Dövlətimizin qüdrəti onun vətəndaşlarıdır

Təranə Ələkbərova: “Ölkəmiz üçün əlimizdən gələn nə varsa, sevə-sevə edirik”

Diasporun formalaşıb, güclənməsi yalnız ayrılacaq maliyyə vəsaitinin çoxluğu ilə ölçülmür. Vətəndən kənarda yaşayan insanların doğma diyarlarına olan sevgisi daha çox önəm kəsb edir. Bu olmadan onları eyni amal uğrunda birləşdirmək də mümkün olmayacaq. Azərbaycan diasporunun getdikcə güclənib, söz sahibinə çevrilməsi məhz bu amillə bağlıdır.

Həmsöhbətim olmuş Təranə Ələkbərovanın fikirləri bunu bir daha deməyə əsas verdi. Ənənəvi həmsöhbətlərimizdən fərqli olaraq o, hansısa təşkilatın ya qurumun sədri, təsisçisi deyil. Amma “Feysbuk(Facebook)” səhifəsindəki profilində paylaşdığı fikirlər, Azərbaycan haqqında söylədikləri, içində olan vətən sevgisi diqqətimi çəkdi. Təbii ki, buna biganə qala bilməzdim. Necə deyərlər bu dəfə xalqın –sıravi diaspor fəalının düşüncələrinə yer ayırmağa qərar verdik. Elə söhbətimizin çox hissəsi də ölkəmiz barədə oldu. Onun Azərbaycanın bu günü ilə bağlı səsləndirdiyi iradları da oldu. Hamısını olduğu kimi diqqətinizə çatdırırıq. Gəlin, əvvəlcə onun keçdiyi həyat yoluna qısaca nəzər salaq.

Təranə Ələkbərova: 1968-ci ildə Bakıda dünyaya göz açıb. Uşaqlığı, gənclik illəri küləklər şəhərində keçib. Orta məktəbi qurtardıqdan sonra BDU-nun Kitabxanaçılıq fakültəsinə daxil olub. Bir müddət Bakıda işlədikdən sonra, 1991-ci ildə ailə qurması ilə bağlı Estoniaya getməli olub.

Burada o, yeni ixtisaslara yiyələnmək üçün kurslara gedir. Satıcılıq, ingilis dili, manikür və pedikür kimi sahələrin diplomlarını alır. Çünki həmin illərdə bu kimi sahələrdə işləmək üçün diplom tələb olunurdu. Amma həmsöhbətim burada uzun müddətə qala bilmir. Bu dəfə taleyi onu başqa ölkəyə, Norveçə aparır. Onun Norveçə gəlməsi də ailə həyatına görə baş verir. 2009-cu ildə Əkbər Muğanlı adlı şəxslə ailə qurur. Özünün etiraf etdiyinə görə, məhz həyat yoldaşının hesabına Azərbaycanla bağlı ciddi məlumatlar əldə edib. Məhz bundan sonra o, Cənubi Azərbaycanda nələrin baş verdiyini anlamağa başlayır:

-Əvvəllər Qarabağ münaqişəsi barədə çox az şeylər bilirdim. Amma indi baş verənləri izləyib, yeni şeylər öyrənməyə çalışıram.

-Norveçdə fəaliyyət göstərən Azərbaycan diasporu ilə əlaqəniz hansı səviyyədədir? Əlaqələr varsa, onlarla hansı şəkildə əməkdaşlıq edirsiniz?

-Norveçdə yüksək səviyyədə fəaliyyət göstərdiyimi iddia etmirəm. Çünki dillə bağlı problemlərim hələ ki qalır. Bununla belə əlimdən gələni edib, dövlətimiz üçün nəsə etməyə çalışıram. Hər həftənin birinci günü Norveç vaxtı ilə saat yeddidə “Azərbaycanın səsi” adlı proqram efirə verilir ki, burada əsasən Azərbaycan barədə məlumatlar verilir. Paralel olaraq milli musiqilərimiz ifa olunur. Sonda yarım saat siyasətlə, Azərbaycanın tutduğu yerlə bağlı debatlar olur. “Avroviziya”, şair və yazıçılarımızın keçdiyi həyat yolu, yaradıcılıqları barədə ətraflı məlumatlar verilr. Təbii ki, bu öz həmvətənlərimizin hesabına mümkün olub. Radionun rəhbərləri Məmmədrza Təbrizli, Rəhmət bəy və Sərvindir. Bir neçə dəfə bu proqramda qonaq qismində iştirak etmişəm. Norveç kimi ölkədə belə bir radionun fəaliyyəti çox əhəmiyyətlidir. Amma proqram yalnız Azərbaycan dilində verildiyindən Norveç ictimaiyyəti geniş məlumat əldə edə bilmir. Hazırda məqsəd burada yaşayan azərbaycanlıları bir yerə toplamaqdır. Amma yeni təklif hazırlamışam və bunu radio rəhbərliyinə verəcəyəm ki, heç olmasa on dəqiqə Norveç və ingilis dillərində də proqram yayımlansın. Bunun ictimaiyyətə böyük təsir edəcəyinə əminəm. Bundan başqa burada fəaliyyət göstərən diaspor təşkilatlarımız ilə geniş əlaqələrim var. Demək olar ki, bütün tədbirlərə qatılıram. Baş verən hadisələrdən xəbərdar oluram.

-Norveçdə Azərbaycan həqiqətlərinin tanıdılması istiqamətində hansı işlər görmüsünüz? Nailiyyətləriniz nədən ibarətdir?

-Bayaq da dedim ki, burada ən güclü silahımız radiodur ki, bununla Azərbaycan həqiqətlərini yayırıq. Təbii ki, Norveçdə yaşayanların çoxu söhbətin nədən getdiyini bilmir. Çünki bütün proqramlar Azərbaycan dilində yayımlanır. Buna görə də tez-tez, demək olar ki, hər ay aksiyalar keçiririk. Mayın 17-də Norveçdə fəhlələrin bayramı idi. Bu gün əhalinin əsas qismi küçələrə çıxır. Biz aksiyamızı məhz bu günə salmışdıq. Məqsədimiz diqqəti Urmiya gölünün qurumasına yönəltmək idi. Son aksiyamız isə sentyabırın 10-da gerçəkləşdi. Bildiyiniz kimi hazırda Cənubi Azərbaycanda çox ciddi işlər baş verir. Dünya ictimaiyyətinin diqqətini bura yönəltməyi özümüzə borc bilirik. Demək olar keçirdiyimiz bütün aksiyalar barədə “Feysbuk”-da məlumatlar verib, videolar yerləşdiririk ki, miqyas yalnız Norveçlə bitməsin. İnan ki, artıq aksiyalara yalnız azərbaycanlılar yox, əcnəbilər də qatılır. Bu isə elə-belə baş verməyib. Uzun illər aparılan zəhmətin nəticəsində buna nail ola bilmişik. Bu bizi daha da ruhlandırır. İnanırıq ki, ədalət deyilən bir şey var ki, ona göz yummayan insanlar hələ də var.

Fəaliyyətimiz yalnız Cənubi Azərbaycanla bağlı deyil, hər ilin mart ayında Qarabağla bağlı böyük aksiyalar keçirilir. Ədalətli səsimizi dünyaya çatdırmaq üçün əlimizdən gələn nə varsa onu da edirik. 20 Yanvar hadisələrinin ildönümü hər zaman qeyd olunur. Bu barədə ictimaiyyətə bütün mümkün vasitələrdən istifadə edib, məlumatlar veririk.

-Sizcə Avropada güclü olmağımıza maneçilik törədən nəsə varmı? Bunun aradan qaldırılması üçün hansı təklifləriniz var?

-Ümumiyyətlə, qeyd edim ki, Avropada bizə mane olan heç bir şey yoxdur. Demokratik şəraitdə fəaliyyət göstərməkdə problem yoxdur. Aksiyalarımızı sərbəst keçiririk və hökümət bir dəfə də olsa bizə maneçilik yaratmayıb. Çünki burada yalnız Azərbaycanla bağlı fikirlər səsləndirilir. İkincisi burada yaşayan azərbaycanlılar vəziyyətdən heç vaxt sui-istifadə hallarına yol verməyiblər. Bu isə bizə qarşı müsbət imicin yaranmasına səbəb olub. Azərbaycanı sevən hər kəs burada doğma diyarları üçün əlindən gələni edə bilər. Əminəm ki, bizim xalqda bu ruh var. Və biz getdikcə Avropada daha da güclü olacağıq.

-Norveçdə Azərbaycanın imici necədir?

-Etiraf edim ki, Norveçdə Azərbaycanı çoxları tanımırlar. Məqsədimiz bu halı aradan qaldırmaqdır, amma səmimi deyim ki, ölkəmizi tanıyan əcnəbilərin münasibəti çox müsbətdir. Mən heç vaxt Azərbaycanı tanıyıb, onun əleyhinə danışan kimsəyə rast gəlməmişəm. Eşitdiyim ancaq xoş sözlər olub.

Şəxsən Azərbaycan mənimçün çox qiymətlidir. Mən Bakını dünyanın heç bir şəhəri ilə müqayisə etmək istəməzdim. O, hər biz azərbaycanlının doğma şəhəri, ümid yeridir. İnanın ki, ailə məsələləri olmasaydı, mən Bakını tərk etməzdim. Yadıma gəlir bir ara yeddi il Bakıya gedə bilmədim. Gələndə isə şəhəri tanıya bilmədim. Şəhərimiz olduqca gözəlləşib və müasirləşib. Hər bir azərbaycanlı kimi bu məni də sevindirir. Sadəcə qürur duyuram.

Norveçdən Azərbaycanın necə görünməsinə gəlincə, kənardan hər şey çox gözəl görünür. Amma hamımız bilirik ki, həqiqətdə bu heç də belə deyil. İlk öncə Qarabağ problemimiz var. İllər keçsə də doğma torpaqlarımızı geri qaytarmağa nail olmamışıq. Təbii ki, bunun siyasətlə bağlı olduğunu da bilirik. Yəni münaqişənin həll olunmamasında Azərbaycanın günahı yoxdur. Göründüyü kimi çox səbrli xalqıq. Hələ ki gözləyirik.

Təbii ki, çatışmayan cəhətləri də var. Ən böyük bəlamız rüşvətdir. Hesab edirəm ki, bu aradan qaldırılmadan, böyük inkişaf yolu keçmək olmaz. Bir də məni narazı salan məqam gənclərimizin Avropaya can atmasıdır. Onlar elə düşünürlər ki, burada həyat, yaşayış idealdır. Halbuki buranın o qədər mənfi cəhətləri var ki, ən çoxu iki il yaşayandan sonra bunu tam çılpaqlığı ilə aşkar etmək olur. Doğrudur, Norveçdə yaşayan azərbaycanlıların böyük əksəriyyəti Cənubdan gələnlərdir ki, bunun səbəbini bilirik. İranda diktatura rejimi var və azərbaycanlılarının heç bir hüququ yoxdur. Səsini çıxaranlar isə həbs olunub, işgəncələrə məruz qalır, edam olunur. Bu üzdən də insanlar imkan düşdükcə vətənlərini tərk etmək məcburiyyətində qalırlar. Molla rejiminə lənətlər yağdırmaqdan başqa hələ ki, əlimizdən bir çey gəlmir. İnşallah bir gün onların da sonu çatar.

Ən çox narahat olduğumuz məqam mollaların Bakıya da əl uzadıb, aranı qarışdırmaq istəyidir. Buna heç bir halda yol vermək olmaz. Şükür ki, hələlik Şimali Azərbaycanda vəziyyət sabitdir. Buna görə öz adımdan dövlət başçısı İlham Əliyevə, onun xanımı Mehriban Əliyevaya minnətdarlıq edirəm. Ölkəmizin dünyada tanıdılmasında onların böyük əməyi olub və bunu qiymətləndiririk.

Məhəmməd TAĞIYEV

Paritet.- 2011.-20-21 sentyabr.- S.10.