Tarixi ərazilərimiz üzərində azərbaycanlıların qanuni varislik haqqını tanıtma konsepsiyası hazırlanıb

Konsepsiya çərçivəsində əldə edilmiş sənədlər beynəlxalq məhkəmələrə təqdim ediləcək

Azərbaycanın İşğal Olunmuş Ərazilərinin Tarix və Mədəniyyət Abidələrini Müdafiə Təşkilatı ictimai birliyinin sədri Faiq İsmayılovun redaksiyamıza verdiyi məlumat görə, təşkilat işğal edilmiş ərazilərimizin azad edilməsi istiqamətində aprdığı işlər çərçivəsində Dağlıq Qarabağda və (indiki Ermənistan adlanan) keçmiş Azərbaycan Əraziləri Üzərində Azərbaycanlıların Qanuni Varislik Haqqını Tanıtma Konsepsiyası işləyib hazırlayıb. Konsepsiyanın hazırlanmasında əsas məqsəd;

Dağlıq Qarabağda və (indiki Ermənistan adlanan) keçmiş Azərbaycan əraziləri üzərində azərbaycanlıların qanuni varislik haqqının tanıdılması istiqamətində arxiv materialları və digər rəsmi sənədlərə əsasən, İnsan Haqlarının qorunması Haqqında Beynəlxalq Hüquqi Nomativ sənədlərin verdiyi imkanlar çərçivəsində, işğal olunmuş Azərbaycan torpqları üzərində Azərbaycanlıların qanuni varislik haqqının dünyaya tanıdılmasına;

İndiki Ermənistan Respublikası daxilində azərbaycanlıların mədəni muxtariyyətinin müəyyən edilməsinə;

Müxtəlif tarixi dövrlərdə milli irqi ayrı-seçkiliyə görə azərbaycanlıların deportasiyası haqqında verilmiş qərarların ləğv etdirilməsinə və hərbi münaqişələr nəticəsində öz torpaqlarından qovularaq on illərlə didərginlik həyatı yaşayan qaçqın və məcburi köçkün insanların öz doğma torpaqlarına qaytarılmasına nail olmaqdır.

Konsepsiya çərçivəsində tədbirlərin həyata keçirilməsi aşağıdakı beş istiqamət üzrə müəyyənləşdirilib:

1. Azərbaycanın işğal edilmiş ərazilərinin (bölgələr üzrə) coğrafiyası, ekologiyası, təbii sərvətləri, iqtisadi durumunun təhlili və əzəli yer adları və toponimlərin bərpası:

2. Azərbaycanın işğal edilmiş ərazilərində azərbaycanlılara məxsus tarix və mədəniyyət abidələri üzərində onların varislik hüququnun bərpası;

3. İşğal edilmiş Azərbaycan torpaqları üzərində azərbaycanlıların qanuni varislik hüququnun bərpası.

4. Qaçqın və məcburi köçkünlərin düşdükləri ağır vəziyyətdən yeganə çıxış yolu kimi onların öz doğma toraqlarına qaytarılması haqqında tədbirlər planının hazırlanması;

5. İndiki Ermənistan Respublikası daxilində azərbaycanlıların mədəni muxtariyyətinin bərpası.

Qurum rəhbərinin fikrincə, konsepsiya həyata keçiriləcəyi təqdirdə indiki Ermənistan tərəfindən işğal edilmiş bütün Azərbaycan əraziləri üzərində azərbaycanlıların varislik hüququnun olduğunu dünyaya tanıdacaq, indiki Ermənistan Respublikası daxilində azərbaycanlıların mədəni muxtariyyətinin yaradılmasına kömək edəcək.

Konsepsiya çərçivəsində həyata keçirilən layihələr vasitəsi ilə əldə edilmiş sənədləri Beynəlxalq Məhkəmələrə təqdim etməklə keçmiş Azərbaycan torpaqları üzərində azərbaycanlıların varislik hüququnun bərpası mümkün olacaq. F. İsmayılov qeyd edib ki, başladıqları bu işdə bütün Azərbaycan vətəndaşlarının və ictimai təşkilatların dəstəyinə ehtiyac var.

İSMAYIL

Paritet.- 2010.- 20-21 may.- S. 6.