QHT-lərə Dövlət Dəstəyi Şurası diaspor təşkilatlarından təkliflər gözləyir

Bu günə qədər Şuradan alınan qrantların 20 faizi diaspor fəaliyyəti ilə məşğul olan təşkilatlara ayrılıb

Müstəqilliyinin 20 illiyini qeyd edən Azərbaycan bu illər ərzində diaspor fəaliyyətində də uğurlara imza atır. Son 10 ildə dünyada azərbaycançılığın təbliği, ermənilərin zaman-zaman yanlış informasiyaları nəticəsində yaranmış rəyin dağıdılması istiqamətində dövlət tərəfindən ardıcıl və birbaşa hədəflərə hesablanmış iş aparılır. Azərbaycan üçün vacib olan bu işdə dövlətlə yanaşı, vətəndaş cəmiyyəti də mühüm rol oynayır. Bunu həyata keçirilən işlərə nəzər yetirdikdə görmək olur.

Vətəndaş cəmiyyətini təşkil edən qeyri-hökumət təşkilatlarının Azərbaycanın təbliği, Qarabağ həqiqətlərinin yayılması istiqamətində gördükləri işlər isə Prezident yanında QHT-lərə Dövlət Dəstəyi Şurasının vəsaiti hesabına reallaşıb. Burada QHT-lərlə yanaşı, Şuranın da rolu böyükdür. Prezident İlham Əliyevin 2007-ci il sərəncamı ilə Şura formalaşan Şura dövlət başçısının həmin il dekabr ayının 13-də imzaladığı fərmanla yaradıldı. QHT nümayəndələri arasında aparılan seçkilərdən sonra isə dövlət başçısının 16 aprel 2008-ci il tarixli sərəncamı ilə Şura üzvləri təyin edildi və bununla da Şura fəaliyyətə başladı. Şura sonradan ayırdığı vəsaitlərin bir hissəsini Azərbaycançılığın təbliği, Qarabağ həqiqətlərinin yayılması, qaçqın və köçkünlərin hüquqlarının dünyada qorunması istiqamətində layihələrə yönəltməyə başladı. Bu isə birbaşa olaraq Azərbaycanın son illər daha da güclənən diaspor fəaliyyətinə töhfədir.

“Qrantların 20 faizi diaspor fəaliyyəti ilə məşğul olan təşkilatlara ayrılıb”

QHT Şurasının üzvü Sahib Məmmədov da “Paritet”ə açıqlamasında bildirib ki, Şuranın bu istiqamətdə ayırdığı vəsaitlər əslində birbaşa diaspor fəaliyyətinə sərf edilir. Onun sözlərinə görə, Şura fəaliyyətə başlayanda müraciət edən təşkilatların 50 faizindən çoxu ilk dəfə idi qrant alırdı ki, bunlar da əsasən vətənpərvərlik, Azərbaycanın təbliği və Qarabağ həqiqətlərinin dünyaya çatdırılması layihələri idi: “O cümlədən, beynəlxalq donorlardan vəsait ala bilməyən diaspor fəaliyyətində iştirak edən təşkilatlar idi. Bu baxımdan, Şuranın diaspor istiqamətində fəaliyyət göstərən təşkilatlara dəstəyi xeyli böyükdür. Bu günə qədər Şuradan alınan qrantların 20 faizi diaspor fəaliyyəti ilə məşğul olan təşkilatlara ayrılıb”. Şura üzvü qeyd edib ki, əsas olan məbləğ və say deyil, əsas məsələ milli QHT-lərin diaspor istiqamətində maliyyələşməsidir.

S.Məmmədov bildirib ki, Şuranın yarandığı ilk illər bu istiqamətdə gördüyü işlər az olsa da, sonradan, xüsusilə də 2010-cı ildən etibarən diaspor fəaliyyətinə və Azərbaycanın təbliğinə diqqət daha çox ayrılıb.

Şuranın fəaliyyəti haqqında hazırladığı hesabatlara da nəzər yetirdikdə bu istiqamətdə fəallığın əsasən 2010-cu ildən artdığı məlum olur. Amma, 2008-ci ildə yaradılan Şura bir il sonra-2009-cu ildə də birbaşa diaspor fəaliyyətinə şamil edilən və Azərbaycan diasporunun uzun illərdir mübarizə apardığı Dağlıq Qarabağ münaqişəsi ilə bağlı Azərbaycanın ədalətli mövqeyinin xarici ölkələrdə və beynəlxalq təşkilatlarda təbliği və müdafiəsini diqqətdən kənarda saxlamayıb. Belə ki, 2009-cu il hesabatında göstərilir ki, Şura bu məqsədlə ümumilikdə 160.220 min manat vəsait ayırıb.

2009-cu ildə Şuranın maliyyə yardımı ilə “Gənclərin İnformasiya Savaşı üçün Resurs Mərkəzi” layihəsini həyata keçirən Qloballaşan Dünyaya İnteqrasiya İctimai Birliyinin sədri İlkin Ağayev isə qəzetimizə açıqlamasında bildirib ki, 4 ay davam edən bu layihənin reallaşması üçün Şura tərəfindən Birliyə 5300 AZN vəsait ayrılıb. İ.Ağayev qeyd edib ki, layihə çərçivəsində yaradılan www.savash.az saytında dünyada ermənilərin bizə qarşı informasiya savaşında mübarizə aparmaq üçün Azərbaycanın dünyadakı diaspor təşkilatları da istifadə ediblər.

Qarabağ problemi, artıq 20 ilə yaxın bir zaman ərzində həll olunmamış vəziyyətdədir. Bunun nəticəsində isə Azərbaycanın 20 faiz torpağı işğal altındadır, bir milyon insanı isə köçkün vəziyyətində yaşayır. Sülh yolu ilə həllinə çalışılan bu münaqişənin Azərbaycanın ərazi bütövlüyü çərçivəsində həll olunmamasının bir səbəbi də erməni diasporunun uzun illərdir dünyada dezinformasiyaları yaymasıdır. Azərbaycan dövləti isə bu yalanların ifşa edilməsində öz səylərini davam etdirir. Artıq Qarabağın Azərbaycanın tarixi torpaqları olması faktı demək olar ki, dünya tərəfindən qəbul edilib. Bu istiqamətdə dünyanın əksər dövlətlərində fəaliyyət göstərən Azərbaycan diasporu da böyük rol oynayır.

2010-cı il ərzində Şura Dağlıq Qarabağ münaqişəsi ilə bağlı 52 layihəyə 302.349 manat vəsait ayırıb. Bu layihələr Azərbaycanın 18 rayon və şəhərində həmçinin 6 xarici ölkədə - Almaniya, ABŞ, Belçika, Bolqarıstan, Rusiya və Türkiyədə həyata keçirilib. 2010-cu ildə Dağlıq Qarabağ mövzusu üzrə maliyyələşən layihələr çərçivəsində 14 müxtəlif kitab, buklet, broşur və jurnal dərc edilib ki, bunlardan da 8 nəşr məhsulu xarici dillərdə buraxılıb. Bununla yanaşı, 9 internet səhifəsi hazırlanaraq yeniləşdirilib və ya xarici dilə tərcümə edilib, 7 sənədli film çəkilərək xarici dillərə tərcümə olunub. Bunlardan “Soyqırım” filmi isə ABŞ-da nümayiş etdirilib. O cümlədən, Şura tərəfindən Qadınların Təhsil Mərkəzi İctimai Birliyinin həyata keçirdiyi “Türkiyə universitetləri üçün Qarabağ həqiqətləri” adlı layihəyə 5.500 AZN, Xocalı Soyqırımını Tanıtma İctimai Birliyinin reallaşdırdığı Azərbaycan həqiqətlərinin beynəlxalq səviyyədə təbliği üçün Almaniyanın Köln şəhərində Qarabağ faciəsi və Xocalı soyqırımı ilə bağlı fotosərginin təşkili və Azərbaycan və ingilis dillərinə “Qarabağ harayı” kitabçasının təqdimatına 5.000 AZN, qaçqın və məcburi köçkünlərin hüquqlarının beynəlxalq səviyyədə müdafiəsi istiqamətində həyata keçirilən 3 layihəyə 11500 AZN vəsait ayrılıb.

“Gördüyümüz işlərlə diasporumuzun ümumi işinə kömək edirik”

Bu istiqamətdə Şuranın xarici ölkələrə səfərləri zamanı da iş aparılır. Belə ki, Şura sədri Azay Quliyevin rəhbərliyi ilə dörd nəfərdən ibarət nümayəndə heyəti Türkiyə Qəzetçilər Federasiyasının dəvəti ilə ötən ilin aprelin 21-23-də İzmir şəhərində səfərdə olub. Səfər çərçivəsində silsilə tədbirlər, o cümlədən Şuranın yardımı ilə QHT layihələri çərçivəsində hazırlanan təbliğat materiallarının - kitab, broşur, sənədli film və fotoların nümayiş etdirildiyi sərgi təşkil edilib. Bunların sırasında “Çanaqqaladan başlanan yol”, “Soyqırım” (Quba), “İrəvan: danışır canlı şahidlər” sənədli filmləri, “Erməni yalanları”, “Qarabağ abidələri”, “Məcburən erməniləşdirmə”, “Bağanis Ayrım soyqırımı”, “Qarabağ gündəliyi” və 43 adda digər kitablar, eləcə də 100-ə yaxın fotoşəkil nümayiş olunub. Bu materiallarda ermənilərin türk-müsəlman əhaliyə qarşı Azərbaycan və Türkiyə ərazilərində törətdikləri soyqırım cinayətləri ifşa edilərək, tarixi gerçəkliklər faktlara və arxiv sənədlərinə istinadən şərh olunubdur. Bununla yanaşı, sərgidə erməni silahlı quldur dəstələrinin Türkiyə bölgələrinə hücumunu əks etdirən fotoşəkillər ilk dəfə nümayiş etdirilib. Sərgidə Türkiyə mətbuatı, televiziya və radiolarının İzmirdəki bölgə müxbirləri, jurnalist birlikləri və qeyri-hökumət təşkilatlarının nümayəndələri, eləcə də İzmir şəhər rəhbərləri iştirak ediblər. Səfər çərçivəsində nümayəndə heyəti Türkiyə jurnalistləri ilə birlikdə “Yeni əsr” televiziyası vasitəsilə yayımlanan 1.5 saatlıq birbaşa efirdə qondarma erməni soyqırımı ilə bağlı fikirlərini bildirərək, bu siyasətin ifşası üçün Türkiyə və Azərbaycanın bütün müvafiq qurumlarının, o cümlədən QHT-lərinin daim birlikdə olması və sıx əməkdaşlıq etməsinin vacibliyini bir daha vurğulayıblar. Bu məsələlər barədə A.Quliyev Türkiyənin NTV, TRT, Ege TV və digər telekanallarının xəbərlər proqramına verdiyi müsahibələrində erməni yalanlarını ifşa edən faktlarla çıxış edib.

Şura üzvü S.Məmmədov bizimlə söhbətində bildirib ki, Azərbaycanın təbliği, həqiqətlərin tanıdılması istiqamətində ayrılan maliyyə yardımları ilə yanaşı, Şura xarici ölkələrin vətəndaş cəmiyyətləri ilə əlaqələr qurur, səfərlər təşkil edir ki, bu səfərlər zamanı da ümumi işlə yanaşı, mütləq Azərbaycanın tarixi, mədəniyyəti, Qarabağ həqiqətləri, Xocalı faciəsi ilə bağlı ingilis dilində disklər, kitablar səfər edilən ölkələrin ictimaiyyətini təmsil edən QHT nümayəndələrinə təqdim edilir.

“Bu işi həm Şura əməkdaşlarının vasitəsi ilə, həm də Şuranın maliyyə yardımı ilə xaricə gedən vətəndaş cəmiyyətinin nümayəndələri vasitəsilə həyata keçiririk. Onlara Azərbaycanla bağlı məlumatları şifahi olaraq da çatdırırıq. Təbii ki, bununla əsl həqiqətlərin çatdırılmasında müəyyən işlər görmüş oluruq. Diaspor fəaliyyəti əsasən ölkə xaricində təşkil edilsə də, biz də öz növbəmizdə gördüyümüz işlərlə diasporumuzun ümumi işinə kömək edirik”-deyə Şura üzvü qeyd edib.

Qeyd edək ki, Şuranın maliyyə yardımı ilə təkcə ötən il 5 QHT tərəfindən bu istiqamətdə 4 beynəlxalq, 1 yerli səviyyəli konfrans keçirilib ki, bunlardan da 2-si xarici ölkədə Belçika və Türkiyədə təşkil edilib. Eyni zamanda, ayrılan vəsaitlər hesabına 9 QHT beynəlxalq mətbuatda erməni yalanlarının ifşa edilməsi, Qarabağ həqiqətlərinin dünya ictimaiyyətinə çatdırılması sahəsində işlər görüb. Bu tədbirlərdən dördü Belçika, Bolqarıstan, Türkiyə və Almaniyada həyata keçirilib. 5 QHT erməni təcavüzünün ağır nəticələri, qaçqın və köçkünlərin, minadan zərər çəkənlərin problemlərinin öyrənilməsi və ictimailəşdirilməsi işini həyata keçirib. 4 QHT Qarabağ mövzusunda seminar keçirərək, maarifləndirmə işini, 6 QHT qaçqın və köçkünlər üçün müxtəlif peşə təlimi və peşə kursları, 4 QHT isə onlar üçün yeni iş yerlərinin yaradılması və hüquqi yardımın göstərilməsi xidmətini təşkil edib.

Şura Azərbaycanın təbliği ilə bağlı bu il 30 layihəyə 150 min AZN vəsait ayırıb

Azərbaycançılığın təbliği, Qarabağ həqiqətlərinin dünya ictimaiyyətinə çatdırılması, Xocalı soyqırımının tanıdılması, ümumilikdə diaspor fəaliyyətində öz maddi və mənəvi yardımlarını ilə QHT Şurası bu il də davam etdirir. Şuranın mətbuat katibi, “Vətəndaş Cəmiyyəti” jurnalının baş redaktoru Səfər Alışarlı “Paritet”ə bildirib ki, 2011-ci ildə Şura bu istiqamətdə 30 layihəyə 150 min manatdan çox vəsait ayırıb. Onun sözlərinə görə, yardımlar davam edir: “Şura diaspor fəaliyyətinə öz töhfəsini yarandığı gündən verir. Hər il olduğu kimi, bu il də Azərbaycanın dünyada təbliği üçün təqdim edilən layihələrə vəsaitlər ayrılıb. Bu yardım davam edir. İl ərzində Şuraya bu istiqamətdə müxtəlif layihələr təqdim edilib. Onlardan 30-u seçilib. Bu layihələr də əsasən Xocalı soyqırımı, Qarabağ həqiqətləri, məcburi köçkünlərin hüquqlarının dünyada müdafiəsi, Azərbaycanın təbliği və bu istiqamətdə digər layihələr olub. Bu layihələrin həyata keçirilməsi üçün Şura tərəfindən 150 min manatdan artıq vəsait ayrılıb”.

Qeyd edək ki, 2011-ci il, oktyabrın 3-də CNN-də efirə çıxan Worldview proqramında Dağlıq Qarabağın yanlış olaraq Ermənistanın regionu kimi təqdim olunmasına etiraz olaraq Şuranın internet resursu qhtxeber.az saytında Amerikada və dünyada ən çox izlənən kanallardan biri hesab olunan CNN-də bu cür təhrif olunmuş məlumatların efirə çıxmaması üçün etiraz məktubu kampaniyası da keçirib.

Şura üzvü S.Məmmədovsa qeyd edib ki, diaspor təşkilatları ilə bağlı xaricdə təşkil olunan tədbirlərin maliyyələşməsi, soydaşlarımızın bura səfərləri, buradakıların xaricə getməsi ilə bağlı da Şura öz köməkliklərini edir: “Eyni zamanda, biz təkliflərin gəlməsini istəyirik. Misal üçün, Moldovadan Azərbaycan filmlərinin subtitrlərinin yerli dilə tərcümə olunması ilə bağlı təklif edilib və Şura bu təklifi dəyərləndirərək maliyyə yardımı ayırıb. Bu iş, artıq reallaşıb. Biz bu cür təkliflərin diaspor təşkilatlarının özlərindən gəlməsini gözləyirik. Azərbaycanın təbliği, Qarabağ həqiqətlərinin, Xocalı faciəsinin tanıdılması ilə bağlı diaspor təşkilatlarının bütün təkliflərini Şura dəstəkləməyə hazırdır”. Onun sözlərinə görə, Şura xaricdəki həmvətənlərimizin yaşadıqları ölkələrin vətəndaş cəmiyyətləri ilə əlaqələr qurmasına, həqiqətlərimizi təbliğ etmələrinə çalışır.

“Biz əsasən diaspor istiqamətində fəaliyyət göstərən yerli təşkilatları maliyyələşdiririk. Onlara ayrılan vəsait də ümumilikdə Azərbaycan diasporunun gücləndirilməsi, təbliğat işlərinə sərf edilir. Amma xaricdə fəaliyyət göstərən diaspor təşkilatlarına da maliyyə yadımı ayırmağa hazırıq”-deyə S.Məmmədov bildirib.

Asif NƏRİMANLI

Paritet.-2011.-25-26 oktyabr.-S.10.