Ukraynada “Ülviləşən Mübariz” devizi altında tədbir keçirilib

Ukrayna Azərbaycanlı Gənclər Birliyinin(UAGB), Ukrayna Parlamenti yanında Ümumukrayna tələbə gənclər assambleyasının və Azərbaycanın Ukraynadakı səfirliyinin birgə təşkilatçılığı ilə 20 yanvar şəhidlərinin xatirəsi “Ülviləşən Mübariz” devizi altında yad edilib.

UAGB-dən qəzetimizə verilən məlumata görə “Azərbaycan səfirliyinin, mili diasporumuzun, eləcə də bir sıra ukrayna gənclər təşkilatları və media nümayəndələrinin qatıldığı mərasimi Ukrayna Azərbaycanlı Gənclər Birliyinin sədri Anar Tahirov açaraq Azərbaycanın dövlət müstəqilliyi və ərazi bütövlüyü uğrunda şəhid olan qəhrəman oğul və qızlarımızın keçdiyi mübarizə tarixindən danışıb: ”Torpaqlarımızın bütövlüyü uğrunda şəhid olanların əksər çoxluğunun gənclərdən ibarət olduğunu bildirib. Tədbirin Ülviləşən Mübariz devizi altında keçirilməsində əsas məqsəd 1990-cı ilin 20 yanvar gecəsində sinəsini dövlət müstəqilliyimizə tuşlanmış gülləyə sipər edərək şəhid olmuş 20 yaşlı şair Ülvi Bünyadzadə ilə bu faciədən düz 20 il sonra vətənimizin bütövlüyü naminə düşmənə sarsıdıcı zərbə vuraraq qəhrəmanlıq zirvəsinə ucalmış Mübariz İbrahimovun indiki gənc nəslə örnək qoyub getdikləri ülviləşən mübarizə yolunu davam etdirməkdən ibarətdir”.

A.Tahirov bildirib ki, dünyanın harasında yaşamasından asılı olmayaraq hər bir azərbaycanlı, xüsusəndə gənclərimiz Azərbaycanın dövlət müstəqilliyi və ərazi bütövlüyü uğrunda Ülvü Bünyadzadə, Mübariz İbrahimov və bu kimi minlərlə vətən yolunda canlarını fəda etmiş oğul və qızlarımızın keçdiyi şərəfli yolu özlərinə örnək hesab edirlər: ”Biz necəki torpaqlarımız düşmən tapdağından azad olumayıb özümüzü dövlətimizin sıravi əsgərləri hesab etməliyik. Əminliklə deyə bilərəm ki, Ali Baş komandamızın əmrinə müntəzir olaraq hər zaman silaha sarılaraq torpaqlarımızı düşmən tapdağından azad etməyə hazırıq”.

Mərasimdə Azərbaycan səfirliyinin müşaviri Yeganə Qafqazlı, Ukrayna Azərbaycanlı Gənclər Birliyinin sədr müavini Cavid Hüseynzadə, Ukrayna Milli televiziyasının aparıcı jurnalisti Andrey Oxrimoviç, Ukrayna parlamenti yanında gənclər assambleyasının sədr müavini Olesya Xlopets, və digər qonaqlar çıxış edərək , Vətən naminə canlarını fəda edənlərin xatirəsinin heç zaman unudulmayacağını bildiriblər. Sonra tədbirə qatılanlar Azərbaycan və Ukrayna dövlət televiziyalarının birgə layihəsi əsasında çəkilmiş “qanlı 20 yanvar faciəsi” filminə baxıb. Filmə baxdıqdan sonra “böyük qəhrəmanlıq tarixinə malik olan Azərbaycan xalqı tezliklə öz ərazi bütövlüyünü bərpa etmək qüdrətindədir fikiri ilə çıxış edən Ukrayna Milli Televiziyasının aparıcı jurnalisti Georgi Spasakukotski son illər inkişaf tempinə görə bölgədə lider dövlətə çevrilən qüdrətli Azərbaycan dövlətinin işğal altında olan torpaqlarının geriyə qaytarılmasına nail olacağına əminliyini bildirib

Mərasimdə Ukrayna Azərbaycanlı Gənclər Birliyinin idarə heyətinin qərarı ilə şəhid Ü.Bünyadzadənin ölümündən bir il əvvəl yazdığı “Vətən andı” birliyə üzv olmaq istəyənlərin andı kimi qəbul olunduğu bildirilib. Milli qəhrəman M.İbrahimovun Ukraynada xatirəsinin əbədiləşdirilməsi üçün vətənimiz və dövlətimiz naminə nümunəvi tədbirlər həyata keçirməklə xalqımızın adına şərəf gətirən gənclərə “Mübariz Gənc” fəxri diplomunun veriləcəyi bildirilib.

Günay

Paritet.- 2011.- 20-21 yanvar.- S. 12.