Diasporumuz Dağlıq Qarabağdakı qondarma rejimi legitimləşdirmək cəhdlərinə qarşı

ABŞ və İsveçdəki diaspor qurumlarımız hərəkətə keçdi

Vaşinqtondakı Azərbaycan və türk diasporları Hyuston Beynəlxalq Məsələlər Şurası üzvlərinin işğal olunmuş Azərbaycan ərazilərinə planlaşdırılan icazəsiz səfərinə etiraz edir.

Türk-Amerika Assosiasiyaları Assembleyasından bildirilib ki, Hyuston Beynəlxalq Məsələlər Şurasının saytında 2012-ci ilin iyununda Ermənistana və Azərbaycanın işğal olunmuş ərazilərinə səfər planlaşdırılması barədə məlumat yerləşdirilib: “Hyuston şəhərinin ən nüfuzlu vətəndaş forumlarından biri olan bu təşkilatın Azərbaycanın erməni işğalı altında olan ərazisinə, Dağlıq Qarabağa rəsmi Bakıdan icazəsiz səfər planlaşdırması diqqətdən yayına bilməz.

Azərbaycan rəhbərliyinin icazəsi olmadan belə bir səfəri təşkil etmək Azərbaycanın suverenliyinə, bütövlüyünə və xalqına qarşı hörmətsizlikdir”.

Diaspor üzvləri Azərbaycanın işğal olunmuş ərazilərinə icazəsiz səfər planlarına etiraz olaraq, Hyuston ictimaiyyətinə, Beynəlxalq Məsələlər Şurasının rəhbərliyinə və yerli media orqanlarına onlarla məktub göndərib(APA).

Məktubda qeyd olunur ki, Dövlət Departamenti ABŞ vətəndaşlarına Dağlıq Qarabağ və ətrafdakı digər işğal edilmiş bölgələrə, həmçinin Azərbaycan və Ermənistan qoşunlarının təmas xəttində yerləşən ərazilərə səfərləri qadağan edib, çünki Dövlət Departamenti onların təhlükəsizliyinə təminat verə bilmir.

İsveç Azərbaycanlıları Konqresinin üzvləri isə 2006-cı ildə Azərbaycan hökumətinə xəbər vermədən işğal altındakı Dağlıq Qarabağa səfər etmiş İsveç millət vəkilləri ilə görüşüblər.Konqresdən verilən xəbərə görə, Sol Partiya fraksiyasına daxil olan deputatlar danışıqlar prosesinin mövcud durumu və erməni tərəfinin destruktiv mövqeyi barədə məlumatlandırılıb. Konqres üzvləri bildiriblər ki, danışıqlar prosesi davam edərkən dünya ictimaiyyəti və İsveç parlamenti azərbaycanlı qaçqın və məcburi köçkünlərin hüquqlarının pozulmasına laqeyd qalmamalı və onların öz torpaqlarına qayıtmasına kömək etməlidir. Onlar qeyd ediblər ki, gələn il İsveç parlamentində Dağlıq Qarabağ münaqişəsinin müzakirəsinin planlaşdırılması çox vacib addımdır.

Deputatlara Dağlıq Qarabağ münaqişəsi və Xocalı faciəsi haqqında əcnəbi müəlliflərin yazdığı kitablar və materiallar təqdim edilib.

Dekabrın 1-də isə İsveçin Höteborq şəhərində yeni fəaliyyətə başlayan “Qarabağ-Azərbaycan” Mədəniyyət Assosiasiyasının rəhbərliyi Avropa Şurası Parlament Assambleyasının (AŞ PA) Siyasi komitəsinin keçmiş sədri, İsveçin bu qurumdakı nümayəndə heyətinin sabiq rəhbəri Yoran Lindblad ilə görüşüb. Dərnəyin sədri Ceyhun Avşar və qurumun İdarə Heyətinin üzvü, təşkilati məsələlər üzrə müavin Zamin Xəlilovun iştirak etdiyi görüşdə isveçli siyasətçi dərnəyin yaranma səbəbləri ilə maraqlanıb, gələcək fəaliyyət istiqamətləri və birgə əməkdaşlığın formaları haqda təkliflər verib. Görüş zamanı Dağlıq Qarabağ münaqişəsi, ümumiyyətlə, Azərbaycan həqiqətlərinin İsveç ictimaiyyətinə çatdırılması məsələləri ilə bağlı fikir mübadiləsi aparılıb.

Qeyd edək ki, “Qarabağ-Azərbaycan” Kültür Dərnəyi noyabrın 19-dan fəaliyyətə başlayıb. Təşkilatın yaranmasında əsas məqsəd İsveçin Höteborq şəhərində yaşayan soydaşlarımız arasında mədəniyyətimizi, tariximizi, dilimizi, yaşatmaq və təbliğ edib həmrəyliyə nail olmaqdır. Xüsusilə dərnəyin əsas fəaliyyət istiqaməti Qarabağ həqiqətlərini daha da sıx təbliğ edib yerli insanların münaqişənin mahiyyəti haqqında məlumatlandırılması olacaq.

Paritet.-2011.-3-5 dekabr.- S.10.