərbi xərcləri son beş il ərzində 10 dəfədən çox artıb. Bu gün Azərbaycan Ordusunun büdcəsi Ermənistan dövlətinin illik büdcəsi səviyyəsinə çatıb. Hərbçilərin sosial-məişət vəziyyətinin yaxşılaşdırılması üçün əməli-praktiki tədbirlər görülür. İldə iki dəfə əmək haqları qaldırılır.

Son bir neçə il ərzində Azərbaycanda müasir hərbi sənaye kompleksinin yaradılması dövlətin diqqət mərkəzindədir. Bu məqsədlə Müdafiə Sənayesi Nazirliyi yaradılıb. Azərbaycanda bu sahədə istehsal olunan məhsullar dünyanın ən yüksək standartlarına cavab verir. Silahlı Qüvvələri müasir tələblərə cavab verən müdafiə təyinatlı məmulatlarla və xalq təsərrüfatını maşınqayırma, cihazqayırma, elektrotexnika, rabitə sahələrində istifadə olunan avadanlıq və ehtiyat hissələri ilə təmin etmək üçün 2009-cu ildə də MSN-nin müəssisələrində yeni istehsal sahələri yaradılıb. Azərbaycan ilk dəfə olaraq məhz bu ildə MSN-nin müəssisələrində yaradılan və istehsal olunan məmulatlarla Beynəlxalq Müdafiə Sənayesi Sərgisində (IDEF-2009) təmsil olundu. Belə bir sərgidə Azərbaycanın öz milli məhsullarını nümayiş etdirməsi digər dövlətlər tərəfindən xüsusi maraqla qarşılanıb.

2008-ci illə müqayisədə ötən il nazirlik üzrə istehsal olunmuş müdafiə təyinatlı məmulatların həcmi 3 dəfə, mülki məhsulların həcmi isə 20 faiz artıb. Ümumilikdə 586 adda məmulat istehsal edilib ki, bunun da 350-si müdafiə təyinatlı məmulatlardır. Bu gün MSN aviasiya, naviqasiya, cihazqayırma və digər istiqamətlər üzrə dünyanın inkişaf etmiş dövlətlərinin firma və şirkətləri ilə sıx əməkdaşlıq edir. Bu sahədən danışan Prezident İlham Əliyev qeyd edib ki, hər yerdə olduğu kimi daxili resurslara istinad etməliyik: “Necə ki, biz siyasətdə, diplomatiyada, iqtisadiyyatda daxili resurslar hesabına yaşayırıq və fəaliyyət göstəririk, bu sahədə də maksimum dərəcədə daxili imkanlardan istifadə edib güclü müdafiə sənayesini yaratmalıyıq. Artıq bunu yaratmışıq. Azərbaycan məhsulları müxtəlif beynəlxalq sərgilərdə nümayiş etdirilir. Artıq biz ixrac imkanlarımızı da genişləndiririk. Biz müdafiə sənayesini yaradanda əlbəttə ki, ilk növbədə öz daxili tələbatımızın ödənilməsini nəzərdə tuturduq. Bu gün də bu prioritetdir, ordunun və bütün hərbi qüvvələrin ehtiyacları ilk növbədə ödənilməlidir. Ancaq əgər ixrac üçün əlavə imkanlar olarsa, əlbəttə ki, bu, ancaq alqışlanacaqdır. Bu, həm iş yerləridir, həm yeni sənaye obyektləridir, həm də ki, əsas məsələmizi - Ermənistan-Azərbaycan, Dağlıq Qarabağ münaqişəsinin həlli üçün bizə çox lazım və vacib olan sahədir”.

İldən-ilə artan hərbi xərclərin tərkib hissəsi olan müdafiə sənayesinə ayrılan xərclər də artır. Bir sözlə, hərbi potensialın gücləndirilməsi, müasir ordunun yaranması üçün Azərbaycanda çox böyük işlər görülür. Azərbaycan Ordusu inkişaf edir, müasir standartlara cavab verir. Bizim ümumi hərbi xərclərimiz 2 milyard dollara bərabərdir. Ölkə başçısının fikrincə, bu məsələ ilə bağlı səylərimizi daha da gücləndirməliyik: “Azərbaycanın hərbi və ordu potensialının gücləndirilməsi, hesab edirəm ki, danışıqlar prosesində ən vacib rollardan birini oynayır. Mən hesab edirəm ki, son müddət ərzində danışıqlarda müşahidə olunan dinamika, yəni müsbətə doğru dinamika, o cümlədən Azərbaycanın iqtisadi, siyasi və hərbi potensialının gücləndirilməsinin nəticəsidir”. O bildirib ki, orduda və bütün hərbi qüvvələrdə gedən proseslər mövqeyimizi gücləndirir. “Həm döyüş qabiliyyəti, həm də vətənpərvərlik ruhu yüksək səviyyədədir. Əlbəttə ki, texnika, silah-sursat, bütün lazımi məsələlər 2010-cu ildə də yubanmadan həll olunmalıdır”.

Prezident deyib ki, Azərbaycan Ordusunun inkişaf etməsi,müasir standartlara cavab verməsi bəzən müəyyən beynəlxalq təşkilatlarda və dövlətlərdə narahatlıq doğurur: “Amma onlar yaddan çıxarmamalıdır ki, Azərbaycan müharibə şəraitində yaşayır, torpaqları işğal altında, vətəndaşları qaçqın-köçkün vəziyyətindədir. Biz hər an öz doğma torpaqlarımızı azad etməyə hazır olmalıyıq və məhz bu məqsədlə güclü ordu yaradırıq. Torpaqları işğal olunmayan, Azərbaycanın problemlərini yaşamayan ölkələr ordu quruculuğuna maksimum diqqət göstərməyə bilərlər. Biz isə bu işğaldan əziyyət çəkirik. Deməli, Azərbaycanda ordu quruculuğu, müdafiə potensialının möhkəmlənməsi dövlətin, hökumətin, hər bir vətəndaşın bir nömrəli vəzifəsi olmalıdır. Biz öz doğma torpaqlarımızı işğalçı qüvvələrdən hərbi yolla azad etməyə hər an hazır olmalıyıq”.

Bu gün Azərbaycan Respublikasının Silahlı Qüvvələri üçün vacib olan bütün ixtisaslar üzrə kadrlar ölkəmizin ali hərbi məktəblərində yüksək tələblərə uyğun hazırlanır. Heydər Əliyev adına Azərbaycan Ali Hərbi, Azərbaycan Ali Hərbi Dənizçilik, Azərbaycan Ali Hərbi Təyyarəçilik məktəbləri, Ali Hərbi Akademiya Silahlı Qüvvələrimizin zabit kadrlara olan tələbatını tam ödəyir.

Ordu quruculuğunda uğurlarımız kifayət qədərdir. Hansı cəhəti götürsək Ermənistandakı vəziyyətdən bir neçə dəfə üstün olmağımız göz qabağındadır. Çoxlu faktlar var ki, Ermənistanda əhali dolanışıq ucbatından, dövlət siyasətinin perspektivsizliyini dərk etdiklərindən ölkəni tərk etməkdə davam edirlər. Heç bir Ermənistan vətəndaşı Dağlıq Qarabağda hərbi xidmət keçmək istəmir. Bu sahədə də müqayisələr aparsaq, görərik ki, Ermənistanın ordusunun inkişaf etdirmək perspektivi yoxdur.

Hazırda bölgədə gedən siyasi proseslər Azərbaycanın mövqeyini gücləndirir. Çünki, ölkəmiz bu siyasi proseslərdə fəal iştirak edirik və bəzi hallarda irəli sürülən təşəbbüslərin müəllifi mövqeyindən çıxış edir. Azərbaycanın iştirakı olmadan bölgədə iqtisadi və regional əməkdaşlıq mümkün deyil və bizim mövqe hamıya bəllidir. “O vaxta qədər ki, torpaqlarımız işğal altındadır, Ermənistanla heç bir əməkdaşlıqdan söhbət gedə bilməz. Hesab edirəm ki, qarşı tərəf bütün bu amilləri təhlil edərək reallıqla barışmalıdır. Reallıq da ondan ibarətdir ki, bu gün Azərbaycanla rəqabət aparmaq çox çətindir, deyə bilərəm, qeyri-mümkündür. Siyasi potensialımız, iqtisadi gücümüz, ordu potensialımız və beynəlxalq haqq-ədalət prinsipləri bizim mövqelərimizi gücləndirir və mən əminəm ki, bütün bu amillər və bizim fəal və hücum siyasətimiz nəticədə torpaqlarımızın işğalçılardan azad olunmasına gətirib çıxaracaqdır.”

Dövlət başçısı dəfələrlə bildirib ki, münaqişə yalnız Azərbaycanın ərazi bütövlüyü çərçivəsində öz həllini tapa bilər, işğalçı qüvvələr işğal olunmuş bütün torpaqlardan çıxarılmalıdır, Azərbaycan vətəndaşları həmin bölgələrə, o cümlədən Dağlıq Qarabağa qayıtmalıdırlar. Ondan sonra Dağlıq Qarabağın hüquqi statusu müzakirə oluna bilər. Biz bu müzakirəyə hazırıq. Ancaq bir şərtlə ki, bu status yalnız Azərbaycanın ərazi bütövlüyü ilə müəyyən oluna bilər. Azərbaycan başqa heç bir varianta getməyəcəkdir.

Prezident xatırladır ki, ermənilər o torpaqları sülh yolu ilə zəbt etməyiblər. “Bizim torpaqlarımız müharibə yolu ilə, başqa ölkələrin dəstəyi ilə işğal olunubdur. Baxmayaraq ki, o hadisələrdən artıq 20 ilə yaxın vaxt keçir, bunu heç kim unutmamalıdır. Azərbaycan vətəndaşları, gənclər, gənc nəsil bunu daim yadda saxlamalıdır. Yəni, ermənilər bunu zor gücü ilə ediblərsə, bizə nə üçün daim tövsiyə edilir ki, sülh yolu ilə həll olunsun. Mən bir daha demək istəyirəm ki, heç kim müharibə istəmir. Kim istəyər ki, indi müharibə olsun. Ancaq biz bu dözülməz vəziyyətlə nə qədər barışmalıyıq?! Nə qədər dünya ictimaiyyəti və bu məsələ ilə məşğul olan tərəflər belə təmkinli mövqedə olacaqlar?!”

Buna görə də ölkə başçısı daimi vurğulayır ki, hərbi quruculuq, ordu quruculuğu daha da sürətlə getməlidir. “Çox işlər görülüb, amma hələ də çox işlər görülməlidir. Bu məqsədlə bizim bütün proqramlarımız icra edilir”.

Bizim qalib gəlməyə qadir nizami ordumuz var. Gündən-günə döyüş qabiliyyətini gücləndirir. Hazırda Silahlı Qüvvələrimiz növbəti təkmilləşmə dövrünü yaşayır. Ona hər cür qayğı göstərilir, təminatı yüksək səviyyədədir. Bunun nəticəsidir ki, əsgər də, zabit də, Ali Baş Komandan da ordumuzun işğal altında olan torpaqlarımızı azad etməyə qadir olduğunu qətiyyətlə bildirirlər. Xalq da öz ordusuna inanır. Odur ki, torpaqlarımızı hərb yolu ilə azad etməyi tələb edənlər də çoxalıb. Əsgərlərimizin döyüş hazırlığı, hərbi texnika ilə təchizatı da buna əsas verir. Qələbədə əsas rolu əsgərin təpəri, hünəri həll edir. Qorxaq əsgər ən müasir silah növləri ilə təchiz olunsa da, zəif düşmənə qalib gələ bilməz. Bunun əsas göstəricisi fərarilikdir. Bu gün Ermənistan ordusunda fərariliyin gündən-günə artdığını, Azərbaycan Ordusunda isə belə halın, demək olar ki, olmaması əsgərlərimizin hünərinin, vətənpərvərliyinin və döyüşlər başlayarsa, mütləq qalib gələcəyinin təsdiqidir.

F.Hüseynzadə

Paritet.- 2010.- 4-5 mart.- S. 1;4.