Hyustonda Azərbaycan mədəniyyətini təbliğ edən diaspor təşkilatı

İsmayıl Əhmədov: ”Əsasən milli musiqimizi və təsviri sənətimizi amerikalılara təqdim edirik”

Azərbaycan həqiqətlərinin dünya ictimaiyyətinə çatdırılması, Ermənistanın Azərbaycana təcavüzü ilə bağlı beynəlxalq aləmin məlumatlandırılması, zəngin kökləri olan mədəni dəyərlərimizin ölkədən kənarda təbliği istiqamətində bir sıra xarici dövlətlərdə fəaliyyət göstərən diaspor təşkilatlarımız tərəfindən silsilə layihələr həyata keçirilir. Belə ki, fəaliyyətində Azərbaycan mədəniyyətinin müxtəlif sahələrinin təbliğini əsas götürən diaspor təşkilatlarından biri də hazırda Hyustonda mövcud olan Azərbaycan Amerika Mədəniyyət Mərkəzidir(AAMM). Bizdə Azərbaycanda qonaq olan AAMM-nin sədri İsmayıl Əhmədovla həmsöhbət olub, rəhbəri olduğu təşkilat və reallaşdırdıqları layihələr haqqında ətraflı məlumat əldə etdik. O, ilk olaraq AAMM-nin yaranma zərurəti haqqında danışdı:

-Biz 2009-cu il 10 mart tarixində Amerika Birləşmiş Ştatlarında yaşayan ümum azərbaycanlıların təşəbbüsü ilə Azərbaycan Amerika Mədəniyyət Mərkəzini yaratdıq. Cəmiyyətimizin əsas fəaliyyət istiqaməti Azərbaycanın qədim, zəngin, rəngarəng incəsənətinin müxtəlif növlərini, mədəniyyətimizin tarixini, amerikalılara və ümumilikdə əcnəbilərə çatdırmaqdır.

Qeyd edim ki, təşkilatımız yarandığı gündən bu günədək biz əsasən Azərbaycan mədəniyyətinin yer aldığı bir-birindən fərqli və maraqlı mədəni layihələr, bayram proqramları həyata keçirməyə nail olmuşuq. Eyni zamanda bir sıra beynəlxalq festivallarda da sənət nümunələrimizi layiqincə təbliğ etmişik. Bu cür tədbirləri keçirməkdə əsas məqsədimiz milli mədəniyyətimizin gözəlliyini, bənzərsizliyini xaricdə layiqincə təmsil edərək, geniş əcnəbi auditoriyasına çatdırmaqdır.

İ.Əhmədov bildirdi ki, Hyustonada Azərbaycan mədəniyyətinin əsas tərkib hissələrindən olan təsviri sənətimizi -əl işlərini, milli musiqimizin müxtəlif növlərini böyük festivallarda və konsert proqramlarında layiqincə təmsil etməyə çalışırlar:” Bir məlumatıda qeyd edim ki, bizim Hyustonda fəaliyyətinin genişliyi və çoxşaxəliyi ilə fərqlənən Hyuston- Bakı Qardaş Şəhərlər Assosiasiyası ilə də əlaqələrimiz vardır. Hyustonda fəaliyyət göstərən iki Azərbaycan diaspor təşkilatı olaraq iki-üç dəfə birgə layihələr həyata keçirmişik. Çox maraqlı və gözəl tədbirlərimiz reallaşıb. Gələcəkdə də bu iş birliyimizi davam etdirəcəyik. Bu cür layihələrdə artıq diaspor təşkilatlarımızın həmrəy və birgə olduğunu əyani olaraq göstərir”.

AAMM-nin fondunda Azərbaycan mədəniyyətinə aid əyani vəsaitlərin yəni, kitabların və başqa çap məhsullarının toplandığını deyən həmsöhbətim qeyd etdi ki, sözügedən kitabların əksəriyyəti ingilis dilindədir: ”Qeyd edim ki, Diasporla İş üzrə Dövlət Komitəsi tərəfindən bizə Azərbaycanla bağlı yetərincə kitablar, CD, broşürlar və s. verirlər. Hər dəfə Bakı səfərindən sonra Hyustona qayıtdıqda özümlə çoxlu kitablar və digər əyani vəsaitlər aparmağa çalışıram. Təəssüf hissi ilə qeyd edim ki, ancaq kitablarımızın sayı bir o qədər də çox deyildir. Arzu edərdik ki, Azərbaycan mədəniyyəti ilə əlaqədar mədəniyyətə aid kiçik kitabların, bukletlərin, broşürlərin sayı gələcəkdə çox olsun. Azərbaycan mədəniyyəti ilə bağlı olan materialların ingilis dilində nəşr edilməsi daha yaxşı olardı. Çünki ingilis dili artıq beynəlxalq dil olduğundan bu dildə nəşr edilən materiallar əcnəbiləri daha çox özünə cəlb edər və maraq yaradar. Məsələn, biz bu il Hyustonda festival keçirdik. Bu festival Hyustonun mərkəzində göydələnlərin arasında reallaşdı. Sözügedən festivala müxtəlif ölkələrdən 35 mindən çox insan gəlmişdi. Biz bu festivalda onlara özümüzün hazırlamış olduğumuz Azərbaycanla və milli mədəniyyətimiz ilə bağlı kitabçaları payladıq”.

“Çox təəssüflər olsun ki, təşkilatımızın müəyyən bir yerdən planlı maddi dəstəyi yoxdur. Təşkil etdiyimiz proqram və layihələrə ətrafımızda olan azərbaycanlı könüllülər tərəfindən dəstək verilir. Amma Azərbaycan diasporasının gücünə inanaraq söyləyə bilərəm ki, dövlətimiz bizə bundan sonra dəstək olacaq”- deyən İ.Əhmədov bildirdi ki, maddi bazaları güclü olarsa daha da böyük proqramlar reallaşdırmaq imkanları olar: ”Məlumat üçün bildirim ki, bizim yaşadığımız şəhərdə 300-ə yaxın azərbaycanlı var. Sevindirici haldır ki, artıq bunların bir qismi ilə əlaqəmiz artıq qurulub və inkişafdadır. Biz onların hər işində iştirak etməyə çalışırıq və keçirdiyimiz tədbirlərimizə də dəvət edirik”.

AAMM-nın www.aacalliance.com saytı fəaliyyət göstərir

“Azərbaycan mədəniyyətini təbliğ etməklə yanaşı milli bayramlarımızı, Azərbaycan tarixinə qanlı hərflərlə yazılmış faciəvi günlərinə aid tədbirlər təşkil edirik”-deyən diaspor rəhbəri bildirdi ki, tədbirə dəvət etdikləri və görüşdükləri dövlət nümayəndələrinə bu mövzular haqqında ətraflı məlumat verirlər. Onun sözlərinə görə bu cür tədbirləri gələcəkdə daha geniş şəkildə keçirəcəklər: ”Təşkilatımızın elektron saytı - www. aacalliance.com. Bu saytda da təşkilatımız, həmçinin keçirdiyimiz proqram və layihələr haqqında məlumatlar yer alıb. Sayt imkan verir ki, gerçəkləşdirdiyimiz tədbirlər haqqında məlumatları virtual olaraq geniş ictimaiyyətə çatdıraq”.

Onun sözlərinə görə, bu gün Azərbaycan diasporasının nəinki Amerika Birləşmiş Ştatlarında bütün dünyada görmüş olduğu işlər çox ürəkaçan və sevindiricidir: ”Azərbaycan diasporunun fəaliyyətinin bu gün məqsədyönlü, həmrəy olması ölkə Prezidenti cənab İlham Əliyevin diaspor işinə göstərmiş olduğu xüsusi qayğısının və diqqətinin nəticəsidir. Diasporla İş üzrə Dövlət Komitəsinin də ABŞ-da fəaliyyət göstərən diaspor təşkilatlarına dəstəyi, orda təşkilatlarımızın sürətlə inkişaf etməsinə təkan verir: ”Hyustonda bir sıra azəri təşkilatlarının nümayəndəliyi var. Hyuston və Bakı arasında qardaşlaşmanın əsası 1976-cı ildə qoyulub. Texas ştatında azərbaycanlıların və türklərin çoxlu sayda təşkilat və cəmiyyətləri var. Onlar biri-birilərinin tədbirlərində iştirak edirlər, birgə mərasimlər keçirirlər. Bizimdə nəinki Hyustonda ABŞ-da mövcud olan başqa ölkələrin diaspora təşkilatları ilə əlaqələrimiz vardır. Bunlardan Qazağıstan, Özbəkistan, Türkmənistan, Yaponiya, Türkiyə və digər ölkələrin diaspora təşkilatları ilə sıx ünsiyyətimiz var. Ümumiyyətə türkdilli ölkələrin diaspor təşkilatları ilə əlaqələrimizin olması bizə ayrı bir güc verməkdədir. Bundan sonrada daha sıx birləşsək və həmrəy olsaq bizim səsimiz daha geniş yayılacaqdır, bizi daha yaxşı eşidəcək və problemlərimizə həssaslıqla yanaşacaqlar.

Mən çox istəyirəm ki, Hyustonda dünyaya göz açmış övladlarımız milli ruhda böyüsünlər. Bu bizim üçün çox vacibdir. Bu istiqamətdə də çalışmalıyıq”.

“ABŞ-da yeni bir mədəniyyət mərkəzi yaratmaq istəyirik”

Bakıya bu dəfəki səfərinin yeni layihələrin icrası ilə bağlı olduğunu deyən İ.Əhmədov bildirdi ki, Diaspor Komitəsinə layihələri haqqında məlumat verib: ”Biz Azərbaycan Amerika Mədəniyyət Mərkəzi olaraq məqsədimiz ABŞ-da yeni bir mədəniyyət mərkəzini yaratmaqdır. Bu da Texas ştatında və yaxın 6 ştatda azərbaycanlıları ümum proqramlarda bir yerə toplamağa imkan verəcəkdir. Mən bu lahiyə haqqında DİDK məlumat verdim. Sadəcə ora qayıdan kimi bu layihəni DİDK-nin sədri hörmətli Nazim İbrahimova göndərəcəyəm. İnanıram ki, bu məsələ öz həllini müsbət istiqamətdə tapacaqdır. Diaspora İş üzrə Dövlət Komitəsi ilə əlaqələrimiz yeni qurulmaqdadır. Əminəm ki, bu əlaqələrimiz gələcəkdə daha da sıx olacaq və bir sıra uğurlu layihələr həyata keçirəcəyik. Ümid edirəm ki, dövlətimiz bu işlərdə bizə hər cür köməklik göstərəcəkdir”.

Hazırda Azərbaycanın Hyustonda neft ölkəsi kimi daha çox tanındığını deyən həmsöhbətim qeyd etdi ki, neftlə bağlı olaraq Hyustonla -Azərbaycan arasında əlaqə var: ”Ancaq küçədə kiməsə yanaşıb soruşsanız əlbəttə, Azərbaycanı tanımayacaqlar. Biz onun üzərində işləyirik ki, Azərbaycanı daha geniş ictimaiyyətə təqdim edək. Hansıkı, bizim Azərbaycandan gəlib, Hyustonda təhsil alan tələbələrimizin də üzərində böyük bir diplomatik iş var. Yəni onlar ali təhsil almaqla yanaşı, Azərbaycanın təbliği ilə də məşğul olmalıdırlar. Mən Hyustonda yaşayan azərbaycanlı kimi, çalışıram ki, imkan daxilində tez-tez orda təhsil alan azərbaycanlı tələbələrlə görüşüm. Və onları Azərbaycanın təbliği ilə bağlı bir sıra işlər görmək üçün təlimatlandırım. Tələbələr də çalışırlar ki, bu istiqamətdə bir sıra işlər görsünlər. Hyuston və Texas çox böyükdür və mümkün deyil ki, orda yaşayan əhalinin hamısı Azərbaycanı tanısın. Ancaq keçirdiyimiz tədbirlər sahəsində çalışacayıq ki, Azərbaycanı orda geniş bir əcnəbi auditoriyası tanısın”.

GÜNAY

Paritet.- 2011.- 6-7 yanvar.- S. 9.