“Dünyada bizim gənclər qədər fəal olan çox az gənc var”

“Yeni Azərbaycan Partiyası gənclərin inkişafı üçün geniş imkanlar yaradıb”

Yeni Azərbaycan Partiyasının ölkənin inkişafı, əhalinin sosial rifahının yaxşılaşdırması istiqamətində və bir çox məsələlərdə işlər görür. Təsadüfi deyil ki, partiyanın artıq yarım milyondan çox üzvü var. Eyni zamanda partiya gənclərin də inkişafı üçün geniş imkanlar yaradıb.

Qeyd edək ki, Dövlət Statistika komitəsinin yaydığı məlumata görə hal-hazırda ölkə əhalisinin 34,1 faizini, yəni 2,9 milyon nəfərini gənclər təşkil edir. Azərbaycanda gənclik dövrü bütün dünyada qəbul olunduğu kimi 14-29 yaş arasıdır. Bu qədər gənc bir millətin gələcəyi, bu gələcəyin uğurlu olacağından xəbər verir. Ümumiyyətlə Azərbaycan gəncliyinin inkişafı və gənclər siyasətinin formalaşması Heydər Əliyevin adı ilə bağlıdır. Belə ki, 1997-ci ilin 2 fevralından etibarən Heydər Əliyevin təşəbbüsü ilə ölkədə Gənclər Günü qeyd edilir. MDB ölkələri ilə müqayisə də Azərbaycan bu məsələlərdə çox öndə durur. Gənclərə göstərilən münasibətin nümunəsi kimi 2007-ci ilin “Gənclər İli” elan edilməsini də göstərmək olar.

Azərbaycan gənclər siyasətində normativ hüquqi aktların hazırlanması, gənclərin cəmiyyətdə özünü təsdiq etməsi məsələləri MDB məkanından xüsusilə fərqlənir, bu prosesdə öndə gedən ölkə kimi özünü sübut edib. Bu barədə YAP Gənclər Birliyinin sədri Seymur Orucov yap.org.az saytına açıqlamasında bildirdi. “Azərbaycanda gənclərə diqqət və qayğı siyasəti ulu öndər Heydər Əliyev tərəfindən müəyyənləşdirilib və bu gün Prezident İlham Əliyev tərəfindən uğurla davam etdirilir. Təbii ki, əhalinin böyük əksəriyyəti gənclər olan ölkədə, demoqrafik problemi olmayan bir ölkədə gənclərə belə bir münasibətin göstərilməsi biz gənclərin üzərinə böyük məsuliyyət yükü qoyur. Azərbaycanda gənclər siyasəti ilə bağlı Prezident İlham Əliyev tərəfindən xeyli sayda sərəncam imzalanıb. Gənclər və İdman Nazirliyi müxtəlif gənclər təşkilatları və digər müvafiq qurumlarla birgə bu siyasətin həyata keçirilməsi üçün səylə çalışırlar. Bu baxımdan Azərbaycan gəncliyi yetərincə peşəkar, öz üzərində çalışan və əvvəlki dövrlərdən xeyli fərqlidirlər.”

Qeyd edək ki, S.Orucov yanvarın 31-də YAP-ın Gənclər Birliyinin Qəbələdə keçirilən III Qurultayda yeni sədr seçilib.

Sədr Azərbaycan gəncinin beynəlxalq aləmdə göstərdiyi uğurlardan, həyata keçirdiyi işlərdən də danışıb. O deyib ki, bu gün Benilüks ölkələrində, ABŞ, Türkiyə, Qazaxıstan və digər ölkələrdə gənclərimiz Azərbaycanı uğurla təmsil edir: “Azərbaycan gənci XXI əsrin tələblərinə uyğun olaraq beynəlxalq səviyyədə ölkəmizi layiqincə təmsil edir. Azərbaycan gəncləri ölkə hüdudlarından kənarda da özünü təsdiq edib, dünyaya Azərbaycan həqiqətlərini çatdırmağa çalışırlar. Heydər Əliyev Fondunun Rusiya nümayəndəliyinin rəhbəri Leyla Əliyevanın sədrliyi ilə Rusiyada AMOR adlı gənclər təşkilatı fəaliyyət göstərir. Bu təşkilatın dünyanın böyük dövlətlərində Azərbaycan həqiqətlərini çatdırmasında rolu xüsusi vurğulanmalıdır. Digər tərəfdən, gənclər dövlətin qayğısı nəticəsində bəlkə də əvvəlki illərdə görülmüş işlərin cəmi qədər iş görə bilir. 2009-2010-cu ildə gənclərlə bağlı böyük beynəlxalq tədbirlər keçirilib. Bu cür tədbirlərin Azərbaycanda keçirilməsi ölkəmizin beynəlxalq miqyasda nüfuzunun göstəricisidir.”

Qeyd edək ki, gənclər təşkilatlarımız Avropa Gənclər Forumunun üzvüdür, eyni zamanda İslam Konfransı Təşkilatının gənclər strukturunun fəal iştirakçılarındadır. S.Orucov hesab edir ki, Azərbaycan gənci qədər fəal olan çox az ölkənin gənci var. O, YAP-ın gənclərlə bağlı fəaliyyət istiqamətlərinin üstünlüklərindən də danışıb: “Partiyamızın gənclər siyasətində prioritet istiqamətlər mövcuddur. Bununla bağlı üç əsas istiqaməti qeyd etmək istəyirəm: təşkilatlanma, beynəlxalq qurumlarda özünütəsdiq və cəmiyyətdə mütəxəssis qismində təmsil olunmasıdır. YAP-ın gənclərlə bağlı siyasətinin uğurla davam etdirilməsi gənclərin ictimai-siyasi fəallığını da ildən ilə artırır. Seçki prosesində gənclərin iştirakına, parlament və bələdiyyələrdə təmsil olunmaları buna misaldır. Hazırda dövlət gənclər siyasətinin bəhrəsi olan, bilik və bacarıqları ilə özünə etimad qazanmış yetərincə gənc millət vəkilimiz var.”

O, digər ölkələrlə müqayisədə bu rəqəmin yüksək olduğunu deyir. “2009-cu ilin dekabr ayında keçirilən bələdiyyə seçkilərində də xeyli sayda gənc namizədlər var idi. Azərbaycan həqiqətləri ilə bağlı dünyada ədalətsiz məqamlara rast gələndə istər interforumlardakı aksiyalarda, istər beynəlxalq tədbirlərə qatılmaq nöqteyi-nəzərdən bütün proseslərdə gənclər çoxluq təşkil edir. Bu da cəmiyyətdə gənclərin fəallığından irəli gəlir. Elə dövlət və qeyri-hökumət strukturu yoxdur ki, orda gənc təmsil olunmasın”.

Gənclərlə bağlı təşkilatları üç istiqamətə bölən S.Orucov onları fəaliyyətinə görə aktiv, qismən aktiv və yeni yaranan təşkilatlar qrupuna ayırıb. Belə ki, yeni yaranan gənclər təşkilatları digərlərinin inkişafında kadr potensialının güclənməsi, sağlam rəqabətin yaradılması baxımından müsbət rol oynayır. Qismən aktiv təşkilatlar öz üzərində işləyərək maraqlı layihələrin həyata keçirilməsinin axtarışında olanlardır. Aktiv qurumlar isə öz ətrafında artıq təsdiqlənmiş, müəyyən zaman kəsiyində ortaq fikirdə olan gəncləri öz ətrafına birləşdirə bilmiş və gələcəkdə mütəxəssislərin cəmiyyətə ixrac edilməsinə xidmət edən strukturlardır. “Yəni bu sahədə birmənalı şəkildə təşkilatlanma var. Burada elm-təhsil, ekologiya, iqtisadiyyat, din, hərbi vətənpərvərlik istiqamətində təşkilatlar var. Yeri gələndə onlar birləşərək birgə fəaliyyət göstərirlər. Bütün bunlar bizim demokratik cəmiyyətimizin mühüm göstəricilərindəndir. Gənclər hərəkatında idmançılarımızda böyük əksəriyyət təşkil edir. Və hər bir gənclik bilikli və bacarıqlı mütəxəssis olmaqla yanaşı, həm də sağlam olmalıdır. Bu hərəkatın da lideri olan Prezident İlham Əliyev idman yarışlarında ölkəmizi dəstəkləyərək idmançılarımızı ruhlandırması idmanımızın inkişafında gənclərimizi ruhlandırır. Peşəkar idmançılar bayrağımızı yüksəldərək Azərbaycanı bir idman ölkəsi kimi tanıtması üçün əlindən gələni edirlər.”

Paritet.-2011.- 3-4 fevral.-S. 5.