Yayda Xalça Muzeyi öz yeni binasına köçəcək

Xalça Muzeyinin direktoru: “Orta məktəblərdə muzey işinin ayrıca fənn kimi tədrisi üçün Təhsil Nazirliyinə müraciət edəcəyik”

Dünən Lətif Kərimov adına Azərbaycan Xalçası və Xalq Tətbiqi Sənəti Dövlət Muzeyində xalça sənətinin incəliklərinin öyrənilməsi və cəmiyyətimizin bütün təbəqələrinin maraq dairəsinə çevirilməsi üçün Mədəniyyət və Turizm Nazirliyi, YUNESKO-nun Moskva Bürosu və Lətif Kərimov adına Azərbaycan Xalçası və Xalq Tətbiqi Sənəti Dövlət Muzeyi tərəfindən hazırlanmış xüsusi təhsil proqramına uyğun “Azərbaycan xalçaçılıq ənənələri muzey təhsilində” adlı təlim -seminar keçirildi.

Xalça Muzeyi Azərbaycan xalçalarının tarixini tədqiq edən, yaşadan və gələcək nəsillərə ötürən məbəddir deyən muzeyin direktoru Röya Tağıyeva bildirdi ki, bunun üçün də Azərbaycan xalçasının dünyada layiqli surətdə tanıtdırılması uğurunda uzun illər gərgin işlər aparılıb və indi də davam edir: ”Bugünkü tədbir Azərbaycan xalça sənətinin qorunub saxlanması və gələcək nəsillərə ötürülməsini əhatə edir. Bununla əlaqədar Xalça Muzeyi YUNESKO-nun Moskva bürosunun dəstəyi ilə “Muzey təhsili” proqramını hazırlayıb. Bugünkü muzeylər mədəni irsi toplayıb qoruyan bir mərkəz olmaqla yanaşı, həm də bilik məbədidir. Bu biliyi gələcək nəsillərə çatdırmalıyıq. Xalça Muzeyi Azərbaycan xalça sənətinin qorunub saxlanması və inkişaf etdirilməsi ilə əlaqədar belə bir proqram hazırlayıb. Bu proqram əsasında bölgələrdə və Bakıda təlimlər keçirilir. Bu tədbirimizdə Azərbaycanın bölgələrindəki muzey direktorları üçün təlimlər keçiririk. Bu müxtəlif təbəqələr üçün hazırlanmış təhsil proqramıdır. Belə ki, uşaqlar, ibtidai və yuxarı sinif şagirdləri üçün , yaşlılar üçün, peşələrini dəyişmək istəyənlər üçün(yəni xalçaçı olmaq istəyir) nəzərdə tutulmuş proqramdı. Bu proqramı bu il bitiririk.

Gələn il isə məktəblərdə sözügedən proqramın tətbiqinə başlayacaqlarını deyən R.Tağıyeva bildirdi ki, Təhsil Nazirliyinin proqramlarına muzey təhsilinin xüsusi bir fənn kimi daxil olması çox yaxşı olardı: ”Çox istərdim ki, uşaqlar tarix, rəsm və s. dərsləri muzeylərdə keçsinlər və qiymətlərini də muzeydə alsınlar. Yəni muzey təkcə gəzinti məkanı olmasın, həm də bilik məkanı olsun. Hələ ki bu proqramla bağlı təhsil Təhsil Nazirliyinə müraciət etməmişik. May ayından məktəblərdə bu proqramın icrasına başlamaq istəyirik. Proqramımızı Təhsil Nazirliyinə göndərəcəyik ki, onlar öz təhsil proqramlarına bunu salsınlar”.

2010- cu ilin fevral ayında Azərbaycan Xalçaçıları İctimai Birliyinin (AXİB) yaradıldığını deyən muzey direktoru vurğuladı ki, birliyin üzvləri tanınmış rəssamlar və xalça ustalarıdır:” Tanınmış rəssam Tahir Salahov da birliyimizin üzvüdür. Ötən ilin dekabrında Moskvada T.Salahovun xalçaçılıqla bağlı sərgisini keçirdik. Belə ki, AXİB ilə birgə biz mart ayında Özbəkistandan bir sıra xalça ustalarını Azərbaycana dəvət edəcəyik və onların sərgilərini burda nümayiş etdirəcəyik. Eyni zamanda da Azərbaycan xalça ustalarının sərgisini Özbəkistanda keçirəcəyik. Yanvarın 28-də Azərbaycan Xalça Muzeyində böyük bir beynəlxalq konfrans keçiriləcək. AXİB, “Miras” birliyi və Xalça Muzeyi yanvarın 28-də “Mədəni irsin qorunub saxlanması” mövzusunda konfrans keçirəcək. Eyni zamanda bu konfransda mədəni irsi qoruyub saxlayan birliklərində fəaliyyətinə toxunulacaq, AXİB və “Miras”birliyinin təqdimatı olacaq”. Onun sözlərinə görə, bu ilin yayında artıq Xalça Muzeyi öz yeni binasına köçəcək.

Xalça Muzeyinin ictimaiyyətlə əlaqələr şöbəsinin rəhbəri Aygün Abasova isə bildirdi ki, seminar həmçinin milli mədəniyyət və tarixə qarşı hörmətin və diqqətin yüksəlməsinə, itirilmiş toxuculuq texnologiyalarının dirçəlməsinə dəstək olacaq: “Layihə tərəfindən Azərbaycanın ənənəvi toxuculuq zonalarında xalçaçılığın inkişafı məqsədiylə Muzey təhsilinə aid məlumat kitabçası tərtib edilib. Həmçinin kitabçanın muzey və təlim müəssisələrində yayılması nəzərdə tutulub”. Seminarın sonunda iştirakçıların Xalça Muzeyinə ekskursiyası da təşkil olundu.

Məlumat üçün bildirək ki, seminarda Bakı, Gəncə, Şəki, Xaçmaz, Şabran, Tovuz, Ağcabədi, Göyçay, Zərdab, Lənkəran, Qəbələ, Quba, Füzulidən ev muzeylərinin rəhbərləri iştirak edirdilər.

Tədbirdə qeyd edildi ki, 15-19 noyabr 2010-cu il tarixində Nayrobi şəhərində (Keniyanın) Azərbaycan xalçaları YUNESKO-nun Qeyri-maddi Mədəni İrsin Qorunması üzrə Reprezentativ siyahıya daxil edilib. O da vurğulandı ki, qeyri-maddi irsin saxlanılması sahəsində YUNESKO-da qəbul edilmiş konvensiyalarda (2003 və 2005-ci illərdə) qeyri-maddi irs nümunələrinin məhv olunmasının qarşısını almaqdan ötrü fəal addımlar atılır və qəbul olunmuş konvensiyalar bunun canlı sübutudur. Eyni zamanda 2007-2010-cu illərdə konvensiyalara qoşulmuş Azərbaycan mədəni irsin mühafizəsi üzrə YUNESKO-nun fəaliyyəti üçün münbit mühitin yaradılmasını təmin edib.

GÜNAY

Paritet.- 2011.- 11-12 yanvar.- S. 12.