“Gənclərlə
bağlı istənilən layihəni dəstəkləyirəm”
Elxan Cəfərov:
“Özünü yaradıcılığa bağlayan insanlar mənim
aləmimdə qəhrəman insanlardır”
Gənclər
və İdman Nazirliyi, Ekologiya və Təbii Sərvətlər
Nazirliyi, Mədəniyyət və Turizm Nazirliyinin birgə
layihəsi olan Ekologiya mövzusuna həsr olunmuş “Gənclərin
II Ümumrespublika Teatr Festivalı”na ssenari qəbulu davam edir. Ssenarilər
pyes formasında və Azərbaycan dilində olmalıdır.
Janr məhdudiyyəti yoxdur. Qeyd edək ki, layihənin ideya
müəllifi, millət vəkili Jalə Əliyevadır. “Bizə ideya lazımdır” devizi
ilə keçirilən festivalın əsas məqsədi - gənclərdə
teatra olan marağı artırmaq, istedadlı gəncləri
teatra cəlb etmək və onlara ekologiya ilə bağlı
olan problemləri çatdırmaq, fikirlərini bu problemlərə
yönəltməkdir. Rejissor Elxan Cəfərov festivalla
bağlı təəssüratlarını bizimlə
paylaşdı.
- Gənclərin II Ümumrespublika
Teatr Festivalına start verilib, bilmirəm, xəbəriniz var,
ya yox?
- Xəbərim
yoxdur, çünki son vaxtlar başım film çəkilişlərinə
qarışdığından bir qədər ətraf aləmdən
xəbərsizəm. Amma xəbəri sizdən eşitdim və
çox da sevindim. Ümumiyyətlə, bəribaşdan deyim
və məlumatınız olsun ki, mən gənclərlə
bağlı istənilən layihəni dəstəkləyirəm.
Bu festivalın təşkilatçılarına minnətdarlığımı
ifadə edirəm. Gənclərin teatr festivalına münasibətim
çox yüksəkdir. Mən özüm də
yaradıcı insanam və hər
bir yaradıcılıq işinə böyük əhəmiyyət
verirəm. İnsan əgər yaradıcıdırsa və
yaradıcılıqla məşğul olursa, o artıq qəhrəmandır.
Özünü yaradıcılığa bağlayan insanlar mənim
aləmimdə qəhrəman insanlardır. Bunu tam səmimiyyətlə
deyirəm. Yaradıcı insanlar fədakar insanlardır və
hər kəs ki yaradıcılıqla məşğul olur,
demək, o müəyyən mənada özünü bu cəmiyyətə
fəda etməlidir. Festivalda hansı mövzuda tamaşalar təqdim
olunacaq? Çünki mövzu da çox önəmli məsələdir.
-
Ötən il vətənpərvərlik mövzusuna həsr
olunmuşdu, bu il isə ekologiya mövzusunda ssenarilər təqdim
olunacaq.
- Vətənpərvərlik
mövzusu bizim üçün hər zaman aktual və
vacibdir. Bu mövzuya müraciət etmək həm də vətəndaş
kimi borcumuzdur. Ekologiya mövzusu da günümüzlə səsləşən
və aktuallığı ilə seçilən mövzudur.
Bir də sizə bir söz deyim, ümumiyyətlə, istənilən
bir festival, yaxud layihə cəmiyyətin inkişafı
üçün hər hansı bir aktual mövzuya həsr
olunursa, bunu yalnız alqışlamaq lazımdır. Mən
bir rejissor olaraq inkarın tərəfdarı deyiləm, təqdirin
tərəfdarıyam. Bunu birmənalı şəkildə
deyirəm.
- Festivalda yaradıcılıq
düşərgələrinin də keçirilməsi nəzərdə
tutulub. Artıq müəyyən proseslərdən sonra
Buzovnada “Art camp”lara - komandaların ustad dərslərinə,
eləcə də digər yaradıcılıq işlərinə
start veriləcək. Gənclərə tövsiyəniz nə
olardı?
- Gənclərə
yalnız uğurlar diləmək istəyirəm. Çox
sevindirici bir işdir. Onlar bu yaradıcılıq düşərgələrində
həm də bir-birləri ilə tanış olacaqlar, fikir
mübadiləsi edəcəklər, paylaşacaqlar. Öyrənsinlər
və öyrəndiklərini teatrda tətbiq etsinlər. Onlar
üçün gözəl bir fürsət yaranıb, Gənclərin
II Ümumrespublika Teatr Festivalı keçirilir, fürsətdən
istifadə etsinlər.
N.ELDARQIZI
Paritet.-2012.-9-10 avqust.-S.16.