II Respublika Muğam Müsabiqəsinə start verilib

Dünən Dövlət Filarmoniyasının kamera və orqan musiqi zalında Heydər Əliyev Fondunun, Təhsil Nazirliyinin, Mədəniyyət və Turizm Nazirliyinin və Azərbaycan Milli Konservatoriyasının təşkilatçılığı ilə keçirilən II Respublika Muğam Müsabiqəsinə start verildi. Müsabiqənin və seçimin çox məsuliyyətli bir iş olduğunu deyən xalq artisti, professor Arif Babayev bildirdi ki, bu gün həm də musiqi bayramıdır: ”Belə ki, respublika üzrə müsabiqələr keçirilib və ordan istedadlı gənclər seçilib. Artıq hazırda Beynəlxalq Muğam Müsabiqəsində iştirak etmək üçün gəncləri seçirik. Bunlar hamısı bizim muğam sənətimizin inkişafına və təbliğinə xidmət edir. Yəni, bu cür istedadlı gənclərimiz formalaşdıqca üzə çıxdıqca muğamlarımız uzun illər, əsrlər yaşayacaq”. Azərbaycanda Beynəlxalq Muğam Müsabiqəsinin keçirilməsinin böyük hadisə olduğunu deyən xalq artisti qeyd etdi ki, bu onu göstərir ki, artıq Azərbaycan muğamı ilə dünya maraqlanır:” Belə olan bir zamanda bu seçimdə də kim yaxşıdırsa, layiqlidirsə, istedadlıdırsa o seçiləcək”.

Milli Konservatoriyanın direktoru Siyavuş Kərimi isə bildirdi ki, müsabiqəyə qatılmaq üçün 40 ərizə ilə müraciət olunub:” Ərizələrin sayı çox idi, ancaq bizim şərtlərə uyğun olan 40 oldu. Bunların arasından da münsiflər heyəti 18 nəfəri seçib. Müsabiqənin şərtlərinə görə, 18 – 35 yaşa kimi xanəndələr müsabiqədə iştirak edə bilərlər. Birinci və ikinci turlarda müəyyən edilmiş proqramları ifa edəndən sonra, gənclər arasından üç nəfər qalib müəyyənləşəcək. Beləliklə də Beynəlxalq Muğam Müsabiqəsində iştirak hüququ qazanacaq. Ümid edirəm ki, bizim müəyyən etdiyimiz qaliblər Azərbaycanın bayrağını həmişə yüksəklərdə saxlayacaqlar.”.

Müsabiqədə qaliblərə mükafat veriləcəyini deyən S.Kərimi qeyd etdi ki, I yer beş min manat, II yer üç min manat, III yer min manat pul mükafatı ilə mükafatlandırılacaq.

Artıq ikinci ildir ki, bu müsabiqənin keçirildiyini deyən Təhsil Nazirinin müavini Elmar Qasımov xatırlatdı ki, I Respublika Muğam Müsabiqəsi 2009-cu ildə keçirilib: ”Bu cür festivallar böyük Şərqin mədəniyyət incisi muğam sənətinin Şərq və Qərbin qovuşuğunda, Böyük İpək yolunun üstündə yerləşən Azərbaycanda hansı səviyyədə inkişaf etdiyini, ona göstərilən dövlət qayğısının mahiyyətini göstərməklə Azərbaycan muğamının bu sənətin ən yüksək zirvəsi olduğunu da nümayiş etdirir. “İndi də II müsabiqənin açılışını edirik. Bu müsabiqənin keçirilməsində məqsəd musiqi müəssisələrində, konservatoriyada təhsil alan tələbələrin yəni, ümumilikdə muğam sənəti ilə məşğul olan gənclərin istedadlarını üzə çıxarmaq və gələcək üçün muğam sənəti yaşadan ifaçıları seçməkdən ibarətdir”. E.Qasımov bildirdi ki, bu festivalın əsas üstünlüyü ondan ibarətdir ki, burda münsiflər heyətində ölkəmizin mötəbər sənətkarları təmsil olunurlar: ”Əminliklə deyə bilərəm ki, bu heyətdə obyektiv olaraq layiqliləri seçəcək. Müsabiqə 3 gün olacaq, seçim bitdikdən sonra 24 fevralda bağlanış olacaq. Yüksək yerləri əldə etmiş(I, II, III) qaliblər mart ayında keçiriləcək Beynəlxalq Muğam Festivalında iştirak edəcəklər. Ümid edirəm ki, bu müsabiqədə birincilik əldə etmiş qaliblər, beynəlxalq müsabiqədə yenidən I yeri tutmaqla sübut edəcəklər ki, muğam sənətinin Vətəni Azərbaycandır və bizim ifaçılar dünya səviyyəli sənətkarlardır”.

Qeyd edək ki, sözügedən müsabiqədə münsiflər heyətində xalq artistləri Arif Babayev, Mənsum İbrahimov, Əlibaba Məmmədov, Nəzakət Teymurova və Aygün Bayramova, istedadlı xanəndə Zabit Nəbizadə, Milli Konservatoriyanın direktoru Siyavuş Kərimi və digər tanınmış, görkəmli musiqiçilər təmsil olunurlar.

Məlumat üçün bildirək ki, 2009-cu ilin mart ayında ölkə Prezidenti İlham Əliyev, Heydər Əliyev fondunun rəhbəri, YUNESKO və İSESKO-nun xoşməramlı səfiri, Azərbaycan mədəniyyətinin dostları cəmiyyətinin sədri Mehriban xanım Əliyevanın təşəbbüsü ilə, eləcə də Mədəniyyət və Turizm Nazirliyinin, Bəstəkarlar İttifaqının təşkilati dəstəyi ilə Bakıda Beynəlxalq Muğam Festivalı keçirilib. Festivalda çıxış edən azərbaycanlı ifaçılar öz məharətli və professional səviyyəli çıxışları ilə dinləyicilərin yaddaşında gözəl təəssüratlarla qalıblar. Qran-prinin məhz Azərbaycanlı ifaçıya verilməsi təsadüfi deyildi. Həmin festivalda Özbəkistanlı muğam ifaçısı Yulduz Turdiyeva birinci, İran musiqiçisi Məhəmməd Motamedi ikinci, Misir musiqiçisi Mustafa Səid üçüncü yerə layiq görülmüş, festivalın Qran -pri mükafatı isə Azərbaycan Milli Konservatoriyasının tələbəsi Təyyar Bayramova təqdim edilmişdi. Festivalın möhtəşəm bağlanış konsertində Azərbaycan musiqisinin şah əsərləri olan “Şur simfonik muğamı”, “Leyli və Məcnun”, “Aşıq Qərib” və “Şah İsmayıl” operalarından səhnələr, folklor musiqi janrlarının təqdimi musiqi mədəniyyətimizin təbliğində xüsusi rol oynadı.

GÜNAY

Paritet.- 2011.- 22-23 fevral.- S. 16.