Bakıda beynəlxalq qida sənayesi sərgisi işə başlayıb

Növbəti sərgilər “Bakı Ekspo” sərgi və konfrans mərkəzində keçiriləcək

Dünən Heydər Əliyev adına İdman Konsert Kompleksində 16-cı Azərbaycan Beynəlxalq Qida Sənayesi “World Food Azerbaijan 2010” sərgisinin açılışı oldu. Nəzərə çatdıraq ki, sərgidə”İteka Kaspian LLC” və “İTE Group PLC” şirkətləri sərginin təşkilatçıları qismində çıxış ediblər, eyni zamanda sərginin keçirilməsinə Azərbaycana Sahibkarlar (İşəgötürənlər) Təşkilatları Milli Konfederasiyası (ASK) tərəfindən dəstək verilib. Sözügedən sərgi UFİ-beynəlxalq sərgi cəmiyyəti (Ümumdünya Sərgi Sənayesi Assosiasiyası) tərəfindən yüksək qiymətə layiq görülüb.Qeyd edək ki, builki sərgidə dünyanın 18 ölkəsindən, o cümlədən Azərbaycan, Belarusiya, Bolqarıstan, Latviya, Pakistan, Rusiya, ABŞ, Türkiyə, Ukrayna və digər ölkələrdən 85 şirkət iştirak edib. Sərginin mühüm olduğunu deyən Türkiyənin ölkəmizdəki səfiri Hulusi Kılıç bildirdi ki, bu hal da Azərbaycanda iqtisadi və ticarət sahəsində canlılıq və fəallıq olduğunu bir daha göstərir:” Qida sənayesi dünyada ən vacib sahələrdən biridir. 2008-ci ildə insanların sıxıntılar çəkdiyini hər birimiz xatırlayırıq. Bu quraqlıq müxtəlif ölkələrdə bir sıra problemlərə yol açdı. Qida təhlükəsizliyini təmin etmək bütün dünyanın problemidir. Bunun üçün də insanların bu problemi birgə çözməsi vacibdir”. Sözügedən sərgiyə Türkiyədən 10 şirkətin qoşulduğunu deyən səfir qeyd etdi ki, bu sərgi Azərbaycan iqtisadiyyatına öz töhfəsini müsbət tərəfdən verəcək.

Azərbaycan Sahibkarlar Konfederasiyasının baş katibi Məmmədəli Əfəndiyev isə Azərbaycanda biznesin inkişafı istiqamətində keçirilən tədbirlərdən danışıb. Artıq bir sıra Azərbaycan şirkətlərinin öz məhsullarını dünya bazarlarına çıxardıqlarını vurğulayıb.

Dünyada bir müddət əvvəl iqtisadi böhran yaşansa da,bu gün belə bir sərginin ölkəmizdə keçirilməsinin sevindirici bir hal olduğunu deyən “İteka Kaspian” şirkətinin rəhbər Fərid Məmmədov bildirdi ki, xarici ölkələrlə yanaşı, bu sərgidə yerli-”Badamlı”, “Beta”, “Jalə”, “John Deere”, “PalSud” və digər məşhur ticarət nişanları təqdim olunur:”Sərginin ümumi iştirakçılarının 60 faizini yerli şirkətlər təşkil edir. Macarıstan, İran, Fransa, ABŞ, BƏƏ və digər ölkələrdən olan debütantlar sərgi iştirakçılarının 30 faizini təşkil edirlər”.

Qeyd edildi ki, sərgi bir neçə tematik ekspozisiyalara bölünüb: “WorldFood”, “World Drink”, “FoodPack” və “WorldFoodTech” bölmələri həm xarici, həm daxili meydançaları tutacaq. “WorldFood” sərgisində ət və quş məhsulları, konserviləşdirilmiş məhsullar, süd məhsulları, bal və digər ənənəvi bölmələr təqdim olundu. Bərdə, Daşkəsən, Qəbələ, Salyan, Şorabat, habelə Azərbaycanın digər rayonlarının yerli zavod və fabriklərinin məhsulları fəal şəkildə nümayiş olundu. Naxçıvan Muxtar Respublikasının birgə stendinə Naxçıvanın qida sənayesinin 20 istehsalçı müəssisələrinin ekspozisiyası daxil olub. F.Məmmədovun sözlərinə görə,hazırda Azərbaycan üzümçülük sahəsi öz yüksəliş mərhələsini yaşayır. Fransa, Moldova və İtaliyadan olan mütəxəssislər tərəfindən üzüm emalı və şərab istehsalı üzrə yeni zavodlar inşa edilir: ”Bununla əlaqədar olaraq, “WorldDrink” bölümündə geniş çeşiddə içkilər və onların istehalı inşa edilir. Bununla əlaqədar olan mütəxəssislər tərəfindən üzüm emalı və şərab istehsalı üzrə texniki istehsal xətləri təqdim olundu”.

F.Məmmədov qeyd etdi ki, sərgi bu il də öz ənənələrinə sadiq qalaraq sənayenin yeni sahələrinin inkişafına yardım göstərməkdə davam edəcək:” Belə ki, Qafqazda ilk dəfə olaraq “WorldFood Azerbaijan 2010” sərgisi çərçivəsində Azərbaycan və digər ölkələrin “halal” ərzaq məhsulları istehsalçılarını bir araya gətirən “HalalFood Azerbaijan” bölməsi təşkil olunub”.

Bərdə - Yağ Pendir MMC-nin təmsilçisi İlham Qasımov əməkdaşımızla söhbətində bildirdi ki, bu müəssisə keçən əsrin 70-ci illərində yaradılıb. Onun sözlərinə görə, sözügedən zavod fəaliyyətdə olduğu müddətdə gündəlik 60 ton süd emalı edərək müxtəlif çeşiddə təbii süd məhsulları istehsal edib ki, bu məhsullar nəinki Respublikamızda, hətta keçmiş Sovet İttifaqının digər regionlarında da öz kefiyyət nişanı ilə tanınıb:” 1993-cü ildən bu günə qədər respublikamızda yaranan iqtisadi və siyasi sabitlik nəticəsində aparılan özəlləşdirmə proqramı çərçivəsində bir çox müəssisələr kimi, Bərdə-Yağ Pendir zavodu da özəlləşdirilib və səhmdar cəmiyyətə çevrilib. Bu zəmində xaricdən müasir texnologiyalara uyğun olaraq avadanlıqlar alınmasına şərait yaradıb”. Hazırda zavod gündəlik fermentlərdən 30 ton süd tədarük edərək, ən son texnologiyalar və dünya standartlarına uyğun olan müxtəlif çeşiddə təbii süd məhsulları istehsal edir:” Bu da, ərazidə aqrar sektorun inkişafına səbəb olub. Onu da xüsusi olaraq qeyd edim ki, tərkibi yüksək protein, kalsium, vitamin və mineral maddələrlə zəngin olan müəssisəmizin bütün məhsulları yüksək qidalandırıcı kefiyyətə malikdir”.

“Delice-İran” şirkətinin direktoru Yaşar Kahribi bildirdi ki, dünyada 10 il ərzində 500-dən artıq “Delimanco” şöbəsi var:” Bilirsiniz, bu texnologiya vasitəsiylə bir saat ərzində 600 ədədə qədər məhsul istehsal olunur. Koreyalıların istehsalı olan “Delimanco” cihazı ilə yüksək kefiyyətli pirojna insanın gözü qarşısında istehsal olunur. Qeyd edim ki, tez bir zamanda istehsal olunan bu pirojna un, yumurta və bitki yağından hazırlanıb və onun içərisi isə krem ilə doldurulur. Bu cihazı alış-veriş mərkəzlərində işlədilməsi münasibdir. Belə ki, bazarlarda, metro, hava və dəmiryolları vağzallarının stansiyalarında 4 m. Belə ki, Koreya istehsalı olan çox yer tutmayan və iki nəfər işçi tələb edən və bir faizli elektrik ilə işləyən avadanlıqdır”.

“Bəhmənyad aqro-sənaye” şirkətinin təmsilçisi bizimlə söhbətində bildirdi ki, sözügedən müəssisə 1998-ci ildə təsis edilib:” Bu gün sözügedən şirkət İranda göbələk istehsalı üzrə ən tanınmış və iri şirkətlərdən biri sayılır. Həmin zamanlar sözügedən müəssisənin istehsal qüvvəsi 100 tona çatardı və müəssisə tərəfindən “Savalan Mushroom” ticarət nişanı altında göbələk, kompost (üzvi gübrə), habelə göbələk konservləri istehsal edilirdi. Onun sözlərinə görə, 5 il ərzində müəssisənin adı çəkilən məhsullar üzrə istehsal qüvvəsi artaraq ildə 1.200 ton təşkil etməyə başladı:” Davamlı olaraq inkişaf proqramlarını davam etdirməklə yanaşı, müəssisəmiz, Avropa texnologiyalarına əsasən, Niderland şirkətinin bilavasitə nəzarəti altında ildə 200 ton məhsul istehsal etməyə imkan verəcək. Hazırda yeni layihənin palnlaşdırılması ilə məşğuluq.Tikinti və montaj işlərinin 2010-cu ilin sonunda başa çatdırılması və yeni istehsal obyektinin 2011-ci ildə istismara verilməsi nəzərdə tutulur. Eyni zamanda şirkətimiz istehsal etdiyi məhsullarını qərbi Avropa texnologiyalarına əsasən müxtəlif tipli qablaşdırmalar ilə bir çox dünya bazarlarına çatdırır.

Pakistanı təmsil edən “Hemani” şirkətinin menceri Əli Abbas Xaku bildirdi ki, xatırlatdı ki, 1949-cu ildə əsası qoyulmuş “Hemani” bitki ticarətində böyük təcrübəyə malikdir:” Yəni müştərilərin daha təbii yolla faydalanması üçün bitki mənşəli məhsulları istehsal edib. Məhsulların artıq şimali Afrika ölkələrində və şimali Asiyanın geniş bazarlarında ad qazanıb. Əsasən biz bitki çayı, bitki yağları, ətriyyat və kosmetik vasitələr və s. istehsal edirik. Azərbaycanda hazırda bizim brendimiz yoxdur, amma çox istərdik ki, olsun və məhsullarımız satılsın. Çünki sizin insanlar bizim məhsularla çox maraqlanırlar”.

“ Metalmədəniməişət “ASC-nin nümayəndəsi isə bildirdi ki, müəssidə dünya satandartlarına uyğun diametri 38 mm-dən 110 mm-dək Twist qapaqları istehsal olunur:” Qapaqlar müştərinin istəyinə görə ofset çaplı, sadə emallı, üzərində təhlükəsizlik düyməsi, sterilizasiya və ya pasterizasiya prosesinə uyğun ola bilər. Qapaqlar Almaniya avadanlığında istehsal olunur. Eyni zamanda 1987-ci ildən fəaliyyət göstərən Metal qablaşdırma sahəsində 1 kq-dan 20 kq qida və kimyavi məhsullar üçün, üzərində olset çapı vurmaqla dairəvi, dörd və altı qutular istehsal olunur”

Naxçıvanda fəaliyyət göstərən “Böyrək suyu” MMC sədri Kamran İsmayılov bildirdi ki, 2005-ci ildə böyrək mineral müalicəvi süfrə suyu və “Savalan-Naxçıvan”böyrək mineral süfrə suyunun qazlı və qazsız formada istehsalına başlayıblar:” Naxçıvanın Şahbuz rayonun Dayalıqlı kəndində fəaliyyət göstəririk. Savalan mineral suyu isə Babək rayonunun Sirab kəndində istehsal edilir. Bu sular böyrək suyu su bulağından götürülür. Suyun götürüldüyü quyunun dərinliyi 76 m-dir. Bu su böyrək daşı və iltihabı xəstəlikləri üçün çox faydalıdır. Bakı və Naxçıvanda ticarət obyektlərində böyrək suyu satılır. Qeyd edim ki, 0,5, 1, 1,5 və 5 litr həcmdə istehsal edilir”.

Sərgidə Bərdə, Daşkəsən, Qəbələ, Salyan, habelə Azərbaycanın digər rayonlarının yerli zavod və fabriklərinin məhsulları - ət, süd və quş məhsulları, konservləşdirilmiş məmulatlar, dondurma, meyvə- tərəvəzlər, uşaq və pəhriz qidaları, tütün, bal və digər ənənəvi bölmələr nümayiş olunur. Sərgi mayın 21-dək davam edəcək.

Onu da qeyd edək ki, artıq növbəti sərgilər yeni bir məkanda “Bakı Ekspo” sərgi və konfrans mərkəzində keçiriləcək.

GÜNAY

Paritet.- 2010.- 20-21 may.- S. 16.