“Bu gün gənclərin ictimai fəallığı artıb”

Nəcəf Novruzov: “Bu il parlament seçkilərində ilk dəfə səs verəcək gəncləri maarifləndirmək məqsədilə seminarlar keçirəcəyik”

Hazırda respublikamızda müxtəlif sahələr üzrə gənclərin fəallığı artıb. Belə ki, çoxsaylı intellektli gənclərimiz xarici ölkələrdə, eyni zamanda beynəlxalq idman yarışlarında Azərbaycanı layiqincə təmsil edir və bayrağımızı yüksəklərə qaldırırlar. Gənclərlə sıx təmasda olan və onların iştirakı ilə müxtəlif adda tədbirlər keçirən Bakı Şəhər Gənclər və İdman Baş İdarəsinin (BŞGİBİ) gənclərin bu və ya digər uğurlarında rolu var. BŞGİBİ-nin gənclərlə iş sektorunun rəhbəri Nəcəf Novruzov bizimlə söhbətə ulu öndər Heydər Əliyevin gənclər haqqında dediyi bir fikirlə başladı: “Gənclər cəmiyyətimizin əksəriyyətini təşkil edir, onlar bizim həm bu günümüz, həm də gələcəyimizdir. Biz, Azərbaycan dövləti, xalqımız gənclərə böyük ümidlərlə baxırıq. Gənclərin təhsil alması, yaxşı şəraitdə böyüməsi, inkişaf etməsi və müstəqil Azərbaycanın əsl vətəndaşları olması hər birimiz üçün çox əzizdir və çox əhəmiyyətlidir”. Bu dəyərli fikirləri iş prinsiplərində əsas götürdüklərini deyən N. Novruzov bildirdi ki, onlar hər il gənclərlə bağlı bir-birindən fərqli mövzular əhatə edən çoxsaylı tədbirlər keçirirlər.

-Bu il gənclərlə bağlı hansı tədbirləri və layihələri keçirməyi nəzərdə tutmusunuz?

- Ümumiyyətlə, BŞGİBİ yarandığı vaxtdan hər il Bakıda, eyni zamanda paytaxtın ayrı-ayrı rayonlarında , qəsəbələrdə gənclər siyasətinin əsas istiqamətlərinə uyğun mövzular üzrə rəngarəng tədbirlər-iclaslar, seminarlar,dəyirmi masalar, toplantılar, elmi -nəzəri konfranslar, intellektual oyunlar, sərgilər, müsabiqələr, festivallar, idman-hərbi oyunları və idman yarışları keçirir.

Bu il gənclərlə bağlı bir sıra tədbirlər keçirmişik və qarşıda maraqlı layihələrimiz var. Belə ki, 2010-2011-ci il tədris ilində ilk dəfə məktəbə gedən aztəminatlı ailələrdən olan uşaqlara məktəbli çantası və məktəb ləvazimatlarının verilməsi mərasimini və “21 sentyabr- Beynəlxalq Sülh günü” münasibətilə Bakı şəhərində yerləşən Uşaq evlərində və İnternat məktəblərindən yaşayan uşaqların rəsm və əl işlərindən ibarət sərgi təşkil etmişdik. Belə sərgiləri təşkil etməkdə məqsədimiz yaradıcı gənclərin istedadının üzə çıxarılmasına kömək etmək və onların cəmiyyətə inteqrasiyasını təmin etməkdir. Bundan başqa bu il parlament seçkilərində ilk dəfə səsverəcək gəncləri maarifləndirmək məqsədilə seminarlar, “Zərərli vərdişlərə yox deyək” devizi altında mədəni kütləvi aksiyalar, tələbə gənclər təşkilat fəallarının və yaradıcı gənclərin iştirakı ilə cəbhə bölgələrində yerləşən “N” saylı hərbi hissəyə səfər, “ Narkomanlıq və QİÇS-ə qarşı mübarizə bəşəriyyətin xilası deməkdir” devizi altında tədbirlərin və kütləvi təbliğat kompaniyalarının və Tələbə-Gənclər Təşkilatları arasında “Ən yaxşı layihə” müsabiqəsinin və “ 1 dekabr-Ümumdünya QİÇS-lə Mübarizə günü” münasibətiylə gənclərin arasında maarifləndirmə işlərinin aparılması istiqamətində də tədbirlərimiz olacaq.

Bu il ölkəmizdə “Ekologiya ili”dir. Biz də bu sahədə gənclər arasında maarifləndirmə işi aparmaq məqsədi ilə “Ekologiya ili çərçivəsində” “Təbiətimizi qorumaq sağlam gələcəyimizin təminatıdır” devizi altında aksiya və iməcliklərin keçirilməsini nəzərdə tutmuşuq. Eyni zamanda gənclərimiz arasında vətənpərvərlik hisslərinin artırılması, yeniyetmə və gənclərin hərbi xidmətə həvəsləndirilməsi məqsədi ilə çağırış qabağı tədbirlərin və gənclərin hərbə yollanması mərasiminin keçirilməsi nəzərdə tutulub. Bundan başqa gənclərin intellektual səviyyələrinin yüksəldilməsi gənclərin vətənpərvərlik klubları arasında “Breyn-rinq” intellektual oyunu, “12 noyabr-Konstitusiya günü” münasibətilə “Mən Konstitusiyanı öyrənirəm” mövzusunda bilik olimpiadası, həmçinin “18 noyabr-Beynəlxalq Tələbə günü” münasibəti ilə tələbələrin yaradıcılıq və idman həftəsi, ümumiyyətlə, Dövlət bayramları və əlamətdar günlər ilə əlaqədar tədbirlər, BŞGİBİ və Ədliyyə Nazirliyinin Penitensiyar xidməti tərəfindən birgə təsdiq edilmiş tədbirlər planı ilə əlaqədar təşkilatı məsələlərin təşkili, “ Gənclər siyasəti” haqqında qanunun digər bəndləri üzrə tədbirlər, xüsusilə də hökumətlərarası beynəlxalq müqavilələr çərçivəsində və beynəlxalq təşkilatlarla birlikdə gənclər siyasəti sahəsində birgə layihələri və başqa istiqamətlərdə də gənclərlə bağlı tədbirləri həyata keçirməyi nəzərdə tuturuq.

Əsas məqsədimiz gənclərin respublikamızın ictimai-siyasi həyatında daim fəal mövqe tutmasına, öz bilik və bacarıqlarını dövlət müstəqilliyimizin möhkəmləndirilməsinə, ölkəmizin inkişaf etdirilməsinə yönəltməkdir ki, onlar Azərbaycan xalqının keçmişinə, bu gününə və sabahına layiq vətəndaşlar olsunlar.

-Prezident Administrasiyasının rəhbəri Ramiz Mehdiyevin mətbuatda dərc edilən “İctimai humanitar elmlər: zaman kontekstində baxış” məqaləsində bu gün gənclərimizdə hərbi-vətənpərvərlik hissinin gücləndirilməsinin vacibliyi vurğulanıb. Siz, gənclərlə sıx işləyən qurum kimi indi bu istiqamətində hansı işləri görürsünüz?

-BŞGİB paytaxt gənclərinin hərbi- vətənpərvərlik tərbiyəsinin gücləndirilməsi istiqamətində ardıcıl iş aparır və bir sıra layihələr həyata keçiririk. Bizim idarənin əməkdaşları gənclərlə birgə vaxtaşırı cəbhə bölgələrinə gedir, əsgərlərlə görüşürlər. Fikrimcə, hərbi hissələrdə belə görüşlərin keçirilməsi bir tərəfdən əsgərlərimizi Vətənin keşiyində daha ayıq-sayıq dayanmağa sövq edir, onlara daha yüksək döyüş ruhu verirsə, digər tərəfdən də gəncləri psixoloji cəhətdən gələcək üçün hərbi xidmətə hazırlayır. Bundan başqa, gənclər və məktəblilər arasında “Cəsurlar” və “Şahin” hərbi -idman oyunları keçiririk. Paytaxt gənclərinin hərbi-vətənpərvərlik tərbiyəsinin gücləndirilməsi məqsədilə başqa tədbirlərimiz də var. Ümumiyyətlə, BŞGİBİ-nin rəsisi Raqif Abbasov hərbi-vətənpərvərliklə bağlı keçirilən hər bir tədbirə xüsusi bir diqqət göstərir və ümumilikdə həmişə idarəmizdə bu istiqamətdə gənclər siyasətinin düzgün və dinamik qurulmasına xüsusi diqqət yetirir.

-Gənclərin bugünkü ictimai fəallığı sizi qane edirmi?

-Gənclər cəmiyyətimizin əksəriyytini təşkil edir. Bizlər gənclərə böyük ümidlərlə baxırıq. Gənclərimiz milli ruhda və milli - mənəvi dəyərlərimizin əsasında tərbiyələnməlidir. Qeyd edim ki, gənclər həmişə doğma şəhərimizlə sıx bağlı olublar. Ölkəmizin inkişafında elə bir səhifə yoxdur ki, gənclər orada öz izlərini qoymasınlar və adlarını yazmasınlar. Bu ənənə bu gündə yaşayır. Gənclərimiz müstəqil Azərbayanın abadlaşdırılması, burda aparılan quruculuq işlərinə öz töfələrini verməyə çalışırlar. Sevindirici haldır ki, bu gün Bakı gəncləri paytaxtımızın ictimai-siyasi həyatında fəal iştirak edir, respublikamızın ictimai-siyasi həyatında və dövlət quruculuğunda gənclərin rolu artıb, daha çox gənc dövlət orqanlarında məsul vəzifələrə irəli çəkilib. Bütün bunlar ölkə rəhbərinin gənclərə hər zaman xüsusi diqqət və qayğı ilə yanaşdığını bir daha göstərir.

GÜNAY

Paritet.- 2010.- 5-6 oktyabr.- S. 11.