Cəbhə bölgəsi olan Tərtərdə sürətlə abadlıq-quruculuq işləri gedir

“Tərtər rayonu bizim hamımız üçün, Azərbaycan üçün çox əziz, doğma rayondur, müharibə illərində tərtərlilər çox cəsarətlə vuruşmuşlar, öz doğma torpaqlarını müdafiə etmişlər. Buna görə onlar hər cür minnətdarlıq və təşəkkürə layiqdirlər. İndi isə Tərtərin artıq yeni bir dövrü başlamışdır. Rayonda sürətli abadlıq-quruculuq işləri gedir”.

İlham ƏLIYEV

Ümummilli liderimiz Heydər Əliyevin iqtisadiyyat da daxil olmaqla ölkə həyatının bütün sahələrində həyata keçirdiyi geniş islahatlar bu gün ki, mütərəqqi inkişaf meyillərinin əsas şərtlərindən biri olmuşdu. Ulu öndərin möhkəm təməl üzərində həyata keçirdiyi sosial-iqtisadi inkişaf strategiyası bu gün Möhtərəm prezidentimiz cənab İlham Əliyev tərəfindən qətiyyətlə və ardıcıllıqla davam etdirilir.

Həyata keçirilən bu mükəmməl strategiya ölkəmizi regionun lider dövlətinə çevirmiş və dünya miqyasında nüfuzunu daha da gücləndirmişdir. Həyata keçirilən islahatlar iqtisadiyyatın bütün sahələrinin sürətli inkişafına təkan vermiş, ən müasir texnologiyaların tətbiqinə, rəqabət qabiliyyətli məhsul istehsal edən müəssisələrin yaradılmasına, infrastrukturun yeniləşməsinə, yeni iş yerlərinin açılmasına imkan yaratmışdır. İqtisadi sahədə keçid dövrünün başa çatması inkişaf üçün daha böyük imkanlar açmışdır. Sosial rifah, iqtisadi tərəqqi amilləri ilə şərtlənən bu inkişaf xətti Azərbaycanın dünya miqyasında nüfuzunu daha da gücləndirmişdir. Hazırda Azərbaycan beynəlxalq miqyasda sabit iqtisadiyyatı və sosial həyatı dinamik inkişaf edən, mühüm geostrateji mövqeyə malik olan, qlobal enerji təhlükəsizliyinin təminatında getdikcə vacib rol oynayan bir dövlət kimi xarakterizə olunur.

“Biz xalqın xidmətçiləriyik” deyən ölkə başçısının hər bir addımı beynəlxalq aləmdə Azərbaycanın mövqeyinin möhkəmləndirilməsinə, ölkədə insan azadlığının, davamlı inkişafın və sosial yönümlü iqtisadiyyatın formalaşmasına hesablanmış məqsədyönlü fəaliyyətdir.

Son illərdə dünyanı bürümüş qlobal maliyyə və iqtisadi böhran şəraitində Azərbaycan iqtisadiyyatının dinamik və uğurlu inkişafının qorunub saxlanması bunu bir daha təsdiqləyir.

Dövlət proqramı çərçivəsində bölgələrdə həyata keçirilən infrastruktur layihələri ölkəmizdə qeyri-neft sektorunun və bütövlükdə sahibkarlığın inkişafına müsbət təsir göstərir. Rayonlar abadlaşır, yeni yollar, körpülər salınır, məktəblər, xəstəxanalar, uşaq bağaları, müxtəlif yönümlü sosial obyektlər tikilir. Bütün bunlar əhalinin rahatlığını təmin etməklə yanaşı, həm də yeni iş yerləri deməkdir.

Prezident İlham Əliyevin cəbhə bölgələrinin inkişafına göstərdiyi xüsusi qayğı, erməni işğalçılarına bir qarış belə torpaq güzəşt edilməyəcəyi barədə qətiyyətli və prinsipial mövqeyi respublikanın hər yerində olduğu kimi, Tərtər rayonunda da böyük ruh yüksəkliyi doğurmuş, doğma torpaqlarımızın tezliklə işğaldan azad ediləcəyi inamını daha da artırıb.

Prezident İlham Əliyevin diqqət və qayğısı ilə ölkədə gedən sürətli iqtisadi inkişaf Tərtər rayonunun da sosial-iqtisadi həyatına əhəmiyyətli təsir göstərmişdir. Tərtər rayonunda nəzərəçarpacaq dəyişikliklərdən ən başlıcası küçələrdə boş-bekar dayanan adamların görünməməsidir. Son illər burada fərəh doğuran işlər görülür. Şəhərin ovqatı, ab-havası da dəyişib. Şəhərin müxtəlif yerlərində həvəslə çalışan insanları gördükcə hiss edirsən ki, onların hamısını birləşdirən eyni arzudur: Tərtəri gözəl, yaraşıqlı, müasir bir şəhərə çevirmək!

Bir sıra sosial obyektlər tikilib istifadəyə verilmiş, rayonun infrastrukturu əsaslı şəkildə yeniləşdirilmiş, xidmət sahələrinin fəaliyyəti günün tələbləri səviyyəsinə qaldırılmış, xüsusilə əhalinin elektrik enerjisi və təbii qazla təminatındakı problemlər aradan qaldırılmış, bir sıra həlli vacib işlər görülüb. Dövlət Proqramına uyğun olaraq əhalinin sosial və məişət problemlərinin həlli məqsədilə müharibədən zərər çəkmiş xeyli yaşayış evi bərpa edilmiş, əlillər və şəhid ailələri üçün yaşayış binası tikilib istifadəyə verilib.

Rayon mərkəzinin girişində olan “Ana abidəsi”nin yerləşdiyi 4 min kvadratmetr ərazi tamamilə abadlaşdırılıb.Ulu öndər Heydər Əliyevin adını daşıyan bənzərsiz park 2 hektara yaxın sahəni əhatə edir. Əsas giriş qapısının tikintisində milli ornamentlərdən istifadə olunmuşdur Parkın ərazisində təbii mənbəyini Tərtər çayından götürən iki böyük arx axır. Müxtəlif ölçülü iki fontan tikilmişdir. Parkda yaşıllıq sahələri salınmış, gəzinti yerləri yaraşıqlı daşlarla üzlənmişdir. Ərazidə əhalinin asudə vaxtının səmərəli keçirilməsi üçün müasir memarlıq üslubunda iaşə obyektləri tikilib istifadəyə verilmişdir. Bənzərsiz şəlalə parka xüsusi yaraşıq verir.

Parkda Heydər Əliyev muzeyi tikilmişdir. Tərtərlilərin ulu öndərə məhəbbətini ifadə edən bu muzey iki mərtəbədən ibarətdir. Muzeyin tikintisində həm milli, həm də müasir memarlıq üslubu bir-birini tamamlayır .

Tərtərin rayon mərkəzi ilə yanaşı, kəndləri də müasirləşir. Xüsusilə yolların abadlaşdırılması diqqət mərkəzindədir.

Tərtərin digər kənd rayonlarından fərqi ondadır ki, təbii imkanları çoxdur. Rayon iqtisadiyyatının əsasını təşkil edən aqrar sahənin maddi-texniki bazası əsaslı şəkildə möhkəmləndirilib. Dövlət başçısının “Kənd təsərrüfatı məhsulları istehsalçılarına dövlət dəstəyi haqqında” sərəncamına əsasən, məqsədyönlü siyasət həyata keçirilmiş, bütün sahələrdə artıma nail olunub.

Regionların sosial-iqtisadi inkişafına dair Dövlət Proqramının davamı olaraq 2009-2013-cü illər üçün hazırlanmış proqramda rayonda da bir sıra mühüm işlər görülməsi nəzərdə tutulur. Bu proqramda sosial obyektlərin tikintisinə və əsaslı təmirinə diqqət artırılmışdır. Ümumiyyətlə kəndarası yolların müəyyən hissəsi asfaltlaşdırılacaq, Tərtər çayı üzərində yeni körpü tikiləcək, tarix-diyarşünaslıq muzeyi, şahmat məktəbi, əlillər və şəhid ailələri üçün bina inşa olunacaq, subartezian quyuları qazılacaq, İncəçay üzərində su anbarı tikiləcək, broyler fabriki inşa ediləcək.

Murad

Paritet.- 2010.- 1-3 may.- S. 10.