YAP Gənclər Birliyi Xocalıya həsr edilmiş tədbir keçirib

Əli Əhmədov: “Xocalı faciəsini törədənlər beynəlxalq təşkilatlar tərəfindən nəinki cinayətə cəlb olunmayıb, hətta onların bir çoxu siyasətlə məşğul olur”

“Biz Azərbaycan gənclərini Xocalı faciəsini unutmamağa, bu qətliamın dünyaya çatdırılması üçün mübarizə aparmağa səsləyirik. Xocalının qanı yerdə qalmamalı, dünya birliyi buna münasibətini açıqlamalıdır.

Buna qədər dünyada bir çox qətliamlar olub və hər biri öz layiqli cəzasına çatıb. Biz bunu dəstəkləyirik. Bununla yanaşı Xocalı qətliamı da tanınmalı, bunun baiskarları dünya qarşısında cavab verməlidir”

Bu barədə YAP sədrinin müavini, icra katibi, millət vəkili Əli Əhmədov dünən YAP Gənclər Birliyinin təşkilatçılığı ilə Xocalı faciəsinə həsr edilmiş konfransda bildirib.

Onun sözlərinə görə, bu qətliam təkcə hərbi cinayət deyil, həm də bəşəriyyətə qarşı törədilib: “Bu bəşəriyyətə qarşı törədilən bir cinayətdir. Beynəlxalq ictimaiyyət buna münasibət bildirməlidir. Cinayətkarlar cəzalandırılmadıqca bundan istifadə edib, yeni cinayətlər törətməkdə davam edirlər. Xocalıda hərbi əməliyyatlarda iştirak etməyən 613 nəfər dinc əhali qətlə yetirilib. Dünya buna digər soyqırımlara, qətliamlara göstərdiyi ədalətli münasibəti verməlidir. Bizim buna haqqımız var. Artıq Xocalıya olan laqeyd münasibət aradan qaldırılmalıdır. Bir ildən sonra bu qətliamın üstündən 20 il ötəcək. Bu faciə haqqında həqiqətlərin dünyanın əksər guşələrinə çatdırılmasına baxmayaraq, təəssüf hissi ilə qeyd etməliyəm ki, beynəlxalq qurumlar tərəfindən lazımi, ədalətli qiymət verilməyib. Bu faciəni törədənlərə qarşı beynəlxalq məhkəmə qurulmayıb. Xocalı faciəsini törədənlər beynəlxalq təşkilatlar tərəfindən nəinki cinayətə cəlb olunmayıb, hətta onların bir çoxu siyasətlə məşğul olur. Bu gün həmin insanlar Azərbaycanın torpaqlarını işğal edən dövlətin rəhbər vəzifələrində işləyir. Bütün bunlar dünyanın Xocalı qətliamına nəinki biganəliyini, birbaşa laqeyd münasibətinin göstəricisidir. İnsana qarşı törədilən cinayət irqindən, milliyyətindən aslı olmayaraq, ən böyük haqsızlıq, ən böyük cinayətdir. Belə hesab edirəm ki, bütün vətəndaşlarımız, xüsusən də gənclərimiz faciənin tanıdılması üçün daha çox çalışmalıdırlar. Biz dəfələrlə ikili standartlardan şikayətlərimizi edirik. Bu gün də mövqeyimizdə qalırıq. Ayrı-ayrı beynəlxalq təşkilatların fəaliyyətində ikili standartlardan istifadə olunur. Xocalı faciəsinə beynəlxalq səviyyədə hüquqi qiymət verməsi prosesində də bunu açıq görürük”. Azərbaycan dövlətinin Xocalı faciəsinin tanıdılması istiqamətində davamlı işlər apardığını da qeyd edən Ə.Əhmədov görüləsi işlərin daha çox olduğunu bildirib: “Cinayətkarların beynəlxalq məhkəməyə verilməsinə gəlincə, Azərbaycan hökumətinin mövqeyi odur ki, faciəni törədənlər beynəlxalq təşkilatların təzyiqləri ilə qanun qarşısında cavab verməlidirlər. Təəssüf ki, bu günə qədər buna nail olunmayıb”.

“Xocalı faciəsi haqqında” qanunun qəbul olunmasına gəlincə, Ə.Əhmədov deyib ki, ölkə daxilində istər qanunvericilik, istərsə də digər məsələlərə dair zəruri işlər görülüb.

YAP Gənclər Təşkilatının sədri Seymur Orucov faciənin tarixindən danışaraq bildirdi ki, soyqırımın törədilməsində SSRİ Silahlı Qüvvələrinə məxsus 366-cı motoatıcı alayın xüsusi fəaliyyəti olub. O qeyd etdi ki, Xocalı faciəsinə ən ədalətli qiyməti ümummilli lider Heydər Əliyev verib. S.Orucov tədbir iştirakçılarını Xocalı faciəsinin qurbanlarını bir dəqiqəlik sükutla yad edilməsinə dəvət etdi.

Qeyd edək ki, Heydər Əliyevin 1997-ci il, 25 fevral sərəncamı ilə hər ilin fevral ayının 26-ı saat 17-00-da respublika ərazisində Xocalı qurbanlarını bir dəqiqəlik sükutla yad edilir.

YAP-ın Sabunçu rayon təşkilatının Gənclər Təşkilatının sədri Lamiyə Cəlilova və Binəqədi Gənclər Təşkilatının sədri Qüdsi Bayramov çıxış edərək, Xocalıda törədilən qətliamın təffərüatlarından danışdılar. O bildirdi ki, beynalxalq təşkilatlar bu faciəyə lazımi münasibət bildirilməsə də YAP gənclər təşkilatları ruhdan düşmür, haqq mübarizəmizdə əlindən gələni edirlər: “Hər il bizim gənclər təşkilatlarımız internet aksiyaları keçirir, dünyanın mindən çox tanınmış xadimlərinin elektron poçt ünvanlarına Xocalı ilə bağlı faktlar, fotolar və video görüntülər göndərir. Biz haqq işimiz uğrunda mübarizə aparmaqdan yorulmuruq və haqqımız tanınmayana qədər, haqsızlar cəzalanmayana qədər bu mübarizəni davam etdirəcəyik.”

L.Cəlilova isə bu faciənin intiqamı alınmayınca, torpaqlarımız işğaldan azad edilməyincə, cinayətkarlar cəzalanmayınca şəhid olmuş insanların ruhlarının Tanrı dərgahında rahatlıq tapmayacağını dedi.

Xocalı faciəsinin şahidi, şəhid ailəsinin üzvü Məhəmməd Şükürov çıxışında bildirdi ki, bu faciə törədilən günə qədər erməni birləşmələri Azərbaycanın bir sıra kənd və qəsəbələrini yerlə-yeksan edib, əhalisini qətlə yetirib. O qeyd etdi ki, bu faktlar keçmiş Sovet İttifaqı Baş Hərbi Kəşfiyyat İdarəsinin Xankəndində yerləşən dairəsinə rəhbərlik edən polkovnik Sadıyevin faciədən sonra SSRİ və Azərbaycan rəhbərliyinə, həmçinin BMT-yə ünvanladığı teleqramların toplandığı 19 səhifəlik sənədlərdə öz əksini tapıb: “Erməni terrorçuları hələ 1988-ci ildən etibarən Dağlıq Qarabağa toplanıb. Dünyada tanınan ASALA terror təşkilatının 26 nəfərlik qruplaşması Xocalı faciəsini törətmək üçün əvvəlcədən bu regiona gəliblər. Bu və digər faktlar var və bu faktlar qaçılmazdır. Mən bu faciənin şahidi kimi deyə bilərəm ki, orda törədilən faciələr bəlkə də dünyanın heç bir soyqırımında olmayıb”.

O bildirdi ki, həmin faciələrin törədilməsində birbaşa olaraq Ermənistanın bu günki müdafiə naziri Seyran Ohanyan da iştirak edib.

Tədbir sonunda Xocalıya həsr edilmiş şeir oxundu. Eyni zamanda faciənin görüntülərindən ibarət video-çarx göstərildi.

Qeyd edək ki, Xocalıya hücum zamanı erməni silahlı dəstələrinin dinc əhaliyə qarşı hərəkətləri Cenevrə konvensiyasına, həmçinin Ümumdünya İnsan Haqları Bəyannaməsinə ziddir. Amma hələ də dünya birliyi bu soyqırımı tanımayıb.

A.CƏLALOĞLU

Paritet.- 2011.- 24-25 fevral.- S.1;6.