Qara Qarayevlə bağlı kitab və diskin təqdimat mərasimi keçirilib

Dünən Mədəniyyət və Turizm Nazirliyi, Musiqi Mədəniyyəti Dövlət Muzeyi, Heydər Əliyev Fondu və M.F.Axundov adına Milli Kitabxanası birgə Qara Qarayevə həsr olunmuş tədbir keçirmişdir. Tədbirdə Heydər Əliyev Fondu və Mədəniyyət və Turizm Nazirliyinin dəstəyi ilə çap olunmuş “Qara Qarayev. Həyat və yaradıcılığı Azərbaycan Musiqi Mədəniyyəti Dövlət Muzeyinin materiallarında” kitabının və Milli Kitabxananın əməkdaşları tərəfindən hazırlanmış “Qara Qarayevin əsərləri” və “Qara Qarayev. Elektron məlumat bazası” disklərinin təqdimat mərasimi keçirilib.

Milli Kitabxananın direktoru Kərim Tahirov musiqimizə ümumdünya şöhrəti gətirən sənətkarlar arasında Qara Qarayevin xüsusi yer tutduğunu qeyd edib. Mədəniyyət və turizm nazirinin müavini Sevda Məmmədəliyeva görkəmli bəstəkarın Azərbaycan klassik musiqisinin inkişafında əvəzsiz xidmətlərindən, klassik və müasir musiqinin sintezini yaratmasından danışıb. O, belə bir kitabın çap olunmasında Heydər Əliyev Fonduna dəstəyə görə təşəkkürünü bildirib.

Kitabın elmi redaktoru, Musiqi Mədəniyyəti Dövlət Muzeyinin direktoru, sənətşünaslıq namizədi Alla Bayramova deyib ki, muzeyin kolleksiyalarında 50 mindən artıq əşya var. Kolleksiyada Qara Qarayevə və ona yaxın olanların fotoşəkilləri, not və mətnlərin əlyazmaları, afişalar, proqramlar, təsviri sənət nümunələri, bəstəkarın şəxsi kitabları və əşyalar qorunur. Nəşr edilən kitabda Q. Qarayevlə bağlı 700 sənət toplanıb.

Milli Elmlər Akademiyasının müxbir üzvü, əməkdar elm xadimi Zemfira Səfərova , Nizami Gəncəvi adına Milli Azərbaycan Ədəbiyyat Muzeyinin direktoru, millət vəkili Rafael Hüseynov və başqa bir sıra tanınmış ictimaiyyət və mədəniyyət xadimləri bəstəkarın yaradıcılığından, onun gözəl müəllim olmasından, neçə-neçə gözəl bəstəkarlar yetişdirməsindən danışıblar.

Məlumat üçün bildirək ki, Qara Qarayevin əsərləri” və “Qara Qarayev. Elektron məlumat bazası” adlı diskdə bəstəkarın həyat və yaradıcılığı, fəaliyyətinin əsas tarixləri, görkəmli şəxslərin Qarayev haqqında dediyi fikirlər, bəstəkarın musiqi və nəşr əsərləri, Q.Qarayevə həsr olunmuş musiqi və nəşr əsərləri, dissertasiyalar və fotoqalereya əks olunur.

Tədbirin gedişatında Qara Qarayevin əsərlərindən nümunələr Azərbaycan Dövlət Simli Kvarteti, Şeksprin “Hamlet” tamaşasına yazdığı musiqidən fraqment- Pantomima, fleyta improvizasiyası Dövlət Akademik Opera və Balet Teatrının solisti Elnur Qurbanov tərəfindən ifa olunub.

Sonda isə tədbir iştirakçıları Q.Qarayevin həyat və yaradıcılığına həsr olunmuş kitab, dövrü mətbuat materialları, CD disklər, dissertasiyalardan ibarət sərgi ilə tanış oldular.

GÜNAY

Paritet.- 2011.- 5-7 fevral.- S.16.