Milli Dram Teatrı dünya teatrları ilə əməkdaşlığı gücləndirir

Teatrın səhnəsində italiyalı rejissor tamaşa qoyacaq

Azərbaycan Dövlət Akademik Milli Dram Teatrı(AMDT) beynəlxalq əlaqələrin, dünya teatrları ilə qarşılıqlı əməkdaşlığın gücləndirilməsi istiqamətində fəaliyyətini davam etdirir. Cari ildə də Mədəniyyət və Turizm Nazirliyinin dəstəyi ilə AMDT-da bir sıra beynəlxalq layihələr gerçəkləşəcək.

Sözügedən teatrın mətbuat xidmətindən qəzetimizə verilən məlumata görə, 12-14 fevral tarixlərində Azdramanın direktoru İsrafil İsrafilovun K.Marcanişvili adına Dövlət Akademik Dram Teatrının baş müdiri Yekaterina Mazmişvilinin dəvəti ilə Gürcüstanın Tiflis şəhərinə işgüzar səfəri başlayıb. Səfərdə qarşılıqlı əməkdaşlıqla bağlı məsələlər müzakirə olunacaq. Yaxın zamanlarda Marcanişvili adına teatrın bədii rəhbəri Levan Çuladzenin Akademik Milli Dram Teatrında tamaşa hazırlaması planlaşdırılır. Görüşdə bu məsələnin detalları ilə bağlı müzakirələr də keçiriləcək.

Tiflisdən qayıtdıqdan sonra İ.İsrafilovun İtaliyanın Milan şəhərinə işgüzar səfəri planlaşdırılır. Sözügedən səfər 20-28 fevral tarixlərində reallaşacaq. Azdramanın direktoru Milana “Pikkolo” teatrının rəhbəri Luka Ronkoni ilə görüşmək və qarşılıqlı əməkdaşlıqla bağlı bəzi məsələləri müzakirə etmək məqsədi ilə yollanır. 2012-ci ildə Luka Ronkoninin Azdramanın səhnəsində Covanni Verqanın “Dişi canavar” əsəri əsasında tamaşa hazırlaması planlaşdırılır. Bu barədə danışıqlar və onun yeni tamaşaları ilə tanışlıq İ.İsrafilovun Milan səfərinin əsas məqsədidir.

Məlumat üçün bildirək ki, Milanın “Pikkolo” Teatrı 1947-ci ilin may ayında P.Qrassi və C.Strellerin rəhbərliyi ilə yaranıb və tezliklə İtaliyanın, həmçinin dünyanın aparıcı teatrlarından birinə çevrilib. Teatr rus yazıçısı M.Qorkinin “Həyatın dibində” pyesi əsasında hazırlanmış ilk tamaşasını via Rovelloda oynayıb. “Pikkolo” Teatrı yarandığı zamandan zəngin repertuara malik olmuşdur. Teatrın repertuarında dünya və İtaliya klassikasının və müasir dramaturgiyasının nümunələri yer alır. Teatrın uğuru və şöhrəti daha çox teatrın banisi dünyaşöhrətli rejissor Corc Strellerin adı ilə bağlıdır.

Hazırda “Pikkolo” Teatrı Avropa Teatrları İttifaqının üzvüdür. Bu, titul dünya teatr məkanında çox böyük əhəmiyyət kəsb edir. Onu da qeyd etmək lazımdır ki, dünyada bu cəmiyyətin üzvü olan cəmi 21 teatr mövcuddur. (Avropa Teatrları İttifaqı 1991-ci ildə Sors Strellerin təşəbbüsu və Fransanın sabiq mədəniyyət naziri Cek Lənqin dəstəyi ilə yaradılıb. Avropanın ən nüfuzlu teatr təşkilatı hesab edilir).

1 yanvar 1999-cu ildən etibarən Pikkolo Teatrına Luka Ronkoni (1933) başçılıq edir. L.Ronkoni hələ Pikkolo Teatrının bədii rəhbəri vəzifəsində çalışana qədər uzun müddət teatr fəaliyyəti ilə məşğul olub. Bir çox teatrlarda maraqlı tamaşalara quruluş verib.

GÜNAY

Paritet.-2011.-15-16 fevral.-S.16