Üç istedadlı gənc...

Rənglərin, musiqinin və poeziyanın qovuşduğu maraqlı aləm

Məlum olduğu kimi ölkəmizdə “2 Fevral Gənclər Günü” kimi qeyd edilir, bundan başqa gənclərlə bağlı festivallar, rəsm, mahnı, rəqs müsabiqələri, idman yarışları və s. kimi müxtəlif adda tədbirlər keçirilir. Bu cür tədbirlərin reallaşması gənclərin potensial imkanlarının üzə çıxarılmasına imkan yaradır. “ Gənclər günü” ərəfəsində həmsöhbət olduğum ilk gənc, istedadlı vokalist Eldar Tahirov oldu.

O, Bakı şəhərində anadan olub: ”Mən Biləcəri qəsəbəsində yerləşən 296 saylı bağçaya gedən zamandan orda keçirilən bayram və digər tədbirlərdə fəal iştirak etmişəm. Hətta, bağçada keçirilən rəsm müsabiqəsində I yer tutmuşam. Elə o zamandan musiqi ilə də yaxından maraqlanmışam”. Dediyinə görə, musiqiyə körpəlikdən həvəs göstərib: ”Mənim musiqiyə olan marağımı görən valideynlərim musiqi məktəbinə apardılar. 2003-cü ilin sentyabr ayından Fikrət Əmirov adına 6 saylı 11 illik incəsənət məktəbinin hazırlıq sinfinə getmişəm. Orda olan müəllimlər mənim səsimi dinlədilər və bildirdilər ki, vokal sinfində dərs almağım yaxşı olardı. Beləliklə də vokal dərslərinə başladım”. O, birinci sinifdən incəsənət məktəbində vokal dərslərinə başlayıb və məktəbdə keçirilən bayram tədbirlərində çıxış edərək ilk dəfə P.Bülbüloğlunun bəstələdiyi “Şən Azərbaycan” mahnısını ifa edib.

E.Tahirov yaşadığı qəsəbədə şəhid Qamət Abbasovun adını daşıyan 284 saylı orta məktəbin I sinfinə gedib. Orta məktəbdə də fəallığı ilə seçilib və III sinfində oxuyarkən “İlin ən yaxşı şagirdi” müsabiqəsinin regional mərhələsində III yeri qazanıb. O, incəsənətin əsas sahəsi olan kinematoqrafiyada da özünü sınayıb və 2004-cü ilin yayında gənc rejissorların respublika səviyyəsində keçirilən kinofestivalında gənc rejissor Fərid Əhmədovun çəkdiyi “Bir insanın yaxşılığı” filminin baş qəhrəmanı rolunda iştirak edib: ”Bununla yanaşı, incəsənət məktəbindəki dərslərimlə də ciddi məşğul olurdum. “Uşaq musiqi və incəsənət məktəbləri şagirdlərinin fortepianoda müşayiət ifaçılığına baxış” müsabiqəsində iştirak etdim və “Tərifnamə”yə layiq görüldüm. 2007-ci ildə isə Türkiyədə keçirilən “23 aprel Uşaq Festivalı”nda ifa etdiyim T.Quliyevin “Kəndimiz”, ”Bağçamız”, ”Bakı haqqında mahnı” və Ü.Hacıbəyovun “Çırpınırdı Qara dəniz” mahnıları ilə türk tamaşaçılarının rəğbətini qazandım”.

2009-cu ilin may ayının 26-da onun oxuduğu incəsənət məktəbinin vokal sinfi “Kamera və Orqon musiqi zalı”nda xalq artisti Teymur Göyçəyevin rəhbərliyi ilə təşkil edilmiş konsertdə T.Quliyevin “Sevgi valsı”, Neopolitanın “Santa Luçiya”, F.Bədəlbəylinin “Ave Maria”, E.Kapnanın “Osole Mio” mahnılarını böyük məharətlə ifa edib: ” Mənim bu konsertdəki çıxışım haqqında “Mədəniyyət” qəzetində ətraflı məlumat verildi. Bu uğurları qazanmağımda əvəzsiz rolu olan müəlliməm Solmaz Qasımovaya minnətdaram”.

Dediyinə görə onun uğurlu çıxışlarından biri də 2009-cu ilin dekabr ayında keçirilən “Beynəlxalq Rastrapoviç festivalı”ndakı çıxışı olub: ”Dekabr ayının 14-ü festivalın Azərbaycan Dövlət Flarmoniyasında yekun konserti keçirilmişdir. Bu konsertdə mən dünya şöhrətli dirijor Maksim Venqerevlə bir səhnəni bölüşdüm. Festivalda bəstəkar Steve Barakatın YUNİSEF üçün bəstələdiyi “Lay-lay” əsərini ifa etdim. Bu çıxışım böyük incəsənət və dövlət xadimləri tərəfindən gurultulu alqışlarla qarşılandı. Festival mənim ifamla yekunlaşdı.

Ötən il isə Azərbaycan Dövlət Filarmoniyasında Teymur Göyçəyevin rəhbərliyi ilə təşkil olunmuş incəsənət məktəbinin yekun konsertində çıxış edərək Kiaranın “La İspaniola”, F.Bədəlbəylinin “Ave Maria” əsərlərini ifa etdim”.

Bütün bunlarla yanaşı Eldarın digər bir qeyri-adi bacarığı da var. O, fiqurlarla əsasən cizgi filmlərinin qəhrəmanlarının modelini yaradır.

İkinci həmsöhbətim gənc yazar Teymur Bayramov- Həbibi Gürcüstanda Qarayazı mahalının Ağtəhlə kəndində ziyalı ailəsində anadan olub. 1989 -cu ildən bəri ailə üzvləri ilə birlikdə Bakı şəhərində yaşayırlar: ” Mənə bu istedad müxtəlif mövzularda şeirlər yazan anamdan keçib. Yaradıcılığımda daha çox sevgiyə, məhəbbətə yer ayırmışam. Allaha, anaya vətənə, təbiətə qarşı olan məhəbbətim yazdığım şeirlərimdə aydınca görünür. Hərbi xidmətdə olan zaman da qələmimi yerə qoymadım və orda da yeni şeirlər yazmağa davam etdim. “Şahdağ”, “Əsgər”, “Şeir yazmaq istəyirəm”, “Yenə yadıma düşdün sən”, “Ayrılıq” Vətənin keşiyində durarkən yazdığım şeirlərdir”. İlk şeirini məktəbdə oxuyarkən yazmağa başladığını deyən həmsöhbətim bildirdi ki, ona Həbibi təxəllüsünü də məktəbdə onunla bərabər şeir yazan digər dostu verib: ”Məktəbdə oxuduğu dövrlərdə şeirlər yazmaqdan əlavə musiqi ilə də məşğul olurdum.

Tələbəlik dövründən şeirlərim mətbuatda yayımlanmağa başladı. “Müxəmməs” və “Namə” adlı şeirləri mətbuatda ilk çap olunmuş şeirlərimdir. Tələbə Həmkarlar İttifaqı Komitəsinin nəzdində fəaliyyət göstərən ədəbi məclisin fəal üzvlərindən biri olmuşam”. Onun dediyinə görə həyatda yaşadığı hadisələri şeir kimi qeyd edib və bir çox şeirlərini “Həbibi dünyası” adlı ilk kitabında toplayıb. Hazırda ikinci kitabım üzərində işləyir.

Rənglər aləminə vurğun olan üçüncü həmsöhbətim gənc və istedadlı rəssam Lalə Cümşüdlü Bakı şəhərində anadan olub: ”Hazırda Bakı Avropa Liseyində oxuyuram, uşaq vaxtlarından rəsm çəkməyə həvəsi olub. 10 yaşımdan Tofiq İsmayılov adına Uşaq-Gənclər Yaradıcılıq Sarayında rəsm dərnəyinə gedirəm. Orada sevimli müəllimlərimdən bu sənətin sirlərini öyrənmişəm. Daha çox natürmot və peysaj janrında rəsmlər çəkirəm”. Onun dediyinə görə Fransa Mədəniyyət mərkəzində ilk fərdi sərgisi keçirilib və sərgiyə 16 rəsm əsəri nümayiş olunub.

GÜNAY

Paritet-2011.- 1-2 fevral.- S. 13.