Danimarkada Azərbaycanın lobbiçilik fəaliyyəti güclənir

Gənclər birliyinin sədri Mehriban Əliyeva: “Azərbaycan dövlətinin varlığı diasporumuzun ən güclü istinad nöqtəsidir”

Azərbaycan diasporunun fəaliyyət coğrafiyasında Avropa xüsusi yer tutur. Avropanın bütün ölkələrində fəaliyyət göstərən diaspor təşkilatlarımız “Köhnə Qitə”nin Azərbaycanı tanımasında mühüm rol oynayırlar. Azərbaycan diasporunun mütəşəkkil formada təşkilatlandığı ölkələrdən biri də Şimali Avropada yerləşən Danimarkadır. Avropanın o qədər də böyük olmayan ölkələrindən sayılan Danimarkada da diasporumuz Azərbaycan həqiqətlərinin Danimarka ictimaiyyətinə çatdırılmasında fəal işlər həyata keçirir. 6 milyona yaxın əhalisi olan bu ölkədə əhali say tərkibinə görə, 96 faiz danimarkalılardan, 2 faizi alman, farer, isveçlilərdən, qalanları isə Qrenlandiyada yaşayan eskimoslardan ibarətdir. Lakin azərbaycanlıların sayının çox az olmasına baxmayaraq, soydaşlarımızın ictimai fəallığı onların bu azlığını kölgədə qoyur. Hazırda Danimarkada 5 diaspor təşkilatımız fəaliyyət göstərir. Onlardan biri də “Vətən” Cəmiyyətidir. 2007-ci ilin fevral ayında yaradılmış Cəmiyyətin əsas məqsədi Azərbaycan mədəniyyətinin, tarixinin, ölkənin başına gələn bəlaların, torpaqlarımızın 20 faizinin ermənilər tərəfindən işğal olunmasının və BMT-nin 4 qətnaməsinin ermənilər tərəfindən yerinə yetirilməməsinin danimarkalılara və başqa millətlərə başa salmaq, onları bunlar barədə məlumatlandırmaqdır.

Cəmiyyətin sədr müavini, gənclər birliyinin sədri Mehriban Əliyeva cəmiyyətin fəaliyyəti, gördükləri işlər haqqında “Paritet”ə danışıb.

Cəmiyyətin 5 ildir fəaliyyət göstərdiyini deyən M.Əliyeva bildirib ki, ötən beş ildə həyata keçirdikləri işlər nəzərə alınsa, fəaliyyətlərini qənaətbəxş hesab etmək olar: “Bizim cəmiyyətimiz Danimarkada ən fəal təşkilatlardandır. 100-ə yaxın azərbaycanlı, 50 nəfər isə danimarkalı nümayəndəmiz var. Üzvlərimiz keçirilən bütün tədbirlərdə iştirak edirlər. Çalışırıq ki, Danimarkada Azərbaycanı layiqli təmsil edək”.

“Vətənimizin haqq işinə az da olsa töhfə vermək şərəfli işdir”

Digər diaspor təşkilatlarımızla əməkdaşlıq məsələlərindən danışan sədr müavini bəzi təşkilatların passivlik nümayiş etdirdiyini də bildirib. Onun sözlərinə görə, bəzən bu passivlik ümumi işə mənfi təsir göstərir: “Biz istər Azərbaycanın, istər Türkiyənin, istərsə digər xalqların diaspor təşkilatları ilə yaxından əməkdaşlıq edirik. Bu əməkdaşlıq müxtəlif formalarda, misal üçün, Türkiyənin tarixi hadisələrinin anım günlərinin və digər tədbirlərin keçirilməsi, o cümlədən, başqa azsaylı millətlərin keçirdikləri tədbirlərə dəstək verməklə aparılır. Buna qarşılıq olaraq da, həmin təşkilatlar Azərbaycan diasporunun fəaliyyətinə yaxından köməklik göstərirlər”.

Azərbaycanın tarixi hadisələrinin, ermənilərin xalqımıza qarşı törətdikləri faciələrin Danimarka ictimaiyyətinə çatdırılması istiqamətində gördükləri işlər barədə danışan M.Əliyeva qeyd edib ki, bu il Xocalı soyqırımının 20-ci ildönümü ilə bağlı silsilə tədbirlər, aksiyalar həyata keçiriblər.

“Bu il fevralın 25-dən başlayaraq, Danimarkanın paytaxtı Kopenhagendə anım mərasimləri təşkil etdik. Soyqırımı həqiqətləri barəsində yerli sakinləri məlumatlandırmaq məqsədi ilə bukletlər, məlumat vərəqələri payladıq. Azərbaycan himninin səsləndirilməsi ilə başlayan mərasimdə yerli diaspor nümayəndələri ilə yanaşı, yerli sakinlər də iştirak edirdilər. Həmin sakinlərə, ümumiyyətlə yerli ictimaiyyətə Xocalıda baş verənlərin dəhşətlərini, ermənilərin təcavüzünü və hələ də cinayətkarların cəzasız qalmasını anladaraq, ətraflı məlumatlar verdik. Sonradan bunun nəticəsini də gördük. Belə ki, artıq Danimarka ictimaiyyəti bu faciələr, ermənilərin əsl kimliyi haqqında məlumatsız deyillər. Onlarda bunlar haqqında soruşanda ən azı müəyyən qədər məlumatlı olduqlarını görmək olur və bu, bizi sevindirir. Hesab edirəm ki, Vətənimizin haqq işinə az da olsa töhfə vermək şərəfli işdir”. Mərasimdə kifayət qədər türk və digər millətlərin nümayəndələrinin iştirak etdiyini deyən sədr müavini bildirib ki, azərbaycanlıların hüznlü günündə onların kədərlərini bölüşməyə gələn qonaqlar arasında Türkiyə səfirliyinin nümayəndələri Oya Tunga və Ogeday Guner, Kopenhagen Tibb Universitetinin professoru Məsud Aşina, Ülki Ocaqları Türk Federasiyasının sədri Bahadur Güller, Kopenhagen Universitetinin professoru Karl Erik Fredeskov, Türkmən Cəmiyyətinin sədri Yurtan bəy, Türküstan Uyğur Cəmiyyətinin sədri Əbdülsəttar bəy, Danimarkadakı Çeçen Birliyinin sədri İlyas Musayev, “Hürriyyət” qəzetinin və “Kanal D” televiziyasının nümayəndəsi Ünsal Turan, Kopenhagendə Danimarka və türk dillərində nəşr olunan “Haber” qəzetinin nümayəndəsi Sadi Tekeloğlu, digər türk cəmiyyətlərinin və yerli ictimaiyyətin nümayəndələri iştirak edirdilər: “Danimarkalı elm adamlarının, ictimai xadimlərinin və digər xalqların nümayəndələrinin iştirakı ən vacib məsələlərdəndir. Biz də maksimum şəkildə çalışaraq tarixi həqiqətlərimizi aydın dildə çatdırırıq. Həmin tədbirdə Xocalıya dair sənədli film də nümayiş olundu. Sevindirici məqamlardan biri də, gənclərimizin bizə daha çox dəstək verməsidir. Əvvəllər gənclər arasında müəyyən qədər passivlik nümayiş olunsa da, artıq bu passivlik aradan qalxıb və demək olar ki, diasporumuzun gördüyü işlərin əsas aparıcıları gənclərdir”.

“Avroviziya-2011” qələbəsi Azərbaycanı danimarkalılar üçün maraqlı ölkəyə çevirib

M.Əliyeva qeyd edib ki, “Vətən” Cəmiyyəti Danimarkada azərbaycanlı qızlardan ibarət “Qarabağ” rəqs qrupu yaradıb. Onun sözlərinə görə, bu qrup Azərbaycan musiqisinin, rəqslərinin təbliğində böyük rol oynayır: “Həm də anım mərasimlərində şeirlər də səsləndirilir. Xocalı ilə bağlı tədbirdə həmin qrupun qızları şeirlər deyəndə danimarkalılardan tutmuş hər kəs ağlayırdı. Bu, insanı həm kədərləndirir, həm də sevindirir. Çünki, dərdinə şərik olanları görürsən. “Qarabağ” rəqs qrupu Novruz bayramları ilə bağlı keçirdiyimiz tədbirlərdə də Azərbaycan rəqslərini nümayiş etdirir, mədəniyyətimizi təbliğ edir”.

M.Əliyeva qeyd edib ki, bu il 20 Yanvar hadisələrinin 22-ci ildönümü ilə bağlı da müxtəlif tədbirlər təşkil ediblər: “Bu hadisələrlə bağlı Danimarka ictimaiyyətinə ətraflı məlumatlar verərək, Azərbaycanın müstəqilliyinin bərpa olunması, müstəqillik uğrunda canlarından keçən şəhidlərimiz haqqında məlumatlandırırıq. Bununla yanaşı, müstəqilliyinin bərpasından 20 il ötən Azərbaycanımızın iqtisadi inkişafı, dünya arenasında oynadığı rol və digər məlumatlarla da danimarkalılarda Vətənimiz haqqında təəssüratlar yaradırıq”.

Sədr müavini onu da qeyd edib ki, Danimarka ictimaiyyəti “Avroviziya-2011” mahnı müsabiqəsində qələbəmizlə Azərbaycanı daha çox tanıdı: “Bu böyük qələbəmiz münasibətilə kirayə “Turist Qatarı” götürərək, Kopenhagen şəhərində Azərbaycan sədaları altında “Avroviziya” mahnısını səsləndirdik. Bu, yerli ictimaiyyətin böyük marağına səbəb oldu. Hər kəs bizə dəstək verirdi. Danimarkanın paytaxtında, “Rodhus Plads” meydanından keçirdiyimiz bu yürüşdə qalibiyyətimizin sevincini bir daha yaşadıq. Məhz bu hadisədən sonra, danimarkalılar Azərbaycana daha çox maraq göstərməyə başladılar. Hətta, bir çoxları özləri yaxınlaşaraq Vətənimiz haqqında maraqlanır, bizi böyük qələbə münasibətilə təbrik edirlər. Bir çoxları da “Avroviziya-2012” mahnı müsabiqəsində iştirak etmək üçün Bakıya gəlməyi düşünürlər”. Onun sözlərinə görə, bu qələbə Azərbaycanı danimarkalılar üçün maraqlı ölkəyə çevirib.

“Kömək üçün müraciət edəcəyimiz qurumun olması çox yaxşıdır”

Danimarkadakı erməni diasporunun əvvəlki illərə nisbətən fəaliyyət çevrələrinin daraldığını deyən M.Əliyeva bildirib ki, hansısa tədbirimizə müdaxilə etmək istəyən ermənilərin qarşısını bizimlə birlikdə türk icmaları da alır: “Biz Türk, uyğur və digər türkdilli ölkələrin icmaları ilə daha yaxından işləyirik. Bir-birimizə bütün məsələlərdə yaxından kömək edirik. Qondarma “erməni soyqırımı”nın Fransada məlum müzakirəsi zamanı bizim cəmiyyətimiz də Fransa Senatına etiraz məktubu ünvanladı, o cümlədən Danimarkada etiraz aksiyası keçirdi. Yəni, bu yaxınlıq, müştərək işbirliyi, birgə mübarizə aparmaq son illər öz bəhrəsini verməkdədir” .

Cəmiyyətin fəaliyyətində Diasporla İş üzrə Dövlət Komitəsinin də yaxından kömək göstərdiyini deyən M.Əliyeva bildirib ki, Komitə onları dövlət bayraqları ilə, Xocalı, Qarabağ həqiqətləri barədə kitablarla təmin edir: “Hesab edirəm ki. Komitənin dəstəyi diasporumuzun fəaliyyətində öz müsbət nəticələrini göstərir. Bununla yanaşı, göstərdiyimiz fəaliyyətdə lazım olan məqamlarda kömək üçün müraciət edəcəyimiz qurumun olması çox yaxşıdır. DİDK-nin bizə Azərbaycan mədəniyyətinin, mətbəxinin təbliği üçün kitablar, broşurlarla və digər resurslarla yardım etməsi işimizi asanlaşdırır və daha yaxşı nəticələr əldə etməyimizə səbəb olur”. Onun sözlərinə görə, müstəqil Azərbaycan dövlətinin varlığı, onun gücünün artması diasporumuzun ən güclü istinad nöqtəsidir.

Lobbiçilik fəaliyyəti genişlənir

M.Əliyeva onu qeyd edib ki, son illər “Vətən” Cəmiyyəti lobbiçilik fəaliyyətinin genişləndirilməsi istiqamətində də müəyyən addımlar atır.

“Bir neçə ay öncə bizim cəmiyyətin yerləşdiyi Hillerod şəhərində Sosial Demokrat Partiyasının nümayəndələri ilə görüşlər keçirdik. Görüşdə SDP-dan parlamentə namizədliyini irəli sürmüş Kristina Antorini (Christine Antorini), Hillerod şəhərinin borgmesteri Kirsten Jensen iştirak edirdilər. Görüş iştirakçılarına Azərbaycanın bu günü, inkişafı, işğal olunmuş torpaqlarımız, ermənilərin təcavüzü və bunun fonunda Azərbaycanın sülhsevər siyasətini anlatdıq. Görüş iştirakçıları bundan məmnun qaldıqlarını bildirdilər. K.Jensen isə belə təmasların daim davam etdirilməsini, azərbaycanlıların Danimarkanın ictimai siyasi həyatında aktivliyinin vacibliyini bildirdi. Onu da qeyd edib ki, bizim cəmiyyət parlament seçkilərində SDP-nı dəstəkləyirdi. Hesab edirəm ki, Danimarka parlamentdə təmsil olunan insanlarla münasibətlər yaratmaqla Azərbaycanın lobbiçilik işinə yardım etmiş olacağıq”, - deyə sədr müavini diqqətə çatdırıb.

Parlament seçkilərində qələbə qazanan, hazırda gənclər və təhsil naziri Kristina Antorini ilə fevral ayında keçirdikləri görüşdən də danışan M.Əliyeva qeyd edib ki, nazirlə ətraflı fikir mübadiləsi aparılıb: “K.Antorini turist səfərlərinin genişləndirilməsindən, azərbaycanlı gənclərin inteqrasiya məsələləri kimi bir sıra vacib məsələləri diqqətə çatdırdı. Nazir məni və cəmiyyətimizin sədri Səfər Sadiqini üzvü olduğumuz SDP-nın konfransına dəvət etdi və biz də mart ayında keçirilmiş konfransda iştirak edərək Azərbaycanı orada təmsil etdik”.

Qeyd edək ki, “Vətən” Cəmiyyətinin daim yenilənən internet səhifəsi də fəaliyyət göstərir (www.vetencemiyyeti.com). Saytda Azərbaycanın tarixi, mədəniyyəti, işğal olunmuş torpaqlarımız haqqında geniş məlumatlar yer alıb. M.Əliyeva bildirib ki, belə bir saytın yaradılması Azərbaycanın virtual aləmdə tanıdılmasına xidmət edir: “İnternet saytımızın “Menyu” bölməsində “Tariximiz”, “Azəri qadınları”, “Azərbaycan incəsənəti”, “İdmançılarımız” və bir sıra bölmələr var ki, burada da Azərbaycan haqqında geniş məlumatlar yer alıb. İşğal olunmuş torpaqlarımız haqqında da “Unutma” bölməsində işğal altında olan rayonlarımız və onların işğal tarixləri haqqında bilgilər dərc olunub. O cümlədən, Azərbaycanın dövlət himni, atributları haqqında, Azərbaycan dövlətinin bugünkü vəziyyətini, inkişafını əks etdirən fotolar və məlumatlar var. Bununla yanaşı, Vətənimiz haqqında digər məlumatları da tapmaq mümkündür. Biz internet saytını daha da genişləndirməyi düşünürük. Yəqin yaxın zamanlarda buna da nail ola biləcəyik”. Sədr müavini qeyd edib ki, təmsil etdiyi cəmiyyət 31 Mart - Dünya Azərbaycanlılarının Soyqırımı Günü münasibətilə də tədbirlər təşkil edərək, Danimarka ictimaiyyətinə bu faciə haqqında geniş məlumat verib, o cümlədən danimarkalılara, ermənilərin təcavüzkar siyasətinin hələ ötən əsrin əvvəllərindən başladığı bildirilib. M.Əliyeva vurğulayıb ki, qarşıda bu və digər məsələlərlə bağlı geniş fəaliyyət planları var.

Asif NƏRİMANLI

Paritet.-2012.-5-6 aprel.- S.5.