Türkiyə-Azərbaycan Dərnəyi təsis edildi

Açılış mərasimində Azərbaycandan və Türkiyənin müxtəlif guşələrindən 500-dək adam iştirak edib

Türkiyənin İstanbul şəhərinin Kadıköy Xalq Təhsil Mərkəzində İstanbul Türkiyə-Azərbaycan Dərnəyinin açılış mərasimi keçirilib.

Diasporla İş üzrə Dövlət Komitəsindən verilən məlumata görə, açılış mərasimində Azərbaycandan və Türkiyənin müxtəlif guşələrindən 500-dək adam iştirak edib. Mərasimi giriş sözü ilə açan İstanbul Türkiyə-Azərbaycan Dərnəyinin rəhbəri Səftər Qaraqoyunlu dünyanın müxtəlif ölkələrində yaşayan eyni millətin övladlarının bir arada toplaşmasından qürur duyduğunu bildirdi. “Bu dərnəyin yaradılmasında məqsəd Türkiyə və Azərbaycan Türkləri arasında mövcud olan dostluq, qardaşlıq və həmrəylik əlaqələrinin inkişaf etdirilməsidir. Bu fəaliyyətimizlə gələcəyimizə töhfə verə bilsək şad olarıq. Bu mənada ümummilli lider, müstəqil Azərbaycan dövlətinin memarı, dünya şöhrətli siyasətçi Heydər Əliyevin “Biz bir millət-iki dövlətik” söylədiyi kimi biz əzəldən bəri iki qardaş millətik və qardaşlığımızın, dostluğumuzun daha da güclənməsi üçün daha çox çalışmalıyıq. Eyni zamanda Türkiyənin qurucusu Mustafa Kamal Atatürk də “Azərbaycanın sevinci sevincimiz, kədəri kədərimizdir” deyib. Azərbaycan və Türkiyənin dostluq və həmrəyliyi sonsuzadək davam etməlidir. Biz Azərbaycanın haqlı mübarizəsini dünya ictimaiyyətinə var gücümüzlə anlatmalıyıq. Biz İstanbul Türkiyə- Azərbaycan Dərnəyi olaraq Azərbaycan və Türkiyənin dünyada səsi olacayıq. Azərbaycan türkləri və Türkiyə türkləri arasında möhkəm körpü funksiyasını yerinə yetirəcəyik. Birliyimiz, diriliyimiz və həmrəyliyimiz üçün əlimizdən gələni əsirgəməyəcəyik. Sizlərin dəstəyi gücümüzə güc qatacaqdır“, - deyə S.Qaraqoyunlu bildirib. S.Qaraqoyunlu nitqini “Yaşasın Türkiyə Azərbaycan dostluğu!”, “Yaşasın Türkiyə Azərbaycan qardaşlığı” şüarları ilə başa vurduqdan sonra İstanbul Türkiyə-Azərbaycan Dərnəyinin açılış rəmzi olan lent kəsildi.

Açılış mərasimində iştirak etmək üçün Ankaradan gəlmiş İsa Yaşar Tezel və Ənvər Türkoğlu yeni yaradılmış dərnəyə uğurlar arzulayaraq Qərb ölkələrinin “Qarabağ məsələsinə” ikili standartlarla yanaşdıqlarını qeyd ediblər.

Türkiyədəki şiə azərilərin dini lideri Səlahəddin Özgündüz öz çıxışında Azərbaycan üçün ölməyə hazır olduğunu qeyd edərək iki məsələdə Azərbaycanı sonsuz dəstəklədiklərini bildirib. “Qarabağın alınması üçün hər cür dəstək verəcəyik. İkinci diləyimiz Azərbaycanda hazırda olduğu kimi gələcəkdə də dini azadlığın davam etməsidir”.

İstanbuldan millət vəkili seçilmiş azəriəsilli CHP nümayəndəsi Ali Özgündüz təmsil etdiyi partiyanın Azərbaycanı daima dəstəklədiyini qeyd edərək, “Qarabağ məsələsində daha güclü lobbi fəaliyyətinə ehtiyac vardır” deyə bildirib.

Diasporla İş üzrə Dövlət Komitəsinin şöbə müdiri Tahir Hacıyev tədbir iştirakçılarına Azərbaycandan salam gətirdiyini söyləyib. Azərbaycanla Türkiyə arasında mövcud olan qardaşlıq əlaqələrinin getdikcə inkişaf etdiyini qeyd edən Tahir Hacıyev Azərbaycan Respublikası Diasporla İş üzrə dövlət Komitəsinin hər zaman fəaliyyət göstərən dərnəklərin yanında olduğunu və bunun da sonra da davam edəcəyini bildirib. “Dostluğumuzun, qardaşlığımızın möhkəmlənməsinə xidmət edən bu cür dərnəklərin fəaliyyət göstərməsinə hər zaman ehtiyac var. Çünki bu dərnəklərin vasitəsi ilə Azərbaycanın Qarabağ uğrunda haqlı mübarizəsini, işğalçı Ermənistanın iç üzünü dünyaya göstərə bilərik. Dərnək qurucularını təbrik edirəm”, - deyə T.Hacıyev vurğulaıb.

İqdırdan millət vəkili seçilmiş MHP nümayəndəsi Sinan Oğan Türkiyənin mürəkkəb bir dövr yaşadığını, sıfır problem bəyan olunduğu halda, hamı ilə problemlərin yaşandığını qeyd edərək ortaya iradə qoyulmalı olduğunu söyləyib. “Xocalıda törədilmiş soyqırımı kimsə görmək istəmir. İşğal olunan Azərbaycan torpaqları barədə heç kəs danışmır. Ağrı Dağını istəyən erməni ilə hansı qardaşlıqdan söhbət gedə bilər?”. Rəsmi hissə başa çatdıqdan sonra tədbir şeir, musiqi və xalq oyunlarından ibarət bədii hissə ilə davam edib.

İSMAYIL

Paritet.- 2011.- 29-30 sentyabr.- S.13.