Erməni işğalı və terrorunu ifşa edən QHT-lərin əlaqələndirmə şurası yaradılacaq

Azay Quliyev: “Müsabiqədə Dağlıq Qarabağ məsələsi prioritet mövzu olaraq irəli sürülüb”

Dağlıq Qarabağla bağlı Azərbaycan həqiqətlərinin dünya ictimaiyyətinə çatdırılması işində dövlətlə yanaşı qeyri-hökumət təşkilatları da xüsusi fəallıq göstərirlər. Prezident yanında Qeyri-Hökumət Təşkilatlarına Dövlət Dəstəyi Şurası yaradıldıqdan sonra isə QHT-lər bu sahədə daha sistemli və səmərəli işləməyə başlayıblar. Şuranın sədri, millət vəkili Azay Quliyev qəzetimizə müsahibəsində QHT-lərin Azərbaycan həqiqətlərinin dünya ictimaiyyətinə çatdırılmasında rolundan və Şuranın bu istiqamətdə gördüyü işlərdən danışıb.

-Son iki ildə QHT sektorunun inkişafı üzrə çox ciddi təməllər qoyulub. Birincisi, cənab prezident İlham Əliyev QHT-lərə dövlət dəstəyi konsepsiyasını təsdiq etməklə dövlətin QHT sektoru ilə bağlı siyasətinin nədən ibarət olduğunu bütün dünyaya, o cümlədən Azərbaycan ictimaiyyətinə təqdim etdi. Bu siyasət QHT-ləri hərtərəfli dəstəkləmək, QHT-lərin bilik və bacarıqlarından ümummilli məsələlərin həllində istifadə etmək, ictimai problemlərin həllinə QHT-ləri cəlb etmək, QHT-hökumət münasibətlərini yeni bir əməkdaşlıq müstəvisinə qaldırmaq, QHT-lərə maliyyə baxımından yardım etmək, QHT-lərin informasiya ehtiyaclarını qarşılamaq, QHT-lərə metodoloji, texniki və təşkilati yardım etməkdən ibarətdir. Yəni, bütün bu sahələrdə sadaladığım niyyət konkret olaraq Azərbaycanda üçüncü sektorun inkişafına, vətəndaş cəmiyyətinin güclənməsinə istiqamətlənib. Son iki ildə sadaladığım bu istiqamətlərin çox ciddi təməli atıldı və konkret nəticələr artıq özünü göstərməkdədir. Artıq bu gün hökumət QHT-lərə çox ciddi şəkildə tərəfdaş gözü ilə baxır və onları özünün ən yaxın köməkçisi hesab edir. Bununla belə, bəzi QHT-lər hökuməti tənqid etsələr də, ona qarşı alternativ hesabatlar hazırlayıb təqdim etsələr də biz başa düşürük ki, bu məsələdə əsas məqsəd ayrı-seçkiliyə yol vermədən QHT-lərin ən yaxşı ideya və təşəbbüslərini dəstəkləməkdən ibarətdir. Buna görə də bu, istər maddi, istər ideoloji, istər siyasi, istərsə də mənəvi baxımdan QHT-lər üçün çox böyük bir üstünlükdür.

- Şura tərəfindən Dağlıq Qarabağla bağlı Azərbaycan həqiqətlərinin dünya ictimaiyyətinə çatdırılması istiqamətində hansı işlər görülür?

- Şura yarandığı ilk gündən indiyə qədər dövlətin bu sahədə həyata keçirdiyi layihələrə və siyasətə dəstək verməyə çalışıb. Hələ ulu öndər Heydər Əliyev 1998-ci ildə erməni yalanlarını ifşa etmək üçün Ermənistandan deportasiya olunan soydaşlarımızla, eyni zamanda azərbaycanlılara qarşı törədilmiş soyqırımları ilə bağlı çox vacib sənədlər imzaladı. Bundan sonra bu işlər yeni bir müstəviyə keçdi və bu sahədə işlər daha sistemli şəkildə aparılmağa başlandı. Dövlət başçısı cənab İlham Əliyevin prezident seçilməsindən sonra bu istiqamətdə işlər daha da sürətləndi və bu siyasətin konkret strukturu, maddi-texniki bazası və təşkilati işləri hazırlanıb həyata keçirilməyə başlandı. Xüsusi qeyd olunmalıdır ki, Azərbaycan həqiqətlərinin dünyaya çatdırılmasında, erməni yalanlarının ifşa olunmasında Mehriban xanım Əliyevanın rəhbərliyi ilə Heydər Əliyev Fondu son illər ərzində çox böyük layihələr həyata keçirib. Təkcə onu demək kifayətdir ki, “Xocalıya ədalət” kampaniyası çərçivəsində Fondun Rusiya bölməsinin rəhbəri Leyla xanım Əliyeva Xocalı faciəsini dünyaya çatdırmaq üçün çox böyük bir hərəkata başlayıb. Fond tərəfindən çoxlu sayda filmlər hazırlandı, kitablar çap edildi və artıq görülən işlər öz müsbət nəticələrini verməkdədir.

Cənab Prezident Şuranı yaradanda da dövlətin QHT-lərə dəstək verəcəyi prioritet istiqamətləri müəyyənləşdirdi ki, bu prioritet istiqamətlərin də önündə Dağlıq Qarabağ məsələsi və Azərbaycan gerçəkliyinin dünya ictimaiyyətinə çatdırılması durur. Bu günə qədər şuranın maliyyə dəstəyi ilə QHT-lər tərəfindən Qarabağ məsələsinə həsr olunmuş yüzə yaxın layihə həyata keçirilib və bu layihələr çərçivəsində 50-dən artıq kitab, broşür, buklet çap olunub, 3 film çəkilib, 30-a yaxın sayt hazırlanıb. Bundan əlavə bir çox beynəlxalq tədbirlərdə, forumlarda QHT-lərin iştirakı təmin olunub, Azərbaycanın ədalətli mövqeyinin dünya ictimaiyyətinə çatdırılması üçün bu forumlardan maksimum dərəcədə faydalanmağa çalışmışıq. Bütün bu işlər hazırda da davam etdirilir və şura tərəfindən bu il elan edilən müsabiqədə Dağlıq Qarabağ məsələsi yenə də prioritet mövzu olaraq irəli sürülüb.

- Qarabağla bağlı fəaliyyət göstərən QHT-lərin hər hansı bir formada birliyinin yaradılması nəzərdə tutulubmu?

- Hər zaman bir fikri müdafiə etmişəm və həmişə bu fikirdə olmuşam ki, bu gün Qarabağla bağlı fəaliyyət göstərən QHT-lərlə hökumət arasında koordinasiya çox zəifdir. Bu koordinasiya mütləq olmalıdır, çünki Qarabağ bizim ümumi problemimizdir. Burada siyasi, maddi və digər maraqlar arxa planda olmalıdır. Ona görə də bizim belə bir fikrimiz var ki, maliyyələşdirdiyimiz layihələri həyata keçirən QHT-lərin əlaqələndirmə şurasını yaradaq, bununla da onların bir-biri ilə bağlı əlaqələrinin, bir-biri ilə bağlı təcrübə mübadiləsinin yaxşılaşmasına kömək edək. Yəqin ki, bu istiqamətdə Xarici İşlər Nazirliyi ilə də müəyyən danışıqlar aparacağıq və çox istərdik ki, nazirlik bu işdə biz ən azı informasiya dəstəyi versin.

- Gələcəkdə bu istiqamətdə Şura tərəfindən hansı işlər görüləcək?

- Düşünürəm ki, biz artıq təbliğat vasitələrinə də yenidən baxmalı, daha çox kütləviliyə diqqət yetirməliyik. Bilməliyik ki, bizim təbliğat materiallarımız hansı asan və effektiv yollarla yayıla bilər. Qarabağ həqiqətlərini dünya birliyinə çatdırmağın ən effektiv yolunu sənədli filmlərin hazırlanmasında görürəm. Çünki bu filmlər qısametrajlı olsalar da, Azərbaycan həqiqətlərini daha dolğun, yığcam və təsirli şəkildə təqdim etməyə imkan verir. Bu səbəbdən də bizim gələcək planlarımızda və layihələrimizdə film yaradıcılığına daha çox yer veriləcək. İndiyə qədər Quba soyqırımı, İrəvan, Çanaqqala savaşı ilə bağlı filmlər çəkmişik və düşünürəm ki, Zəngəzur, Şuşa, Laçın, Naxçıvan və digər bölgələrimizlə də bağlı ciddi filmlər hazırlanmalıdır. Bununla yanaşı, digər təbliğat formaları, xüsusən də qarşılıqlı səfərlər, görüşlər, beynəlxalq tədbirlərdə iştirak, xüsusi nəşrlərin çapı və digər bu kimi mühüm məsələlər də diqqətimizdə olacaq.

-Qarabağ həqiqətləri ilə bağlı yerli QHT-lərin beynəlxalq təşkilatlarla əməkdaşlığı hansı səviyyədədir?

- Son dövrlər bu sahədə bir sıra mühüm işlər görülsə də, Qarabağ məsələsi ilə bağlı beynəlxalq təşkilatlarla əməkdaşlığın indiki səviyyəsi qənaətbəxş sayıla bilməz. Çünki torpaqlarının bir hissəsi işğal edilən, Ermənistan kimi hiyləgər bir düşmənlə üz-üzə olan bir məmləkətin QHT-ləri beynəlxalq əməkdaşlıq sarıdan daha çox işlər görməlidirlər. Bunu nəzərə alaraq, belə bir qərara gəldik ki, QHT-lərin beynəlxalq əməkdaşlığını qurmaq üçün Şuranın hansısa bir layihəsi olsun. Bu layihə ilk növbədə həmin təşkilatlara informasiya təminatı verəcək, QHT-lərin xarici ölkələrdəki həmkarları ilə necə əlaqələr qurulması ilə bağlı metodoloji dəstək verəcək. Bundan sonra ola bilsin ki, biz bir neçə beynəlxalq forumun keçirilməsini də gündəmə gətirdik. Bizim QHT-lərə tövsiyə edərdim ki, məhz beynəlxalq təşkilatların üzvü olmağa, onların tribunasından istifadə etməyə cəhd göstərsinlər, ikitərəfli və çoxtərəfli əlaqələrin qurulmasına üstünlük versinlər. Bu, ölkəmizi beynəlxalq arenada lazımi səviyyədə təmsil və təbliğ etmək üçün önəmli bir fürsət olardı. Onu da nəzərinizə çatdırım ki, bizim milli hesabatımız hazırlanıb və artıq çapa göndərmişik. Bu hesabat nəticəsində bəlli olur ki, çox az sayda QHT-lər bu cür imkanlardan faydalana bilirlər.

-Bəs millət vəkili kimi Qarabağla bağlı Azərbaycan həqiqətlərinin dünya ictimaiyyətinə çatdırılması istiqamətindəki fəaliyyətiniz barədə nə deyə bilərsiniz?

- Millət vəkili kimi çalışıram ki, üzərimə düşən missiyanı və vəzifəni layiqincə yerinə yetirim və seçicilərimin, eyni zamanda ölkəmin və parlamentimin gözləntilərini qarşılaya bilim. Bu həm Azərbaycan daxilində fəaliyyətimlə bağlıdır, həm də Azərbaycandan kənarda. ATƏT-in Parlament Assambleyasının üzvü kimi, tez-tez xaricdə toplantılarımız olur və burada Azərbaycanı layiqincə təmsil etməyə çalışırıq. Xüsusilə Dağlıq Qarabağla bağlı mövqeyimiz kifayət qədər aydın və davamlı şəkildə eşidilməkdədir. Eyni zamanda başqa-başqa forum və toplantılarda da çalışırıq ki, ölkəmizin ehtiyaclarını və maraqlarını nəzərə alaraq öz mövqeyimizi quraq. Ümumiyyətlə, vicdanlı, səmimi, işgüzar və seçicilərlə daim ünsiyyət qurmaq kimi ağır bir missiyanı daşımaq çox da asan məsələ deyil. Səndən çoxlu gözləntilər var, hər kəs səndən nəsə umur, problemlərinin həll edilməsinə dəstək olmağını istəyirlər. Hesab edirəm ki, millət vəkili hər zaman seçicilərinə yaxın olmalı, sözün ən səmimi mənasında qəlbi seçicilərin qəlbi ilə döyünməlidir.

Babək CAHANDAROV

Paritet.- 2010.- 4-5 may.- S. 7.