“Məqsəd yeni nəsli vətəndaş cəmiyyətinin gələcək liderləri kimi yetişdirməkdir”

Məcid Musayev: “Fəaliyyətimiz çərçivəsində sıralarımızda kreativ ideyaları olan hər bir tələbə-gənci görməyə şadıq”

Vətəndaş cəmiyyətinin inkişafına töhfə verən Azərbaycan Tələbə Gənclər Təşkilatları İttifaqı bu gün növbəti “Liderlik Məktəbi”nə start verir. Cəmiyyətdə gənc liderlərin aşkar olunmasına yönəlik bu layihəyə hazırlığın gedişi və eləcə də digər məsələlərlə bağlı ATGTİ-nin mətbuat katibi Məcid Musayevlə həmsöhbət olduq.

-Bildiyiniz kimi, 2005-ci ildə ölkənin bütün ali təhsil müəssisələrində Tələbə Gənclər Təşkilatları (TGT) yaradılıb. Bütün TGT-lərin fəaliyyətini vahid bir mərkəzdə toplamaq üçün 2009-cu ilin 20 noyabr tarixində Azərbaycan Tələbə Gənclər Təşkilatları İttifaqı (ATGTİ) yaradıldı. ATGTİ-nin məqsədi ölkənin tələbə cəmiyyətinin hərtərəfli inkişafına dəstək göstərməkdir. Bu məqsədə nail olmaq üçün son 2 il ərzində ATGTİ bir çox layihə və tədbirlər həyata keçirmişdir ki, bu fəaliyyətin nəticəsi olaraq, İttifaq tələbə-gənclər üçün geniş və hərtərəfli fəaliyyət platformasına çevrilə bilib. Bu gün ATGTİ tələbə-gənclər üçün ekologiya, hüquqşünaslıq, beynəlxalq əlaqələr, idman, diplomatiya və s. sahələrdə fəaliyyət göstərən, ölkənin ən böyük tələbə təşkilatıdır.

- Vətəndaş cəmiyyətinin inkişafında tələbə gənclərin rolunun artırılması istiqamətində hansı layihələri həyata keçirmisiniz?

- Dediyim kimi, ötən 2 il ərzində ATGTİ bir çox layihələr həyata keçirib, ancaq ilk olaraq layihələrimizin əsas məqsədini (prinsipini) qeyd etmək istərdim. ATGTİ hər bir layihəsini reallaşdırmamışdan öncə onu dəfələrlə analiz edərək, tələbə-gənclərin müasir istək və tələblərinə cavab verib-vermədiyini müəyyən edir. Əgər nəzərdə tutulan layihənin yekunu gənclərin inkişafına dəstək verməyəcəksə, bu layihə ləğv olunur. Əminliklə deyə bilərəm ki, bu müddət ərzində keçirdiyimiz irimiqyaslı layihələr tələbələrin bilik və şəxsi keyfiyyətlərinin inkişafına lazımi qədər kömək olub. Reallaşdırdığımız “Yaşıl enerji” düşərgəsi, “Tələbələrarası I Hüquq Olimpiadası”, “1 tələbəyə 1000 kitab” “Tələbə baharı” layihələri və ATGTİ-nin ən böyük layihəsi olan “Liderlik Məktəbi” bu gün tələbə cəmiyyətində kifayət qədər tanınır və izlənilir. Fikrimcə, ATGTİ-nin reallaşdırdığı hər bir layihə gənclərin şəxsi inkişafına dəstək verərək, vətəndaş cəmiyyətinin inkişafına xidmət edir. Bu günün gənci gələcəkdə yeni cəmiyyət qurucusudur və sirr deyil ki, gənclər hər bir ölkənin gələcəyidir. Bizim layihələr ilk olaraq tələbə-gənclərə özlərini bu və ya digər sahələrdə sınamağa imkan yaradır, onlara öz maraqlarına uyğun fəaliyyət istiqamətini seçməyə kömək edir.

ATGTİ olaraq biz reallaşdırdığımız layihələrdə mümkün qədər müxtəlif sahələri əhatə etməyə çalışırıq. Beynəlxalq əlaqələr, iqtisadiyyat, elm və maarifləndirmə, mədəniyyət və s. Bu gün ölkəmizi Cənubi Koreyadan Meksikaya qədər müxtəlif beynəlxalq tədbirlərdə təmsil edən fəallarımız, Azərbaycanın mədəniyyət təqdimatlarını hər tədbirdə qalib edən gənclərimiz var. Bu gün ATGTİ Avropa Tələbələr Birliyinin (ATB) tamhüquqlu üzvüdür və bununla biz gəncləri avropalı həmyaşıdlarına bir addım daha yaxın etdik. Təşkilatın bu nailiyyəti nəticəsində üzvlərimizin (fəallarımızın) Avropada keçirilən bir çox beynəlxalq layihələrdə iştirakı daha asanlaşıb. Biz bu şansı bütün tələbə-gənclərə veririk.

İnformasiya texnologiyalarının inkişaf etdiyi bir dövrdə ATGTİ gəncləri bu istiqamətdə maarifləndirmə tədbirlərinə start verdi. 50-yə yaxın gəncə 2 ay müddətində tam pulsuz kompyuter kursları təşkil etdik. Bu kurslarda gənclər kursun əvvəlində öyrəndikləri bütün nəzəri bilikləri günün sonunda praktiki şəkildə kompyuterlərdə tətbiq edirdilər. Gənclərin xarici dil biliklərini inkişaf etdirmək üçün Rusiya və ABŞ səfirliklərinin dəstəyi ilə gənclər üçün pulsuz rus və ingilis dilləri danışıq klubları təşkil edilib. Beləliklə, bizim bu gün maarifləndirdiyimiz gənclər, sabah sağlam vətəndaş cəmiyyətini qura biləcəklər və əlbəttə ki, həmin cəmiyyətin baş rollarında özləri (tələbə-gənclər) duracaq.

-Təşkilatınızın ən səs-küylü layihələrindən biri “Liderlik Məktəbi”dir. Bu məktəb haqqında ətraflı məlumat verməyinizi istəyirəm. İdeya necə yarandı, məqsədi nələrdir? Fəaliyyət strukturu necə qurulub?

- Bəli, ATGTİ olaraq ən böyük layihəmiz “Liderlik Məktəbi” layihəsidir. 2010-cu ilin iyul-avqust aylarında Lənkəranda ilk dəfə “Liderlik Məktəbi” keçirildi. O zaman layihədə regional ali təhsil müəssisələrinin tələbələri daxil olmaqla 120 tələbə iştirak edirdi. Daha sonra 2011-ci ilin qışında Qubada, 2011-ci ilin yayında Qəbələdə və bu dəfə MDB ölkələrinin gənclərinin iştirakı ilə beynəlxalq, ondan sonra isə 2012-ci ilin fevral ayında Xızıda 4-cü “Liderlik Məktəbi” reallaşdırılıb. Deyə bilərəm ki, bu layihə ATGTİ tərəfindən təsis edilmiş ənənəyə çevrilib.

İndi isə sayca 5-ci “Xəmsə” “Yay Liderlik Məktəbi”nə hazırlıqlar gedir. Bu dəfə layihə 9-15 avqust tarixlərində Şəki şəhərində reallaşacaq. Layihənin əsas ideyası və məqsədi, yeni nəsli (gəncləri) vətəndaş cəmiyyətinin gələcək liderləri kimi yetişdirməkdir. Bu məqsədlə bütün ali təhsil müəssisələrindən tələbə-gənclər seçilərək “Liderlik Məktəbi” layihəsində həm öyrənirlər, həm də əylənirlər. Bu günə qədər keçirilmiş 4 “Liderlik Məktəbi”ndə 500-dən çox gənc iştirak edib və sevindirici haldır ki, bu gün həmin tələbə-gənclər ölkənin aparıcı QHT-lərində işləyir, beynəlxalq qurumların və özəl şirkətlərin işçiləridirlər. Onların bir çoxu ölkəmizi beynəlxalq müstəvidə uğurla təmsil edir.

- Dediniz, “Liderlik Məktəbi”ndə bu zamana qədər 500 gənc iştirak edib. Maraqlıdır, gəncləri məktəbə necə cəlb edirsiniz?

- Gənclərin bu layihəyə marağı olduqca yüksək səviyyədədir. “Liderlik Məktəbi” layihəsi çərçivəsində ATGTİ-yə 1000-ə yaxın elektron müraciət ərizə formasının daxil olması buna sübutdur. Həm də, artıq qeyd etdiyim kimi, ATGTİ reallaşdıracağı hər bir layihəni öncədən analiz edir və qiymətləndirir. Müxtəlif sosial şəbəkələrdə “Liderlik Məktəbi” haqda öncədən verilən elanlar onu göstərir ki, gənclərimiz bu layihəni artıq tanıyırlar və yeni bir “Liderlik Məktəbi”nin başlanmasını səbirsizliklə gözləyirlər.

Biz hər yeni “Liderlik Məktəbi”nin bütöv proqramının layihənin iştirakçısı olan gənclərin istəklərinə (marağlarına) əsaslanaraq, keçmiş layihələrin təcrübəsindən istifadə edərək tərtib edirik. Gənclərin hansı təlimlərə ehtiyacları olduğunu nəzərə alırıq, müasir musiqinin hansı cərəyanlarına üstünlük verdiklərini müəyyən edirik. Hər bir “Liderlik Məktəbi”ndə gənclər üçün maraqlı olan idman növləri müəyyənləşdirilir. Eyni zamanda “Liderlik Məktəbi” çərçivəsində gənclərin mütəxəssis qismində kimi görmək istədikləri də nəzərə alınır. Bunlar məşhur idmançılarımız, ölkəmizin tanınmış ictimai-siyasi xadimləri, xarici ölkələrin səfirləri və ya mədəniyyət attaşeləri və başqaları olurlar.

Deyə bilərəm ki, biz özümüz də (layihənin təşkilatçıları) gəncik və əksər hallarda maraq və istəklərimiz üst-üstə düşür.

-Artıq növbəti “Liderlik Məktəbi” başlamaq üzrədir. Ötən məktəblərdən fərqli cəhəti olacaqmı?

- Bəli, hal-hazırda yeni “Xəmsə” “Yay Liderlik Məktəbi”nə hazırlıq prosesi tam sürəti ilə gedir. Bu gün üçün “Liderlik Məktəbi”nin komandalarının adları müəyyən olunub, komanda üzvləri (layihənin iştirakçıları) seçilib. Qeyd etdiyim kimi, növbəti “Yay Liderlik Məktəbi” 9-15 avqust tarixlərində Şəkidə keçiriləcək. Fərqli cəhətlərdən biri odur ki, bu dəfə layihədə 4 yox, 5 komanda qalibiyyət uğrunda yarışacaq. Bu dəfə reallaşdırılacaq “Liderlik Məktəbi” sayca 5-ci olduğu üçün ona “Xəmsə” adı verilib və “Yay Liderlik Məktəbi”nin komandaları dahi Azərbaycan şairi Nizami Gəncəvinin “Xəmsə”sini təşkil edən əsərlərin adlarını (“Sirlər xəzinəsi”, “Xosrov və Şirin”, “Leyli və Məcnun”, “Yeddi gözəl”, “İsgəndərnamə”) daşıyırlar. Əminəm ki, budəfəki “Liderlik Məktəbi” öz idman oyunları, tələbə-gənclərin qonaqlarla müzakirələri və komandaların təqdimatları ilə yadda qalacaq.

-Tələbə gənclərin QHT sektorunda fəaliyyətini necə qiymətləndirirsiniz? Sizcə, bu fəaliyyət qənaətbəxşdirmi?

- Deyə bilərəm ki, hər bir nəticədən daha yaxşı (daha yüksək) nəticə əldə etmək olar. Bu gün bir çox gənclər müxtəlif QHT-lərdə fəaliyyət göstərirlər və mən bunu öz tərəfimdən yüksək qiymətləndirirəm. QHT sahəsində fəaliyyət hər bir gənc üçün geniş bir təcrübə imkanıdır. Gənclər QHT-lərdə fəaliyyət nəticəsində bir çox yeni biliklər əldə edərək, gələcək karyeralarının ilk təməlini qoyurlar. Mənim də fəaliyyətim ayrı-ayrı QHT-lərdə başlayıb.

-Sonda təşkilatınızın gələcək layihələri barədə danışaq.

- ATGTİ olaraq, gələcək fəaliyyətimizdə də gənclərin maarifləndirilməsi sahəsində bir neçə layihə reallaşdıracağıq. Cari ilin idman ili elan edilməsi ilə əlaqədar idman və gənclərə sağlam həyat tərzinin təbliği diqqət mərkəzində olacaq. Eyni zamanda İttifaq böyük bir beynəlxalq layihə üzərində işləyir. Bu layihə ölkəmizin iqtisadiyyatının əsas amillərindən birini əhatə edəcək. Fəaliyyətimiz çərçivəsində sıralarımızda kreativ ideyaları olan hər bir tələbə-gənci görməyə şadıq.

Nərmin MURADOVA

Paritet.-2012.-9-10 avqust.-S.9.