Ordumuzun tərəqqisi danılmazdır

Silahlı Qüvvələrimiz haqqında danışarkən ölkənin milli maraqları nəzərə alınmalıdır

Ordumuzda baş verən son olayla əlaqədar bəzi millət vəkillərinin, o cümlədən kütləvi informasiya vasitələrinin şou xarakterli çıxışları məni istər-istəməz 1990-cı illərin əvvəllərində baş verən hadisələrə qaytarır. O vaxtlar çoxları Azərbaycan ordusunun gələcəyinə inanmır, bir qayda olaraq şübhə ilə yanaşırdılar. Ancaq ümummilli liderimiz Heydər Əliyevin ölkə ictimaiyyətinin təkidi ilə yenidən hakimiyyətə gəlməsi və xalqımızın iradəsi onların kökündən yanıldıqlarını sübuta yetirdi.

Ulu öndərin sərkərdəlik istedadı qısa zaman kəsiyində öz səmərəli bəhrəsini verdi. Xalqı bir mərkəzdə - Müdafiə Nazirliyində birləşməyə çağıran dövlət başçısı bütün qüvvələrin toparlanmasına və eyni cəbhədə mübarizə aparmasına nail oldu. Ordunun qanunvericilik bazası formalaşdırıldı. Gənclərin hərbi vətənpərvərlik tərbiyəsi sahəsində ciddi dönüş yaradıldı. Bir sözlə, Silahlı Qüvvələrimiz vahid bir xətt üzrə daim dinamik inkişaf edən Silahlı quruma çevrildi. O illərin şahidi kimi, bugünkü Azərbaycan ordusunu 15-20 il bundan əvvəlki ordu ilə müqayisə etmək mənim üçün çox çətindir. İstər mənəvi-psixoloji, istər maddi-texniki təminat, istərsə də döyüş hazırlığı baxımından bu gün Azərbaycan ordusu, sözün həqiqi mənasında, çox az orduların əldə edə biləcəyi böyük nailiyyətlərə yiyələnib. Silahlı Qüvvələrimizdə inkişafın dinamikliyi, həyatın qaynar axını bu uğurların gələcəkdə daha böyük miqyası əhatə edəcəyinə zəmin yaradır.

Doğrudan da, dövlət başçısı, Silahlı Qüvvələrimizin Ali Baş Komandanı İlham Əliyev tərəfindən ordumuzun daim hərtərəfli diqqət və qayğı ilə əhatə olunması ordu mənsublarında yüksək döyüş əhval-ruhiyyəsi ilə müşaiyət olunur. Hərbi qulluqçularımızın tam böyük əksəriyyəti öz mənəvi və fiziki imkanlarına, o cümlədən düşmən üzərində qələbə çalacağına, bununla da, dövlətin və xalqın etimadını doğruldacağına inanır. Bu inamın arxasında, heç şübhəsiz, onlara göstərilən etimad, diqqət, qayğı və ən əsası isə, Azərbaycan xalqının milli maraqları dayanır.

Bu gün Azərbaycan Silahlı Qüvvələrinin Cənubi Qafqazda ən yüksək döyüş hazırlığına malik bir hərbi qurum olduğunu xarici ölkələrin ekspertləri də etiraf edirlər. Bununla belə dünyanın bütün ordularında olduğu kimi, bizim ordumuz da etimal olunan cinayət hadisələrindən sığortalanmayıb. Axı ordu müxtəlif xarakterə və dünyagörüşünə malik insanların cəmləşdiyi məkandır və bu məkanda hər hansı nizamnamədənkənar hərəkətlərin qarşısını tamamilə almaq mümkün deyil. Bu tip hadisələr ABŞ, Türkiyə və Rusiya kimi böyük ölkələrin Silahlı Qüvvələrində də qeydə alınır. Bu günlərdə “N” saylı hərbi hissəsində baş verən qanlı olay hamıdan, xüsusilə ictimaiyyət və KİV nümayəndələrindən səbr və obyektivlik tələb edir. Silahlı Qüvvələrimizdə baş verən bu olayla əlaqədar bir sıra kütləvi informasiya vasitələrində dərc olunan yazıların və verilən şərhlərin həqiqətə uyğun olmaması isə təəssüf doğurur. Hadisə ilə əlaqədar ölkə başçısının göstərişinə əsasən Müdafiə Nazirliyinin rəhbərliyi istintaq qrupu ilə birgə dərhal hadisə yerinə yollanıb, intizam pozuntuları ilə əlaqədar ilkin tədbirlər həyata keçirmiş və obyektiv istintaq işinə başlanılıb. Müdafiə Nazirliyi mətbuat xidmətinin yaydığı məlumatlarda da bu haqda ətraflı bəhs olunur və xüsusi vurğulanır ki, hadisəyə hüquqi qiymət verilmədən bəzi üzdəniraq qüvvələrin ordumuzu nüfuzdan salmaq məqsədilə tələm-tələsik verdiyi bəyanatlar əslində düşmən dəyirmanına su tökür.

Bu günlərdə Azərbaycanda müdafiə və təhlükəsizlik, hərbi vətənpərvərlik, əlil və veteranlarla iş sahəsində fəaliyyət göstərən bir qrup qeyri-hökumət təşkilatlarının hadisə ilə bağlı ölkə ictimaiyyətinə və media nümayəndələrinə ünvanladığı müraciətdə də bu haqda ətraflı danışılır. “Hadisədən dərhal sonra ən yüksək səviyyədə atılan addımlar, dövlət başçısı, ali komandanımız tərəfindən görülən təxirəsalınmaz tədbirlər bir daha sübut edir ki, ordu quruculuğu, Silahlı Qüvvələrin inkişafı və möhkəmləndirilməsi Azərbaycan Prezidentinin diqqət yetirdiyi ən vacib məsələdir. Biz vətəndaşlarımızı, ölkə ictimaiyyətini diqqətli olmağa, cəmiyyətdə xüsusi rola malik media qurumlarını, KİV təmsilçilərini Azərbaycanın dövlət mənafeyini, milli maraqlarını daha ciddi şəkildə nəzərə alaraq fəaliyyət göstərməyə dəvət edirik”.

Hərbi ekspertlər də “N” saylı hərbi hissəsində baş verən insidenti şişirtməyin əleyhinədirlər. Hərbi ekspert İldırım Məmmədzadə Azərbaycan qanunvericiliyini əsas götürərək bildirdi ki, ordu, silahlı qüvvələr siyasətdən kənar institutlardır: “Bundan kiminsə öz siyasi məqsədləri üçün istifadə etməsi təsadüf olunan hallardandır. Hesab edirəm ki, bu, düzgün münasibət deyil. Çünki bizim əsgərlərimiz soyuqda, çətin bir şəraitdə öz borclarını yerinə yetirərək, vətənimizin keşiyində dayanırlar. Bu günlərdə bir nəfər əsgərin hansısa səbəbdən, yaxud səriştəsizlik üzündən öz silahını yoldaşlarına tuşlamasına qarşı belə bir münasibət göstərmək isə bütün hərbçilərimizin çəkdiyi əziyyəti yerə vurmaqdır. Bu cür hadisələrdən heç bir ordu sığortalanmayıb. Lakin bu, heç bir halda, siyasi məqsədlər üçün istifadəyə əsas vermir. Ən azı ona görə ki, Azərbaycan Silahlı Qüvvələri region ölkələri içərisində liderdir və istənilən vaxt torpaqlarımızı işğaldan azad etməyə qadirdir.

“Tərxis Olunmuş Hərbçiləri Gəncləri maarifləndirmə” ictimai birliyinin sədri Emin Həsənlinin fikrincə, Azərbaycan ordusunun güclənməsi Azərbaycanı istəməyən bütün qüvvələri narahat edir. Bir məqamı hamı anlamalıdır ki, ordu nə iqtidarın, nə də müxalifətindir. Ordu bütövlükdə ölkəmizin, cəmiyyətimizindir. Ordu mövzusuna münasibət həssas olmalıdır. Biz toparlanmalı, bir yumruq kimi birləşməli, dövlətimizin ordu üçün gördüyü işləri qiymətləndirməliyik”.

Məsələyə münasibət bildirən Azərbaycan Vətən Müharibəsi Veteranları Birliyinin sədri Füzuli Rzaquliyevin isə qeyd etdi ki, hər hansı bir hərbi hissədə baş verən qanunsuzluğu, tələfatı ümumi ordunun adına yazmaq olmaz. “Bizim Fərid kimi, Mübariz kimi yüzlərlə oğullarımız var. Son hadisədə günahkarlar məhz yerlərdəki komandirlərdir ki, onlar da öz layiqli cəzalarını aldılar. Sağ olsun cənab Prezidentimiz ki, bu məsələyə dərhal reaksiya verdi və lazım olan tədbiri gördü. Dövlətimiz bu sahədə bütün əziyyətləri çəkir, ona görə də bu hadisə ordumuzun adına yazılmamalıdır”.

Qarabağ Müharibəsi Əlilləri, Veteranları və Şəhid Ailələri İctimai Birliyinin sədri, ehtiyatda olan polkovnik Mehdi Mehdiyev də həmkarlarının fikirləri ilə şərikdir. O bildirdi ki, bu gün Azərbaycan ordusunun istər texniki təchizatı, istərsə də şəxsi heyətin döyüş hazırlığı yüksək səviyyədədir. “Bunu gözü götürməyənlər də var. “N” saylı hərbi hissəsində baş vermiş qanun pozuntusu, təbii ki, bizim hamımızı kədərləndirir. Amma bunu əlində bayraq edib, düşmənin xeyrinə fikir bildirənlər də az deyil. Elə Ermənistanın özü də bu barədə müxtəlif şayiələr yayır ki, öz ordusunun xeyrinə bizim ordunu gözdən salsın. Amma əslində hansısa bir cinayətin baş verməsi orduya ləkə yaxmaq üçün şərait yaratmamalıdır. Hər şeyi unudub bircə faktdan yapışmaq lazım deyil. Ən azı ona görə ki, ordumuzun döyüş hazırlığı yüksək səviyyədədir, şəxsi heyətdə ruh yüksəkliyi vardır”.

Doğrudan da, orduda baş verən hər hansı neqativ hadisə Silahlı Qüvvələrimizin indiyədək qazandığı uğurlara xələl gətirilmədən, tam obyektivlik prinsipi əsasında, xalqın milli maraqlarına söykənilərək şərh olunmalı, analiz edilməlidir. Təəssüf ki, bəzi üzdəniraq qüvvələr bu mühüm və əhəmiyyətli məqamı bəzən qəsdən unudur, öz şəxsi maraqlarına xidmət edən məqamlara üstünlük verirlər. Belələri indiyədək Azarbaycan Prezidentinin rəhbərliyi altında Müdafiə Nazirliyi rəsmilərinin həyata keçirdiyi strateji əhəmiyyətli tədbirləri, gördüyü mühüm işləri sanki tamamilə unudur, bir xalqın gələcəyini təhlükə altına atmaqdan belə çəkinmirlər. Bizə bunu deməyə ağına-bozuna baxılmadan kütləvi informasiya vasitələrinə ötürülən və heç bir fakta söykənməyən, yəni hüquqi bazası olmayan arqumentlər əsas verir. Nə qədər xudbin və dar düşüncəli olmalısan ki, orduda baş verən faciəni şəxsi ambisiyalarını həyata keçirməkdən ötrü bir vasitəyə, tranplinə çevirəsən. İndiyədək əldə olunmuş müqaisəyə gəlməyəcək dərəcədə böyük uğurların üstündən vicdan əzabı hiss etmədən xətt çəkəsən. Son olay bəzi üzdəniraq qüvvələrin sanki pusquda dayandığını, ən adi hadisədən belə öz məqsədləri üçün bəhrələnməyə çalışdığını bir daha sübuta yetirdi. “N” saylı hərbi hissəsində baş verən hadisəni şişirtməklə bütün ordunu xalqın gözündən salmağa çalışanların bu hərəkətini başqa necə qiymətləndirmək olar! Onlar bu hərəkətlərlə gecə-gündüz döyüş növbəsi çəkən fədakar Azərbaycan əsgərinin Vətən qarşısındakı xidmətlərini aşağılayır, bununla da, istər-istəməz düşmənlə bir cəbhədə birləşmiş olurlar. Ancaq bu kimi hallar ölkənin Silahlı Qüvvələrini o cümlədən xalqımızı nəinki ruhdan salmır, əksinə, təcavüzkar Ermənistan ordusu ilə mübarizədə hərbi qulluqçuların ayıq-sayıqlığını, mübarizə əzmini daha da artırır.

Sonda bir daha qeyd edirik ki, ordu quruculuğu sahəsində əldə olunan uğurlar, həyatımızın dinamik inkişafı fonunda kifayət qədər böyük ümidlərə əsas verir. Bu mənada Silahlı Qüvvələrimizə münasibətdə hər bir kəs səbr, təmkin və obyektivlik nümayiş etdirməlidir. Unutmaq olmaz ki, ölkənin ən böyük Silahlı qurumu olan Azərbaycan ordusu dövlətin və xalqın inam və güvənc yeridir.

Bu inam sarsılmaz və əbədidir.

İbrahim RÜSTƏMOV

Əməkdar jurnalist

Paritet.- 2011.- 26-28 fevral.- S. 9.