“Mən ürəklə işləyirəm”

Bakıda beynəlxalq elmi konfrans keçirildi

Ötən şənbə günü Bakıda "Dünya Ürək Günü"nə həsr olunmuş "Mən ürəklə işləyirəm" adlı beynəlxalq elmi konfrans keçirildi. Konfransda azərbaycanlı kardioloqlarla yanaşı, Türkiyə, İran, Rusiyadan mütəxəssislər də iştirak edirdi. Səhiyyə nazirinin müavini Elsevər Ağayev bildirdi ki, ölkəmizdə əhalinin sağlamlığının qorunması sahəsində, səhiyyənin inkişafı istiqamətində birsıra islahatlar aparılıb.

"Dövlət tərəfindən səhiyyəyə göstərilən diqqət və qayğının artırılması tibbin müasir dövrlə ayaqlaşan və tərəqqi edən bir sahəyə çevirməkdədir. Belə ki, artıq nəinki paytaxtda, eyni zamanda, regionlarda müasir tibb ocaqları tikilib, yenidən bərpa edilib, ən müasir avadanlıqla təmin olunubdur. Ürək və Damar Cərrahiyyəsi Cəmiyyətinin sədri, Mərkəzi Klinikanın Baş Həkimi, tibb elmləri namizədi Kamran Musayev bildirdi ki, artıq 10 ildir ki, Dünya Ürək Federasiyası tərəfindən "Dünya Ürək Günü" müxtəlif ölkələrdə qeyd olunur. Bu çox sevindirici bir haldır ki, artıq bizim ölkədə də ilk dəfə olaraq əlamətdar gün belə geniş qeyd olunur. Bu Azərbaycanın səhiyyə sahəsində qazandığı nailiyyətlərdən xəbər verir.

Kamran Musayev bildirdi ki, tədbirin məqsədi ictimai diqqəti ürək-damar xəstəliklərinin təhlükəsinə yönəltmək, cəmiyyəti maarifləndirməkdir.

Milli Məclisin deputatı Qənirə Paşayeva vurğuladı ki, ürək-damar xəstəlikləri artıq dünyada əsas ölüm səbəblərindən sayılır. Bu xəstəliyin qarşısını almaq üçün öncə səbəblər araşdırılmalıdır. Çünki səbəbin aradan qaldırılması xəstəliyin yayılmasının qarşısının alınması üçün daha effektiv üsuldur. Deputat insanların bu sahədə maarifləndirilməsinin vacibliyini qeyd etdi.

Tədbirdə "Böyüklərdə ürək-damar cərrahiyyəsinin müasir aspektləri", "Transkateter aort qapaq implantasiyası", "Anadangəlmə ürək qüsurlarının etiopatogenezi və erkən diaqnostikası", "Ürək catışmazlığının müasir müalicə metodları" və digər mövzulardan danışıldı. Qeyd edək ki, konfransın sonunda iştirakçılar sertifikatlarla təltif edildi.

AYSEL

Paritet.- 2010.- 28-29 sentyabr.- S. 8.