Heydər Əliyev haqqında film nümayiş olundu

Dünən Bank VTB(Azərbaycan)-da Ümummilli lider Heydər Əliyevin anadan olmasının 87-ci ildönümü münasibətilə “Heydər Əliyev. Hakimiyyət pərdəsi arxasında” adlı sənədli film nümayiş olunub. Filmdə Heydər Əliyevin həyatı, siyasi fəaliyyəti, o cümlədən Prezident İlham Əliyevin , Heydər Əliyev Fondunun rəhbəri Mehriban Əliyevanın, Rusiyanın tanınmış ictimai- siyasi xadimi Mixail Qusmanın Heydər Əliyev haqqındakı xatirələri geniş şəkildə öz əksini tapıb. Həmçinin filmdə Qorbaçovun SSRİ- nin birinci katibi olmasından sonra Heydər Əliyevin siyasi arenadan gedişi, 20 yanvar hadisələrindən sonra ümummilli liderin Moskvadan Azərbaycana qayıdışı və Azərbaycan Respublikasının prezidenti olmasına qədər keçdiyi dövr işıqlandırılıb.

Tədbirdə Heydər Əliyevin mühafizə xidmətinin rəhbəri olmuş Aleksandr Alekseyeviç İvanov da iştirak edib. İvanov Heydər Əliyev haqqındakı xatirələrindən danışaraq bildirib ki, Heydər Əliyev onun tanıdığı nadir siyasətçilərdən biridir. O, qeyd edib ki, Heydər Əliyev görkəmli siyasətçi olmaqla yanaşı həmçinin gözəl ailə başçısı olub. İvanov Zərifə Əliyeva haqqındakı təəssüratlarını bölüşərək bildirib ki, o görkəmli oftalmoloq olmaqla yanaşı, çox gözəl keyfiyyətlərə malik insan, həmçinin sadiq həyat yoldaşı olub. O, Heydər Əliyevlə Zərifə Əliyevanın bir-birilərini sevdiklərini və bu sevginin əbədi olaraq davam etdiyini də xüsusi olaraq vurğulayıb. İvanov həmçinin Heydər Əliyevin qalstukları çox sevdiyini və ad günündə onun üçün ən böyük hədiyyənin qalstuk olduğunu bildirib.

Məlumat üçün bildirək ki, Aleksandr Alekseyeviç İvanov 12 iyul 1950-ci ildə Bakıda anadan olub. 1972-ci ildə dövlət təhlükəsizliyi orqanlarında çalışmağa başlayıb. 1979-cu ildən o dövrdə Azərbaycan SSR-nin Kommunist Partiyasının MK-nin birinci katibi olan Heydər Əliyevin mühafizə xidmətində fəaliyyətə başlayıb. 1982-ci ildən A,A. İvanov Heydər Əliyevin mühafizə xidmətinə rəhbərlik etməyə başlayıb və 1988-ci ilə qədər onunla çalışıb.

A.A.İvanov 2005-ci ildən bu günə qədər “İnterfaks-Azərbaycan” İnformasiya agentliyinin baş direktorudur.

MURAD

Paritet.- 2010.- 8-10 may.- S.9.