Diaspordan möhtəşəm aksiya

Xocalı soyqırımının tanınması üçün Niderland parlamentinə 1 milyon yerli vətəndaşın imzası təqdim edilib

Fevralın 14-də “Xocalıya ədalət” kampaniyasının Niderlandda fəaliyyət göstərən nümayəndələri, “Azərbaycanın Holland Dostları” Cəmiyyətinin təmsilçiləri Azərbaycan diasporunun digər fəalları ilə birgə Niderland parlamentinin xarici əlaqələr komissiyasının rəhbəri Nebahat Albayrak, bu komissiyanın katibi T.Van Toor, Niderland Əmək və Xristian Demokrat partiyalarından parlamentin deputatları Yeroen de Lange və Coşkun Görüzlə görüşmüşlər(AzərTAc).

“Xocalıya ədalət” kampaniyasının yerli əlaqələndirici komitəsinin sədri, Niderlandın milli qəhrəmanı, Oranje-Nassau Kral ordeni cəngavəri Gert van Dam Xocalı soyqırımı barədə ətraflı məlumat verərək, 20 il öncə ermənilər tərəfindən mülki azərbaycanlılara qarşı törədilmiş bu beynəlxalq cinayətə məsuliyyət daşıyanların cəzalandırılmasını tələb etmiş və bu faciənin Niderland parlamentində gündəmə gətiriləcəyinə ümidvar olduğunu bildirib. Çıxışının sonunda Gert van Dam parlament nümayəndələrinə “Qarabağ” adlı kitabını təqdim edərək, dünyanın ən demokratik ölkələrindən biri sayılan Niderland Krallığının parlamenti və ictimaiyyəti tərəfindən Xocalı faciəsi ilə bağlı Avropa dəyərlərinə əsaslanan ədalətin bərpa edilməsi üçün dəstək xahiş edib.

Daha sonra “Azərbaycanın Holland Dostları” Cəmiyyətinin icraçı direktoru Marion van der Vegt söz alaraq bildirib ki, 100 il öncə ermənilərlə bağlı hətta tarixçilər tərəfindən sübuta yetirilməyən naməlum hadisələrə siyasi don geydirmək əvəzinə, cəmi 20 il bundan əvvəl Xocalıda törədilmiş və artıq tam təsdiqlənmiş vəhşiliklərə Niderland və beynəlxalq birlik tərəfindən hüquqi və siyasi qiymət verilməlidir.

Gert van Dam və Marion van der Vegt Xocalı soyqırımına siyasi və hüquqi qiymət verilməsini tələb edən “Milyon imza - bir istək” toplusunu təqdim etmiş, Azərbaycanın Ermənistan tərəfindən işğal olunmuş torpaqlarının tezliklə azad ediləcəyinə, regionda sülhün və insan hüquqlarının bərqərar olunmasına Niderland parlamentinin də öz töhfəsinin verəcəyinə ümidvar olduqlarını bildirmişlər.

Eyni zamanda, ATƏT-in və Avropa Şurası Parlament Assambleyasının üzvləri olan bu deputatlar Xocalı soyqırımına dair müraciətin Niderland parlamentində baxılmasına nail olacaqlarına söz vermişlər.

Niderland parlamentinin xarici əlaqələr komissiyasının rəhbəri N. Albayrak bu yaxınlarda Vyanada ATƏT ilə Avropa Şurasının birgə təşkil edəcəyi toplantıya qatılacağını və bu məsələnin iclasın gündəliyinə salınması üçün çalışacağını qeyd edib.

Görüşdə iştirak etmiş Niderland jurnalistləri Azərbaycan nümayəndə heyətinin müraciətinin Niderland parlamentinə təqdim olunmasını yerli mətbuatda geniş işıqlandırmışlar.

Paritet.-2012.-18-20 fevral.- S.4.