“Xalçada Yeni Nəfəs”

Sərgidə 28 ədəd xalça eskizi nümayiş etdirilib

Sözügedən muzeydən qəzetimizə verilən məlumata görə tədbirdə çıxış edən Xalça Muzeyinin direktoru Röya Tağıyeva keçirilən sərginin məqsədindən danışaraq bildirib ki, bu cür sərgini keçirməkdə məqsədləri mədəniyyətlərarası dialoqda xalçanın rolunu və qədim ənənələrə malik Azərbaycan xalça sənətinə gənclərin münasibətini nümayiş etdirməkdir: ”Müasir gənclərimiz xalqımızın qədim və zəngin sənət növlərindən olan xalçaçılıq sənətini qorumaqla yanaşı ona yeni-yeni nəfəslər veriblər. Bu da xalça sənətinin bir daha bitib tükənməyən zənginliyindən xəbər verir. Hər dəfə ona müraciət edildikdə yeni məqamlar ortaya çıxır. Burada keçmişlə müasirliyin harmoniyası parlaq şəkildə öz əksini tapır. Bugünkü sərgidə nümayiş olunan eskizlərdə dünyanın ən müqəddəs varlığı olan ananın övladına məhəbbəti, həmçinin insanların gündəlik ritmik həyatlarının müxtəlif çalarları təsvir edilmişdir. Rəssamlar, eyni zamanda, öz əsərlərində qədim adət-ənənələrimizi, qədim əyləncə növü olan xoruz döyüşlərində əks etdirmişlər. Xoruzlar döyüşkən olduğu üçün mübarizlik simvolu hesab edilir. Çünkü insanlar həyatda öz amalları uğrunda mübarizə aparırlar”.

Gənclərin əsərlərinin bir qismində insanların zaman-zaman düşdükləri hisləri rəng çalarları vasitəsilə ilə fəsillərə oxşadıblar deyən Rəssamlar İttifaqının sədr müavini Ağəli İbrahimov isə bildirib ki, gənclər yaz fəslinin gəlişi ilə əlaqədar təbiətin canlandığı kimi, onların qəlblərində də yeni-yeni arzular doğulduğundan və əldə etdikləri xoşbəxtliyin istiliyini bütün varlığı ilə duymaqla yanaşı ətrafındakılara da bu xoşbəxtliyin enerjisini yayırlar: ”Bəzi xalçalarda isə rəssamların solğun boyalarında insan övladının heç gözləmədiyi bir anda başına gələn hadisənin təsirindən payızın saralan yarpaqları kimi ümidini itirmiş və tənhalığa çəkilərək ətrafdakılarına qarşı olan soyuq münasibətini görmək olar . Xalılarda istifadə edilən hər rəngin bir mənası var”.

Tədbirdə çıxış edən digər sənət adamları da belə sərgilərin keçirilməsini yüksək qiymətləndirərək bildiriblər ki, gənc nəslin xalça sənətinə maraq göstərməsi çox təqdirəlayiq bir haldır.

Məlumat üçün bildirək ki, sərgidə Azərbaycan Dövlət Rəssamlıq Akademiyasının III-cü kurs tələbələri olan Yuliya Ələkbərovanın “Günəşin doğması” (2008-ci il), “Analiq” (2009-cu il), “Günəş” (2009-cu il), “Cənnət bağı” (2010-cu il), Leyla Vazehinin “Baharın müjdəsi” “2009-cu il), “Xəzanın səsi” (2010-cu il), “Yeni nəfəslər” (2010-cu il), “Şirin gecə” (2010-cu il), Ayturan İbrahimovanın “Kilim” (2008-ci il), “Gənclik nəğməsi” (2009-cu il), “Ellərin bayramı” (2009-cu il), “ü sevgi” (2010-cu il), və s. adlı 28 ədəd xalça eskizləri nümayiş etdilib.

Günay

Paritet.- 2011.- 3-4 fevral.- S. 16.