Etnik azlıqların ana dili dövlət səviyyəsində qorunur

Nərgiz Eyvazova: “Ölkədə ləzgi dili tədris olunan 94, talış dili tədris olunan 248 məktəb fəaliyyət göstərir”

“Azərbaycan dünyada tolerantlığı ilə seçilən bir dövlətdir. Bizim ölkədə bütün etnik millətlərin dilinə, dininə, adət-ənənələrinə hörmətlə yanaşılır. Təsadüfi deyil ki, ləzgilərin yaşadığı şimal bölgələrində bu etnik millətin dilində fəaliyyət göstərən 94 məktəb var. Bu məktəblərdə ləzgi dilində 15 min insan təhsil alır. Talışların yaşadığı cənubda isə talış dilində 248 məktəb fəaliyyət göstərir.”

Bu barədə Azərbaycan Gənclərinin Avropaya İnteqrasiyası Təşkilatının Milli İcmaların Koordinasiya Şurası ilə birgə təşkil etdiyi, fevralın 21-də Rusiya İnformasiya və Mədəniyyət Mərkəzində “Beynəlxalq Ana dili Günü”-nə həsr olunmuş konfransda çıxış edən AGAT-ın nümayəndəsi Nərgiz Eyvazova bildirib. Onun sözlərinə görə, konfransın əsas məqsədi milli kimliyin möhkəmlənməsində ana dilinin rolu, hər bir millətin tarixində ana dilinin vacibliyini vurğulamaq, xalqların ana dillərinin qorunmasında tolerantlığın əhəmiyyətini göstərməkdir: “Bizim əsas məqsədimiz Azərbaycanda fəaliyyət göstərən milli icmaları bir arada toplamaq, tolerantlığın inkişafına töhvəmizi verməkdir. Bu gün Azərbaycanda müxtəlif xalqların azadlıqları qorunur və onların mövcudluğunu qoruyub saxlamaqda dövlət səviyyəsində kömək edilir. Biz də gənclər təşkilatı olaraq bu millətlərin icmalarının bir yerdə toplanması, inteqrasiyası üçün Milli İcmaların Kordinasiya Şurasını yaratmışıq. Ən önəmlisi isə bu icmaları birləşdirən Şuranın ortaq dili Azərbaycan dili olmasıdır. Buna heç bir icma etiraz etmir və onlar da yaşadıqları ölkənin dilini öyrənməyə çalışırlar”.

Qeyd edək ki, Milli İcmaların Kordinasiya Şurası AGAT-ın təşəbbüsü ilə Cənubi Qafqazda ilk dəfə olaraq 16 noyabr, 2009-cu ildə təsis edilib. Hal-hazırda Şuraya rus, ukrayna, yəhudi, tatar, yunan, türk və polşa gənclər təşkilatları daxildirlər. Şuranın yaradılmasında əsas məqsəd milli icmaların gənclər təşkilatlarının qarşılıqlı əməkdaşlıqlarının təmin olunması, tolerantlıq, mədəniyyətlərarası və dinlərarası dialoqa töhvə vermək, onların Azərbaycanın sosiol-mədəni mühitinə inteqrasiyasını daha da sürətləndirməkdir.

Tədbirdə çıxış edən Azərbaycandakı Türkiyəli Tələbələr Şurasının rəhbəri Yunus Altun bütün türk xalqlarının qədim tarixə malik olduğunu, onların dillərinin eyni kökdən qaynaqlandığını vurğulayaraq bildirdi ki, millətlərin inteqrasiyası, sülh şəraitində yaşaması üçün ilk növbədə dillərin yaxınlaşmasına nail olmaqdır: “Azərbaycan cəmiyyəti bu istiqamətdə çox işlər görür. Eyni zamanda heç bir etnik qrupa öz dilində ünsiyyət yaratmaqda problemlər yaradılmır”.

“Rus dilinə göstərdiyi münasibətə görə mən Azərbaycan dövlətinə minnətdarlığımı bildirirəm”. Rus icmasının nümayəndəsi Lyubov Timatenova bildirdi ki, rus dili təkcə Bakıda yaxud paytaxta yaxın Sumqayıtda deyil, həmçinin ölkənin bütün regionlarında da geniş təbliğ edilir: “Təkcə universitetlərdə rus bölməsinin yaradılması bizim dilimizə olan hörmətin göstəricisidir. Biz burda öz evimizdəki kimi yaşayırıq. Bütün bunlar azərbaycanlıların bir millət kimi mədəni, tolerant olduğunun sübutudur. Buna görə sizə təşəkkür edirik”.

Türk dillərinin tarixindən danışan tatar icmasının sədr müavini Nazim Muxtarov isə bildirdi ki, başqa dillərlə yanaşı öz doğma dilimizi də öyrənməli, təkmilləşdirməliyik: “Bu gün Tatarıstanda olduğu kimi, Azərbaycanda da və başqa türkdilli dövlətlərdə də öz dilinə laqeyd yanaşma var. Biz bu neqativ halları da aradan qaldırmalıyıq. Ən əsas da gənclərimiz arasında doğma dili təbliğ etməli, onu incəliklərinə qədər öyrətməliyik”.

Qeyd edək ki, MİKŞ ayda iki dəfə olaraq, həmin icmaların gənclərinin iştirakı ilə keçirilir. N.Eyvazova qeyd etdi ki, adətən toplantılar yəhudi icmasını mərkəzində keçirilir: “Azərbaycanda mövcud olan milli icmaların müxtəlif tədbirləri olur. Bu şuranın vasitəsi ilə biz həmin tədbirlərdə bütün icmaların nümayəndələrini toplayırıq. Çox gözəl mənzərə yaranır. İnsanlar müxtəlif dillərdə danışsalar da, bir-birilərini anlayırlar.”

Tədbirdə həmçinin Türkiyə və Polşanın Azərbaycandakı səfirliklərinin nümayəndələri iştirak edirdilər.

A. NƏRIMANLI

Paritet.- 2011.- 22-23 fevral.- S.4.