“Biz eşitmək və eşidilmək istəyirik”

Leyla Əliyeva: “Biz, Azərbaycanın gənc nəsli gözüaçıq olmaq, Vətənimizi heç zaman unutmamaq, köklərimizi və ənənələrimizi sevmək və qorumaq istəyirik”

(əvvəli ötən sayımızda)

RAGT sədrinin müraciətində konqres çərçivəsində Azərbaycan Gənclərinin Dünya Birliyinin yaradılması, bizim gənclər diasporunun möhkəmlənməsi yolunda növbəti və çox vacib addım olacağına, qarşıda Dünya Azərbaycanlı Gənclərinin I Konqresi Azərbaycan Prezidenti İlham Əliyevə müraciət də qəbul edib. Müraciətdə deyilir ki, Konqres nümayəndələri ölkənin inkişafı və tərəqqisi, eləcə də milli diaspor quruculuğu və gənclərlə iş sahəsində Azərbaycan dövlətinin gördüyü işlərin əhəmiyyətini yüksək qiymətləndirir: “Bununla yanaşı, biz hesab edirik ki, azərbaycanlı gənclər bu siyasətə daha fəal dəstək verməli, ümummilli mənafelərdən irəli gələn məsələlərin həllində daha yüksək templə iştirak etməlidirlər. Biz - Dünya Azərbaycanlı Gənclərin I Konqresinin iştirakçıları Sizi əmin edirik ki, dünyanın hər hansı ölkəsində yaşamasından asılı olmayaraq, hər bir azərbaycanlı gənc Azərbaycan xalqının milli maraqlarının qorunması naminə bütün gücü ilə mübarizə aparmaq, Azərbaycan prezidentinə daim dəstək vermək əzmindədir”.

Bununla yanaşı, Ermənistan-Azərbaycan, Dağlıq Qarabağ münaqişəsi ilə əlaqədar dünya ictimaiyyətinə, beynəlxalq təşkilatlara, xarici ölkələrin parlamentlərinə, dövlət və hökumət başçılarına da müraciət qəbul edilib. “Dünya Azərbaycanlı Gənclərin 1-ci Konqresinin iştirakçıları dünya ictimaiyyətinə, beynəlxalq təşkilatlara, sülhün və dostluğun tərəfində olan bütün ölkələrin rəhbərləri və parlamentlərinə müraciət edərək, Cənubi Qafqaz regionunun əmin-amanlığı, bu bölgədə yaşayan insanların təhlükəsizliyi, uşaqların gələcəyi naminə Ermənistan-Azərbaycan, Dağlıq Qarabağ münaqişəsinin həlli üçün öz səylərini səfərbər etməyə çağırırıq. Biz əminik ki, yalnız dünya birliyinin ədalətli, qətiyyətli və prinsipial mövqeyi Cənubi Qafqazın təhlükəsiz gələcəyinin açarıdır”-deyə müraciətdə qeyd edilib.

Sonda konqresin qətnaməsi də qəbul olunub. Qətnamədə azərbaycanlı gənclər təşkilatlarının diaspor quruculuğu, Azərbaycan həqiqətlərinin dünya ictimaiyyətinə çatdırılması, milli-mənəvi dəyərlərimizin qorunması, insan hüquq və azadlıqlarının müdafiəsi, mədəni irsimizin təbliği istiqamətində fəaliyyətinin koordinasiya edilməsi məqsədilə Dünya Azərbaycanlı Gəncləri Birliyinin (İttifaqı) təsis edilməsi ideyası dəstəklənib. Həmçinin, Dünya Azərbaycanlı Gəncləri Birliyinin təsis edilməsi ilə əlaqədar təşəbbüs qrupu yaradılıb. (diaspora.gov.az)

Qeyd edək ki, Dünya Azərbaycanlı Gənclərinin Konqreslərinin hər 3 ildən bir keçirilməsi haqqında da qərar qəbul edilib.

“YAP Gənclər Birliyi diaspor sahəsinə də öz töhfəsini verməyə çalışır”

Diaspor fəaliyyətinin daha güclü və mütəşşəkkil aparılmasına öz töhfələrini verən gənclər arasında Yeni Azərbaycan Partiyasının Gənclər Birliyi də mühüm rol oynayır. Birliyin bu istiqamətdə fəaliyyəti əsasən, səfər etdikləri ölkələrin gəncləri ilə görüşlərdə Azərbaycan həqiqətlərinin çatdırılması, ümumilikdə Azərbaycanın tanıdılması və digər məsələlər təşkil edir. GB-nin sədri Seymur Orucov “Paritet”ə açıqlamasında bildirib ki, YAP-ın GB-nin diaspor fəaliyyətində özünəməxsus yeri var: “Birlik beynəlxalq əlaqələrində bu məsələni prioritet istiqamət kimi götürür. Buna nümunə olaraq, Birliyin 3 nəfərdən ibarət nümayəndə heyətinin may ayında Rumıniyaya səfərini qeyd etmək olar. Səfər çərçivəsində bu ölkədə yaşayan və təhsil alan soydaşlarımız, Heydər Əliyev Fondunun Rumıniyadakı nümayəndəliyinin əməkdaşları, Rumıniya-Azərbaycan Dostluq Cəmiyyətinin, Rumıniya-Azərbaycan Ticarət və Sənaye Palatasının, Rumıniya-Azərbaycan Gənclər və Mədəniyyət Assosiasiyasının üzvləri ilə görüşlər keçirilib”. Onun sözlərinə görə, görüş zamanı xaricdə yaşayan Azərbaycan diasporu barəsində ətraflı məlumatlar verilib: “Rumıniyada Azərbaycan diasporu kifayət qədər inkişaf edib. Artıq, bu ölkənin ictimaiyyəti ilə qaynayıb-qarışıb və oradakı insanlara Azərbaycanla bağlı bütün həqiqətləri, bütün məlumatları çatdırmaqda, təbliğ etməkdə heç bir çətinlik çəkmirlər. Biz orada olarkən Srayerva şəhərinin gənclər təşkilatı ilə qeyri-rəsmi görüş zamanı söhbət əsnasında məlum oldu ki, guya, Azərbaycan ermənilərin torpaqlarını işğal edib. Məsələni araşdırdıq və məlum oldu ki, bunu deyən gəncin Amerikada təhsil alarkən, otaq yoldaşı erməni olub. Həmin erməni öz yalanları ilə məsələni özününküləşdirərək, ermənilər bizim deyil, guya biz ermənilərin torpaqlarını işğal etmiş olduğumuzu gəncin beyninə yeridib. Biz orda əsl həqiqətləri açıqladıq, məsələni bütünlüklə başa saldıq. Nəticədə, gələn dəfə həmin insan bizdən üzr istədi və erməninin onu aldatdığını, özünün də səhv etdiyini bildirdi”.

S.Orucov qeyd edib ki, səfər zamanı rumınlı gənc tədqiqatçıların Azərbaycana gəlib burada elmi-tədqiqat aparmaq təklifi də irəli sürülüb. O, bu məsələdə maraqlı olduqlarını da deyib: “Çünki həmin tədqiqatçıların əsəri kitab şəklində nəşr olunacaq. Azərbaycanın Ermənistan tərəfindən təcavüzə məruz qaldığını nəzərə alsaq, Azərbaycan həqiqətlərinin bu ölkədə yayılması olduqca böyük əhəmiyyətə malikdir. Bizim diasporumuz bu gün erməni təcavüzü ilə bağlı Rumıniya cəmiyyətinə geniş məlumatlar çatdırır və bu yöndə gələcəkdə də ciddi şəkildə fəaliyyət göstərəcəklərini vurğulayırlar. Bu istiqamətdə dövlət siyasəti ilə yanaşı, diasporun fəaliyyətinin bəhrəsidir ki, bu ölkə Azərbaycanın ərazi bütövlüyünü dəstəkləyir və rumınlar ermənilər tərəfindən xalqımızın başına gətirilən fəlakətlər haqqında məlumatlıdırlar”.

Birliyin sədri onu da bildirib ki, Rumıniyada diasporumuz yüksək səviyyədə təşkilatlanıb və işlərini uğurla davam etdirirlər: “Demək olar ki, oradakı erməni diasporu tamamilə sıxışdırılaraq çıxardılıb. Rumıniyadakı səfirimizin də bu işdə böyük rolu var. Rumıniyada ermənilərin sayı 30 minə qədərdir və onlar kompakt şəkildə yaşayırlar. Amma, diasporumuzun mübarizəsi nəticəsində, ermənilər əməli işdə hökumət tərəfindən öz yerlərində oturdulub. Maraqlı bir faktı vurğulamaq istərdim. Biz orada olarkən diaspor təşkilatımızın nümayəndələrindən biri yemək sifariş verdi. Sifarişi gətirən adam əvvəlcə soruşdu ki, siz bizim parkımızı bərpa edən ölkənin-Azərbaycanın nümayəndələrisiz? Bizim Azərbaycanı təmsil etdiyimizi biləndə, münasibətlərində bir istilik, yaxınlıq yarandı. Mən ən primitiv misal çəkdim. Bununla demək istəyirəm ki, Azərbaycan dövlətinin gördüyü işlər, artıq, başqa ölkələrin də xalqına nüfuz edib. İstər diaspor, istərsə də digər sahələrdə”.

Diaspor fəaliyyətində gəncliyin əhəmiyyətini vurğulayan S.Orucov dövlətin gənclərlə bağlı həyata keçirdiyi siyasətin bu işdə köməkliyinin böyük olacağını deyib. Qeyd edib ki, xaricdə təhsil alan hər bir azərbaycanlı gənc tələbə Azərbaycanın xoşməramlı səfiri olmalıdır: “Dövlət başçısı da bunu dəfələrlə vurğulayıb. Prezident İlham Əliyev çıxışlarının birində bildirib ki, bizim gənclərimiz xaricdə təhsil alıb, ölkəyə qayıdaraq, yenilikləri tətbiq edirlər. Amma, onların içində kimlərsə oxuduğu yerdə qalıb işləyə bilər. Onlar yaşadıqları yerdə inkişaf etməlidirlər. Yəni, Azərbaycandan xaricdə nə qədər nümayəndə olsa, bu o qədər bizim xeyrimizədir. Bu, diasporamızın bazasının formalaşmasıdır. Onların hərəsi öz ətrafını genişləndirdikcə ölkəmizin uğurları da bir o qədər genişlənər. Bu çıxışı ilə dövlət başçısı gəncliyə və diaspor sahəsində onların roluna nə qədər əhəmiyyət verdiyini göstərir. Hər bir gənc də bundan nəticə çıxartmalı və dövlətimizin qabağa getməsində əlindən gələni əsirgəməməlidir. Bizim Birlik də bu siyasəti əsas tutaraq öz işini qurur və bu yolda bacardığımızı edirik. Onu da qeyd edim ki, YAP GB bütün sahələrdə olduğu kimi, diaspor sahəsinə də öz töhfəsini verməyə çalışır”.

YAP GB-nin sədri dövlət proqramı çərçivəsində xaricdə təhsil alan gənclərimizi Azərbaycanın və diasporumuzun gələcək potensial təmsilçiləri olduğunu deyib. O, təcavüzə məruz qalan bir xalq kimi mübarizəmizi heç vaxt dayandırmamalı, ermənilərin yalanlarının ifşa edilməsində bütün gücümüzlə çalışmalı olduğumuzu vurğulayıb. Qeyd edib ki, payızda Bakıda keçirilməsi nəzərdə tutulan beynəlxalq konfransda da bu məsələlərə xüsusi diqqət ayıracaqlar: “Beynəlxalq əlaqələrin genişlənməsi diaspor fəaliyyətinin daha da yaxşı təşkil edilməsinə kömək edən amillərdəndir. Bizim Birlik də bu gün beynəlxalq əlaqələrini uğurla genişləndirir. Biz daim bu əlaqələrdən vətənimizin xeyrinə istifadə etməyə çalışırıq. Payız aylarında Avrasiya gənclərini Bakıya dəvət etməyi planlaşdırırıq. Böyük bir tədbirin olacağını düşünürük. Avropanın, Asiyasının qabaqcıl gənclərinin qatılacağı həmin tədbirdə Azərbaycanla bağlı həqiqətləri bütün iştirakçıların diqqətinə çatdıracağıq. Qarabağ, Xocalı ilə bağlı, ermənilərin təcavüzləri haqqında müzakirələr nəzərdə tutulur. Gənclərin fəaliyyəti barəsində olacaq tədbirdə qonaqlara Qarabağ münaqişəsi, Xocalı hadisələri haqqında məlumatlar veriləcək”.

GB-nin sədri bildirib ki, özümüzü dünyaya əzilmiş xalq kimi göstərməyimizi istəmirəm: “Bizim prezident hər zaman milli məsələlərdə iradə nümayiş etdirir, əzmkarlıqla çalışır və bunların nəticəsidir ki, əksər vaxt hər şey bizim qələbəmizlə tamamlanır. Bunu bu gün dünyada Azərbaycana göstərilən münasibətdə də görmək olar. Biz heç vaxt əzik dövlət deyilik. Biz müharibəni deyil, sadəcə olaraq döyüşü uduzmuşuq. Hesab edirəm ki, hər şeyi olduğu kimi, çılpaq həqiqətləri necə baş veribsə eləcə də çatdırmaq lazımdır”.

S.Orucov qeyd edib ki, xarici ölkələrdə yaşayan Azərbaycan diasporu erməni təbliğatına qarşı daha da aktiv olmalıdır və bu yolda YAP-ın GB Azərbaycan diasporuna hər zaman dəstək verməyə hazırdır.

“Azərbaycan gəncliyi Azərbaycan həqiqətlərinin və reallıqlarının çatdırılmasında əvəzsiz rol oynayır”

“Avropaya inteqrasiya edən bir ölkənin və qloballaşan dünyanın bütün çağırışlarına cavab verən Azərbaycan gəncliyi Azərbaycan həqiqətlərinin və reallıqlarının çatdırılmasında əvəzsiz rol oynayır”.

Bu barədə isə “Paritet”ə açıqlamasında Azərbaycan Gənclərinin Avropaya İnteqrasiya Təşkilatının sədri Gülsel Səfərova bildirib. Onun sözlərinə görə, bu gün mədəniyyətlərarası dialoq məsələsində də gəncliyin rolu mühümdür: “Statistikaya nəzər yetirsək görərik ki, beynəlxalq təşkilatların arasında gedən proqramlar gənclərin təmsilçiliyi ilə həyata keçirilir. Dünya ölkələrində gənclərə böyük bir arena verilib. Azərbaycan həqiqətlərinin çatdırılması, bu arenada çağırışlara cavab verilməsi biz gənclikdən çox asılıdır. İstər diaspor fəaliyyətində, istərsə də digər sahələrdə bu, Azərbaycan gəncliyi üçün məsuliyyət, bir öhdəlik olmalıdır. Burada heç bir məcburiyyətdən söhbət getmir. Əlbəttə ki, Azərbaycan milli ideyasını önəmsəyib hansısa xarici dövlətdə fəaliyyət göstərən gəncin ilk vəzifəsi, öz vətənini layiqincə təmsil etməkdir. Layiqincə dedikdə çox zaman soruşurlar bu necə olur. Sadəcə olaraq, öz ölkəsi barəsində mədəni, tarixi, ictimai-siyasi biliklərə yiyələnib, bu informasiyaları olduğu ortamda düzgün paylaşmasıdır. Belə olduğu təqdirdə, əlbəttə ki, Azərbaycan və onun barəsindəki hər şey haqqında daha dolğun məlumat gedəcək”.

Son 5 ildə Azərbaycanda diaspor fəaliyyətinin daha çox artdığını diqqətə çatdıran G.Səfərova qeyd edib ki, istər Dünya Azərbaycanlı Gənclərin I Konqresi, istərsə də Dünya Azərbaycanlılarının III Qurultayının keçirilməsi buna sübutdur: “Bütün bunlar istər dövlət, istərsə vətəndaş səviyyəsində Azərbaycanın xarici əlaqələrinə, diaspor fəaliyyətinə böyük yer ayrıldığını göstərir”.

Sədrlik etdiyi təşkilatın fəaliyyəti haqqında danışan G.Səfərova bildirib ki, biz də öz növbəmizdə beynəlxalq təşkilatlarda Azərbaycanın adına müxtəlif layihələr həyata keçirdir, Azərbaycan həqiqətlərini çatdırırıq: “Bu sahədə gənclərin gördüyü hər bir iş böyük qiymətləndirilməlidir. Hər bir gəncin vətənimiz üçün öz aktivliyini, fəaliyyətini artırması daha yaxşı olar. Hesab edirəm ki, qarşıdakı illərdə diaspor fəaliyyətində daha böyük nailiyyətlər əldə edə biləcəyik. Düzdür, bugünkü diaspor fəaliyyəti 10 əvvəlki diaspordan tamamilə fərqlənir. Bu, ilbəil daha da güclənir”.

Onun sözlərinə görə, istər ictimai təşkilatlar, istər insanlar, istərsə də dövlət qurumları bu istiqamətdə fəal işləməlidirlər.

Asif NƏRİMANLI

Paritet.- 2011.- 10-12 sentyabr.- S. 10.