“Hamımızı Azərbaycan birləşdirir”

Namiq Əzimov: “Rusiyadakı diaspor təşkilatları arasındakı münasibət yaxşı səviyyədədir”

Bu dəfə qərib diyarda, yəni Rusiyada yaşayan vəkil soydaşımızla müsahibəni sizlərə təqdim edirik. Amma vəkil olsa imkanı daxilində diasporumuzun işlərində fəal iştirak edir. Moskvadakı işlərinin çoxu vəkillik statusuyla bağlı olduğundan çalışır azarbaycanlılarla bağlı hüquqi problemlərin həllində o da öz əməyini göstərsin. Beləcə, Moskva “İnter-advokat” vəkillər kollegiyasının sədri Namiq Əzimovu, buyurun, ilk olaraq elə öz dilindən onu tanıyın.

-Mən Lənkəran rayonunun Xolmili kəndində anadan olmuşam. Orta məktəbi qurtarandan sonra iki il Bakıda işləyib yaşamışam. 1980-cı ildə ordu sıralarına çağırılmışam. 1982-ci ildə Moskva şəhərinə gəlmişəm və bu günə kimi də burada yaşayıram. İki uşaq atasıyam. Qızım Ellada, Lomonosov adına Moskva Dövlət Universitetinin dövlət idarəçiliyi fakültəsinin üçüncü kursunda, oğlum Samiq, Hüquq Akademiyasının kollecində oxuyur. Yoldaşım Aygün xanım, Krupskaya adına Moskva Dövlət Pedoqoji Universtitini bitirib.

- Rusiyaya üz tutmağınız nə ilə bağlı oldu?

- Rusiyaya üz tutmağımın əsas səbəbi MDU-nun hüquq fakültəsində oxumaq arzusu idi. Müəyyən səbəblər üzündən ora daxil ola bilmədim. Üç il inşaat müəssisələrində işləyəndən sonra Moskva Dövlət Mədəniyyət Universitetinə daxil oldum. Oranı bitirəndən sonra Moskva Dövlət Hüquq Akademiyasında təhsilimi davam etdirdim. Hazırda Moskva “İnter-Advokat” vəkillər kollegiyasının sədri, “Azimov” hüquq kompaniyasının yaradıcısıyam.

-Necə oldu ki, belə bir kollegiyanı yaratmaq qərarına gəldiniz?

- Kollegiyanı yaratmaqda məqsədim əhaliyə hərtərəfli hüquqi kömək göstərməkdir. Bizim kollegiyada iqtisadiyyatın hər bir sahəsində xidmət göstərən vəkillər işləyir. Hüquqşunaslarımız cinayət, mülki, inzibati, arbitraj və s. işlərdə çox böyük müvəffəqiyyətlə çalışırlar.

-Sizin kollegiya və kompaniyada azərbaycanlılar da çalışırmı?

- Bəli, bizim kollegiyada azərbaycanlılar çalışır.

- Rusiyayadakı diasporumuzu güclü hesab etmək olarmı?

- Rusiyadakı Azərbaycan diasporunu güclu saymaq olar. Diasporumuz sayca çoxluq təşkil edən ictimai qurumlardan biridir.

-Bəs, diaspor qurumları arasında koordinasiya varmı?

- Rusiya ərazisində bir neçə diaspor təşkilatı var. Onların fikirləri eyni olsa da hamısı müstəqil hərəkət edirlər. Amma Azərbaycanla əlaqədar olan bütün tədbirlərdə onların həmişə bir araya gəldiklərini görürəm. Hər təşkilatın öz mətbu orqanı və internet saytı var. Müəyyən fikir ayrılıqları olsa da, bunu ictimai müzakirələrə çıxarmırlar. Bir sözlə, deyərdim ki, diaspor təşkilatları arasındakı münasibət yaxşı səviyyədədir.

Mənim yaşadığım Moskvada həyatın ritmi çox intensivdir. Çox zaman gün ərzində görüləcək işlərin öhdəsindən gəlmək olmur, vaxt çatmır. Elə günlər olur ki, 3-4 saat vaxtımız tıxaclarda keçir. Bütün bunlarla əlaqədar olaraq bəzən elə olur ki, kimsə Azarbaycan diasporunun keçirdiyi tədbirlərə çatdıra bilmir və iştirak etmir. Bu hamı tərəfindən başa düşülür və heç kəs heç kəsdən incimir. Amma bütün bunlara baxmayaraq diasporun xətti ilə keçirilən tədbirlərdə həmişə anşlaq olur. Tədbirlərdə ayırmırıq ki, kim hansı diaspor təşkilatının üzvüdür. Hamımızı Azərbaycan birləşdirir.

-Sizin özünüzün Vətənlə əlaqələriniz hansı formadadır?

- Burdakı çoxluğumuz bəzən bizə Vətəndən uzaqlarda yaşamağımızı unutdurur. Bu gün Rusiyada yaşayan bütün azərbaycanlıların evlərində Azərbaycan telekanalları işləyir. Azərbaycanlılara məxsus olan restoran və kafelərdə çox zaman dilimizdə mahnılar səslənir. Sanki Azərbaycandayıq. Amma bütün bunlara baxmayaraq Vətənlə də heç vaxt əlaqəni kəsmirik. Telefon və internet vasitəsilə tez-tez qohumlarımızla, dostlarımızla danışıqlar aparırıq. Sosial şəbəkələrin köməyi ilə Azərbaycanda yaşayan həmvətənlərimizlə dostluq əlaqələri yaradırıq. Ən başlıcası isə imkan daxilində çalışırıq ki, Azərbaycana tez-tez gələk. Mən əsil rahatlığı yalnız Azərbaycanda, Lənkəranda hiss edirəm.

-Rusiyadakı azərbaycanlılar daha çox hansı sahələrdə fəaliyyət göstərirlər?

- Çoxları bəlkə də fikirləşirlər ki, azərbayanlıların çoxu ticarətdə işləyir. Xeyr, bu heç də belə deyil. Sadəcə, ticarətlə əlaqədar işlər göz qabağındadır və orada işləyən azərbaycanlılar tez gözə çarpırlar. Bizim Rusiyada çoxlu tanınmış həkimlərimiz, ali təhsil ocaqlarında dərs verən muəllimlərimiz, çoxlu hüquqşunas və vəkillərimiz var, hətta inşaat sahəsində tanınmış çoxlu azərbaycanlılar işləyir. Demək olar ki, Rusiya vətəndaşlığı olan azərbaycanlıların çoxu qeyri-ticarət sahəsində çalışırlar. Onlar da ki göz qabağında deyillər.

-Rusiyadakı azərbaycanlı icmasının əsas problemləri kimi nələri qeyd edərdiniz?

- Rusiyada azərbaycanlı icmasının əsas problemlərindən biri yerli ultramillətçilərin onlara qarşı apardığı qeyri-qanuni hərəkətlər idi. Manej meydanında baş verən iğtişaşlardan sonra radikal şovinist təşkilatların fəaliyyəti heçə endirilib. Rusiya hakimiyyət orqanları onlara qarşı mübarizəni sərtləşdirdilər və onların qeyri-rus mənşəli vətəndaşlara qarşı hücumları da azaldı . Bu da biz azərbaycanlıları gərginlikdən və müəyyən problemlərdən azad edir.

-Yəqin ki, həmyerlilərimiz Sizə öz hüquqlarının qorunması üçün müraciət edirlər. Onlar əsasən hansı məsələlərlə bağlı müraciət edirlər?

- Azərbaycanlılar əsasən miqrasiya qanunları ilə əlaqədar məsələlərlə bağlı müraciət edirlər. Rusiya ərazisində qeydiyyata düşmək, işləməkdən ötrü icazə kağızı almaq, azərbaycanlıları narahat edən əsas məsələlərdəndir. Təəssüflər olsun ki, bəzilərinin qeyri -qanuni hərəkətləri Rusiya cinayət məcəlləsinin müəyyən bəndlərinin pozulmasına gətirib çıxardır. Belə hadisələrin baş verməsi əsasən azərbaycanlıların rusca pis danışmaları və Rusiya qanunlarını bilməmələri ucbatından baş verir.

-Azərbaycanlıların Rusiyadakı imici sizi qane edirmi?

-İki il bundan qabaq Rusiyada azərbaycanlılar haqqında rəy məni qane etmirdi. İndi demək olar ki, bizə qarşı olan fikirlər tədricən dəyişməyə başlayır. Bu əsasən Azərbaycanda baş verən dəyişikliklərlə əlaqədardır. Bakıya gələn Rusiya vətəndaşları paytaxtımızın gözəlləşdiyini və sovet dövründə olduğu kimi necə də qonaqpərvər şəhər olduğunu qeyd edirlər. Rusiya şou-biznesinin nümayəndələri, idmançıları Bakıya dəfələrlə böyük məmnuniyyətlə gedəcəklərini qeyd edirlər. Sevindirici haldır ki, onlar bu barədə KİV-də də danışırlar. “Avroviziya-2011”-dən sonra Azərbaycana, azərbaycanlılara hörmət bir az da artdı. Jurnalistlər, teleaparıcılar dəfələrlə qeyd etdilər ki, Azərbaycanda musiqi müsabiqəsi yüksək səviyyədə keçəcək. Siz təsəvvür edirsiniz, bu barədə fikrini bildirən hər bir şəxs çıxışlarının axırında hamını Bakıya dəvət edir: “Gəlin, Bakının gözəlliyini, azərbaycanlıların qonaqpərvərliyini görün”. Qeyd edirəm, bunu qeyri-azərbaycanlılar deyirlər. Sevinməyə əsasımız var. İnanıram ki, gələcək musiqi müsabiqəsindən sonra bizi bir az da başqa səviyyədə qəbul edəcəklər.

-Qərib diyardan Vətənimizin sosial-iqtisadi inkişafı, ümumiyyətlə, hər bir uğurumuz necə görünür?

- Çox yaxşı görünür. Bizim hamımız buna çox sevinirik. Mənim 90-cı illərin sonlarında Almaniyaya mühacirət etmiş dostlarım, hər Moskvaya gələndə həmişə Azərbaycanın sosial -iqtisadi inkişafından danışırlar. Maraqlı orasıdır ki, onlar azərbaycanlı deyillər və uzaq Köln şəhərindən bunu görmələri məni çox fərəhləndirir. Bu o deməkdir ki, Azərbaycanda gedən proseslərdən uzaq ölkələrdə də xəbərləri var. Bu da respublikada aparılan düzgün siyasətin nəticəsidir ki, dünya ictimaiyyətinin də bu irəliləyişlərdən xəbərləri var.

-Səhv etmirəmsə, Siz Rusiya KİV-ləri ilə də əməkdaşlıq edirsiniz?

- Bəli, əlaqələrim var. Bir müddət əvvəl “Paytaxt” və “Yuqo-zapad” televiziya kanallarında hüquq mövzularında tez-tez çıxışlarım olurdu. “Rossiyskiy advokat” jurnalı və bir sıra hüquq portalları ilə əməkdaşlığımı indi davam etdirirəm.

- Bəs, hansı diaspor KİV-i ilə əməkdaşlıq edirsiniz?

- Demək olar ki, Rusiyada azərbaycanlılarının KİV-lərinin çoxlarıyla əməkdaşlıq edirəm. Bir çoxlarının hüquqi məsələlərlə bağlı mənə tez-tez sualları olur. 2002-ci ildən Rusiyada yayımlanan “İnteraz” telekanalında “Advokatla görüş” hüquqi verilişinin yaradıcısı və aparıcısı olmuşam. Canlı efirdən həmyerlilərimizin suallarına həm rusca, həm də azərbaycanca cavablar vermişəm. Diaspor qəzetlərimizin bir çoxlarında hüquqi mövzularda maraqlı materiallarım dərc olunur.

Fuad HÜSEYNZADƏ

Paritet.- 2011.- 11-13 iyun.- S.10.