Bu il müdafiə xərcləri 3 milyard dollardan çox olacaq

“2011-ci ildə sahibkarlığın, özəl sektorun inkişafı üçün, qeyri-neft sektorunun inkişafı üçün əlavə tədbirlər görülməlidir”

Yoxsulluq 4-5 dəfə aşağı düşüb

Xəbər verildiyi kimi ötən həftə Prezident İlham Əliyevin sədrliyi ilə Nazirlər Kabinetinin 2010-cu ilin sosial-iqtisadi inkişafının yekunlarına və 2011-ci ildə qarşıda duran vəzifələrə həsr olunmuş iclası keçirilib. İclasda dövlətimizin başçısı giriş nitqi söyləyərək siyasi, sosial-iqtisadi məsələlərdən danışıb. O deyib ki, 2010-cu ilin yekunlarına görə, yoxsulluğun səviyyəsi daha da aşağı düşüb və artıq Azərbaycanda yoxsulluq şəraitində yaşayanlar 9,1 faizdir. “Hesab edirəm ki, bu, bizim böyük nailiyyətimizdir. Yeddi il ərzində Azərbaycanda yoxsulluq 4-5 dəfə aşağı düşmüşdür. Bu, bir daha göstərir ki, bizim apardığımız islahatlar və iqtisadi artım, ilk növbədə, Azərbaycan vətəndaşlarının rifah halının yaxşılaşdırılmasına yönəldilibdir. Onu da göstərir ki, Azərbaycanda enerji sektorunda görülən işlər nəticəsində ölkə xəzinəsinə daxil olunan vəsait ədalətli bölünür və beləliklə, Azərbaycanda sosial ədalət prinsipi həmişə yüksək səviyyədə tətbiq olunur”. Ötən il bütün sosial proqramların icra edildiyini deyən ölkə başçısı bildirib ki, bu il belə olmalıdır.

2011-ci ildə qarşıda duran vəzifələrdən də danışan Prezident iqtisadiyyatımızın daha da artacağına əmin olduğunu vurğulayıb: “Makroiqtisadi sabitlik qorunmalıdır və əminəm ki, inflyasiya birrəqəmli olacaqdır. Biz xüsusilə istehlak bazarına nəzarətimizi gücləndirməliyik. Bu sahədə böyük işlər görülüb və davam etdirilməlidir. Qiymətlərin süni şəkildə şişirdilməsinə yol verməməliyik, azad rəqabəti təmin etməliyik, inhisarçılıq meyillərinin qarşısını almalıyıq. Lazımsız yoxlamalar aparılmamalıdır, xüsusilə hüquq mühafizə orqanları tərəfindən lazımsız yoxlamalara son qoyulmalıdır ki, ölkədə sahibkarlığı daha da sürətlə inkişaf etdirək, buna daha böyük təkan verək”.

Onun sözlərinə görə, iqtisadiyyatımızın çoxşaxəli iqtisadiyyat kimi formalaşmasında qeyri-neft sektorunun inkişafı həlledici rol oynayır. Prezident qeyd edib ki, 2011-ci ildə sahibkarlığın, özəl sektorun inkişafı üçün, qeyri-neft sektorunun inkişafı üçün əlavə tədbirlər görülməlidir: “Dövlət qurumları - həm mərkəzi qurumlar, həm də bölgələrdə yerləşən qurumlar sahibkarlığın inkişafına kömək göstərməlidir, onlara maneçilik törətməməlidir, süni əngəllər də yığışdırılmalıdır”.

Təsdiq edilmiş qaz ehtiyatlarımız 2,2 trilyon kubmetrdir

“Bizim iqtisadiyyatımız üçün əsas olan sektorda - neft-qaz sektorunda keçən il bütün planlar yerinə yetirildi” deyən ölkə başçısı hesab edir ki, bu il qazın hasilatı və ixracı daha da artmalıdır: “Keçən il Azərbaycan Dövlət Neft Şirkəti tərəfindən böyük qaz yatağı aşkar edilmişdir. “Ümid” yatağı bizim qaz potensialımıza əlavə həcm gətirir. Artıq bizim təsdiq edilmiş qaz ehtiyatlarımız 2,2 trilyon kubmetrdir”.

“Bizim iqtisadi potensialımız güclüdür” deyən Prezident İlham Əliyev valyuta ehtiyatlarımızın 30 milyard dollara yaxınlaşdığını diqqətə çatdırıb. Bütün bunlara baxmayaraq o, harada qüsurlar, çatışmayan cəhətlər varsa, onları aradan qaldırılması tapşırığını da verib.

2011-ci ildə də regionlarda müasir infrastruktur layihələr həyata keçiriləcək

Prezident deyib ki, nəzərdə tutulmuş və icrada olan bütün infrastruktur layihələri 2011-ci ildə davam etdiriləcək. Onun fikrincə kifayət qədər vəsait var ki, infrastruktur layihələrinin həyata keçirilməsi üçün ondan istifadə edilsin. Regionlarda işlərin yaxşı getdiyini, regional inkişaf proqramının icra edildiyini bildirən Prezident keçən il 70 mindən çox iş yerinin açıldığını və onun 53 mininin daimi iş yeri olduğunu xatırladıb: “Bizim ixracdan asılılığımız azalır. Biz artıq qeyri-neft ixrac potensialına malikik və öz məhsullarımızı artıq başqa ölkələrdə nümayiş etdiririk”. “Bu il həmin siyasət daha da sürətlə aparılmalıdır” deyən Prezident regionlarda yaradılan müasir infrastruktur layihələri də həyata keçirilməyə başlandığını qeyd edib.

Gələcəkdə Azərbaycan gəmi ixrac edəcək

Keçən il nəqliyyat sektoruna böyük investisiyalar qoyulduğunu xatırladan İlham Əliyev bu sektorun ölkə iqtisadiyyatı üçün çox böyük əhəmiyyət daşıdığını deyib: “Biz gələcəkdə Azərbaycandan artıq bu gəmiləri ixrac edəcəyik. Dəmir yolunun inkişafı üçün proqram icra edilir. Hava nəqliyyatını mən qeyd etdim, bizim kifayət qədər müasir təyyarə parkımız var və bu park ancaq ən yüksək keyfiyyətə malik təyyarələrdən ibarətdir. Beynəlxalq aeroportlar tikilibdir”.

Prezident 2011-ci ildə Bakı-Tiflis-Qars dəmir yolunun tikintisinin davam etdiriləcəyini və bu layihəyə böyük əhəmiyyət verildiyini vurğulayıb.

Dağlıq Qarabağ münaqişəsinin həll olunmamasının tək səbəbi...

Prezident çıxışında Ermənistan-Azərbaycan, Dağlıq Qarabağ münaqişəsinə də toxunub və bu münaqişənin həll olunmamasının təkcə bir səbəbi olduğunu deyib: “Ermənistan tərəfi, demək olar ki, danışıqları pozmaq istəyir. Danışıqlar masasında əvvəlcə razılaşdırılmış məsələlərə yenidən qayıtmaq istəyir, vaxt uzatmaq istəyir. Bir sözlə, bizdə belə fikir yaranır ki, Ermənistan işğal olunmuş torpaqları azad etmək istəmir, çalışırlar nə qədər mümkündürsə, o torpaqları işğal altında saxlasınlar.

Beləliklə də, bundan istifadə edib Azərbaycandan Dağlıq Qarabağın statusu ilə bağlı onlara xeyir gətirən şərtləri əldə etsinlər”. Bunun mümkün olmadığını və Dağlıq Qarabağın əzəli Azərbaycan torpağı oduğunu, beynəlxalq birlik tərəfindən Azərbaycan torpağı kimi tanınmasını dəfələrlə bəyan etdiyini deyən Prezidentin sözlərinə görə, Azərbaycan dövləti heç vaxt imkan verməz ki, ikinci erməni dövləti yenə də Azərbaycanın tarixi torpaqlarında yaradılsın: “Yəni bu, danışıqlar mövzusu deyil və heç vaxt olmayacaqdır.

Məsələnin həlli üçün Ermənistan öz işğalçı qüvvələrini zəbt edilmiş torpaqlardan çıxarmalıdır. Ondan sonra sülh yarana bilər. Azərbaycan vətəndaşları öz doğma torpaqlarına qayıtmalıdırlar, o cümlədən Dağlıq Qarabağa qayıtmalıdırlar, Dağlıq Qarabağda muxtariyyət şəraitində yaşamalıdırlar”. O, Azərbaycanın danışıqlar prosesində konstruktiv mövqe nümayiş etdirdiyini hesab edir. Prezident deyib ki, Azərbaycanın ərazi bütövlüyünün bərpası qeyd-şərtsiz öz həllini tapmalıdır.

“Azərbaycan ordusu istənilən anda düşmənə sarsıdıcı zərbə endirə bilər”

Danışıqlar aparılan zaman, eyni zamanda, ordu quruculuğuna böyük diqqət göstərildiyini qeyd edən Ali Baş Komandan “bu sahədə böyük uğurlara nail ola bilmişik” fikri ilə sözünü davam etdirib: “Düşmən də bunu bilir və qorxudan əsir. Onların son aylarda verdikləri isterik və əsəbi, qorxu ilə dolu çıxışlar bunun əyani sübutudur. Onlar da yaxşı bilirlər ki, Azərbaycan ordusu istənilən anda düşmənə sarsıdıcı zərbə endirə bilər. O zərbə nəticəsində nəinki Dağlıq Qarabağda, Ermənistanda da vəziyyət başqa istiqamətdə inkişaf edə bilər. Sadəcə olaraq, biz istəyirik ki, bu məsələ sülh yolu ilə həll olunsun”. Onun fikrincə Azərbaycanda istehsal olunan hərbi məhsullar, 500 növə qədər məhsul həm ordumuza xidmət edir, həm də biz artıq xarici bazarlara da çıxırıq, beynəlxalq sərgilərdə iştirak edirik. “Bu sahədə 2011-ci ildə də çox mühüm hadisələr baş verəcək, Azərbaycanda ən müasir avadanlığın, texnikanın, döyüş sursatının istehsalı başlanmalıdır”.

“2011-ci ildə ordu xərcləri, müdafiə xərcləri 3 milyard dollardan çox olacaqdır” deyən dövlət başçısı əmin olduğun bildirib ki, Azərbaycanın güclü ordusu Ermənistan-Azərbaycan, Dağlıq Qarabağ münaqişəsinin həlli üçün öz sözünü deməlidir və vaxt gələndə deyəcəkdir.

“Ekologiya ili” rəsmən başa çatdı, amma...

Ekoloji tədbirlərin də davam etdiriləcəyini qeyd edən Prezident ötən il bu sahəyə böyük vəsaitin ayrıldığını söyləyib. O bildirib ki, “Ekologiya ili” rəsmən başa çatsa da, ancaq “Ekologiya ili”nə xas olan ab-hava gərək davam etsin. “Həm ağac əkilməsi eyni templə davam etdirilməli, həm də təmizləyici qurğular istifadəyə verilməli, içməli su layihələri icra olunmalıdır” deyə Prezident vurğulayıb.

Dövlət başçısı hesab edir ki, 2011-ci ildə ilk növbədə Xəzər dənizinin suyunun şirinləşdirilməsinə dair layihə icra edilməlidir: “Samur-Abşeron kanalı, Taxtakörpü su anbarının tikintisi 2012-ci ildə başa çatdırılmalıdır. Bu da bizə əlavə imkanlar yaradacaqdır”.

O bu il bərpa olunan enerji mənbələrinin yaradılması işində əlavə tədbirlər görüləcəyini də deyib. Onun fikrincə bütün su mənbələrimizin xəritəsi təsdiq olunubdur: “Bərpa olunan digər enerji mənbələrindən istifadə üçün daha da ciddi tədbirlər görülməlidir. Bu vəzifəni mən keçən ilin əvvəlində qoymuşam, üstündən bir il keçibdir”.

Böyük taxılçılıq təsərrüfatlarının yaradılması üçün dövlət maliyyə dəstəyi göstərəcək

Ölkə başçısı nitqində 2011-ci ildə kənd təsərrüfatının inkişafını stimullaşdırmaq üçün də əlavə tədbirlərin görülməsini, subsidiyaların verilməsi işinin davam etdirilməsini vacib bilib. O qeyd edib ki, əvvəlki illərdə görülmüş işlər öz bəhrəsini verir, soyuducu anbarların, taxıl anbarlarının tikintisi kənd təsərrüfatının inkişafına öz müsbət təsirini göstərib: “Kənd təsərrüfatının inkişafı üçün çox mühüm sahə sayılan toxumçuluğu da inkişaf etdirməliyik. Bu sahədə artıq Azərbaycanda böyük özəl müəssisələr yaradılıb. Mən o müəssisələrdə olmuşam. Hesab edirəm ki, biz bu təşəbbüsləri dəstəkləməliyik, sahibkarlara yeni imkanlar yaradılmalı, kreditlər ayrılmalıdır. Yerli icra orqanları onları dəstəkləməlidir ki, toxumçuluqla bağlı məsələlər tezliklə həllini tapsın”.

Prezident heyvandarlıq sahəsində də cins mal-qaranın gətirilməsi prosesinin getdiyini diqqətə çatdıraraq, bu işin 2011-ci ildə də davam etdirilməsini deyib. Onun qənaətincə aqrolizinq, aqroservislərin fəaliyyəti kənd təsərrüfatının inkişafına böyük dəstəkdir, bu sahədə də dövlətin müdaxiləsi və siyasəti əlbəttə ki, həlledicidir.

“Taxıl istehsalının artırılması üçün əlavə tədbirlər görülməlidir” deyən Prezident böyük fermer təsərrüfatlarının yaradılması üçün müəyyən addımların atılması təklifini verib: “Böyük fermer təsərrüfatlarının yaradılması üçün dövlət tərəfindən bütün infrastruktur, təchizat məsələləri həll olunmalıdır. Yəqin ki, tender prinsipi əsasında sahibkarlar öz təkliflərini verməlidirlər və o təkliflərə baxılmalıdır. Ondan sonra dövlət yenə də öz maliyyə imkanlarından istifadə edib, böyük taxılçılıq təsərrüfatlarının yaradılması üçün maliyyə dəstəyini də göstərəcəkdir”.

2012-ci ildə birinci süni peykimiz orbitə çıxarılacaq

Prezident 2011-ci ildə informasiya-kommunikasiya texnologiyalarının inkişafı üçün də əlavə tədbirlər görüləcəyini diqqətə çatdırırıb. O, Azərbaycanın artıq kosmik sənayesi olan ölkəyə çevrildiyini deyərək 2012-ci ildə birinci süni peykimizin orbitə çıxarılacağını bildirib: “Başqa peyklər də səmaya çıxarılmalıdır. Beləliklə, Azərbaycan çox ciddi kosmik sənayeyə malik ölkəyə çevriləcəkdir. Bu da gələcəyə atılan bir addımdır. Biz görürük ki, indi dünyada qüvvələr nisbətini texniki tərəqqi müəyyən edir. Həmişə belə olub, indiki şəraitdə isə bu, özünü daha da qabarıq şəkildə büruzə verir. Texniki tərəqqi, texnoloji irəliləyiş, müasir texnologiyalar, xüsusilə informasiya-kommunikasiya sahəsində, rabitə sahəsində, elektronika, kosmik sənayesində əldə edilmiş uğurlar ölkələrin inkişafını və gücünü müəyyən edir”. Onun sözlərinə görə, qısa müddət ərzində Azərbaycanda çox güclü kosmik sənaye yaradılmalıdır. “Bu, bizə hər cəhətdən lazımdır”, deyə o əlavə edib.

Müstəqilliyin bərpasının 20 illiyi təntənəli qeyd olunacaq

İlham Əliyev Azərbaycanın öz müstəqilliyini bərpa etməsinin 20 illiyinin təntənəli qeyd olunacağını bildirib: “Bu il biz müstəqilliyimizin bərpasının 20 illiyini qeyd edəcəyik. İyirmi il ərzində Azərbaycan müstəqil ölkə kimi yaşayır. Təbii ki, müstəqilliyimizin bərpası Sovet İttifaqının dağılması nəticəsində baş verib. Azərbaycan və bütün başqa müttəfiq respublikalar müstəqil olub. Azərbaycan isə müstəqilliyini bərpa edib, çünki bizim müstəqilliyimizin tarixi 1991-ci ildən deyil, 1918-ci ildən başlayır. Məhz buna görə Azərbaycanda 28 May günü xüsusi təntənə ilə qeyd olunur. Bizim üçün müstəqilliyimizin əsas tarixi 28 may 1918-ci ildir. 1991-ci ildə Sovet İttifaqının dağılması nəticəsində bütün başqa respublikalarla bərabər Azərbaycan da müstəqilliyə qovuşdu, daha doğrusu, dediyim kimi, müstəqilliyini bərpa etdi. Bu yubileyi biz Azərbaycanda geniş şəkildə qeyd etməliyik. İyirmi il həm böyük, həm də çox da böyük olmayan müddətdir. İyirmi il ərzində çox iş görmək olar, heç nə görməmək də olar. Azərbaycanda son 17 ildə, müstəqilliyimizin birinci iki ilini çıxmaq şərti ilə, doğrudan da tarixi nailiyyətlər əldə edilib. Bu gün danışdığımız bütün uğurlar bu müstəqilliyin nəticəsidir. Müstəqillik bizim üçün ən böyük sərvətdir, ən böyük dəyərdir. Müstəqillikdən qiymətli heç bir şey ola bilməz. İl ərzində biz həm Azərbaycanda, həm də xaricdə müstəqilliyimizin bərpasını qeyd etməliyik. Bu məsələlərlə bağlı yaxın günlərdə mən müvafiq sərəncam da imzalayacağam”.

2011-ci ilin “Turizm ili” elan olundu

Prezident 2011-ci ilin “Turizm ili” elan olunmasını təklif edib: “2011-ci il başlayıb, keçən il bizdə “Ekologiya ili” elan olunmuşdu. Dediyim kimi, yaxşı nəticələr əldə edilib. Təklif edirəm ki, 2011-ci ili biz “Turizm ili” elan edək. 2011-ci ildə Bakıda 5 beşulduzlu mehmanxana açılacaq, hesab edirəm, yəqin ki, bu, dünyada analoqu olmayan bir hadisədir. Bir ildə bir şəhərdə 5 beşulduzlu mehmanxana açılacaq, mən Bakını nəzərdə tuturam. Ancaq Bakıda dördulduzlu, üçulduzlu hotellər də tikilməkdədir. Bölgələrdə hotelçilik ilə bağlı çox böyük işlər görülür, artıq Azərbaycanda turizmin inkişafı reallıqdır. Bu infrastrukturu yaratmaq üçün, əlbəttə ki, dövlət tərəfindən böyük vəsait tələb olunur. Ancaq bu, infrastruktur məsələlərinə yönəldilir. Hotellər isə özəl sektor tərəfindən tikilir. Deməli, Azərbaycanın inkişafına inam o qədər böyükdür ki, buraya, bu hotellərə milyonlarla, yüz milyonlarla vəsait qoyulur. İnvestorlarda inam var ki, bu vəsait onlara dividentlər gətirəcək. Şəhərimizə isə bu, yenilik gətirir, müasirlik gətirir. Şəhərə gələn qonaqlar üçün gözəl şəraitin yaradılması, əlbəttə ki, vacib məsələdir. Bununla bərabər, burada deyildiyi kimi, “Şahdağ” qış-yay xizək kurortu, xizək infrastrukturu yaradılır. Bu da sırf dövlət tərəfindən yaradılan layihədir. Mən o bölgələrdə dəfələrlə olmuşam. Mən oraya birinci dəfə gedəndə heç nə yox idi. Dağlar idi, heç yaşayış məntəqələri də yox idi. Yaşayış məntəqələrindən bir neçə kilometr uzaqlıqda yerləşən dağlar idi. Amma indi orada yollar, elektrik xətləri, qaz xətləri, su xətləri çəkilir, birinci mehmanxana dövlət tərəfindən tikilir. Əminəm ki, bundan sonra özəl sektorda bu təşəbbüsə qoşulacaq, çünki orada çoxlu mehmanxana tikilməlidir. Xizək bazası, qaldırıcılar, tibb məntəqələri, restoranlar, əyləncə yerləri olacaq. Bir sözlə, “Şahdağ” kurort mərkəzi dünya səviyyəli mərkəzə çevriləcək. Dünyada hazırda mövcud olan ən qabaqcıl, ən populyar kurort yerlərindən geri qalmamalıdır və qalmayacaq. Beləliklə, bu, ölkəmizə həm yeni investisiyalar gətirəcək, həm də şimal zonasında yaşayan əhali üçün əlavə şərait yaradacaq, minlərlə, bəlkə də, on minlərlə yeni iş yerləri açılacaq. Azərbaycana gələn turistlərin sayı daha da çox olacaq və Azərbaycan turizm üçün çox cəlbedici ölkəyə çevriləcək. Bizim gözəl təbiətimiz var, Xəzər dənizimiz, gözəl dağlarımız, çaylarımız, meşələrimiz bizim böyük sərvətimizdir. Elə etməliyik ki, 2011-ci ildə turizmin inkişafına böyük təkan verilsin. Hesab edirəm ki, bu məqsədlə 2011-ci ilin “Turizm ili” elan olunması ədalətlidir”.

FUAD

Paritet.-2011.-18-19 yanvar.- S. 3-4.