Teatrlarımız virtual dünyada

 

Hazırda ölkəmizdə teatrların ümumi infrastrukturunda bir sıra dəyişikliklər, yeniliklər edilib və müasir standartlara cavab verən mədəniyyət ocaqları sənət adamlarının və tamaşaçıların ixtiyarına verilib. Hətta teatrlarımızda informasiya texnologiyalarından istifadə imkanları da genişlənməkdədir. Belə ki, son zamanlar bir sıra teatrlarımızın elektron saytları istifadəyə verilib. Bizdə Bakıda fəaliyyət göstərən teatrların saytları haqqında daha ətraflı məlumat əldə etmək üçün, bu sahəyə addiyyati olan insanlarla əlaqə saxladıq.

İlk olaraq bu günlərdə saytının işinə start verən Azərbaycan Dövlət Akademik Opera və Balet Teatrı ilə əlaqə saxladıq. Sözügedən teatrın mətbuat xidmətindən aldığımız məlumata görə, bu yaxınlarda teatrın (www.tob.az ) ünvanda rəsmi saytı fəaliyyətə başlayıb. Saytın yaranmasına ən yaxşı dizayner və mütəxəssislər cəlb olunub. Saytda Opera və Balet Teatrının və onun binasının yaranma tarixi haqqında materiallar, həmçinin milli opera və balet sənətimizin korifeyləri, görkəmli mədəniyyət xadimləri haqqında məlumatlar öz əksini tapıb: O cümlədən saytda teatrın inzibati və yaradıcı kollektivlərinin - vokal, balet truppaları, simfonik orkestr və xor kollektivlərinin əməkdaşları haqqında məlumatlar öz əksini tapıb. Orda həmçinin teatrın repertuarında olan tamaşalar haqqında qısa annotasiyalar, yaxın üç ayda göstəriləcək tamaşalar barədə informasiyalar da verilib. Bundan başqa Opera və Balet Teatrının saytında teatrın fəaliyyəti ilə bağlı bütün yeniliklərə, kütləvi informasiya vasitələrində dərc olunan resenziyalara geniş yer ayrılıb: Teatra dəvət olunan qastrolçular - vokal və balet ulduzları, dirijor, xoreoqraf və rejissorlar haqqında saytda məlumatlar veriləcəkdir. Sayt hər zaman öz formasını təkmilləşdirəcək və müasir tələblərə uyğun materiallarla yeniləşəcəkdir. Saytın yaranmasında iştirak edən mütəxəssis və dizaynerlər onun fəaliyyətinə hər zaman nəzarət edəcəklər.

Abdulla Şaiq adına Azərbaycan Dövlət Kukla Teatrının(DKT) direktoru Rəşad Əhmədzadə bildirdi ki, rəhbərlik etdiyi teatrın elektron saytı www.kuklateatri.com) artıq il yarıma yaxın bir müddətdir ki, fəaliyyətdədir: Azərbaycan dilində saytımız tam hazırdır. Saytda DKT-nın tarixi, kollektivi , tamaşaları və repertuarı haqqında məlumat, fotolar və s. yer alıb. Hazırda Azərbaycan dilində saytımızda yerləşdirilmiş materialların ingilis və rus dillərinə çevirilməsi üçün işlər aparılır. Yəni məlumatların müəyyən hissəsi tərcümə olunub, müəyyən hissəsi isə hələ tərcümə olunmayıb. DKT-nın saytının tərtibatına gəldikdə isə direktor qeyd etdi ki, gələn ilin əvvəlində saytda bir sıra yeniliklərin edilməsi nəzərdə tutulub:Hazırda belə bir sistem yaradılıb ki, əgər saytda məlumatlar Azərbaycan dilində və yaxud hər hansı başqa bir dildə yerləşdirilibsə, həmin sistemi tətbiq etdikdə, o proqram 30 dilə avtomatik olaraq məlumatı tərcümə edir. Bu gün informasiya texnologiyaları sahəsi daim inkişafdadır. Bu baxımdan biz də çalışacayıq ki, teatrımızın saytı müasir tələblərə uyğun olsun.

Saytın teatr üçün əhəmiyyətindən danışan Rəşad müəllim söylədi ki, teatrın repertuarını daha geniş auditoriyaya təqdim etmək də, eyni zamanda yerli , əcnəbi tamaşaçılarla teatr arasında daha sıx münasibətlərin yaranmasında və onların tamaşalar haqqında fikirlərini bilmək üçün saytın olması çox vacibdir.

Şıxəli Qurbanov adına Dövlət Musiqili Komediya Teatrının direktor müavini Elxan Ocaqov isə bildirdi ki, Muskomediyanın saytı (www .muskomediya.az) 2007-ci ilin əvvəllərindən istifadəyə verilib, ancaq hazırda üzərində iş aparıldığı üçün fəaliyyəti dayandırılıb: Müəyyən düzəlişlər olunmaqla saytımız yenidən işlənir. Düzəlişlər sona çatdıqdan sonra, yaxın vaxtlarda sayt yenidən istifadəyə veriləcək. Muskomediyanın saytında məlumatların üç (Azərbaycan, rus, ingilis) dillərində yerləşdirildiyini deyən Elxan müəllim bildirdi ki, ordakı bölmələrdə teatrın tarixi, tamaşalar haqqında anons, afişalar və ayrıca informasiyalar, şəkillər, eyni zamanda Muskomediyanın bütün yaradıcı heyyəti haqqında məlumatlar yer alıb: Yəni çox geniş sayt idi, ancaq bu gün teatrımızda bir çox dəyişikliklər olduğu üçün, saytımızda da yeniliklər etmək lazım idi. Muskomediya Beynəlxalq Musiqili Komediya Assosiasiyasına daxil olduğu üçün, dünyanın bütün ölkələrindən saytımıza daxil olurlar və maraqlanırlar. Yəni bizim teatrın saytının çoxsaylı auditoriyası var. E.Ocaqov qeyd etdi ki,bu gün dünyada ən böyük reklam vasitəsi internetdir: Belə ki, əvvəllər reklam vasitəsi kimi afişa vardı, yavaş-yavaş afişanı televizor əvəz etdi. Hazırda internet bizim reklam bazarına yiyələnib. Televiziyada hər hansı sahə ilə bağlı reklamlar konkret vaxtda, məhdud çərçivədə ölkə daxilində verilir. Ancaq internetdə hər kəs istənilən vaxt sayta daxil olub, teatr haqqında geniş və mükəmməl informasiya əldə edə bilər. Teatr müqəddəs sənət ocağıdır, bu səbəbdən də hər bir xalqın teatrının geniş şəkildə təbliği vacib bir məsələdir. Bu baxımdan bu gün teatrlarda internetin rolu heç nə ilə müqayisə olunmaz dərəcədə böyükdür.

Azərbaycan Dövət Yuğ Teatrının ədəbi hissə müdiri Elçin Cəfərov qeyd etdi ki, Yuğ Teatrının saytı (www.yugteatr.org) artıq 4-5 ildir ki, ingilis dilində istifadəyə verilib. Saytda məlumatların ingilis dilində yerləşdirilməsinə gəlincə isə ədəbi hissə müdiri bildirdi ki, ölkəmizdə olan tamaşaçılara kütləvi informasiyalar vasitəsilə məlumatları Azərbaycan dilində çatdırırlar: Bu gün Yuğ teatrının kifayət qədər xarici əlaqələri var. Əsasən də teatrımızın xaricdə təbliğ olunması üçün, ilk olaraq saytımızı ingilis dilində hazırladıq. Saytda ingilis dilində məlumatlar başa düşüləndi, elə çətin yazılmayıb. Tamaşaların adı həm ingilis, həm də Azərbaycan dilində verilib. Hazırda isə saytın Azərbaycan dili variantının hazırlanması istiqamətində iş aparırıq, təxminən iki aya qədər müddətdə tam hazır olacaq. Saytın auditoriyasının daha çox tələbələr və xaricilər olduğunu deyən E.Cəfərov söylədi ki, Yuğ teatrında saytın yaradılmasından sonra təbliğat işi genişləndi: Belə ki, xarici ölkələrdə qastrollara gedərkən, orda teatrımızla maraqlanan əcnəbi tamaşaçılara və mütəxəssislərə saytımızı veririk, onlarda istədiyi məlumatı ordan əldə edirlər. Onu da qeyd edim ki, sayt yarandığı gündən daim dəyişikliklər və yeniliklər edilir. Saytımızda müxtəlif bölmələr var, eyni zamanda qara fonda aktyorların şəkilləri və tamaşadan səhnələr bir-birini əvəz edir.

Azərbaycan Dövlət Gənc Tamaşaçılar Teatrının direktoru (DGTT) əməkdar artist Mübariz Həmidov bir neçə ay əvvəl teatrın saytının (www.gt-teatr.com) yarandığını bildirdi: Saytımız hazırda fəaliyyətdədir, ancaq məni o qədər də qane etmir. Bunun üçün saytımızın başqa yeni bir dizaynda olmasını istəyirəm.İndiki saytımızı hazırlayan mütəxəssisə demişəm ki, mənə daha bir neçə yeni variant təqdim etsin. Bu variantlardan birini seçib, yenidən sayt üzərində iş aparacağıq. Artıq materialları ona vermişəm. Yəni qeyd etmək istəyirəm ki, hazırkı saytımız sonuncu variant deyil, onun üzərində təkmilləşdirmə iş aparılacaq və yeniliklər ediləcək.

M. Həmidov qeyd etdi ki, DGTT-nın saytı ümumilikdə onu qane etmədiyi üçün, onu geniş auditoriyaya media nümayəndələrinə hələki təqdim etməyiblər: Yenidən üzərində iş aparıldıqdan sonra, saytımızın geniş formada təqdimatını keçirəcəyik. Çalışacayıq ki, teatrımızın əhatəli və müasir tələblərə cavab verən bir elektron saytı olsun. Bilirsiniz, bu gün gənclərimizn çoxu teatrların tarixindən, hansı tamaşaların hazırlanmasından, ümumilikdə repertuardan xəbərləri yoxdur. Saytda teatrın tarixi, yaradıcı heyyət haqqında məlumat verilir, afişalar, fotolar, həmçinin teatrın 4 aylıq repertuar planı s. məlumatlar yerləşdirilib. Bundan başqa saytımızda forum bölməsi var ki, orda tamaşaçıların baxdıqları tamaşalar haqqında fikirlərini, rəyini bildirmək imkanı var. Saytın müsbət tərəfi və əhəmiyyəti ondadır ki, orda olan bu bölmələrdən gənclər və ümumilikdə teatrla maraqlanan hər kəs ətraflı məlumat əldə edə bilər.

Hazırda (www.gt-teatr.com) saytının Azərbaycan dilində olduğunu deyən direktor bildirdi ki, gələcəkdə saytda məlumatların həm də ingilis və rus dillərində yerləşdirilməsi nəzərdə tutulub.

İrəvan Azərbaycan Dram Teatrından aldığımız məlumata görə, teatrın saytı üzərində işlər tamamlanıb, yaxın günlərdə təqdimatı olacaq və istifadəyə veriləcək.

Azərbaycan Dövlət Akademik Milli Teatrının mətbuat xidmətindən verilən xəbərə görə, hazırda Azdramanın binası təmirdə olduğundan və ümumilikdə teatrda bir sıra yenidənqurma işləri aparılır, o cümlədən saytın (www.azdrama.az) üzərində də iş gedir: Ancaq hələlik saytımızda heç bir yeni məlumat yoxdur. Teatrın binası istifadəyə verildikdə, saytımızda yeni bir formada təqdim ediləcək.

Pantomim Teatrının mətbuat xidmətindən qəzetimizə verilən məlumata görə, artıq bir aydır ki, teatrın saytı (www. pantomima. azadhost.biz) fəaliyyətdədir: Ancaq hələ rəsmi təqdimatı olmayıb. Bu yaxınlarda ictimaiyyətə təqdim olunacaq.Üç dildədir. Yeni yaranıb saytımız getdikcə daha da təkmil olacaq. Bu gün saytımıza daxil olan hər kəsin Pantomim Teatrı haqqında ətraflı məlumat əldə etmək üçün imkanı var.

Səməd Vurğun adına Rus Dram Teatrının mətbuat xidmətindən aldığımız məlumata görə, teatrın saytı (www.rusdrama-az.com) 2001-ci ildən fəaliyyət göstərir və bütün məlumatlar saytda rus dilində yerləşdirilib: Saytımızda teatr haqqında ətraflı məlumat yerləşdililib. Ordakı bölmələrdə teatrın tarixi, fotoqalereya, repertuar, media (kütləvi informasiya vasitələrində dərc olunan məqalələr), forum və başqa bir sıra bilmələr yer alıb. Teatrın yenilikləri də mütəmadi olaraq saytda yerləşdirilir.

Bakı Bələdiyyə Teatrından verilən xəbərə görə, sözügedən teatrın hazırda internet saytı yoxdur.

 

 

GÜNAY

 

Paritet.- 2010.- 30 sentyabr-1 oktyabr.- S. 12.