Prezident Qaradağda yeni obyektlərlə və Bakı bulvarında yenidənqurma işləri ilə tanış olub

Dünən paytaxtın Qaradağ rayonunda olan Prezident İlham Əliyev Lökbatan qəsəbəsində ulu öndər Heydər Əliyevin adını daşıyan parkın, Heydər Əliyev Mərkəzinin, həmçinin “Cırtdan” uşaq əyləncə parkının açılışında iştirak edib. Dövlət başçısı Qaradağ rayon ictimaiyyətinin nümayəndələri ilə də görüşüb. Son illərdə bütün ölkədə olduğu kimi, paytaxtın Qaradağ rayonunun da geniş miqyaslı abadlıq və quruculuq tədbirləri həyata keçirilir. Bakı şəhərinin inkişaf planına uyğun olaraq Qaradağ rayonunda da müxtəlif istehsal sahələri, iri infrastruktur layihələri həyata keçirilir, yeni-yeni sənaye müəssisələri tikilib istifadəyə verilir. Ölkənin ən böyük sənaye mərkəzlərindən olan Qaradağ rayonunun inkişafı dövlət başçısının daim diqqət mərkəzindədir. Qaradağ rayonunun sosial inkişafı ilə bağlı böyük tədbirlər həyata keçirilir, əhalinin sosial problemlərinin həlli istiqamətində mühüm addımlar atılır.

Qaradağ rayonuna gələn dövlət başçısı əvvəlcə ulu öndər Heydər Əliyevin adını daşıyan yeni parkın açılış mərasimində iştirak edib. Dövlət başçısı parkda yaradılan şəraitlə yaxından tanış olub. Ona məlumat verilib ki, Lökbatan qəsəbəsinin mərkəzində yerləşən parkda əsaslı yenidənqurma işləri həyata keçirilib, parkın ərazisi xeyli genişləndirilib. Yenidənqurma işlərindən sonra parkda fəvvarələr quraşdırılıb, yaşıllaşdırma işləri həyata keçirilib. Prezidentin Bakıda park və xiyabanların əsaslı təmiri və yenidən qurulması ilə bağlı tapşırıqlarına uyğun olaraq salınan yeni parkda əhalinin istirahəti üçün hər cür şəraitin yaradıldığı bildirilib. Parkla tanışlıqdan sonra Prezident xalqımızın ümummilli lideri Heydər Əliyevin abidəsini ziyarət edib. Sonra dövlət başçısı Qaradağ rayon ictimaiyyətinin nümayəndələri ilə görüşüb. Qaradağ sakini Təranə İsmayılova rayonun inkişafına göstərdiyi diqqət və qayğıya görə Prezidentə minnətdarlıq edib(aztv.az).

Qaradağ rayon sakinləri ümummilli lider Heydər Əliyevin xalqımız qarşısındakı xidmətlərini heç vaxt unutmur. Ulu öndər Heydər Əliyev hakimiyyətdə olduğu illərdə Qaradağ rayonunun inkişafına xüsusi diqqət göstərib, hakimiyyətinin birinci dövründə Qaradağın ölkənin aparıcı sənaye mərkəzlərindən birinə çevrilməsinin istiqamətində böyük işlər görüb. Məhz həmin illərdə burada nəhəng sənaye zavodları fəaliyyətə başlayıb. Ulu öndərin vaxtilə açılışında iştirak etdiyi bu iri sənaye müəssisələri hazırda da müasir Azərbaycanın iqtisadi inkişafına öz töhfələrini verir. Heydər Əliyev muzeyində nümayiş etdirilən bu fotolar ümummilli liderin Qaradağ rayonuna səfərlərini, böyük sənaye obyektlərinin açılışında iştirakını əks etdirməklə yanaşı, həm də Qaradağ rayonunun inkişafının ulu öndərin hər zaman diqqət mərkəzində olduğunu bir daha sübut edir. Azərbaycan müstəqillik qazandıqdan sonra da ölkəmizin iqtisadi qüdrətinin artmasında Qaradağ rayonu mühüm yer tutur.

Dövlət başçısı həmçinin Heydər Əliyev Mərkəzinin açılışında iştirak edib.

O, mərkəzdə yaradılan şəraitlə tanış olub. Bildirilib ki, burada ulu öndərin zəngin irsinin öyrənilməsi və təbliği üçün hər cür şərait yaradılıb. Müasir avadanlıqla təchiz olunan internet zalı təşkil edilib. Prezident ulu öndər Heydər Əliyevin həyat və fəaliyyətini əks etdirən fotolara da baxıb. Lökbatanda Heydər Əliyev Mərkəzinin yaradılması müasir Azərbaycan tarixinin, Heydər Əliyev irsinin, ulu öndərin zəngin siyasi fəaliyyətinin öyrənilməsi və təbliği baxımından böyük önəm daşıyır. Gənc nəslin milli-mənəvi ruhda tərbiyə edilməsində də ulu öndərin çıxışlarının əvəzsiz rolu var. Yeni mərkəz də Azərbaycan xalqının ümummilli lideri Heydər Əliyevin dövlətçilik fəlsəfəsi və azərbaycançılıq məfkurəsinin dərindən öyrənilməsi, geniş təbliğ olunması baxımından da mühüm əhəmiyyət daşıyır.

Daha sonra dövlət başçısı 50 yerlik konfrans zalında yaradılan şəraitlə tanış olub. Məlumat verilib ki, bununla yanaşı, mərkəzdə 220 yerlik iclas zalı da yaradılıb. Prezident iclas zalında yaradılan şəraitlə də tanış olub. Dövlət başçısı ulu öndərin həyat və fəaliyyətinin əks olunduğu və 3D formatında hazırlanan filmə tamaşa edib. Qeyd edək ki, mərkəzdə bura gələnlərin istifadə etməsi üçün kiçik kafetiya və zəngin kitab ehtiyatı olan kitabxanada da yaradılıb. Burada ümummilli liderin həyat və fəaliyyətindən bəhs edən ədəbiyyat toplanıb. Mərkəzlə tanışlıqdan sonra dövlət başçısı xatirə kitabına ürək sözlərini yazıb.

Prezident Qaradağ rayonuna səfəri çərçivəsində “Cırtdan” uşaq əyləncə parkının açılışında da iştirak edib. Bildirilib ki, Lökbatan qəsəbəsində uşaqlar üçün salınan “Cırtdan” uşaq əyləncə parkı xüsusi zövqlə salınıb. Yay aylarında parkın ərazisində uşaqların istirahəti üçün hər cür şərait yaradılıb. Qeyd olunub ki, qapalı “Cırtdan” uşaq kafesi müasir mebel dəstləri və avadanlıqla təchiz olunub. 10 min kvadratmetr ərazisi olan park xüsusi dizayn əsasında qurulub, burada müxtəlif atraksionlar və əyləncəli qurğular quraşdırılıb. Parkda yaradılan şəraitlə tanış olan dövlət başçısı “Cırtdan” uşaq kafesində də olub. Burada da uşaqların mənalı istirahətinin təşkili üçün geniş imkanlar yaradılıb. Bir sözlə, Qaradağ rayonunun simasına xüsusi yaraşıq verən bu park ölkəmizin gələcəyi olan uşaqların zövqünü daim oxşayacaq.

Prezident Lökbatanda Heydər Parkının, Heydər Əliyev Mərkəzinin və “Cırtdan” uşaq əyləncə parkının açılışlarında iştirak edib.

Dünən Prezident Bakı bulvarının genişləndirilməsi proqramı çərçivəsində gəmi təmiri zavodunun ərazisində həyata keçirilən yenidənqurma işlərinin gedişi ilə tanış olub.

Prezidentin sədrliyi ilə yanvarın 14-də Nazirlər Kabinetinin 2010-cu ilin sosial-iqtisadi inkişafının yekunlarına həsr olunmuş iclasında dövlət başçısı 2011-ci ildə qarşıda duran vəzifələr sırasında Bakı bulvarının Dövlət Bayrağı Meydanı ilə birləşdirilməsi barədə tapşırıqlar vermişdi. Prezidentin tapşırıqlarının həyata keçirilməsi ilə əlaqədar Bakı buxtasında yerləşən bir sıra müəssisə və obyektlərin, o cümlədən Xəzər Dəniz Gəmiçiliyinin gəmi təmiri zavodunun və digər sənaye obyektlərinin köçürülməsi zərurəti yaranmışdı(AzərTAc).

Verilən tapşırıqların operativ həlli istiqamətində görülən işlərlə yaxından tanış olan dövlətimizin başçısı gəmi təmiri zavodunun sökülən hissəsində işlərin gedişi ilə maraqlanıb, müvafiq tapşırıq və tövsiyələrini verib.

Paritet.- 2011.- 22-24 yanvar.- S. 3.