Bəstəkarın həyatının bir anı...

 

Sevinc Tofiqqızı: “İlk işıq üzü görəcək musiqi albomumun adı “Həyatın bir anı” olacaq”

 

Musiqi- insanı keçmişə və gələcəyə aparan möcüzə dolu bir aləmdi. Qəribədir ki, insan həm sevincli və həm də kədərli anlarında həmişə musiqiyə müraciət edir və daxilində bir rahatlıq tapır. Buna  əsasəndə demək olar ki, insanın ən yaxın dostu və sirdaşı gözəl yazılmış musiqidir.  Bu gün bizim sizə haqqında danışacağımız bəstəkarın musiqilərindəki  həzinlik, gözəllik insanı başqa bir aləmə, yəni xəyal aləminə aparır.”Hər bir bəstəkar  ifaçıya yeni nəfəs gətirməlidir, hər yazılan musiqi isə tamaşaçının qəlbinə təsir etməli və həyəcanlandırmalıdır”deyən istedadlı bəstəkar Sevinc Tofiqqızı bizə sirli -sehrli sənət dünyasından danışdı.

 

Musiqinin, poeziyanın və rənglərin qovuşduğu  sirli dünya

 

 -İlk olaraq onu qeyd edim ki, valideynlərim incəsənətə çox bağlı insanlardır. Atam hazırda  inşaat sahəsində çalışmasına  baxmayaraq, çox gözəl rəssamlıq qabiliyyəti var. Anam  isə ixtisasca həkimdir. O, musiqi təhsili alıb, ancaq sonradan bu fəaliyyətini təkmilləşdirməyib. Valideynlərimin incəsənətə sonsuz həvəsini illər boyunca görmək, eyni zamanda daxilimdə musiqiyə olan sevgi məni bu sənətə gətirib. Bir maraqlı faktı da qeyd edim, anam deyir ki, uşaq vaxtı şıltaqlıq   dəcəllik edəndə belə məni musiqi ilə sakitləşdirərmişlər. Orta məktəbin birinci sinfinə gedəndə pianoda  çalmaq istəyinə düşdüm. Bu istəyimi görən valideynlərim, məni  musiqi məktəbinə qoydular. Doğum günümdə isə mənə fortepiano hədiyyə etdilər.Altı yaşımdan rəsm çəkməyə başladım. Rəssamlığa  meylim atamdan gəlib. Atam evin divarında iki rənglə anasının portretini yaradıb. Atam anasının portretini yaradanda  bildim ki, o, çox istedadlıdır. Həmin  rəsmə baxanda elə hiss edirdim ki, sanki canlı bir insanla ünsiyyətdəyəm.

 İlk çəkdiyim rəsm atamın portreti olub. Düzdür, o zaman çəkdiyim həmin şəkil atama az oxşayırdı. Getdikcə öz üzərimdə işləyərək daha orijinal şəkillər çəkdim. Cizgi filmlərinə baxırdım, ordakı qəhrəmanların rəsmini də çəkirdim.Qaldı ki toxumaq, hörmək işimə- bu mənə anamdan keçib. İkinci sinifdən anamdan aldığım dərslər nəticəsində  toxuculuqla məşğul oluram. İlk dəfə şal toxumuşam. Bu gün də bu sənəti davam etdirirəm.

-Həm gözəl rəsmlərin, həm də gözəl əl işlərinin müəllifisiniz  üçün  sərginiz olmayıb?

 - Çünki rəssamlıq sadəcə mənim hobbimdir. Yəni heç zaman fikirləşməmişəm ki, mən rəssam  olacağam. Onu qeyd edim ki, dizayn işi də məndə yaxşı alınır. Özüm üçün hər hansı bir geyim alanda onun üzərində işləyib, qeyri-adi bir forma  verirəm. 

-Bildiyimizə görə, müəllifi olduğunuz şeirlər də var..

 - (Gülür) Ara-sıra şeirlərdə yazıram. Yəni qəlbimdən gələn hissləri kağız üzərinə köçürürəm.  Ancaq şeirlərimin  nəşr edilməsini və oxuculara təqdim olunmasını hələ istəmirəm. İndi əsas  istəyim odur ki, bəstələrimi yetərincə  xalqa çatdırım. Gələcəkdə sözlərimə musiqi bəstələnməsini istərdim və bəlkə elə özüm bəstələdim.

-Sizin musiqilərinizi hansı müğənnilər ifa edir?

-Əvvəla onu deyim ki, çox sevinirəm ki, “Biz ikimiz” adlı bəstəmi böyük sənətkar Flora Kərimova istedadlı müğənni  Aslan Hüseynovla birgə duet şəkilində ifa ediblər. Eləcə də Nadir Qafarzadə, “Yeni ulduz” müsabiqəsinin qalibi Vüqar Muradov və gənc müğənni  Əfsanə bəstələrimin ifaçılarıdır. Şairlərdən isə, Xanım İsmayılqızının və Asifin yaradıcılığına müraciət edirəm.

-Xarici ölkələrdən dəvət almısınızmı?

-Moskva şou-biznesinə qatılmaq üçün təkliflər çox olub. Hətta qızım Nərgizi də seriala çəkmək istəyirdilər. Lakin mən razılıq vermədim.

 

“Hər bir bəstəkar ifaçılığa yeni nəfəs gətirmlidir”

 

-Sizcə əsl bəstəkar necə olmalıdır?

-Hər bir bəstəkarın öz iş üslubu olmalıdır. Musiqi gərək insanı həyəcanlandırsın, düşündürsün. Hər bir bəstəkar ifaçılığa yeni nəfəs gətirməlidir.

-Nə üçün siz daha çox instrumental əsərlər yazırsınız?

-İlk nota aldığım peşəkar musiqi “Həsrətindəyəm” instrumental  kompozisiyam olub. Bu əsərin belə adlandırılması təsadüfi deyil. Çünki bu kompozisiya  qürbətdə yaşadığım illərin bəhrəsidir.Musiqilərim daha çox instrumental üzərində qurulur. İnstrumentala daha çox meylliyəm. Çox sevirəm bu janrda işləməyi, bu  mənim daxilimdən gəlir. Ümumiyyətlə, bəstələrim mənim həyatımdı. Dənizin kənarına  gedəndə və ya təbiətlə ünsiyyətdə olanda fikrimə gələn yeni ideyanı mütləq  nota alıram.  Sonra gəlib evdə yazıram və əlavələr edirəm. İnstrumental musiqilərimi istedadlı və gözəl bəstəkarımız  Ruhəngiz Qasımovaya təqdim etdikdə, o dedi ki, bu əsərlərdən gözəl musiqilər alınar. Bundan sonra instrumental musiqilərimi  mahnılara çevirdim. Və Xanım İsmayılqızının şeirlərinə gözəl  musiqilər bəstələdim. Mənim ən çox sevdiyim instrumentalım,  Atv 106”,  “Atv international”da  Bakının görüntüləri ilə səslənən “Həsrətindəyəm” əsəridir.  “Ümid körpüləri” instrumental musiqimi   çox sevirəm və ona klip çəkdirmək istəyirəm.  Sözləri  şair Asifin, musiqisi isə mənim olan,  Nadir Qafarzadənin ifa etdiyi “Doymadım bu sevgidən” mahnıma klip çəkilib. Sözügedən klipdə məndə çəkilmişəm. Hazırda “Can” qrupunun keçmiş üzvü Şəbnəmlə işləyirəm. “ Sevgi deyil, bəs nədir”  musiqimə bu yaxınlarda klip çəkiləcək. Əfsanə adlı gənc müğənni ilə də işləyirəm, o mənim “ Dön” adlı mahnıma klip çəkdirir.  Aslan Hüseynovla  sözləri Xanım İsmayılqızına, musiqisi isə  mənə məxsus olan “Çağır məni” mahnıma  klip çəkdirmək fikrimiz var.

         -Əvvəl musiqini bəstələyirsiniz, sonra ona uyğun sözləri seçirsiniz yoxsa, əksinə?

-Musiqini yazıram, sonra şeiri seçirəm. Ya da elə olur ki, şeir xoşuma gəlir və ona uyğun musiqi yazıram.  Çalışıram ki, mənim bəstələdiyim musiqilərdə  bir tamlıq və  bütövlük olsun

 

“Musiqi sevilsə, müəllifi ilə maraqlanacaqlar”

 

-Həyatda çox optimist görünən Sevinc xanımın nədən musiqilərində gizli bir kədər duyulur?

- Ola bilsin ki,  mənim üz cizgilərim məni həmişə şən göstərir. Amma bəstələrimdə hardasa  az da olsa qəm, kədər  var. Bu səbəbdən də mən söylədim ki, bəstələrim mənim həyatımdır.

-Efirdə   çox görünmürsünüz. Buna səbəb nədir?

-Bilirsiniz , efirlərdə çox görünməyi  xoşlamıram. Mənim üçün əsas odur ki, musiqilərimi  ürəyim istədiyi kimi xalqıma çatdırım. Əgər musiqi sevilsə, istər istəməz onun  müəllifi ilə maraqlanacaqlar. Ancaq bu yaxınlarda bir neçə maraqlı layihələrlə efirlərdə görünəcəyəm.

-CD-niz  vaxt işıq üzü görəcək?

-Artıq bir neçə instrumental əsər yazmışam. İstedadlı aranjimançı Osman müəllim   hazırda onları aranjiman edir. Sözügedən musiqilər hazır olan kimi ilk diskim işıq üzü görəcək.Albomda 15 mahnı yer alacaq və adı isə  Həyatın bir anı” olacaqdır.

-Hazırda hansı kompozisiya üzərində işləyirsiniz?

- Mənim ilhamverici qüvvəm təbiətdir, dənizdir. Sonuncu əsərim elə dəniz kənarında yazdığım “Həyatın bir anı” instrumental əsərimdir.

-İnstrumental musiqilərinizin ifa olunmasını istərdinizmi?

-Əlbəttə, istərdim. Hələ gələcəkdə istəyim var ki, yazdığım instrumental əsərlərdən ibarət konsert  proqramı ilə çıxış edim.

 

“Ailəm mənim səadətim,  bəstələrim isə həyatımdı”

 

-Ailəniz haqqında nə deyə bilərsiniz?

-Qızlarımın ikisi də çox istedadlıdır. Belə ki, Nərgiz çox gözəl rəqs edir, dekerativ tətbiqi sənətlə məşğul olur, maraqlı əl işləri olan gəlinciklər hazırlayır. Ancaq o həkim olmaq istəyir. İkinci qızım Lalə  isə rəsm çəkməyə meyllidir. Çox gözəl rəsmləri var. Bu istedad Laləyə məndən keçib. Amma o da başqa peşənin arxasınca gedəcək. Həkim olmaq istəyir. Bilirsiniz ailəm mənim səadətimdir, bəstələrim isə həyatım.

-Pedaqoji fəaliyyətlə məşğulsunuzmu?

-Bəli , çox istedadlı 6-7 tələbəm var. Bu tələbələrim arasında çox istedadlısı,  üçüncü sinif şagirdi olan Səməndər  Seyidovdur.  Əminəm ki, o gələcəkdə qəlbindəki güclü musiqi duyumu ilə  çox gözəl və möhtəşəm əsərlər yaradaraq istedadlı bəstəkar olacaq. Bir məqamı sizə xatırladım ki, Səməndərin valideynləri də  musiqini çox  sevdiklərindən onların arzusu idi ki,  övladları  pianoda ifa etsin. Bu uşaqla ilk tanışlıqda gördüm ki, Səməndərin  daxilində bir musiqi qığılcımı var. Sadəcə bu qığılcımı alovlandırmaq lazımdır. Həqiqətən də, qısa bir zaman da Səməndər pianoda çalmağı öyrəndi və istedadını daha gözəl şəkildə nümayiş etdirdi.  O, artıq müstəqil  bir neçə kompozisiya ifa edib.  Onun “Ümid körpüləri“ kompozisiyamı  ifa  etməsi məni çox sevindirdi.  Hətta Səməndər hazırda musiqi  bəstələməyə hazırlaşır. Digər istedadlı tələbəlim də var, onlar notu bilmədən ifa edirlər. Hazırda isə  tələbələrə not öyrədirəm.

Biz Sevinc xanımın çox istetdadlı və azyaşlı tələbəsi Səməndər Seyidovla məşq zamanı görüşdük. O musiqiyə hədsiz sevgisi olduğunu dedi və gözəl ifası ilə bizi təəccübləndirdi. Bir neçə dəqiqə müddətində Səməndər  müstəqil olaraq, pianoda çox gözəl musiqilər ifa etdi.  Bizimlə  söhbətində balaca bəstəkar  bunları dedi: “ Musiqini kiçik yaşlarımdan sevirəm. Hazırda  musiqinin sirlərini Sevinc müəllimədən  öyrənirəm. Müəllimi çox sevirəm  və onunla işləməkdən zövq alıram. Arzum istedadlı musiqiçi- bəstəkar olmaqdır.  Musiqi bəstələmək istəyirəm”.

 

 

Günay

 

Paritet.- 2010.- 2-3 sentyabr.- S. 12.