200 adda kitabın sərgisi keçirilib

Dünən M.FAxundov adına Azərbaycan Milli Kitabxanasında Mədəniyyət və Turizm Nazirliyinin 5 illiyi ilə əlaqədar 2006-2010-cu illərdə işıq üzü görmüş nəşr məhsullarından ibarət kitab sərgisi və 3 dildə nəşr olunan "Mədəniyyət" kataloqunun 4-cü sayının və "Bizim nəşrlər" kataloqunun təqdimat mərasimi keçirildi. Tədbirdə mədəniyyət və turizm naziri Əbülfəs Qarayev və görkəmli mədəniyyət xadimləri, müəlliflər, nəşriyyat işçiləri iştirak edirdilər.

Nazir beş il ərzində əldə etdikləri uğurlardan danışaraq bildirdi ki, son yüz ildə mədəniyyətimizə vurulan ən böyük zərbə dilimizlə bağlı olub: "Dünyada heç bir xalq yüz il ərzində öz mədəniyyətini dörd dəfə tərcümə etməyə məruz qalmayıb. Ölkə prezidentinin apardığı siyasət ondan ibarətdir ki, Azərbaycan xalqının mədəni irsinin dəyərli nümunələrinin gənc nəsilə çatdırılması üçün həmin ədəbi materiallar yeni əlifba ilə nəşr edilsin. Beş illik fəaliyyətimiz nəticəsində Azərbaycan mədəniyyətinə böyük töhfələr verən şəxslərin əsərləri yenidən nəşr olunub". Bir çox kitabların rus, ingilis, ərəb dillərinə tərcümə olunduğunu deyən nazirin sözlərinə görə son beş ildə 32 min kitab dünyanın müxtəlif kitabxanalarına yerləşdirilib: "Hətta Türkiyədə də azərbaycanlı müəllifləri barədə məlumat az idi. Ancaq bu gün Milli Kitabxana ilə əməkdaşlıq sahəsində nəinki Türkiyədə, bir çox başqa xarici ölkələrində kitabxanalarında kitablar var. Bu da bizi sevindirdi ki, nəşr işi Azərbaycanın daxilində məhdudlaşmır, ölkəmizin hüdudlarını aşaraq dünyanın bir sıra ölkələrində keçirilən nüfuzlu sərgilərdə nümayiş olunur. 2009-cu ildən başlayaraq hər iki ildən bir Azərbaycanda beynəlxalq kitab sərgiləri keçirilir ki, bu da dünya nəşrləri ilə tanış olmaq, eyni zamanda Azərbaycanda olan ədəbi və bədii irsi dünyaya çatdırmaq üçün yaxşı bir fürsətdir". Azərbaycanın turizm potensialı ilə bağlı da kitabların və broşürlərin nəşr olunduğunu deyən nazir qeyd etdi ki, bu çap məhsulları beynəlxalq sərgilərdə ziyarətçilərə təqdim edilir: "Hər il yüz adda müxtəlif kitablar, broşürlar müxtəlif beynəlxalq sərgilərdə nümayiş etdirilir. "Yeniləşən mədəniyyət, yeniləşən məkan" adlı layihə çərçivəsində teatr binaları və mədəniyyət ocaqları təmir olunur".

Sənətşünas, əməkdar incəsənət xadimi Ziyadxan Əliyev bildirdi ki, son üç ildə MTN yaxından əməkdaşlıq edən müəlliflərdən biridir. Onun sözlərinə görə bu illərdə nazirliyin dəstəyi ilə dörd kitabı çap olunub. Sonra sənətşünas çıxışını nəşr olunan kitabları haqqında ətraflı məlumat verməklə davam etdirdi.

Tədbirdə AYB-nin katibi Rəşad Məcid, Azərbaycan Milli Kitabxanasının direktoru Kərim Tahirov və digər natiqlər çıxış edərək MTN-nin təşkil etdiyi sərginin əhəmiyyətində və orda nümayiş olunan kitabların dəyərindən danışaraq bildirdilərki, bu nəşrlər dəyərli müəlliflərimizi gənc nəsilə çatdırmaq və Azərbaycan ədəbi və mədəni aləmini dünyada təbliğ etmək üçün yaxşı bir vasitədir.

Məlumat üçün bildirək ki, sərgidə nazirliyin təşkilatçılığı ilə 200 adda təqdim olan kitabların əksəriyyəti mədəniyyət, incəsənət, ədəbiyyat, kulturologiya, mədəni irsin qorunması və turizm sahələrini əhatə edirdi.

Günay

Paritet.- 2011.- 29-31 yanvar.-S. 16.