Hər zaman yenilik axtarışında olan modelyer

Modelyer Teymur Səfərov: ”Hər gün yeni bir geyim eskizi çəkməsəm, daxilən rahat ola bilmərəm”

Tez-tez eşitdiyimiz bir dəyərli fikir var- “Dünyanı gözəllik xilas edəcək” . Bu gözəllik anlamına təbiətin özündə, rəssamın çəkdiyi tablolarda, bəstəkarın yazdığı musiqidə gündəlik həyatımızda, qadınların və kişilərin geyimlərində və s. rast gəlmək olur. Məsələn, geyimdə olan gözəllikdən danışsaq deyə bilər ki, moda, dəb və rənglərin harmoniyası, bir-birinə uyğun olanda həmin libas çox əsrarəngiz görünür. Eyni zamanda saç düzümü, ətir, bəzək əşyaları zövqlə və düzgün istifadə etdildikdə, bu komponentlər geyimi tamamlayaraq estetik gözəllik yaradır ki, bu da modanın yaranmasına gətirib çıxarır. Hazırladığı geyimlərində qeyd etdiyim moda ünsürlərinə üstünlük verən hazırda “Ye.S moda evi”ndə çalışan gənc və istedadlı modelyer Teymur Səfərovla həmsöhbət olduq. O, ilk olaraq moda evinin əhəmiyyəti haqqında danışdı və bildirdi ki, moda evi təkcə elə adda olmalıdır:

-Hər bir “moda evi”nin özünəməxsusluğu vacibdir. Yəni moda evi incəsənət və gözəllik məkanı olmalıdır. İncəsənətə maraq göstərənlər, modelyer təxəyyülü, yaradıcı insanlar moda evində toplaşmayıbsa nə qədər bahalı parçalardan, bəzək əşyalarından istifadə olunsa da, sonda hazırlanan geyimdən istənilən effekt alınmır. Görürsünüz deyirlər ki, hansı bir “atelyedə” dərzi yaxşı geyim tikir. Bu yaradıcı iş deyil sadəcə dərzinin sifariş əsasında heç bir əlavəsi olmadan tikdiyi, adi bir geyimdi. Ancaq əsl moda evində çoxlu sayda eskizlər toplanmalı və orda çalışan modelyer daima yenilik axtarışında olmalıdır. Eyni zamanda modelyerin öz xətti və yaradıcılıq üslubu olmalıdır ki, onun hazırladığı geyimlər başqa geyimlərə bənzəməməlidir. Bir sözlə, moda evində hər bir şey incəsənətə qulluq edərək, onun ətrafında fırlanmalıdır. Hazırda çalışdığım “Ye.S moda evi”ndə biz artıq bu qeyd etdiyim mühiti yaratmışıq. Hətta otaqların dizaynında incəsənət-təsviri sənət nümunələrindən istifadə edilib və sərgi salonumuzda bir-birindən fərqli milli və müasir geyimlərimiz nümayiş olunur. Onu da xüsusi olaraq qeyd edim ki, çalışdığım moda evinin rəhbəri Yeganə Sadıxova və digər əməkdaşlarımız qəlbi, ruhu incəsənətə bağlı və moda aləminə vurğun olan peşəkarlardır. Modelyer üçün onu başa düşən mühitdə işləmək daha rahatdır. Bu gün mən çalışdığım bu məkanda belə bir mühitin olduğu üçün işimdən zövq alaraq demək olar ki, hər gün yeni geyim eskizləri çəkirəm. Artıq moda evinin fondunda mənim 300 -dən çox geyim eskizlərim toplanıb ki, bizə müraciət edənlərə təqdim olunur və onlar üçün də seçim rahat olur. Əgər kimsə modelyerə müraciət edirsə, deməli o, qeyri-adi və başqa insanların geyminə bənzəməyən bir geyim istəyir. Bu səbəbdən də modelyerin təxəyyülünün nəticəsi olan eskizlər olmalıdı ki, son nəticədə hazırlanan geyim başqa bir geyimə bənzəməsin.

Moda anlamından danışan modelyer bildirdi ki, bu haqda saatlarla, günlərlə danışsan belə kifayətlənmək olmaz:” Mənim fikrimcə moda duyğudur, hissdir, müxtəlif rəngli parçaların bir-biri ilə uyğun olaraq birləşməsi və məcazi mənada desək danışmasıdır. Yəni insan hər hansı geyimi geyindikdə özündə bir rahatlıq hiss edirsə və ya özünü hər hansı bir obrazda görürsə bu modadır. Hər kəsin özünə yaraşanı zövqlə geyinməsi modadır. İnsan müəyyən mənada özünə, geyiminə fikir verməyi bacarmalıdır. Bəzi insanlarla danışanda qeyd edirlər ki, onlar üçün moda rahat olan və özlərini sərbəst hiss etdikləri geyimlərdi. Moda insanın daxili zövqünə uyğun olmalıdır”.

“Çalışdığım “Ye.S moda evi”də əsl moda, dəb mühiti var”

Azərbaycanda insanların modelyerlə işləməyə az-az hallarda üstünlük verdiklərini deyən T.Səfərov bildirdi ki, bu da ondan irəli gəlir ki, bizim ölkədə hələ moda biznesi o qədər də inkişaf etməyib:” Azərbaycanda ilk olaraq moda biznesini inkişaf etdirmək lazımdır. Bu sahədə təbliğatı artırmalıyıq və moda evinə peşəkarları cəlb etməliyik. Bu zaman bu sahədə inkişaf əldə etmək olar. Sankt-Peterburqda moda üzrə təhsil alıb bir müddət orda çalışandan sonra öz doğma Vətənimə gələrək “Ye.S moda evi”ndə fəaliyyətə başlamışam. Bizim moda evinə geyim sifariş etmək üçün müxtəlif nəslin nümayəndələri gəlir və köməkliyimizlə öz bədən ölçülərinə uyğun geyim forması seçirlər”.

“Rəssamlıq -qrafika üzrə təhsil almışam. Bu zaman da xəyalən müxtəlif obrazları geyindirərək, eskizini hazırlayaraq onları praktikada tətbiq etmişəm. Məsələn, kraliça, polkovnik, adi qız, gəlin və s. obrazları geyindirəndə görürsən ki, istədiyin obrazın alınmasında 70 faiz geyimin də rolu var. Rənglərlə belə desək, dil tapıb uyğunluq yaradanda və bir-biri ilə barışdırdıqda geyim gözəl alınır. İstər-istəməz geyimlə az da olsa insan düşüncəsini, həyat tərzinin necəliyini müəyyənləşdirmək olur. Bunun üçün də istər qadın, istərsə də kişi hər şeydən əvvəl gərək geyiminə, davranışına, yerişinə fikir versin. Eyni zamanda rənglərə də fikir vermək lazımdır. Geyimlə yanaşı, bunlar da bir-birini tamamlamalıdır”.

Bir modelyer olaraq xüsusi sevib seçdiyi bir rəngin olmadığını deyən həmsöhbətim söylədi ki, o bütün rəngləri sevir:”Ancaq mən çalışıram ki, öz sifarişçilərimə onlara yaraşan rəngi və geyimi təklif edim. Ancaq sifarişçilərlə aramızda(gülür) “moda müharibəsi” olur. Amma çox zaman fikirlərimiz üst-üstə düşür. Hər bir qadın incə və zərif görünməyi istəyir. Bizdə çalışırıq ki, Yeganə xanımla birgə onları razı salaq”.

“Mən hazırladığım geyimlərdə daha çox müasirliyə üstünlük verirəm və avanqard üslubda işləməyi çox sevirəm” deyən modelyer qeyd etdi ki, bizi digər millətlərdən fərqləndirən özümüzə məxsus milli ornamentli geyimlərimiz var: “Milli geyimlərimizin digər fərqli cəhəti isə müxtəlif təbəqələr üçün olmasıdır. O zamanlar subay qızlarla evli qadınların geyimləri fərqli idi. Məncə, geyimlərimizi milli ornamentlərlə müasir standartlara uyğun formada inkişaf etdirib Avropaya inteqrasiya etmək müəyyən mənada məqsədəuyğun sayıla bilər. Bunun üçün də geyimlərimdə milli və müasir geyimlərin hansısa mənbəyə əsaslanaraq, elmi olaraq və təxəyyülümü ora əlavə edərək kolleksiyamı və eskizlərimi yaradıram. Bundan başqa hicablı xanımlar üçün də kolleksiyam hazırdı. Bu yaxınlarda nümayiş olunacaq”.Ancaq milli və müasir moda aləmində Avropaya inteqrasiyanın da maraqla qarşıladığını deyən T.Səfərov qeyd etdi ki, bugünkü gənclərimizin geyimləri qaneedicidir:”Ancaq geyimin özü də bir mədəniyyətdir, bunun üçün də gənclərimiz hər zaman bu mədəniyyəti qoruyub saxlamalıdırlar. Gənclərimiz daima yaxşını seçib geyinməlidir. Çünki gənclik hər bir xalqın, ölkənin güzgüsüdür. Biz modelyerlərdə daima yenilik axtarışında olmalıyıq ki, o güzgüdə hər zaman gözəllik görək. Bu işdə mənə rəssamlıq təhsilimdə kömək edir. Çox eskizlər çəkirəm və onlar arasından da həm bir modelyer olaraq mənim üçün və həm də sifarişçilər tərəfindən seçim etmək rahat olur”.

Bu il dəbdə olan rənglərdən də danışan modelyer qeyd etdi ki, 2011-ci il dovşan üzrə təhvil olduğundan boz, qara, ağ və narıncı rənglər modadır. Onun sözlərinə görə, moda evlərinin çoxusu qara və ağın birləşməsindən hazırlanmış geyimlərə üstünlük verirlər.

GÜNAY

Paritet.-2011.- 13-14 yanvar.- S. 12.