““Aztelekom”un tam özəlləşdirilməsi strateji cəhətdən vacibdir”

Əli Abbasov: “Əhalini keyfiyyətli xidmətlə təchiz etmək üçün internetə qoşulma şərtlərini sadələşdirən bir siyasət işləyirik”

Rabitə və informasiya texnologiyaları naziri Əli Abbasov “The Business Year” jurnalının Azərbaycana həsr olunmuş xüsusi sayına müsahibə verib. “Azadinform” müsahibəni qısa ixtisarla təqdim edir:

- Nazirliyiniz sabit şəbəkəni genişzolaqlı inkişaf etdirmək üçün hansı investisiyaları dəstəkləyib və gələcək illərdə yayılma əmsalı üçün nə kimi hədəfləriniz var?

- Ölkənin bütün ərazilərinə genişzolaqlı xidmətləri çatdırmaq üçün mexanizmi yenidən qurmalı və telekommunikasiya şəbəkəsini rəqəmsallaşdırmalı olduq. Biz orta və kiçik sahibkarları Azərbaycanda internet xidmətləri ilə təmin etməyə həvəsləndiririk. Bu fəaliyyət üçün heç bir xüsusi icazə tələb edilmir. Məhz bunun nəticəsidir ki, hazırda ölkədə 30 internet provayderi var və onların ikisini çıxmaq şərti ilə hamısı özəl kompaniyalardır. İnternet seqmenti son illər ərzində böyük inkişaf yolu keçib. Genişzolaqlı internet xidmətlərindən istifadə tarifləri son üç ildə 10 dəfə düşərkən, xidmətlərin həcmi 4 dəfə, son 5 ildəki göstəriciyə görə isə 7 dəfə artıb. Ölkə üzrə bizim istifadəçi göstəricimiz 50 faizdir ki, bu istifadəçilərin də 15 faizi genişzolaqlı internet istifadəçisidir. Hazırda internet istifadəçilərinin sayını artırmağa çalışırıq. Eyni zamanda əhalini keyfiyyətli xidmətlə təchiz etmək üçün internetə qoşulma şərtlərini sadələşdirən bir siyasət işləyirik. Uzunmüddətli inkişaf hədəflərimizi qətiləşdirəcək genişzolaqlı internet xidmətlərini inkişaf etdirmək üçün yeni strategiya üzərində çalışırıq.

- “Aztelekom”un tam özəlləşdirilməsindən əvvəl daha hansı addımların atılmasına ehtiyac var və bunun rəqabətə nə kimi təsiri olacaq?

- “Aztelekom” Azərbaycanın böyük bir telekommunikasiya şəbəkəsinə malik olan beynəlxalq operatoru olduğundan onun tam özəlləşdirilməsi strateji cəhətdən vacibdir. Buna görə də şirkət tam özəlləşdirilmədən və səhmdar cəmiyyətə çevrilmədən əvvəl yenidən strukturlaşdırılmalıdır. “Aztelekom”un özəlləşdirilməsi həm də yeni keyfiyyətli xidmət təklif etmək üçün bazarın digər üzvlərini stimullaşdıracaq. Qısaca, bazarı inkişaf etdirmək və istifadəçiləri razı salmaq məqsədilə telekommunikasiya operatorları üçün sağlam və rəqabətə davamlı bazarın təchizi bizim əsas hədəfimizdir.

- Daşınan nömrə sistemi varmı sizdə, bu sahədə vəziyyət necədir?

- Biz mobil nömrə daşıya bilmək imkanı yaratmaq üçün ixtisaslaşmış şirkətlərin təmsilçiləri ilə görüşmüşük. İndi isə normativ qanuni sənədləri hazırlamaq və Azərbaycanda sistemi tənzimləmək üçün texniki baza yaratmaq istiqamətində birgə çalışırıq. Mobil rabitə sektorunda əldə olunan inkişaf bizə sektorun inkişafına, sağlam rəqabət mühiti formalaşdırmağa və istifadəçilərin daha böyük imtiyazlarla yüksək keyfiyyətli xidmətlərlə təmin olunmasına müsbət təsir edəcək. Bundan başqa, bu xidmətlərdən etibarlı və effektiv istifadəni də tənzimləyəcək.

- 2011-ci ildə Azərbaycanın telekommunikasiya sənayesində 20 faizdən çox böyümə proqnozlaşdırılıb. Bu böyümənin arxasındakı ən vacib faktorlar nələrdir?

- İnformasiya-kommunikasiya texnologiyalarının iqtisadiyyatın inkişafında lider sektor kimi qəbul edilməsi bu sahənin hərtərəfli inkişafına geniş yol açıb. Son altı ildə İKT sektoru illik 30-32 faiz artım göstəriciləri ilə 5 dəfə böyüyüb. 2011-ci ildə aparılan internet sorğuların nəticələri optimist proqnozlar verməyə zəmin yaradır. Belə ki, 2010-cu ilin müvafiq dövründəki göstəricilərlə qarşılaşdırıldıqda İKT sektorunda 24,7 faiz, xüsusilə telekommunikasiya sektorunda 19,2 faizlik artım var və informasiya texnologiyaları sahəsi 2 dəfə böyüyüb. Ümid edirik ki, 2011-ci ilin sonuna kimi bu artım göstəricisi 30 faizə çatacaq.

-Azərbaycanın yerli məhsul istehsalı xidmətinin inkişafında informasiya texnologiyaları sektorunun rolunu necə görürsünüz?

- İnformasiya texnologiyalarının dinamik və mobil operator sektorunun sürətli inkişafında İKT sənayesi mərkəzi əsas rol oynayacaq. İT təchizatları istehsalı artır, yeni kompaniyaların professional səviyyəsi təkmilləşir, yeni şirkətlər Azərbaycanda elektron bankçılıq xidmətlərinin və ticarətin yayılmasında fəal rol oynayırlar. Azərbaycan İT şirkətləri Cənubi Qafqaz və Mərkəzi Asiyada yalnız milli layihələrə daxil edilmir, onlar həm də regional bazara öz məhsullarını ixrac edirlər. Önümüzdəki əsas məqsədlərdən biri sektorun ölkə iqtisadiyyatındakı çəkisini artırmaq, yeni şirkətlərin fəaliyyətini genişləndirməklə yanaşı, yerli istehsalı və ixracat həcmini artırmaqdır.

İsmayil

Paritet.- 2011.- 6-8 avqust.- S.9.