Yerli əhali arasında qış turizminə maraq necədir?

“Qış turizminin inkişafı üçün yol infrastrukturunun da yaxşı olması vacibdir”

Xəbər verildiyi kimi, ölkə Prezidenti 2011-ci ili “Turizm ili” elan edib. Bu da ölkəmizdə artıq son illər inkişaf dövrünü yaşayan və müəyyən nailiyyətlər əldə olunan turizm infrastrukturunun daha da inkişaf etməsinə təkan verəcək, eyni zamanda ölkəmizdə ixtisaslı turizm kadrlarının yetişməsinə, yüksək xidmətin formalaşmasına təsir göstərəcək və bir sıra turizm sahələrinin inkişafına səbəb olacaq. Həmçinin Prezidentin sərəncamı ilə “Şahdağ” yay-qış turizm kompleksinin tikilməsi isə ölkəmizdə qış turizminin də inkişafına və daha kütləvi xarakter almasına təkan verəcək.

Azərbaycan Turizm Şurasının baş mütəxəssisi, “Baki-tur” şirkətinin əməkdaşı Əlixan Mürvətovun dediyinə görə, Azərbaycanda bu gün yay turizminə daha çox üstünlük verilir:” Yayda turizm sahəsi daha sürətlə inkişaf edir. Ümumiyyətlə, yerli əhaliylədə iş qurulmasında yay ayları əlverişli olur. May ayından başlayaraq sentyabr ayınadək işlər daha da artır. Ancaq ölkəmizdə qış turizminə də meyllər var. Məsələn, 2010-cu ilin və 2011-ci ilin qış mövsümündə “Baki-tur” turizm şirkətinin xətti ilə təşkil olunan Qəbələ-Şəki turları çox maraqla qarşılandı. Həmkarlar İttifaqlarının xətti ilə təşkil etdik və bu turda 500 nəfərdən artıq turist iştirak edirdi. Bu da daxili turizmdə qış turizminin inkişafının göstəricisidir. Artıq yerli əhali sərt qış aylarından qorxmur və qış turizminə maraq göstərir”.

2011-ci ildən çox şeylər gözlədiklərini deyən həmsöhbətim qeyd etdi ki, ümid edir ki, bu il ölkəmizə gələn turistlərin sayı artacaq:” Eyni zamanda digər ölkələrə səyahət üçün gedən turistlərində sayında artım olacaq. Daxili turizmdə də daha böyük uğurlar əldə olunacaq və canlanma daha da artacaq. Bütün bu işlərin icrası üçün insanlar da fəal olmalı, həmçinin turizm şirkətləri yaxşı işləməli və reklam işinə daha çox fikir verməlidirlər”.

Bu il Bakıda 5 beşulduzlu hotellərin istifadəyə verilməsinin turizm sahəsi üçün böyük uğur olduğun deyən Ə.Mürvətov bildirdi ki, bu cür tikintilər ölkəmizin turizm sahəsində müsbət imicinin formalaşmasına böyük təsir edəcək: ”Ölkəmizdə yüksək keyfiyyətli və müasir hotellərin olması imkan verir ki, biz xarici firmalarla danışarkən onlara daha çox turist xidməti təklif etmək imkanımız olur. Ancaq mənim fikrimcə beşulduzlu hotellərlə yanaşı, ölkəmizə səyahətə gəlmək istəyən orta təbəqə üçün az ulduzlu hotellərin də tikilməsi yaxşı olardı. Yəni işimizi elə qurmalıyıq ki, müxtəlif təbəqədən olan əcnəbi turistləri ölkəmizə cəlb edə bilək”.

Bölgələrimizdə qış turizmin inkişaf səviyyəsindən də danışan turizm mütəxəssisi bildirdi ki, onun çalışdığı turizm şirkəti Şəki-Qəbələ turunu hazırlayıb: ”Bundan başqa “Şahdağ” qış-yay turizm kompleksinin tikilməsi çox gözəldir. Hətta mən tədris zamanı turizm ixtisası üzrə təhsil alan tələbələrimizə deyirəm ki, sizin artıq bu kompleksdə işləriniz var. Yəni bu cür komplekslər təkcə “Şahdağ”la məhdudlaşmır. Eyni zamanda ölkə Prezidentinin Sərəncamı ilə Oğuz və Qəbələdə çox gözəl turist kompleksləri tikilib. Bundan başqa Şamaxıda və Cənub bölgələrində də özəl turist müəssisələri tikilib. Onu xüsusi olaraq vurğulayım ki, qış turizminin inkişafı təkcə hotellərin və istirahət mərkəzlərinin müasir səviyyədə tikilib istifadəyə verilməsindən ibarət deyil. Yolların da normal olması bu işdə vacibdir. Məsələn, biz istərdik ki, bir neçə il əvvəl yeni ili bir qrup turistlə birgə Lerikdə yerləşən “Relax”istirahət mərkəzində keçirək. Turistlərlə birgə bu məkana yollandıq və “Yeni ili” orda qeyd etdik. Ancaq geri dönəndə güclü qar yağdı və turistlərin qayıtması çətin oldu, bunun üçün də onlar iki gün orda əlavə qaldılar. Bu cür problemlərin olmaması üçün yaxşı infrastruktur olması vacibdir. Respublikamızda qış turizminin inkişafı üçün yollar normal olmalıdır”.

Qış turizmiylə bağlı reklam, təbliğat işlərinin az aparıldığını deyən müsahibim qeyd etdi ki, bu işə turizm şirkətləri tərəfindən xüsusi diqqət verilməlidir: ”Çünki, turizm işində reklam əsasdır. Təbliğat işi güclü olarsa, ölkə daxilində qış turizminə maraq artar. Burda bir haşiyə çıxmaq istərdim, artıq 26 ildir ki, turizm sahəsində çalışıram. Bu səbəbdən də deyə bilərəm ki, hələ sovet dönəmində də ölkəmizdə qış turizminə daha çox əcnəbilər meyilli idilər. Amma bu gün sevindirici haldır ki, artıq azərbaycanlılar qış turizmində iştirak etmək istəyirlər. Respublikada bu sahədə bir azda reklam güclü olsa, tikilməkdə olan qış turizm kompleksləri hazır olandan sonra qış turizminə əhali arasında maraq daha da artacaq”.

“Hər bir turizm şirkəti istəyir ki, qışda da, yayda olduğu kimi qazanc əldə etsin. Qışda turizm şirkətlərində bir qədər durğunluq olur. Ancaq ümid edirəm ki, bu komplekslər hazırlanandan sonra turizm şirkətləri qış turizminin təbliği ilə məşğul olacaq”-deyən Ə.Mürvətov bildirdi ki, qış turizminin kütləvilik qazanması üçün qiymətlərdə əsasdır: ”Yeni tikilib istifadəyə veriləcək qış turizm komplekslərində qiymətlər normal olmasa bu sahə yenə də o qədər inkişaf etməyəcək. Bunun üçün də qiymətlərə diqqət verilməlidir. Ümumilikdə, səmimi olaraq qeyd edim ki, ölkəmizdə qış turizminin inkişafı o qədər də qənaətbəxş deyil. Ancaq bu ilin “Turizm ili” elan edilməsi və yeni müasir qış komplekslərinin tikilib istifadəyə verilməsi qış turizmində müsbətə doğru böyük dönüş yaradacağına inanıram”.

GÜNAY

Paritet.- 2011.- 25-26 yanvar.- S.11.